ਬਰੇਸ਼ੀਆ/ਇਟਲੀ, ਸਤੰਬਰ 2019- (ਏਜੰਸੀ )-

ਇਟਲੀ ਦੇ ਪਵੀਆ ਸ਼ਹਿਰ 'ਚ ਇਕ ਫਾਰਮ ਹਾਊਸ ਦੇ ਗੋਬਰ ਟੈਂਕ 'ਚ ਡਿਗਣ ਕਾਰਨ 4 ਪੰਜਾਬੀ ਨੌਜਵਾਨਾਂ ਦੀ ਮੌਤ ਹੋ ਗਈ | ਜਾਣਕਾਰੀ ਮੁਤਾਬਿਕ ਪਵੀਆ ਦੇ ਨੇੜੇ ਅਰੇਨਾ ਪੋ, ਜਿਥੇ ਇਹ ਹਾਦਸਾ ਵਾਪਰਿਆ, ਵਿਖੇ ਸਥਿਤ ਫਾਰਮ ਹਾਊਸ ਦੇ ਮਾਲਕ ਦੋ ਪੰਜਾਬੀ ਭਰਾ ਸਨ ਤੇ ਉਨ੍ਹਾਂ ਨਾਲ ਦੋ ਹੋਰ ਪੰਜਾਬੀ ਨੌਜਵਾਨ ਕੰਮ ਕਰਦੇ ਸਨ | ਸਿਵਲ ਅਤੇ ਪੁਲਿਸ ਅਧਿਕਾਰੀਆਂ ਵਲੋਂ ਮੌਕੇ 'ਤੇ ਐਮਰਜੈਂਸੀ ਸੇਵਾਵਾਂ ਦਿੱਤੀਆਂ ਗਈਆਂ ਪਰ ਉਸ ਸਮੇਂ ਤੱਕ ਬਹੁਤ ਦੇਰ ਹੋ ਚੁੱਕੀ ਸੀ | ਖ਼ਬਰ ਲਿਖਣ ਤੱਕ ਫ਼ਾਇਰ ਬਿ੍ਗੇਡ ਵਲੋਂ ਦੋ ਲਾਸ਼ਾਂ ਨੂੰ ਬਾਹਰ ਕੱਢ ਲਿਆ ਗਿਆ ਸੀ ਤੇ ਬਾਕੀ ਦੋਵਾਂ ਦੀ ਭਾਲ ਲਈ ਪਾਣੀ ਦੇ ਟੈਂਕ ਨੂੰ ਖਾਲੀ ਕੀਤਾ ਜਾ ਰਿਹਾ ਸੀ | ਇਟਾਲੀਅਨ ਪੁਲਿਸ ਵਲੋਂ ਮਿ੍ਤਕ ਨੌਜਵਾਨਾਂ ਦੀ ਪਛਾਣ ਅਤੇ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਗਾਉਣ ਲਈ ਕੋਸ਼ਿਸ਼ਾਂ ਜਾਰੀ ਹਨ | ਇਸ ਹਾਦਸੇ ਦੀ ਖ਼ਬਰ ਮਿਲਦਿਆਂ ਹੀ ਇਟਲੀ 'ਚ ਵਸਦੇ ਪੰਜਾਬੀ ਭਾਈਚਾਰੇ 'ਚ ਸੋਗ ਦੀ ਲਹਿਰ ਫੈਲ ਗਈ |

ਮਨੀਲਾ,ਸਤੰਬਰ 2019-
ਉੱਘੇ ਭਾਰਤੀ ਪੱਤਰਕਾਰ ਰਵੀਸ਼ ਕੁਮਾਰ (44) ਨੇ ਕਿਹਾ ਹੈ ਕਿ ਭਾਰਤੀ ਮੀਡੀਆ ‘ਸੰਕਟ’ ਦੇ ਦੌਰ ’ਚੋਂ ਗੁਜ਼ਰ ਰਿਹਾ ਹੈ ਜੋ ਅਚਾਨਕ ਨਹੀਂ ਸਗੋਂ ਸੋਚ ਵਿਚਾਰ ਕੇ ਮੁਸ਼ਕਲਾਂ ਨਾਲ ਘੇਰਿਆ ਗਿਆ ਹੈ। ਐੱਨਡੀਟੀਵੀ ਦੇ ਸੀਨੀਅਰ ਐਗਜ਼ੀਕਿਊਟਿਵ ਸੰਪਾਦਕ ਰਵੀਸ਼ ਕੁਮਾਰ ਨੂੰ ਅੱਜ 2019 ਦੇ ਰੈਮਨ ਮੈਗਸੈਸੈ ਪੁਰਸਕਾਰ ਨਾਲ ਨਿਵਾਜਿਆ ਗਿਆ ਹੈ। ਪੁਰਸਕਾਰ ਦੇਣ ਵਾਲੇ ਪੱਤਰ ’ਚ ਕਿਹਾ ਗਿਆ ਹੈ ਕਿ ਭਾਰਤ ਦੇ ਪ੍ਰਭਾਵਸ਼ਾਲੀ ਟੀਵੀ ਪੱਤਰਕਾਰਾਂ ’ਚੋਂ ਇਕ ਰਵੀਸ਼ ਕੁਮਾਰ ਆਪਣੀਆਂ ਖ਼ਬਰਾਂ ’ਚ ਆਮ ਲੋਕਾਂ ਦੀਆਂ ਸਮੱਸਿਆਵਾਂ ਨੂੰ ਤਰਜੀਹ ਦਿੰਦੇ ਹਨ।
ਫਿਲਪੀਨਜ਼ ਦੀ ਰਾਜਧਾਨੀ ਮਨੀਲਾ ’ਚ ਪੁਰਸਕਾਰ ਹਾਸਲ ਕਰਨ ਮਗਰੋਂ ਆਪਣੇ ਸੰਬੋਧਨ ’ਚ ਉਨ੍ਹਾਂ ਕਿਹਾ ਕਿ ਭਾਰਤੀ ਮੀਡੀਆ ਸੰਕਟ ਦੀ ਹਾਲਤ ’ਚ ਹੈ ਅਤੇ ਇਹ ਸੰਕਟ ਅਚਾਨਕ ਨਹੀਂ ਆਇਆ ਹੈ ਸਗੋਂ ਯੋਜਨਾਬੱਧ ਹੈ। ਰਵੀਸ਼ ਕੁਮਾਰ ਨੇ ਕਿਹਾ,‘‘ਮੈਂ ਆਪਣੇ ਲਈ ਤਾਂ ਖੁਸ਼ ਹਾਂ ਪਰ ਜਿਸ ਪੇਸ਼ੇ ਦੀ ਦੁਨੀਆਂ ਤੋਂ ਆਉਂਦਾ ਹਾਂ, ਉਸ ਦੀ ਹਾਲਤ ਨਿਰਾਸ਼ਾ ਬਿਆਨ ਕਰਦੀ ਹੈ।’’ ਆਪਣੇ ਸੰਬੋਧਨ ’ਚ ਉਨ੍ਹਾਂ ਕਿਹਾ ਕਿ ਪੱਤਰਕਾਰ ਹੋਣਾ ਹੁਣ ਨਿੱਜੀ ਕੋਸ਼ਿਸ਼ ਹੋ ਗਈ ਹੈ ਕਿਉਂਕਿ ਸਮਾਚਾਰ ਅਦਾਰੇ ਅਤੇ ਉਨ੍ਹਾਂ ਦੇ ਕਾਰਪੋਰੇਟ ਐਗਜ਼ੀਕਿਊਟਿਵ ਹੁਣ ਅਜਿਹੇ ਪੱਤਰਕਾਰਾਂ ਨੂੰ ਨੌਕਰੀਆਂ ਛੱਡਣ ਲਈ ਮਜਬੂਰ ਕਰ ਰਹੇ ਹਨ ਜੋ ਸਮਝੌਤਾ ਨਹੀਂ ਕਰਦੇ ਹਨ। ‘ਫਿਰ ਵੀ ਇਹ ਦੇਖਣਾ ਹੌਸਲਾ ਦਿੰਦਾ ਹੈ ਕਿ ਅਜਿਹੇ ਹੋਰ ਵੀ ਪੱਤਰਕਾਰ ਹਨ ਜੋ ਜਾਨ ਅਤੇ ਨੌਕਰੀ ਦੀ ਪਰਵਾਹ ਕੀਤੇ ਬਿਨਾਂ ਪੱਤਰਕਾਰੀ ਕਰ ਰਹੇ ਹਨ।’ ਰਵੀਸ਼ ਕੁਮਾਰ ਨੇ 5 ਅਗਸਤ ਨੂੰ ਧਾਰਾ 370 ਹਟਾਏ ਜਾਣ ਮਗਰੋਂ ਕਸ਼ਮੀਰ ਦੇ ਹਾਲਾਤ ਅਤੇ ਵਾਦੀ ’ਚ ਸੰਚਾਰ ਸੇਵਾਵਾਂ ’ਤੇ ਪਾਬੰਦੀ ਜਿਹੇ ਵਿਸ਼ਿਆਂ ਉਪਰ ਵੀ ਆਪਣੀ ਰਾਏ ਰੱਖੀ। ਉਨ੍ਹਾਂ ਕਿਹਾ ਕਿ ਜਦੋਂ ਕਸ਼ਮੀਰ ’ਚ ਇੰਟਰਨੈੱਟ ਬੰਦ ਕੀਤਾ ਗਿਆ ਤਾਂ ਸਾਰਾ ਮੀਡੀਆ ਸਰਕਾਰ ਦੇ ਪੱਖ ’ਚ ਆ ਗਿਆ ਪਰ ਕੁਝ ਅਜਿਹੇ ਵੀ ਸਨ ਜਿਨ੍ਹਾਂ ਸੱਚ ਦਿਖਾਉਣ ਦੀ ਹਿੰਮਤ ਕੀਤੀ ਅਤੇ ਟਰੌਲਾਂ ਦੀ ਫ਼ੌਜ ਦਾ ਸਾਹਮਣਾ ਕੀਤਾ। ਉਨ੍ਹਾਂ ਕਿਹਾ ਕਿ ਹਰ ਜੰਗ ਜਿੱਤਣ ਲਈ ਨਹੀਂ ਲੜੀ ਜਾਂਦੀ ਪਰ ਕੁਝ ਜੰਗਾਂ ਸਿਰਫ਼ ਇਸ ਲਈ ਲੜੀਆਂ ਜਾਂਦੀਆਂ ਹਨ ਤਾਂ ਜੋ ਦੁਨੀਆਂ ਨੂੰ ਦੱਸਿਆ ਜਾ ਸਕੇ ਕਿ ਕੋਈ ਹੈ ਜੋ ਲੜ ਰਿਹਾ ਹੈ। ‘ਮੈਂ ਉਨ੍ਹਾਂ ਸਾਰੇ ਪੱਤਰਕਾਰਾਂ ਵੱਲੋਂ ਇਸ ਸਨਮਾਨ ਨੂੰ ਸਵੀਕਾਰ ਕਰਦਾ ਹਾਂ।’

ਦੁਨੀਆ ਦੀ ਨਾਮਵਾਰ ਏਅਰਲਾਈਨ ਬਿ੍ਟਿਸ਼ ਏਅਰਵੇਜ਼ ਦੇ ਪਾਇਲਟਾਂ ਦੀ ਦੋ ਦਿਨਾਂ ਹੜਤਾਲ 9 ਸਤੰਬਰ ਤੋਂ ਸ਼ੁਰੂ

ਹੀਥਰੋ/ਲੰਡਨ, ਸਤੰਬਰ 2019 -(ਗਿਆਨੀ ਰਵਿਦਾਰਪਾਲ ਸਿੰਘ)-

ਉਂਗਲਾ ਤੇ ਗਿਣਿਆ ਜਾਂਦੀਆਂ ਦੁਨੀਆ ਦੀਆਂ ਵੱਡੀਆਂ ਏਅਰਲਾਈਨ ਵਿੱਚ ਗਿਣੀ ਜਾਂਦੀ ਬਿ੍ਟਿਸ਼ ਏਅਰਵੇਜ਼ ਦੇ ਪਾਇਲਟਾਂ ਦੀ ਤਨਖ਼ਾਹ ਦੇ ਵਾਧੇ ਨੂੰ ਲੈ ਕੇ ਦੋ ਦਿਨਾਂ ਹੜਤਾਲ 9 ਸਤੰਬਰ ਤੋਂ ਸ਼ੁਰੂ ਹੋ ਗਈ ਹੈ । ਜਿਸ ਨਾਲ 2 ਲੱਖ 80 ਹਜ਼ਾਰ ਯਾਤਰੀ ਪ੍ਰਭਾਵਿਤ ਹੋਣਗੇ । ਮੰਗਲਵਾਰ ਤੱਕ 1700 ਦੇ ਕਰੀਬ ਉਡਾਣਾਂ ਨਹੀਂ ਉਡਣਗੀਆਂ । ਹੀਥਰੋ ਤੋਂ ਨਿਊਯਾਰਕ ਦੀਆਂ 40 ਉਡਾਣਾਂ, ਐਲ ਏ, ਦਿੱਲੀ, ਹਾਂਗਕਾਂਗ ਅਤੇ ਜੌਹਨਸਬਰਗ ਜਾਣ ਵਾਲੀਆਂ ਦਰਜਨ ਉਡਾਣਾਂ ਰੱਦ ਹੋਣਗੀਆਂ । ਜੇ ਫੈਸਲਾ ਨਾ ਹੋਵੇ ਤਾ ਇਹ ਹੜਤਾਲ ਕਿ੍ਸਮਸ ਸਮੇਤ ਜਨਵਰੀ ਤੱਕ ਚੱਲ ਸਕਦੀ ਹੈ । ਬਾਲਪਾ ਯੂਨੀਅਨ ਦੇ ਮੈਂਬਰਾਂ ਨੇ 11.5 ਫ਼ੀਸਦੀ ਤਿੰਨ ਸਾਲਾ ਤਨਖ਼ਾਹ ਵਾਧਾ ਅਤੇ ਇਕ ਫ਼ੀਸਦੀ ਬੋਨਸ ਰੱਦ ਹੋਣ ਬਾਅਦ ਗੱਲਬਾਤ ਟੁੱਟ ਗਈ ਸੀ । ਜਾਣਕਾਰੀ ਲਈ ਦੱਸ ਦੇਈਏ ਕੇ ਬੀ. ਏ. ਦੇ ਕੈਪਟਨਾਂ ਨੂੰ ਲਗਭਗ 1 ਲੱਖ 67000 ਪੌਡ ਅਤੇ 16000 ਪੌਡ ਹੋਰ ਭੱਤਾ ਦਿੱਤਾ ਜਾਂਦਾ ਹੈ । ਬੀ. ਏ. ਨੇ 4300 ਪਾਇਲਟਾਂ ਨੂੰ ਸ਼ੁੱਕਰਵਾਰ ਨੂੰ ਈਮੇਲ ਕਰਕੇ ਚਿਤਾਵਨੀ ਦੇ ਦਿੱਤੀ ਸੀ ਕਿ ਹੜਤਾਲ ਕਰਨਾ ਰੋਜ਼ਗਾਰ ਸਮਝੌਤੇ ਦੀ ਉਲੰਘਣਾ ਹੈ । ਜ਼ਿਕਰਯੋਗ ਹੈ ਕਿ ਪਾਇਲਟਾਂ ਵੱਲੋਂ 9, 10 ਅਤੇ 27 ਸਤੰਬਰ ਨੂੰ ਹੜਤਾਲ ਮਿਥੀ ਗਈ ਹੈ ।

ਵੈਨਕੂਵਰ, ਸਤੰਬਰ 2019- 

ਇਕ ਅਣਜਾਣ ਵਿਅਕਤੀ ਦੀ ਜਾਨ ਬਚਾਉਣ ਵਾਲੇ ਪੰਜਾਬੀ ਟੈਕਸੀ ਚਾਲਕ ਨੂੰ ਕੈਨੇਡਾ ਪੁਲੀਸ ਨੇ ਸਨਮਾਨਿਤ ਕੀਤਾ ਹੈ। ਵਿਸਲਰ ਸਥਿਤ ਰਾਇਲ ਕੈਨੇਡੀਅਨ ਮਾਊਂਟਿਡ ਪੁਲੀਸ ਅਫ਼ਸਰਾਂ ਨੇ ਪੰਜਾਬੀ ਨੌਜਵਾਨ ਨੂੰ ‘ਜਾਨ ਬਚਾਉਣ ਵਾਲਾ’ ਕਹਿ ਕੇ ਸਨਮਾਨ ਪੱਤਰ ਸੌਂਪਿਆ।
ਪੰਜਾਬ ਦੇ ਨਕੋਦਰ ਦੇ ਪਿਛੋਕੜ ਵਾਲਾ ਜਸ਼ਨਜੀਤ ਸਿੰਘ ਸੰਘਾ 6 ਸਾਲ ਪਹਿਲਾਂ ਉੱਚ ਸਿੱਖਿਆ ਵੀਜ਼ੇ ਤਹਿਤ ਕੈਨੇਡਾ ਆਇਆ ਸੀ ਤੇ ਉਹ ਕੁਝ ਸਾਲਾਂ ਤੋਂ ਟੈਕਸੀ ਚਲਾ ਰਿਹਾ ਹੈ। ਲੰਘੀ 11 ਫਰਵਰੀ ਨੂੰ ਪਹਾੜੀ ਤੇ ਬਰਫ਼ ਨਾਲ ਲੱਦੇ ਸੈਲਾਨੀ ਸ਼ਹਿਰ ਵਿਸਲਰ ’ਚ ਉਸ ਨੇ ਸੜਕ ਕਿਨਾਰੇ ਜ਼ਖ਼ਮੀ ਹਾਲਤ ’ਚ ਤੜਫਦਾ ਇਕ ਵਿਅਕਤੀ ਵੇਖਿਆ, ਜਿਸ ਦਾ ਖੂਨ ਰੋਕਣ ਲਈ ਉਸ ਨੇ ਆਪਣੀ ਦਸਤਾਰ ਉਸ ਦੇ ਜ਼ਖ਼ਮਾਂ ’ਤੇ ਬੰਨ੍ਹ ਦਿੱਤੀ ਸੀ। ਉਸ ਨੇ ਜ਼ਖ਼ਮੀ ਨੂੰ ਆਪਣੀ ਟੈਕਸੀ ’ਚ ਹਸਪਤਾਲ ਪਹੁੰਚਾਇਆ। ਡਾਕਟਰਾਂ ਨੇ ਕਿਹਾ ਕਿ ਜੇਕਰ ਜ਼ਖ਼ਮੀ ਦਾ ਲਹੂ ਕੁਝ ਦੇਰ ਹੋਰ ਬੰਦ ਨਾ ਹੁੰਦਾ ਤਾਂ ਉਸ ਦੀ ਜਾਨ ਜਾ ਸਕਦੀ ਸੀ। ਜਸ਼ਨਜੀਤ ਨੇ ਕਿਹਾ ਕਿ ਉਸ ਨੂੰ ਤਸੱਲੀ ਤੇ ਖੁਸ਼ੀ ਹੈ ਕਿ ਵਾਹਿਗੁਰੂ ਨੇ ਉਹ ਨੂੰ ਕਿਸੇ ਦੀ ਜਾਨ ਬਚਾਉਣ ਦਾ ਵਸੀਲਾ ਬਣਾਇਆ।

‘ਭਾਰਤ ਦਾ ਰੂਸ ਦੇ ਪੂਰਬੀ ਖੇਤਰ ਨਾਲ ਕਾਫ਼ੀ ਪੁਰਾਣਾ ਰਿਸ਼ਤਾ-ਪ੍ਰਧਾਨ ਮੰਤਰੀ

ਵਲਾਦੀਵੋਸਤੋਕ, ਸਤੰਬਰ 2019-
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਅੱਜ ਕਿਹਾ ਕਿ ਭਾਰਤ, ਰੂਸ ਦੇ ਪੂਰਬੀ ਖੇਤਰ ਦੇ ਵਿਕਾਸ ਲਈ ਉਹਦੇ ਨਾਲ ਮਿਲ ਦੇ ਕੰਮ ਕਰੇਗਾ। ਉਨ੍ਹਾਂ ਵਸੀਲਿਆਂ ਨਾਲ ਭਰਪੂਰ ਇਸ ਖੇਤਰ ਦੇ ਵਿਕਾਸ ਲਈ ਇਕ ਅਰਬ ਡਾਲਰ ਦਾ ਕਰਜ਼ਾ ਦੇਣ ਦਾ ਐਲਾਨ ਕੀਤਾ। ਸ੍ਰੀ ਮੋਦੀ ਨੇ ਪੰਜਵੇਂ ਪੂਰਬੀ ਆਰਥਿਕ ਫੋਰਮ (ਈਈਐੱਫ਼) ਦੇ ਮੁਕੰਮਲ ਸੈਸ਼ਨ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਭਾਰਤ ਤੇ ਰੂਸ ਵਿਚਾਲੇ ਦੋਸਤੀ ਰਾਜਧਾਨੀਆਂ ਤਕ ਸਰਕਾਰੀ ਪੱਧਰ ਦੇ ਸੰਵਾਦ ਤਕ ਸੀਮਤ ਨਹੀਂ ਹਨ।
ਪ੍ਰਧਾਨ ਮੰਤਰੀ ਨੇ ਫੋਰਮ ਨੂੰ ਸੰਬੋਧਨ ਕਰਦਿਆਂ ਕਿਹਾ, ‘ਭਾਰਤ ਦਾ ਰੂਸ ਦੇ ਪੂਰਬੀ ਖੇਤਰ ਨਾਲ ਕਾਫ਼ੀ ਪੁਰਾਣਾ ਰਿਸ਼ਤਾ ਹੈ। ਭਾਰਤ ਪਹਿਲਾ ਮੁਲਕ ਸੀ, ਜਿਸ ਨੇ ਵਲਾਦੀਵੋਸਤੋਕ ਵਿੱਚ ਕੌਂਸੁਲੇਟ ਖੋਲ੍ਹਿਆ ਹੈ।’ ਸ੍ਰੀ ਮੋਦੀ ਨੇ ਕਿਹਾ, ‘ਰੂਸ ਦੇ ਪੂਰਬੀ ਖੇਤਰ ਦੇ ਵਿਕਾਸ ਲਈ ਭਾਰਤ ਇਕ ਅਰਬ ਡਾਲਰ ਦੇ ਕਰਜ਼ੇ ਦੀ ਸਹੂਲਤ ਦੇਵੇਗਾ। ਮੇਰੀ ਸਰਕਾਰ ਐਕਟ ਈਸਟ ਪਾਲਿਸੀ ’ਤੇ ਸਰਗਰਮੀ ਨਾਲ ਕੰਮ ਕਰ ਰਹੀ ਹੈ। ਮੇਰਾ ਇਹ ਮੰਨਣਾ ਹੈ ਕਿ ਅੱਜ ਦੇ ਐਲਾਨ ਨਾਲ ਦੋਵਾਂ ਮੁਲਕਾਂ ਦੀ ਆਰਥਿਕ ਕੂਟਨੀਤੀ ਨੂੰ ਨਵਾਂ ਆਯਾਮ ਮਿਲੇਗਾ।’ ਰੂਸੀ ਸਦਰ ਵਲਾਦੀਮੀਰ ਪੂਤਿਨ ਦੀ ਹਾਜ਼ਰੀ ਵਿਚ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ‘ਐਕਟ ਈਸਟ ਪਾਲਿਸੀ’ ਦਾ ਮੁੱਖ ਮੰਤਵ ਰੂਸ ਦੇ ਦੂਰ-ਦੁਰਾਡੇ ਵਾਲੇ ਪੂਰਬੀ ਖੇਤਰ ਨਾਲ ਸਰਗਰਮੀਆਂ ਨੂੰ ਮਜ਼ਬੂਤ ਬਣਾਉਣਾ ਹੈ। ਉਨ੍ਹਾਂ ਕਿਹਾ, ‘ਭਾਰਤ ਪੂਰਬੀ ਆਰਥਿਕ ਫੋਰਮ ਦੀ ਵੱਖ ਵੱਖ ਸਰਗਰਮੀਆਂ ਵਿੱਚ ਭਾਈਵਾਲ ਰਿਹਾ ਹੈ। ਇਹ ਭਾਈਵਾਲੀ ਸਰਕਾਰ ਤੇ ਉਦਯੋਗ ਦੇ ਸਿਖਰਲੇ ਪੱਧਰ ਨਾਲ ਹੈ।’ ਪੂਤਿਨ ਦੀ ਤਾਰੀਫ਼ ਕਰਦਿਆਂ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਰੂਸੀ ਸਦਰ ਨੇ ਭਾਰਤ ਲਈ ਨਿਵੇਸ਼ ਦੇ ਮੌਕੇ ਖੋਲ੍ਹੇ ਹਨ। ਸ੍ਰੀ ਮੋਦੀ ਨੇ ਕਿਹਾ ਕਿ ਭਾਰਤ ਤੇ ਰੂਸ ਹਿੰਦ-ਪ੍ਰਸ਼ਾਂਤ ਖੇਤਰ ਨੂੰ ‘ਖੁੱਲ੍ਹਾ, ਆਜ਼ਾਦ ਤੇ ਸਮਾਵੇਸ਼ੀ’ ਬਣਾਉਣ ਲਈ ਇਸ ਖੇਤਰ ਵਿੱਚ ਸਹਿਯੋਗ ਦੇ ਨਵੇਂ ਯੁੱਗ ਦਾ ਆਗਾਜ਼ ਕਰ ਰਹੇ ਹਨ। ਉਨ੍ਹਾਂ ਕਿਹਾ, ‘ਜਦੋਂ ਵਲਾਦੀਵੋਸਤੋਕ ਤੇ ਚੇਨੱਈ ਦਰਮਿਆਨ ਸਮੁੰਦਰੀ ਰਾਹ ਖੁੱਲ੍ਹਣ ਨਾਲ ਜਹਾਜ਼ ਚੱਲਣੇ ਸ਼ੁਰੂ ਹੋਣਗੇ, ਤਾਂ ਰੂਸ ਦਾ ਇਹ ਬੰਦਰਗਾਹੀ ਸ਼ਹਿਰ ਭਾਰਤ ਵਿੱਚ ਉੱਤਰ ਪੂਰਬ ਏਸ਼ਿਆਈ ਬਾਜ਼ਾਰ ਨੂੰ ਹੱਲਾਸ਼ੇਰੀ ਦੇਣ ਵਾਲਾ ਕੇਂਦਰ ਬਣ ਜਾਵੇਗਾ। ਇਸ ਨਾਲ ਭਾਰਤ-ਰੂਸ ਭਾਈਵਾਲੀ ਹੋਰ ਗੂੜ੍ਹੀ ਹੋਵੇਗੀ। ਚੇਤੇ ਰਹੇ ਕਿ ਚੀਨ ਵੱਲੋਂ ਲਗਪਗ ਪੂਰੇ ਦੱਖਣੀ ਚੀਨ ਸਾਗਰ ’ਤੇ ਆਪਣਾ ਦਾਅਵਾ ਜਤਾਇਆ ਜਾਂਦਾ ਹੈ, ਜਦੋਂਕਿ ਵੀਅਤਨਾਮ, ਫ਼ਿਲਪੀਨ, ਮਲੇਸ਼ੀਆ, ਬਰੂਨੇਈ ਤੇ ਤਾਇਵਾਨ ਜਿਹੇ ਮੁਲਕਾਂ ਵੱਲੋਂ ਇਸ ਦਾਅਵੇ ਦਾ ਵਿਰੋਧ ਕੀਤਾ ਜਾਂਦਾ ਹੈ।

ਦੋਵਾਂ ਪਰਿਵਾਰਾਂ 'ਚ ਸਮਝੌਤੇ ਦਾ ਗਵਰਨਰ ਨੇ ਕੀਤਾ ਐਲਾਨ -

ਅਜੇ ਘਰ ਵਾਪਸੀ ਬਾਕੀ

ਲਾਹੌਰ , ਸਤੰਬਰ 2019 -

ਪਾਕਿਸਤਾਨ ਦੀ ਅਗਵਾ ਕੀਤੀ ਸਿੱਖ ਲੜਕੀ ਜਗਜੀਤ ਕੌਰ ਮਾਪਿਆਂ ਦੇ ਹਵਾਲੇ ਕਰ ਲਈ ਰਾਹ ਪੱਧਰਾ ਹੋ ਗਿਆ ਲਗਦਾ ਹੈ ਕਿਉਂਕਿ ਲੜਕੀ ਦੇ ਮਾਪਿਆਂ ਅਤੇ ਉਸ ਨੂੰ ਕਥਿਤ ਤੌਰ ਤੇ ਅਗਵਾ ਕਰਨ ਵਾਲੇ ਲੜਕੇ ਦੇ ਮਾਪਿਆਂ ਵਿਚ ਆਪਸੀ ਸਮਝੌਤਾ ਹੋ ਗਿਆ ਹੈ । ਇਹ ਐਲਾਨ ਖ਼ੁਦ ਪਾਕਿਸਤਾਨੀ ਪੰਜਾਬ ਦੇ ਗਵਰਨਰ ਮੁਹੰਮਦ ਸਰਵਰ ਨੇ ਕੀਤਾ ।ਇਸ ਮੌਕੇ ਤੇ ਕੁੜੀ ਦੇ ਮਾਪੇ ਅਤੇ ਮੁੰਡੇ ਦੇ ਮਾਪੇ ਵੀ ਮੌਜੂਦ ਸਨ ।ਲੜਕੀ ਦੇ ਪਿਤਾ ਨੇ ਕਿਹਾ ਕਿ ਉਨ੍ਹਾਂ ਨੂੰ ਕੋਈ ਇਤਰਾਜ਼ ਨਹੀਂ ਜੇਕਰ ਜਗਜੀਤ ਕੌਰ ਆਪਣੇ ਮਾਪਿਆਂ ਦੇ ਨਾਲ ਜਾਂਦੀ ਹੈ । ਇਸ ਵੇਲੇ ਜਗਜੀਤ ਕੌਰ ਲਾਹੌਰ ਦੇ ਵੋਮੈਨ ਸ਼ੈਲਟਰ ਹੋਮ ਵਿਚ ਹੈ । ਉਸਦੇ ਮਾਪੇ ਵੀ ਉਸਦੇ ਕੋਲ ਹਨ ਪਰ ਉਹ ਘਰ ਕਦੋਂ ਵਾਪਸ ਜਾਵੇਗੀ ਇਹ ਜਾਣਕਾਰੀ ਅਜੇ ਨਹੀਂ ਕਿਓਂਕਿ ਉਸਦਾ ਨਿਕਾਹ ਹੋਣ ਕਾਰਨ ਅਤੇ ਕੇਸ ਹਾਈ ਕੋਰਟ ਵਿਚ ਹੋਣ ਕਾਰਨ ਕਾਗ਼ਜ਼ੀ ਕਾਰਵਾਈਆਂ ਦੀ ਜ਼ਰੂਰਤ ਹੋਵੇਗੀ।

ਮਾਨਚੈਸਟਰ,ਸਤੰਬਰ 2019,-(ਅਮਨਜੀਤ ਸਿੰਘ ਖਹਿਰਾ)-

ਲਿਵਰਪੂਲ ਦੇ ਸੈਂਟਰ ਬੈਕ ਵਿਰਜਿਲ ਵਨ ਦਿਜਕ ਤੋਂ ਇਲਾਵਾ ਕ੍ਰਿਸਟਿਆਨੋ ਰੋਨਾਲਡੋ ਅਤੇ ਲਾਇਨਲ ਮੈਸੀ ਵੀ ਫੀਫਾ ਦੇ ਸਾਲ ਦੇ ਸਰਵੋਤਮ ਫੁਟਬਾਲਰ ਪੁਰਸਕਾਰ ਦੀ ਦੌੜ ਵਿੱਚ ਸ਼ਾਮਲ ਹਨ। ਸਰੋਵਤਮ ਫੀਫਾ ਫੁਟਬਾਲ ਐਵਾਰਡ 23 ਸਤੰਬਰ ਨੂੰ ਮਿਲਾਨ ਵਿੱਚ ਹੋਣ ਵਾਲੇ ਸਮਾਰੋਹ ਦੌਰਾਨ ਦਿੱਤੇ ਜਾਣਗੇ।
ਨੀਦਰਲੈਂਡ ਦੇ ਕੌਮਾਂਤਰੀ ਫੁਟਬਾਲਰ ਦਿਜਕ ਨੇ ਲੰਘੇ ਹਫ਼ਤੇ ਮੈਸੀ ਅਤੇ ਰੋਨਾਲਡੋ ਨੂੰ ਪਛਾੜ ਕੇ ਸਾਲ ਦਾ ਸਰਵੋਤਮ ਯੂਰੋਪੀ ਖਿਡਾਰੀ ਦਾ ਪੁਰਸਕਾਰ ਜਿੱਤਿਆ ਹੈ। ਚੈਂਪੀਅਨਜ਼ ਲੀਗ ਵਿੱਚ ਲਿਵਰਪੂਲ ਦੀ ਖ਼ਿਤਾਬੀ ਜਿੱਤ ਵਿੱਚ ਵਾਨ ਦਿਜਕ ਦੀ ਅਹਿਮ ਭੂਮਿਕਾ ਰਹੀ ਹੈ। ਪੁਰਸ਼ ਟੀਮ ਦੇ ਸਰਵੋਤਮ ਕੋਚ ਲਈ ਮੈਨਚੈਸਟਰ ਸਿਟੀ ਦੇ ਪੇਪ ਗਾਰਡੀਓਲਾ, ਲਿਵਰਪੂਲ ਦੇ ਜਰਗੇਨ ਕਲੋਪ ਅਤੇ ਟੋਟਨਹੇਮ ਦੇ ਮੌਰੀਸੀਓ ਪੋਸ਼ਟਿਲੋ ਦੌੜ ਵਿੱਚ ਹਨ। ਮਹਿਲਾ ਟੀਮ ਦੇ ਕੋਚ ਲਈ ਇੰਗਲੈਂਡ ਦੀ ਫਿਲ ਨੇਵਿਲੇ, ਅਮਰੀਕਾ ਦੀ ਜਿੱਲ ਇਲਿਸ ਅਤੇ ਸਰੀਨਾ ਵੀਗਮੈਨ ਵਿਚਾਲੇ ਮੁਕਾਬਲਾ ਹੋਵੇਗਾ। 

ਸਰਵੋਤਮ ਫੀਫਾ ਫੁਟਬਾਲ ਐਵਾਰਡਾਂ ਲਈ ਸੰਭਾਵੀਆਂ ਦੀ ਸੂਚੀ

ਪੁਰਸ਼ ਖਿਡਾਰੀ-

ਕ੍ਰਿਸਟਿਆਨੋ ਰੋਨਾਲਡੋ (ਯੂਵੈਂਟਸ/ਪੁਰਤਗਾਲ), ਲਾਇਨਲ ਮੈਸੀ (ਬਾਰਸੀਲੋਨਾ/ਅਰਜਨਟੀਨਾ), ਵਿਰਜਿਲ ਵਨ ਦਿਜਕ (ਲਿਵਰਪੂਲ/ਨੀਦਰਲੈਂਡ)

ਮਹਿਲਾ ਖਿਡਾਰੀ-

ਲੂਸੀ ਬਰੋਂਜ਼ੇ (ਲਿਓਨ/ਇੰਗਲੈਂਡ), ਅਲੈਕਸ ਮੌਰਗਨ (ਓਰਲੈਂਡੋ ਪਰਾਈਡ/ਅਮਰੀਕਾ), ਮੈਗਨ ਰੈਪੀਨੋਅ (ਰੇਨ ਐੱਫਸੀ/ਅਮਰੀਕਾ)

ਪੁਰਸ਼ ਕੋਚ- 

ਪੈੱਪ ਗਾਰਡੀਓਲਾ (ਮੈਨਚੈਸਟਰ ਸਿਟੀ), ਜਰਗੇਨ ਕਲੋਪ (ਲਿਵਰਪੂਲ), ਮੌਰੀਸੀਓ ਪੋਸ਼ਟਿੱਨੋ (ਟੋਟਨਹੇਮ)

ਮਹਿਲਾ ਕੋਚ-

ਜਿੱਲ ਐਲਿਸ (ਅਮਰੀਕਾ), ਫਿੱਲ ਨੇਵਿਲੇ (ਇੰਗਲੈਂਡ), ਸਰੀਨਾ ਵੀਗਮੈਨ (ਨੀਦਰਲੈਂਡ)

ਮਹਿਲਾ ਗੋਲਕੀਪਰ-

ਕ੍ਰਿਸਟਿਆਨੇ ਐਂਡਲਰ (ਪੈਰਿਸ ਸੇਂਟ ਜਰਮੇਨ/ਚਿੱਲੀ), ਹੈੱਡਵਿਗ ਲਿੰਡਹਲ (ਵੋਲਫਸਬਰਗ/ਸਵੀਡਨ), ਸਰੀ ਵਨ ਵੀਨੈਂਡਲ (ਐਟਲੈਟਿਕੋ ਮੈਡਰਿਡ/ਨੀਦਰਲੈਂਡ)

ਪੁਰਸ਼ ਗੋਲਕੀਪਰ-

ਐਲੀਸਨ (ਲਿਵਰਪੂਲ/ਬ੍ਰਾਜ਼ੀਲ), ਐਡਰਸਨ (ਮੈਨਚੈਸਟਰ ਸਿਟੀ/ਬ੍ਰਾਜ਼ੀਲ), ਮਾਰਕ ਆਂਦਰੇ ਟਰ ਸਟੇਗਨ (ਬਾਰਸੀਲੋਨਾ/ਜਰਮਨੀ)

 ਬਿਹਤਰੀਨ ਗੋਲ (ਪੁਸਕਸ ਐਵਾਰਡ)-

ਲਾਇਨਲ ਮੈਸੀ, ਜੁਆਨ ਕੁਇੰਟਰੋ , ਡੇਨੀਅਲ ਜ਼ੀਸੋਰੀ।

ਲਾਹੌਰ 'ਚ 'ਬਾਬਾ ਗੁਰੂ ਨਾਨਕ ਤੇ ਉਨ੍ਹਾਂ ਦਾ ਯੁੱਗ' ਵਿਸ਼ੇ 'ਤੇ ਕੌਮਾਂਤਰੀ ਸਿੱਖ ਕਨਵੈਨਸ਼ਨ ਸ਼ੁਰੂ

ਲਾਹੌਰ,ਸਤੰਬਰ 2019 - ਪਾਕਿਸਤਾਨ ਦੀ ਧਾਰਮਿਕ ਸੈਰ-ਸਪਾਟਾ ਅਤੇ ਵਿਰਾਸਤੀ ਕਮੇਟੀ ਵਲੋਂ ਲਾਹੌਰ 'ਚ ਗਵਰਨਰ ਹਾਊਸ ਵਿਖੇ 'ਬਾਬਾ ਗੁਰੂ ਨਾਨਕ ਅਤੇ ਉਨ੍ਹਾਂ ਦਾ ਯੁੱਗ' ਤਿੰਨ ਰੋਜ਼ਾ ਕੌਮਾਂਤਰੀ ਸਿੱਖ ਕਨਵੈਨਸ਼ਨ ਦੀ ਅੱਜ ਕੀਤੀ ਸ਼ੁਰੂਆਤ ਮੌਕੇ ਲਹਿੰਦੇ ਪੰਜਾਬ ਦੇ ਗਵਰਨਰ ਚੌਧਰੀ ਮੁਹੰਮਦ ਸਰਵਰ ਨੇ ਸੰਬੋਧਨ ਦੌਰਾਨ ਕਿਹਾ ਕਿ ਅੱਜ ਤੱਕ ਦੇ ਇਤਿਹਾਸ 'ਚ ਪਹਿਲੀ ਵਾਰ ਗਵਰਨਰ ਹਾਊਸ 'ਚ ਕੌਮਾਂਤਰੀ ਸਿੱਖ ਕਨਵੈਨਸ਼ਨ ਤੇ ਗੁਰਬਾਣੀ ਕੀਰਤਨ ਹੋਇਆ ਹੈ | ਉਨ੍ਹਾਂ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ਼ ਪੁਰਬ ਦੇ ਸਬੰਧ 'ਚ ਸ੍ਰੀ ਨਨਕਾਣਾ ਸਾਹਿਬ 'ਚ ਕੀਤੀਆਂ ਜਾ ਰਹੀਆਂ ਤਿਆਰੀਆਂ ਤੇ ਜ਼ਿਲ੍ਹਾ ਨਾਰੋਵਾਲ 'ਚ ਸ੍ਰੀ ਕਰਤਾਰਪੁਰ ਸਾਹਿਬ ਦੇ ਲਾਂਘੇ ਬਾਰੇ ਚਰਚਾ ਕਰਦਿਆਂ ਦੱਸਿਆ ਕਿ ਲਾਂਘੇ 

ਦੀ ਉਸਾਰੀ ਦਾ 85 ਫ਼ੀਸਦੀ ਕੰਮ ਮੁਕੰਮਲ ਹੋ ਚੁੱਕਿਆ ਹੈ ਅਤੇ ਬਾਕੀ ਰਹਿੰਦਾ ਕੰਮ ਨਵੰਬਰ ਦੇ ਪਹਿਲੇ ਹਫ਼ਤੇ ਤੋਂ ਪਹਿਲਾਂ ਮੁਕੰਮਲ ਕਰ ਲਿਆ ਜਾਵੇਗਾ | ਉਨ੍ਹਾਂ ਕਿਹਾ ਕਿ ਵਿਦੇਸ਼ੀ ਸਿੱਖ ਸੰਸਥਾਵਾਂ ਵਲੋਂ ਪਾਕਿ ਸਰਕਾਰ ਪਾਸ ਅਪੀਲ ਕੀਤੀ ਗਈ ਸੀ ਕਿ ਸ੍ਰੀ ਕਰਤਾਰਪੁਰ ਸਾਹਿਬ ਵਿਚਲੀ ਗੁਰੂ ਸਾਹਿਬ ਨਾਲ ਸਬੰਧਿਤ 104 ਏਕੜ ਭੂਮੀ ਨੂੰ ਕਿਸੇ ਵੀ ਵਪਾਰਕ ਕਾਰਵਾਈ ਲਈ ਨਾ ਇਸਤੇਮਾਲ ਕੀਤਾ ਜਾਵੇ | ਜਿਸ ਦੇ ਮੱਦੇਨਜ਼ਰ ਗੁਰਦੁਆਰਾ ਸਾਹਿਬ ਦਾ ਚੌਗਿਰਦਾ ਵਧਾ ਕੇ 42 ਏਕੜ ਕਰ ਦਿੱਤਾ ਗਿਆ ਹੈ ਅਤੇ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਖੇਤਾਂ ਦੀ ਭੂਮੀ ਵੀ 26 ਏਕੜ ਤੋਂ ਵਧਾ ਕੇ 62 ਏਕੜ ਕਰ ਦਿੱਤੀ ਗਈ ਹੈ | ਉਨ੍ਹਾਂ ਦੱਸਿਆ ਕਿ ਪ੍ਰਕਾਸ਼ ਪੁਰਬ ਤੋਂ ਪਹਿਲਾਂ ਸ੍ਰੀ ਨਨਕਾਣਾ ਸਾਹਿਬ ਰੇਲਵੇ ਸਟੇਸ਼ਨ ਤੋਂ ਗੁਰਦੁਆਰਾ ਜਨਮ ਅਸਥਾਨ ਸ੍ਰੀ ਨਨਕਾਣਾ ਸਾਹਿਬ ਤੱਕ 'ਬਾਬਾ ਗੁਰੂ ਨਾਨਕ ਮਾਰਗ' ਲਿੰਕ ਰੋਡ ਬਣਾਈ ਜਾ ਰਹੀ ਹੈ, ਜਿਸ ਨਾਲ ਸਿੱਖ ਸ਼ਰਧਾਲੂਆਂ ਨੂੰ ਆਵਾਜਾਈ ਦੌਰਾਨ ਭੀੜ ਜਾਂ ਟ੍ਰੈਫਿਕ ਜਾਮ ਦੀ ਸਮੱਸਿਆ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ | ਉਨ੍ਹਾਂ ਸ੍ਰੀ ਨਨਕਾਣਾ ਸਾਹਿਬ 'ਚ ਉਸਾਰੀ ਜਾਣ ਵਾਲੀ ਬਾਬਾ ਗੁਰੂ ਨਾਨਕ ਇੰਟਰਨੈਸ਼ਨਲ ਯੂਨੀਵਰਸਿਟੀ ਲਈ ਵਿਦੇਸ਼ੀ ਸਿੱਖਾਂ ਨੂੰ ਆਰਥਿਕ ਸਹਿਯੋਗ ਦੇਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਉਕਤ 60 ਏਕੜ 'ਚ ਉਸਾਰੀ ਜਾਣ ਵਾਲੀ ਯੂਨੀਵਰਸਿਟੀ ਹੁਣ 200 ਏਕੜ 'ਚ ਉਸਾਰੀ ਜਾਵੇਗੀ | ਜਿਸ 'ਚ ਦੁਨੀਆ ਭਰ ਤੋਂ ਹਰ ਮਜ਼ਹਬ ਦੇ ਵਿਦਿਆਰਥੀ ਸਿੱਖਿਆ ਪ੍ਰਾਪਤ ਕਰ ਸਕਣਗੇ | ਉਨ੍ਹਾਂ ਕਨਵੈੱਨਸ਼ਨ ਦੌਰਾਨ ਪੁੱਛੇ ਗਏ ਸਵਾਲਾਂ ਦਾ ਜਵਾਬ ਦਿੰਦਿਆਂ ਸਵੀਕਾਰ ਕੀਤਾ ਕਿ ਪਾਕਿਸਤਾਨ 'ਚ ਜ਼ਿਆਦਾਤਰ ਇਤਿਹਾਸਕ ਗੁਰਦੁਆਰਿਆਂ ਤੇ ਉਨ੍ਹਾਂ ਦੀਆਂ ਜ਼ਮੀਨਾਂ 'ਤੇ ਭੂਮੀ ਮਾਫ਼ੀਆ ਦਾ ਕਬਜ਼ਾ ਕਾਇਮ ਹੈ | ਗਵਰਨਰ ਸਰਵਰ ਨੇ ਇਹ ਵੀ ਕਿਹਾ ਕਿ ਭਾਰਤੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵਲੋਂ ਖੜ੍ਹਾ ਕੀਤਾ ਕਸ਼ਮੀਰ ਦਾ ਮਸਲਾ ਪਾਕਿ ਲਈ ਮਹੱਤਵਪੂਰਨ ਮਾਮਲਾ ਹੈ, ਇਸ ਦੇ ਬਾਵਜੂਦ ਕਰਤਾਰਪੁਰ ਲਾਂਘੇ ਦੀ ਉਸਾਰੀ ਜਾਰੀ ਰਹੇਗੀ ਤੇ ਇਮਰਾਨ ਖ਼ਾਨ ਲਾਂਘੇ ਦਾ ਉਦਘਾਟਨ ਕਰਨਗੇ |
ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਦੀ ਵਿਸ਼ੇਸ਼ ਸੂਚਨਾ ਸਹਾਇਕ ਡਾ: ਫਿਰਦੌਸ ਆਸ਼ਕ ਅਵਾਣ ਨੇ ਕਸ਼ਮੀਰ ਮਾਮਲੇ ਨੂੰ ਲੈ ਕੇ ਭਾਰਤ ਵਿਰੋਧੀ ਬਿਆਨਬਾਜ਼ੀ ਕਰਦਿਆਂ ਕਿਹਾ ਕਿ ਕਸ਼ਮੀਰ ਦੇ ਮਾਮਲੇ 'ਚ ਪਾਕਿਸਤਾਨ ਇਕ ਕਦਮ ਵੀ ਪਿੱਛੇ ਨਹੀਂ ਹਟੇਗਾ ਅਤੇ ਅਸੀਂ ਉਮੀਦ ਕਰਦੇ ਹਾਂ ਕਿ ਵਿਸ਼ਵ ਭਰ ਦਾ ਸਿੱਖ ਭਾਈਚਾਰਾ ਕਸ਼ਮੀਰ ਦੇ ਮਾਮਲੇ 'ਚ ਪਾਕਿਸਤਾਨ ਦੇ ਮੋਢੇ ਨਾਲ ਮੋਢਾ ਜੋੜ ਕੇ ਟਾਕਰਾ ਕਰੇਗਾ | ਧਾਰਮਿਕ ਤੇ ਆਪਸੀ ਸਦਭਾਵਨਾ ਮਾਮਲਿਆਂ ਦੇ ਮੰਤਰੀ ਡਾ: ਨੂਰ-ਉਲ-ਹੱਕ-ਕਾਦਰੀ ਨੇ ਕਰਤਾਰਪੁਰ ਸਾਹਿਬ ਲਾਂਘੇ ਨੂੰ ਤਾਰੀਖ਼ੀ ਦੱਸਦਿਆਂ ਕਿਹਾ ਕਿ ਲਾਂਘੇ ਦਾ ਕੰਮ ਇਮਰਾਨ ਖ਼ਾਨ ਤੇ ਨਵਜੋਤ ਸਿੰਘ ਸਿੱਧੂ ਦੇ ਉੱਦਮਾਂ ਸਦਕਾ ਸੰਭਵ ਹੋ ਸਕਿਆ ਹੈ | ਜਿਸ ਕਾਰਨ ਵਿਸ਼ਵ ਭਰ ਦੇ ਸਿੱਖ ਤੇ ਪਾਕਿਸਤਾਨੀ ਨਾਗਰਿਕ ਸ: ਸਿੱਧੂ ਦਾ ਹਮੇਸ਼ਾ ਇਕ 'ਅਮਨ ਦੇ ਸਫ਼ੀਰ' ਵਜੋਂ ਸਤਿਕਾਰ ਕਰਦੇ ਰਹਿਣਗੇ | ਇਸ ਮੌਕੇ ਘੱਟ ਗਿਣਤੀ ਮੰਤਰੀ ਇਜਾਜ਼ ਆਲਮ, ਐਮ.ਪੀ.ਏ. ਤੇ ਸੰਸਦੀ ਸਕੱਤਰ ਮਹਿੰਦਰਪਾਲ ਸਿੰਘ, ਪਾਕਿਸਤਾਨ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸਤਵੰਤ ਸਿੰਘ, ਸਾਬਕਾ ਪ੍ਰਧਾਨ ਬਿਸ਼ਨ ਸਿੰਘ, ਗੋਪਾਲ ਸਿੰਘ ਚਾਵਲਾ, ਸਰਬਤ ਸਿੰਘ, ਵਿਕਾਸ ਸਿੰਘ, ਰਾਦੇਸ਼ ਸਿੰਘ ਟੋਨੀ, ਪੀ.ਆਰ.ਓ. ਪਵਨ ਸਿੰਘ ਅਰੋੜਾ, ਈ.ਟੀ.ਪੀ.ਬੀ. ਦੇ ਡਿਪਟੀ ਸਕੱਤਰ ਇਮਰਾਨ ਗੌਾਦਲ ਸਮੇਤ ਭਾਰਤ, ਕੈਨੇਡਾ, ਅਮਰੀਕਾ, ਫਰਾਂਸ, ਬਿ੍ਟੇਨ ਸਮੇਤ ਵੱਖ-ਵੱਖ ਮੁਲਕਾਂ ਤੋਂ ਕਨਵੈੱਨਸ਼ਨ 'ਚ ਹਿੱਸਾ ਲੈਣ ਲਈ ਪਹੁੰਚੇ 30 ਦੇ ਲਗਪਗ ਸਿੱਖ ਚਿੰਤਕ, ਲੇਖਕ ਤੇ ਵਿਦਵਾਨ ਹਾਜ਼ਰ ਸਨ |
ਕਨਵੈੱਨਸ਼ਨ ਦੀ ਸ਼ੁਰੂਆਤ ਅੱਜ ਸਵੇਰੇ ਪਵਿੱਤਰ ਕੁਰਾਨ ਦੇ ਉਪਦੇਸ਼ਾਂ ਨਾਲ ਕੀਤੀ ਗਈ | ਇਸ ਦੌਰਾਨ ਸਭ ਤੋਂ ਪਹਿਲਾਂ ਸ੍ਰੀ ਨਨਕਾਣਾ ਸਾਹਿਬ ਦੇ ਭਾਈ ਸੰਤੋਖ ਸਿੰਘ, ਭਾਈ ਅਮਰੀਕ ਸਿੰਘ, ਭਾਈ ਇੰਦਰ ਸਿੰਘ ਦੇ ਕੀਰਤਨੀ ਜਥੇ ਵਲੋਂ ਗੁਰਬਾਣੀ ਦਾ ਰਸਭਿੰਨਾ ਕੀਰਤਨ ਕੀਤਾ ਗਿਆ | ਸਮਾਰੋਹ 'ਚ ਸਟੇਜ ਸਕੱਤਰ ਦੀ ਭੂਮਿਕਾ ਕਨਵੈੱਨਸ਼ਨ ਦੇ ਕੋਆਰਡੀਨੇਟਰ ਤੇ ਦਿਆਲ ਸਿੰਘ ਰਿਸਰਚ ਤੇ ਕਲਚਰਲ ਫੋਰਮ ਲਾਹੌਰ ਦੇ ਡਾਇਰੈਕਟਰ ਅਹਿਸਾਨ ਐੱਚ. ਨਦੀਮ ਵਲੋਂ ਨਿਭਾਈ ਗਈ | ਕਨਵੈੱਨਸ਼ਨ ਦੀ ਸ਼ੁਰੂਆਤ 'ਚ ਕਰਤਾਰਪੁਰ ਲਾਂਘੇ ਤੇ 550ਵੇਂ ਪ੍ਰਕਾਸ਼ ਪੁਰਬ ਦੀਆਂ ਤਿਆਰੀਆਂ ਬਾਰੇ ਇਵੈਕੂਈ ਟਰੱਸਟ ਪ੍ਰਾਪਰਟੀ ਬੋਰਡ ਵਲੋਂ ਤਿਆਰ ਕੀਤੀ ਗਈ 30 ਮਿੰਟ ਦੀ ਦਸਤਾਵੇਜ਼ੀ ਫ਼ਿਲਮ ਪੇਸ਼ ਕੀਤੀ ਗਈ | ਇਸ ਉਪਰੰਤ ਤਿੰਨ ਸੈਸ਼ਨਾਂ 'ਚ 6 ਬੁਲਾਰਿਆਂ ਵਲੋਂ ਆਪਣੇ ਪਰਚੇ ਪੜ੍ਹੇ ਗਏ ਤੇ ਕ੍ਰਮਵਾਰ ਇਨ੍ਹਾਂ ਸੈਸ਼ਨਾਂ 'ਚ ਡਾ: ਨਾਦਰਾ ਸ਼ਾਹਬਾਜ਼, ਫ਼ਕੀਰ ਸੈਫੂਦੀਨ ਤੇ ਡਾ: ਮੁਜਾਹਿਦਾ ਭੱਟ ਬਤੌਰ ਸੈਸ਼ਨ ਸਕੱਤਰ ਰਹੇ | ਕੱਲ੍ਹ ਇਕ ਸਤੰਬਰ ਨੂੰ ਮਹਿਮਾਨਾਂ ਨੂੰ ਗੁਰਦੁਆਰਾ ਸੱਚਾ ਸੌਦਾ, ਗੁਰਦੁਆਰਾ ਜਨਮ ਅਸਥਾਨ ਸ੍ਰੀ ਨਨਕਾਣਾ ਸਾਹਿਬ ਦੇ ਦਰਸ਼ਨ ਕਰਾਉਣ ਉਪਰੰਤ ਲਾਹੌਰ ਦੇ ਫ਼ਕੀਰ ਖ਼ਾਨਾ ਮਿਊਜ਼ੀਅਮ 'ਚ ਵੀ ਲਿਜਾਇਆ ਜਾਵੇਗਾ | ਇਸ ਦੇ ਬਾਅਦ 2 ਸਤੰਬਰ ਨੂੰ ਦੇਸ਼-ਵਿਦੇਸ਼ ਤੋਂ ਲਾਹੌਰ ਪਹੁੰਚੇ ਸਿੱਖ ਵਿਦਵਾਨ ਗਵਰਨਰ ਹਾਊਸ 'ਚ ਸਿੱਖ ਵਿਰਸੇ ਨਾਲ ਸਬੰਧਿਤ ਪ੍ਰਦਰਸ਼ਨੀ ਵੇਖਣਗੇ ਅਤੇ ਲਾਹੌਰ ਕਿਲ੍ਹੇ ਦੀ ਸਿੱਖ ਗੈਲਰੀ ਦਾ ਵੀ ਦੌਰਾ ਕਰਨਗੇ |

ਜਗਰਾਓਂ ਲਾਈਨਜ਼ ਕਲੱਬ ਵਲੋਂ ਖੂਨ ਦਾਨ ਕੈਂਪ...

ਖਾਲਸਾ ਪਰਿਵਾਰ ਵਲੋਂ ਪਹਿਲੇ ਪ੍ਰਕਾਸ ਪੁਰਬ ਦੀਆਂ ਵਧਾਈਆਂ....

ਮਾਸਟਰ ਟਰੇਨਰ ਬਲਰਾਮ ਸਿੰਘ ਲਈ ਦਰਦ ਭਰੇ ਹਾਲਾਤਾਂ ਵਿਚ ਅੰਤਿਮ ਅਰਦਾਸ....

ਪੰਜਾਬ ਸਰਕਾਰ ਦੇ ਸਮਾਰਟ ਸਕੂਲਾਂ ਦਾ ਉਪਰਲਾ....