ਪੰਜਾਬ

ਜਦ ਈਮਾਨ ਹੋਇਆ ਬੇਈਮਾਨ ! ✍️ ਪਰਮਿੰਦਰ ਸਿੰਘ ਬਲ “

ਨਹੀਂ ਮਿਟ ਸਕਤੀ ਸ਼ਹੀਦੋਂ ਕੀ ਹਸਤੀ , ਖੁਦ ਹੀ ਮਿਟ ਜਾਤੇ ਹੈਂ ਮਿਟਾਨੇ ਵਾਲੇ “

- ਸੰਗਰੂਰ ਪਾਰਲੀਮੈਂਟਰੀ ਚੋਣ ਵਿੱਚ ਭਾਵੇ ਸਿਮਰਨਜੀਤ ਸਿੰਘ ਮਾਨ ਦੀ ਜਿੱਤ ਹੋਈ , ਪਰ ਇਹ ਇਕ ਵਿਰੋਧਤਾ ਦਾ ਹੀ ਮੁੱਦਾ ਸੀ । ਵੋਟਰਾਂ ਦੀ ਸੋਚ ਸ਼ਾਇਦ ਆਪ ਵਿਰੋਧੀ , ਕਾਂਗਰਸ ਤੇ ਬਾਦਲ ਦਲੀਆ ਵਿਰੋਧੀ ਸੀ। ਚੋਣ ਮੁੱਦੇ , ਵਾਅਦੇ ਨਾ ਕਿਸੇ ਨੇ ਵਿਚਾਰੇ ਨਾ ਹੀ ਜੇਤੂ ਉਮੀਦਵਾਰ ਤੋਂ ਕੁਝ ਲੱਭਣ ਦੀ ਕੋਸ਼ਿਸ਼ ਕੀਤੀ ਕਿ ਕੀ ਰੰਗ ਬਦਲੇਗਾ ਜਾਂ ਦਿਖਾਏਗਾ । ਕਿਹੜੀ ਐਸੀ ਲੋੜ ਬਣ ਗਈ ਕਿ ਦੇਸ਼ ਵਿੱਚ ਪ੍ਰਸਿੱਧ ਜਾਣੇ ਜਾਂਦੇ ਸ਼ਹੀਦੇ ਆਜਮ ਸਰਦਾਰ ਭਗਤ ਸਿੰਘ ਦੇ ਨਾਮ ਨੂੰ ਸਰਦਾਰ ਮਾਨ ਨੇ ਅੱਤਵਾਦੀ ਕਿਹਾ । ਜੇ ਸਿਰਫ਼ ਸੰਗਰੂਰ ਦੀ ਹੀ ਗੱਲ ਕਰੀਏ ਤਾਂ ਲੱਖਾਂ ਵੋਟਰ ਹੋਣਗੇ ਜੋ ਭਗਤ ਸਿੰਘ ਨੂੰ ਇਕ ਪੰਜਾਬੀ ਸਿੱਖ ਵਜੋਂ ਮਹਾਨ ਸ਼ਹੀਦ ਮੰਨਦੇ ਹਨ । ਕੀ ਸਰਦਾਰ ਮਾਨ ਦਾ ਈਮਾਨ ਉਹਨਾਂ ਵੋਟਰਾਂ ਨਾਲ ਰਾਤੋ ਰਾਤ ਬੇਈਮਾਨ ਹੋ ਗਿਆ ? ਮੇਰੀ ਨਜਰੇ ਇਹ ਗਿਣੀ ਮਿਥੀ ਚਾਲ ਹੈ ਜੋ ਸਰਦਾਰ ਮਾਨ ਨੇ ਹਰ ਕੁਰਬਾਨੀ ਵਾਲੇ ਸ਼ਹੀਦ ਜਾਂ ਸਿੱਖ ਬੰਦੀ ਕੈਦੀਆਂ ਤੇ ਉਂਗਲ ਧਰੀ ਹੈ ! ਕਿਸੇ ਵੀ ਕੌਮ ਦੀਆਂ ਬੇੜਿਆਂ ਵਿੱਚ ਵੱਟੇ ਕੋਈ ਅਸਮਾਨੋ ਨਹੀਂ ਡਿਗਦੇ , ਸਿਰਫ਼ ਦਗੇਦਾਰ ਲੋਕ ਹੀ ਇਹ ਵੱਟੇ ਧਰਦੇ ਹਨ , ਤਾਂ ਕਿ ਬੇੜੀ ਡੁੱਬ ਜਾਵੇ । ਤੁਰੰਤ ਆਪਣੇ ਨਾਨੇ ਅਰੂੜ੍ਹ ਸਿੰਘ ਦੇ ਹੱਕ ਵਿੱਚ ਵੀਡੀਓ ਬਿਆਨ ਦੇ ਕੇ ਨਾਨੇ ਦੀਆਂ ਸਿੱਖਾਂ ਤੇ ਦੇਸ਼ ਨਾਲ ਕੀਤੀਆਂ ਗਦਾਰੀਆਂ ਨੂੰ ਧੋਣਾਂ ਸ਼ੁਰੂ ਕਰ ਦਿੱਤਾ । ਇਤਿਹਾਸ ਗਵਾਹ ਹੈ ਕਿ ਜਥੇਦਾਰ ਅਰੂੜ੍ਹ ਸਿੰਘ ਅੰਗਰੇਜ਼ ਸਰਕਾਰ ਦਾ ਪਿਠੂ ਸੀ । ਉਸ ਨੇ ਅੰਗਰੇਜ਼ ਦਾ ਹਮੇਸ਼ਾ ਪਾਣੀ ਭਰਿਆ । ਜਲਿਆਂ ਵਾਲੇ ਬਾਗ ਦੇ ਦੋਸ਼ੀ ਡਾਇਰ ਨੂੰ ਉਸ ਸਮੇਂ ਸਨਮਾਨਿਤ ਕੀਤਾ ਜਦ ਉਸ ਨੇ 1500 ਸਿੱਖਾਂ ਤੇ ਪੰਜਾਬੀਆਂ ਨੂੰ ਇਕ ਦਿਨ ਪਹਿਲਾਂ ਹੀ ਗੋਲੀਆਂ ਮਾਰ ਕੇ ਸ਼ਹੀਦ ਕੀਤਾ ਸੀ । ਮਾਨ ਸਾਹਿਬ ਹਮੇਸ਼ਾ ਆਪਣੇ ਈਮਾਨ ਨੂੰ ਦਾਅ ਤੇ ਲਾਅ ਕੇ ਬਾਅਦ ਵਿਚ ਈਮਾਨ ਬਦਲ ਲੈਣ ਦੀ ਰੁਚੀ ਬਣਾਉਂਦੇ ਆਏ ਹਨ । ਵਰਨਾ ਸੰਗਰੂਰ ਚੋਣਾਂ ਵਿਚ ਵੋਟਾਂ ਲੈਣ ਖਾਤਰ ਸਿੱਖ ਬੰਦੀ ਕੈਦੀ ਸਰਦਾਰ ਹਵਾਰੇ ਦੇ ਨਾਮ ਦਾ ਵੀ ਆਸਰਾ ਕਿਸ ਪੱਖੋ ਲਿਆ ਸੀ ? ਗਿਰਗਟ ਵਾਂਗੂ ਰੰਗ ਬਦਲਦੇ ਸਰਦਾਰ ਮਾਨ ,2002 ਵਿੱਚ ਇਕ ਅਖ਼ਬਾਰੀ ਬਿਆਨ ਰਾਹੀ ਆਪਣੇ ਨਾਨੇ ਦੀਆਂ ਕੌਮ ਵਿਰੋਧੀ ਕਰਤੂਤਾਂ ਨੂੰ ਨਿੰਦ ਚੁੱਕੇ ਹਨ । ਹੁਣ ਇਹਨਾਂ ਆਪਣੇ ਬੇਟੇ ਸਰਦਾਰ ਈਮਾਨ ਪਾਸੋਂ ਇਹ ਅਰਜ਼ੀ ਦੀਵਾਈ ਕਿ ਭਗਤ ਸਿੰਘ ਦੀ ਤਸਵੀਰ ਸਿੱਖ ਅਜਾਇਬ ਘਰ ਵਿੱਚੋਂ ਹਟਾਈ ਜਾਵੇ । ਪਿੳ ਪੁੱਤਰ ਸ਼ਾਇਦ ਅੱਜ ਵੀ ਨਾਨੇ , ਪੜਨਾਨੇ ਦੇ ਦੌਰ ਵਿੱਚ ਬੈਠੇ ਮਹਿਸੂਸ ਕਰ ਰਹੇ ਹਨ । ਸ਼ਰੋਮਣੀ ਕਮੇਟੀ ਇਕ ਸਿੱਖ ਸੰਸਥਾ ਹੈ , ਅਜਾਇਬ ਘਰ ਵਿੱਚ ਲੱਗੀਆਂ ਮਹਾਨ ਸਿੱਖਾਂ ਦੀਆਂ ਤਸਵੀਰਾਂ , ਉਹਨਾਂ ਦੀਆਂ ਪ੍ਰਾਪਤੀਆਂ , ਜ਼ਿੰਦਗੀ ਦੀ ਘਾਲਣਾ ਅਤੇ ਦਿੱਤੀਆਂ ਸ਼ਹਾਦਤਾਂ ਦੇ ਮਾਣ ਮਤੇ ਸਿੱਖ ਇਤਿਹਾਸ ਦੇ ਸੁਨਹਿਰੀ ਪੰਨੇ ਹਨ । ਇਸ ਸੰਸਥਾ ਦੀ ਹੋਂਦ ਅਰੂੜ੍ਹ ਸਿੰਘ ਵਰਗੇ ਦੋਖੀਆਂ ਤੋਂ ਅਕਾਲ ਤਖਤ ਆਜ਼ਾਦ ਕਰਵਾਉਣ ਸਮੇਂ ਹੋਈ ਸੀ । ਨਾਨੇ , ਪੜਨਾਨੇ ਅਤੇ ਕਾਤਲ ਜਨਰਲ ਡਾਇਰ ਦਾ ਜੋ ਸਾਂਝਾ ਰਿਸ਼ਤਾ ਸੀ ਉਹ ਇਤਿਹਾਸ ਦੇ ਕਾਲੇ ਪੰਨੇ ਹਨ । ਇਹਨਾਂ ਕਾਲੇ ਪੰਨਿਆਂ ਰਾਹੀ ਅੰਗਰੇਜ਼ ਸਾਮਰਾਜ ਨੇ ਜਲਿਆਂ ਵਾਲਾ ਬਾਗ , ਕੂਕਾ ਲਹਿਰ , ਕਲਕੱਤੇ ਬਜਬਜ ਘਾਟ ਦੀਆਂ ਸਿੱਖ ਸ਼ਹੀਦੀਆਂ ,ਸਿੱਖਾਂ ਨੂੰ ਫਾਂਸੀਆਂ ਦੇ ਰੱਸੇਆਂ ਤੇ ਟੰਗਿਆ ਹੈ । ਜ਼ੁਲਮ ਦੀ ਹਰ ਘੜੀ ਵਿੱਚ ਨਾਨੇ , ਪਰਨਾਨੇ ਅਤੇ ਡਾਇਰ ਦੀ ਕਾਤਲ ਜੁੰਡਲ਼ੀ ਅੰਗਰੇਜ਼ ਸਾਮਰਾਜ ਦੇ ਕੁਹਾੜੇ ਦਾ ਦਸਤਾ ਬਣਕੇ ਸਿੱਖਾਂ ਦਾ ਸ਼ਿਕਾਰ ਕਰਦੇ ਰਹੇ ।ਸਰਦਾਰ ਭਗਤ ਸਿੰਘ ਸ਼ਹੀਦ ਨੇ ਇਸੇ ਦਰਿੰਦਗੀ ਦੇ ਜ਼ੁਲਮ ਵਿਰੁੱਧ ਜੂਝਣਾ ,ਸ਼ਹੀਦ ਹੋਣ ਦਾ ਰਾਹ ਅਪਨਾਇਆ ਤਾਂ ਜੋ ਕੌਮ ਉਪਰੋਕਤ ਜਰਵਾਣਿਆਂ ਤੋਂ ਆਜ਼ਾਦ ਹੋਵੇ । ਇਹ ਸ਼ਹਾਦਤ ਵੀ ਉਸ ਨੂੰ ਸ਼ਹੀਦਾਂ ਦੇ ਸਿਰਤਾਜ ਪੰਜਵੇਂ ਪਾਤਸ਼ਾਹ ਗੁਰੂ ਅਰਜਨ ਦੇਵ ਜੀ ਅਤੇ ਨੌਂਵੇਂ ਪਾਤਸ਼ਾਹ ਗੁਰੂ ਤੇਗ਼ ਬਹਾਦਰ ਜੀ ਵੱਲੋਂ ਤਿਲਕ ਜੰਝੂ ਦੇ ਰਾਖੇ ਵਜੋਂ ਦਿੱਤੀ ਸ਼ਹਾਦਤ ਦੇ ਪੂਰਨਿਆਂ ਵਿੱਚੋਂ ਹੀ ਮਿਲੀ । ਗੁਰੂ ਇਤਿਹਾਸ ਅਤੇ ਅੱਜ ਤੱਕ ਦੇ ਸਿੱਖ ਇਤਿਹਾਸ ਦੇ ਸ਼ਹੀਦ ਸਿੱਖ ਕੌਮ ਦੀ ਵਿਰਾਸਤ ਅਤੇ ਗੌਰਵ ਭਰਿਆ ਇਤਿਹਾਸ ਹੈ । ਕੌਮ ਸਾਰੀਆਂ ਸ਼ਹਾਦਤਾਂ ਨੂੰ ਸਾਂਝੇ ਤੌਰ ਤੇ ਹੀ ਮਾਣ ਕਰਦੀ ਆਈ ਹੈ । ਕਦੇ ਕਿਸੇ ਸ਼ਹੀਦ ਦੀ ਕੁਰਬਾਨੀ ਤੇ ਵਖਰੇਵਾਂ ਨਹੀਂ ਦੱਸਿਆ । ਨਾ ਹੀ ਕਦੇ ਇਤਿਹਾਸ ਵਿੱਚ ਅਜਿਹਾ ਹੋਇਆ ਹੈ। ਪਰ ਮਾਨ ਸਾਹਿਬ ਨੇ ਇਕ ਫਾਂਸੀ ਤੇ ਵੜੇ ਭਗਤ ਸਿੰਘ ਨੂੰ ਚੈਲੰਜ ਹੀ ਨਹੀਂ ਕੀਤਾ ਸਗੋਂ ਅਰੂੜ੍ਹ ਸਿੰਘ ਤੇ ਡਾਇਰ ਦੀ ਅੰਗਰੇਜ਼ ਸਾਮਰਾਜ ਜੁੰਡਲ਼ੀ ਨਾਲ ਸਾਂਝ ਦਿਖਾਈ ਹੈ । ਖੁਦ ਤਾਂ ਇਹ ਜਿਹੋ ਜਿਹੇ ਸਨ ਦਿਸ ਰਹੇ ਹਨ , ਪਰ ਜੋ ਬਿਨੇ ਪੱਤਰ ਇਹਨਾਂ ਆਪਣੇ ਪੁੱਤਰ ਈਮਾਨ ਪਾਸ ਦੇ ਕੇ ਸ਼ੋਮਣੀ ਕਮੇਟੀ ਦੇ ਦਫ਼ਤਰ ਭੇਜਿਆ , ਕੀ ਨਾਨੇ , ਪਰਨਾਨੇ ਦੀ ਵਿਰਾਸਤ ਦੇ ਇਹੀ ਲੱਛਣ ਰਹਿਣਗੇ । ਅਜਿਹੀ ਵਿਰਾਸਤ ਵਿੱਚ ਵਧਦਾ ਕਾਲਾ ਪੰਨਾ ਦੇਖ ਕੇ ਇਹਨਾਂ ਦੀ ਕਰਨੀ ਤੇ ਅਫ਼ਸੋਸ ਹੁੰਦਾ ਹੈ , ਕਿ ਕਈ ਬਜੁਰਗ ਵੀ ਆਪਣੀ ਔਲਾਦ ਨੂੰ ਸਹੀ ਰਸਤਾ ਨਹੀਂ ਦਿਖਾ ਸਕਦੇ । ਕਿਉਂਕਿ ਉਨ੍ਹਾਂ ਦਾ ਆਪਣਾ ਖੁਦ ਦਾ ਈਮਾਨ ਹੀ ਬੇਈਮਾਨ ਹੋ ਚੁੱਕਾ ਹੁੰਦਾ ਹੈ । ਉਹ ਕੀ ਮਤ ਦੇਣ ਦੇ ਯੋਗ ਰਹਿ ਜਾਂਦੇ ਹਨ ?
ਸ਼ਹੀਦ ਭਗਤ ਸਿੰਘ ਨੇ ਸਿੱਖ ਕੌਮ ਦੇ ਕੇਸਰੀ ਨਿਸ਼ਾਨ ਵਿੱਚੋਂ ਹੀ ਆਧਾਰ ਮੰਨ ਕੇ ਫਾਂਸੀ ਦੇ ਰਸਤੇ ਤੇ ਚਲਦਿਆਂ ਇਹ ਸ਼ਬਦਾਂ ਦਾ ਆਧਾਰ ਪੈਦਾ ਕੀਤਾ । ਜੋ ਅਟੱਲ ਬੋਲ ਅੱਜ ਵੀ ਪੰਜਾਬ ਦੇ ਬੱਚੇ ਬੱਚੇ ਦੀ ਜ਼ਬਾਨ ਤੇ ਗਾਏ ਜਾ ਰਹੇ ਹਨ , “ਮੇਰਾ ਰੰਗ ਦੇ ਬਸੰਤੀ ਚੋਲਾ”।ਮਾਨ ਸਾਹਿਬ ਤੁਸੀਂ ਕੁਝ ਰਜਵਾੜੇ ਪਿਠੂਆਂ ਨੂੰ ਗੁਮਰਾਹ ਕਰ ਸਕਦੇ ਹੋ । ਸਿੱਖਾਂ ਪੰਜਾਬੀਆਂ ਦੇ ਦਿਲਾਂ ਵਿੱਚੋਂ ਭਗਤ ਸਿੰਘ ਦਾ ਮਾਣ ਤੁਸੀਂ ਘੱਟ ਨਹੀਂ ਕਰ ਸਕਦੇ ।ਅਜਿਹੀ ਸੋਚ ਦਾ ਤਿਆਗ ਕਰੋ , ਵਰਨਾ ਅਜਿਹੀ ਦਗੇਦਾਰ ਸੋਚ ਪਲੇ ਬੰਨ ਕੇ ਖੁਦ ਹੀ ਤਬਾਹ ਹੋ ਜਾਓਗੇ । “ਨਹੀਂ ਮਿਟ ਸਕਤੀ ਸ਼ਹੀਦੋਂ ਕੀ ਹਸਤੀ , ਮਿਟਾਨੇ ਵਾਲੇ ਖੁਦ ਹੀ ਮਿਟ ਜਾਤੇ ਹੈਂ “ ——ਪਰਮਿੰਦਰ ਸਿੰਘ ਬਲ

ਸਰਾਭਾ ਵਿਖੇ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਭੁੱਖ ਹੜਤਾਲ ਦਾ 166ਵਾਂ ਦਿਨ

ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਮੁੱਲਾਂਪੁਰ ਤੋਂ ਸਰਾਭੇ ਤਕ ਰੋਸ ਮਾਰਚ 9 ਅਗਸਤ ਨੂੰ ਹੋਵੇਗਾ : ਦੇਵ ਸਰਾਭਾ

ਮੋਦੀ ਸਰਕਾਰ ਸਿੱਖਾਂ ਨੂੰ ਬਣਦਾ ਸਤਿਕਾਰ ਦੇਣ ਤੋਂ ਭੱਜ ਰਹੀ ਹੈ : ਜਗਦੀਸ਼ ਸਿੰਘ ਗਰਚਾ

ਮੁੱਲਾਂਪੁਰ ਦਾਖਾ, 5 ਅਗਸਤ (ਸਤਵਿੰਦਰ ਸਿੰਘ ਗਿੱਲ) ਗ਼ਦਰ ਪਾਰਟੀ ਦੇ ਨਾਇਕ ਬਾਲਾ ਜਰਨੈਲ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਦੇ ਜੱਦੀ ਪਿੰਡ ਸਰਾਭਾ ਵਿਖੇ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਪੰਥਕ ਮੋਰਚਾ ਭੁੱਖ ਹਡ਼ਤਾਲ ਦੇ 166ਵਾਂ ਦਿਨ ਪੂਰਾ ਹੋਇਆ। ਰੋਜ਼ਾਨਾ ਪਹਿਰੇਦਾਰ ਦੇ ਮੁੱਖ ਸੰਪਾਦਕ ਸ. ਜਸਪਾਲ ਸਿੰਘ ਹੇਰਾਂ ਦੀ ਸਰਪ੍ਰਸਤੀ ਹੇਠ ਚੱਲ ਰਹੇ ਮੋਰਚੇ ਚ ਅੱਜ ਬਾਬਾ ਜਗਦੇਵ ਸਿੰਘ ਦੁੱਗਰੀ, ਤੇਜਾ ਸਿੰਘ ਟੂਸੇ, ਖਜ਼ਾਨਚੀ ਪਰਵਿੰਦਰ ਸਿੰਘ ਟੂਸੇ ,ਅਜਮੇਰ ਸਿੰਘ ਸਰਾਭਾ ਆਦਿ ਬਲਦੇਵ ਸਿੰਘ ਦੇਵ ਸਰਾਭਾ ਨਾਲ ਭੁੱਖ ਹਡ਼ਤਾਲ ਤੇ ਬੈਠੇ। ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਬਲਦੇਵ ਸਿੰਘ ਦੇਵ ਸਰਾਭਾ ਨੇ ਆਖਿਆ ਕਿ ਸਰਕਾਰਾਂ ਸਿੱਖਾਂ ਦੇ ਸਬਰ ਦਾ ਇਮਤਿਹਾਨ ਲੈਂਦੀਆਂ ਹਨ ।ਪਰ ਸਿੱਖ ਕੌਮ ਇਨ੍ਹਾਂ ਦੇ ਕੀਤੇ ਅੱਤਿਆਚਾਰ ਹਮੇਸ਼ਾਂ ਯਾਦ ਰੱਖਣਗੇ । ਬਾਕੀ ਸਰਕਾਰਾਂ ਦੇ ਲੀਡਰ ਭੁੱਲ ਜਾਂਦੇ ਨੇ ਕਿ ਸਿੱਖ ਉਹ ਕੌਮ ਹੈ ਜਿਨ੍ਹਾਂ ਦੇ ਗੁਰੂ ਗੋਬਿੰਦ ਸਿੰਘ ਮਹਾਰਾਜ ਜੀ ਨੇ ਚਿੜੀਆਂ ਤੋਂ ਬਾਜ਼ ਦੜਾ ਸਨ ਤੇ ਸਿੰਘਾਂ ਨੂੰ ਅੰਮ੍ਰਿਤ ਦੀ ਦਾਤ ਬਖਸ਼ ਕੇ ਗਿਦੜੋਂ ਸ਼ੇਰ ਬਣਾਇਆ। ਫਿਰ ਸਰਕਾਰਾਂ ਆਖ਼ਰ ਸਿੱਖ ਕੌਮ ਨਾਲ ਵਧੀਕੀਆਂ ਕਰਦੀ ਹੈ ।ਜੋ ਕੌਮ ਆਪਣੇ ਨਾਲ ਹੋਏ ਅੱਤਿਆਚਾਰ ਨੂੰ ਲੰਮੇ ਸਮੇਂ ਤੱਕ ਨਹੀਂ ਭੁੱਲਦੀ ਜਦੋਂ ਤਕ ਬਦਲਾ ਨਾ ਲੈ ਲੈਣ ਉਦੋਂ ਤਕ ਦੁਸ਼ਮਣ ਦੀ ਭਾਲ 'ਚ ਰਹਿੰਦੀ ਹੈ । ਉਨ੍ਹਾਂ ਨੇ ਅੱਗੇ ਆਖਿਆ ਕਿ ਜੇਕਰ ਸਿੱਖ ਕੌਮ ਕਿਸੇ ਦਾ ਸਤਿਕਾਰ ਕਰਦੀ ਹੈ ਤਾਂ ਉਹ ਦਿਲ ਨਾਲ ਕਰਦੀ ਹੈ । ਜੇਕਰ ਕੋਈ ਸਿੱਖਾਂ ਤੇ ਜ਼ੁਲਮ ਕਰਕੇ ਦੁਸ਼ਮਣੀ ਪਾਉਂਦਾ ਤਾਂ ਇਹ ਕੌਮ ਉਸਦਾ ਸਿਵਿਆਂ ਤੱਕ ਪਿੱਛਾ ਨਹੀਂ ਛੱਡਦੀ। ਜੇਕਰ ਸਰਕਾਰਾਂ ਦੇ ਲੀਡਰ ਸਿੱਖਾਂ ਨਾਲ ਇਨਸਾਫ ਕਰਨ ਦੀ ਗੱਲ ਕਰਦੇ ਹਨ ਤਾਂ ਫਿਰ ਜ਼ੁਲਮ ਕੌਣ ਕਰਦਾ । ਫੇਰ ਬਾਣੀ ਦੀ ਬੇਅਦਬੀ ਕਰਨ ਵਾਲਿਆਂ ਨੂੰ ਸਜ਼ਾਵਾਂ ਦੇਣ ਤੋਂ ਕੌਣ ਰੋਕਦਾ ਅਤੇ ਸਜ਼ਾਵਾਂ ਪੂਰੀਆਂ ਕਰ ਚੁੱਕੇ ਬੰਦੀ ਸਿੰਘਾਂ ਨੂੰ ਜੇਲ੍ਹਾਂ ਚੋਂ ਬਾਹਰ ਕੌਣ ਨਹੀਂ ਆਉਣ ਦਿੰਦਾ । ਜਦ ਕੇ ਲੋਕ ਵੋਟਾਂ ਪਾ ਕੇ ਐਮ ਐਲ ਏ, ਐਮ ਪੀ ਚਾਹੁੰਦੇ ਹਨ। ਪਰ ਹਾਕਮ ਕਿਸੇ ਹੋਰ ਦੇ ਚੱਲਦੇ ਹੈ ।ਆਖ਼ਰ ਕਦੋਂ ਤਕ ਲੋਕਾਂ ਤੇ ਆਰ ਐਸ ਐਸ ਤੇ ਹਿੰਦੂਤਵੀ ਆਪਣੇ ਹੁਕਮ ਚਲਾਉਂਦੇ ਰਹਿਣਗੇ । ਜੇਕਰ ਪੰਜਾਬ ਸਰਕਾਰ ਦੀ ਗੱਲ ਕਰੀਏ ਤਾਂ ਇੱਥੇ ਵੀ ਇਹੀ ਹਾਲ ਹੈ ਲੋਕਾਂ ਨੇ ਬਦਲਾਅ ਲਿਆਉਣ ਲਈ ਮੁੱਖ ਮੰਤਰੀ ਸ. ਭਗਵੰਤ ਸਿੰਘ ਮਾਨ ਨੂੰ ਵੋਟਾਂ ਪਾਈਆਂ ਅਤੇ ਬਹੁਮਤ ਨਾਲ ਜਿਤਾਇਆ ਪਰ ਪਤਾ ਨਹੀਂ ਉਹ ਕਿਉਂ ਅੱਜ ਹਿੰਦੂ ਤਵਿਆਂ ਦੇ ਗੱਠ ਪੁਤਲੀ ਬਣ ਕੇ ਨੱਚੀ ਜਾਂਦੇ ਹਨ ।ਫੇਰ ਸਿੱਖ ਕੌਮ ਦੇ ਹੱਕੀ ਮੰਗਾਂ ਦੀ ਗੱਲ ਕੌਣ ਕਰੂ । ਆਖ਼ਰ ਸਿੱਖਾਂ ਨੂੰ ਇਨਸਾਫ਼ ਕਦੋਂ ਮਿਲੂ ।ਉਨ੍ਹਾਂ ਨੇ ਆਖ਼ਰ ਵਿੱਚ ਆਖਿਆ ਕਿ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਰੋਸ ਮਾਰਚ ਨੌੰ ਅਗਸਤ ਨੂੰ ਹੋਵੇਗਾ । ਜੋ ਗੁਰਦੁਆਰਾ ਸ਼ਹੀਦ ਗੰਜ ਮੁਸ਼ਕਿਆਣਾ ਸਾਹਿਬ ਮੁੱਲਾਂਪੁਰ ਤੋਂ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਦੀ ਜਨਮ ਭੂਮੀ ਪਿੰਡ ਸਰਾਭਾ ਤਕ ਮਾਰਚ ਕੱਢਿਆ ਜਾਵੇਗਾ । ਸੋ ਅਸੀਂ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਦਰਦ ਰੱਖਣ ਵਾਲੇ ਜੁਝਾਰੂ ਲੋਕਾਂ ਨੂੰ ਅਪੀਲ ਕਰਦੇ ਹਾਂ ਕਿ ਉਹ ਗੁਰਦੁਆਰਾ ਸਾਹਿਬ ਠੀਕ 10 ਵਜੇ ਪਹੁੰਚ ਜਾਣ ਤਾਂ ਜੋ ਰੋਸ ਮਾਰਚ ਸਮੇਂ ਸਿਰ ਸ਼ੁਰੂ ਕੀਤਾ ਜਾ ਸਕੇ। ਇਸ ਮੌਕੇ ਸਾਬਕਾ ਤਕਨੀਕੀ ਮੰਤਰੀ ਜਗਦੀਸ਼ ਸਿੰਘ ਗਰਚਾ ਨੇ ਪੰਥਕ ਮੋਰਚਾ ਸਰਾਭਾ ਭੁੱਖ ਹਡ਼ਤਾਲ 'ਚ ਹਾਜ਼ਰੀ ਭਰੀ । ਉਨ੍ਹਾਂ ਗੱਲਬਾਤ ਕਰਦਿਆਂ ਆਖਿਆ ਕਿ ਸਾਨੂੰ ਸਭ ਨੂੰ ਰਾਜਨੀਤੀ ਤੋਂ ਉੱਪਰ ਉੱਠ ਕੇ ਸਾਹਿਬ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੇ ਦੋਸ਼ੀਆਂ ਨੂੰ ਸਜ਼ਾਵਾਂ ਦਿਵਾਉਣ ਅਤੇ ਬੰਦੀ ਸਿੰਘਾਂ ਨੂੰ ਰਿਹਾਅ ਕਰਵਾਉਣ ਲਈ ਸਾਨੂੰ ਇੱਕ ਮੰਚ ਤੇ ਇਕੱਠੇ ਹੋਣਾ ਅਤਿ ਜ਼ਰੂਰੀ । ਕਿਉਂਕਿ ਮੋਦੀ ਸਰਕਾਰ ਸਿੱਖਾਂ ਨੂੰ ਬਣਦਾ ਸਤਿਕਾਰ ਦੇਣ ਤੋਂ ਭੱਜ ਰਹੀ ਹੈ। ਜੋ ਗੁਰੂ ਨਾਨਕ ਦੇਵ ਜੀ ਦੇ ਗੁਰਪੁਰਬ ਮੌਕੇ ਬੰਦੀ ਸਿੰਘਾਂ ਨੂੰ ਰਿਹਾਅ ਕਰਨ ਦਾ ਐਲਾਨ ਕਰਦੇ ਹਨ ਪਰ ਚਾਰ ਸਾਲ ਬੀਤਣ ਤੇ ਵੀ ਬੰਦੀ ਸਿੰਘ ਜੇਲ੍ਹਾਂ ਤੋਂ ਬਾਹਰ ਨਹੀਂ ਆਏ ਇਸ ਦੀ ਸਿੱਧੀ ਜ਼ਿੰਮੇਵਾਰ ਕੇਂਦਰ ਸਰਕਾਰ ।ਜਦਕਿ ਭਾਰਤ ਦਾ ਸੰਵਿਧਾਨ ਸਜ਼ਾ ਪੂਰੀ ਹੋਣ ਤੇ ਕਿਸੇ ਨੂੰ ਵੀ ਜੇਲ੍ਹਾਂ ਵਿੱਚ ਡੱਕ ਕੇ ਰੱਖਣ ਦਾ ਅਧਿਕਾਰ ਨਹੀਂ ਦਿੰਦਾ ।ਫੇਰ ਸਿੱਖਾਂ ਨੂੰ ਸਜ਼ਾ ਪੂਰੀ ਹੋਣ ਤੇ ਦੋਗੁਣੀ ਸਜ਼ਾਵਾਂ ਭੁਗਤਣ ਤੇ ਕਿਉਂ ਰਿਹਾਅ ਨਹੀਂ ਕੀਤਾ ਜਾ ਰਿਹਾ।ਅਸੀਂ ਸਮੁੱਚੀ ਸਿੱਖ ਕੌਮ ਨੂੰ ਅਪੀਲ ਕਰਦੇ ਹਾਂ ਕਿ ਉਹ ਇੱਕ ਮੰਚ ਤੇ ਇਕੱਠੇ ਹੋ ਕੇ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਹੰਭਲਾ ਮਾਰਨ ਤਾਂ ਜੋ ਸਾਡੇ ਜੁਝਾਰੂ ਜਲਦ ਜੇਲ੍ਹਾਂ ਤੋਂ ਬਾਹਰ ਆ ਸਕਣ। ਸਾਬਕਾ ਸਰਪੰਚ ਜਗਤਾਰ ਸਿੰਘ ਸਰਾਭਾ,ਗੁਰਮੇਲ ਸਿੰਘ ਊਭੀ ਜੋਧਾ, ਬਲਦੇਵ ਸਿੰਘ ਈਸਨਪੁਰ,ਬੂਟਾ ਸਿੰਘ ,ਅਜਮੇਰ ਸਿੰਘ ਭੋਲਾ ਸਰਾਭਾ,ਗੁਲਜ਼ਾਰ ਸਿੰਘ ਮੋਹੀ,ਅੱਛਰਾ ਸਿੰਘ ਸਰਾਭਾ,ਹਰਬੰਸ ਸਿੰਘ ਪੰਮਾ ਹਿੱਸੋਵਾਲ, ਗੁਲਜ਼ਾਰ ਸਿੰਘ ਮੋਹੀ, ਕੁਲਦੀਪ ਸਿੰਘ ਕਿਲਾ ਰਾਏਪੁਰ, ਆਦਿ ਹਾਜ਼ਰੀ ਭਰੀ।

ਸਿਹਤ ਮੰਤਰੀ ਬਨਾਮ ਉਪ-ਕੁਲਪਤੀ ✍️ ਸਲੇਮਪੁਰੀ ਦੀ ਚੂੰਢੀ

- ਪਿਛਲੇ ਦਿਨੀਂ ਬਾਬਾ ਫਰੀਦ ਯੂਨੀਵਰਸਿਟੀ ਫਰੀਦਕੋਟ ਜਿਸ ਵਿਚ ਮੈਡੀਕਲ ਕਾਲਜ ਅਤੇ ਹਸਪਤਾਲ ਫਰੀਦਕੋਟ ਚੱਲ ਰਿਹਾ ਹੈ ਦੇ ਉਪ-ਕੁਲਪਤੀ ਨਾਲ ਸਿਹਤ ਮੰਤਰੀ ਪੰਜਾਬ ਵਲੋਂ ਕੀਤੇ ਗਏ ਵਿਵਹਾਰ / ਦੁਰ-ਵਿਵਹਾਰ ਨੂੰ ਲੈ ਕੇ ਫਰੀਦਕੋਟ ਤੋਂ ਲੈ ਕੇ ਚੰਡੀਗੜ੍ਹ-ਦਿੱਲੀ ਤੱਕ ਹਰੇਕ ਅਖਬਾਰ, ਟੀ. ਵੀ. ਚੈਨਲ ਅਤੇ ਸੋਸ਼ਲ ਮੀਡੀਆ ਉਪਰ ਖੂਬ ਚਰਚਾ ਚੱਲ ਰਹੀ ਹੈ। ਸਿਹਤ ਮੰਤਰੀ ਪੰਜਾਬ ਅਤੇ ਉਪ-ਕੁਲਪਤੀ ਵਿਚਾਲੇ ਵਾਪਰੀ ਘਟਨਾ /ਦੁਰਘਟਨਾ ਨੂੰ ਲੈ ਕੇ ਲੋਕ ਦੋ ਹਿੱਸਿਆਂ ਵਿਚ ਵੰਡੇ ਗਏ ਹਨ, ਜਿਨ੍ਹਾਂ ਵਿਚੋਂ ਇਕ ਹਿੱਸਾ ਉਪ-ਕੁਲਪਤੀ ਦੀ ਪਿੱਠ ਉੱਪਰ ਆ ਕੇ ਖੜ੍ਹੋ ਗਿਆ ਹੈ ਜਦ ਕਿ ਦੂਜਾ ਹਿੱਸਾ ਸਿਹਤ ਮੰਤਰੀ ਚੇਤਨ ਸਿੰਘ ਜੌੜਮਾਜਰਾ ਵਲੋਂ ਕੀਤੀ ਕਾਰਵਾਈ ਨੂੰ ਸਹੀ ਦਰਸਾਉਣ ਲਈ ਸਬੂਤ ਦੇ ਰਿਹਾ ਹੈ। ਸਿਹਤ ਮੰਤਰੀ ਵਲੋਂ ਉਪ-ਕੁਲਪਤੀ ਡਾ ਰਾਜ ਬਹਾਦਰ ਨੂੰ ਹਸਪਤਾਲ ਵਿਚ ਮਰੀਜ਼ਾਂ ਵਾਸਤੇ ਰੱਖੇ ਗਲੇ-ਸੜੇ ਬੈੱਡ ਉਪਰ ਪਾਉਣ ਦੀ ਘਟਨਾ ਸਬੰਧੀ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਵਲੋਂ ਅਫਸੋਸ ਜਾਹਿਰ ਕੀਤਾ ਗਿਆ ਹੈ। ਉਪ-ਕੁਲਪਤੀ ਵਲੋਂ ਆਪਣੇ ਨਾਲ ਵਾਪਰੀ ਘਟਨਾ ਨੂੰ ਆਪਣੀ ਇੱਜਤ ਉਪਰ ਵੱਜੀ ਗਹਿਰੀ ਸੱਟ ਮੰਨ ਕੇ ਉਪ-ਕੁਲਪਤੀ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਗਿਆ ਹੈ। ਮੁੱਖ ਮੰਤਰੀ ਸ ਮਾਨ ਨੇ ਆਪਣੇ ਬਿਆਨ ਵਿੱਚ ਕਿਹਾ ਕਿ ਜੇਕਰ ਉਪ-ਕੁਲਪਤੀ ਦੇ ਕੰਮ ਪ੍ਰਤੀ ਸੰਤੁਸ਼ਟੀ ਨਹੀਂ ਸੀ ਤਾਂ ਬੈਠ ਕੇ ਗੱਲਬਾਤ ਕੀਤੀ ਜਾ ਸਕਦੀ ਸੀ।
ਖੈਰ, ਹੁਣ ਤਾਂ ਗੱਲ ਦਾ ਖਿਲਾਰਾ ਪੈ ਚੁੱਕਿਆ ਹੈ। ਲੱਖਾ ਸਿਧਾਣਾ ਵਲੋਂ ਫਰੀਦਕੋਟ ਯੂਨੀਵਰਸਿਟੀ /ਮੈਡੀਕਲ ਕਾਲਜ ਅਤੇ ਹਸਪਤਾਲ ਦੀ ਦੁਰਦਸ਼ਾ ਨੂੰ ਲੈ ਕੇ ਜੋ ਗੰਭੀਰ ਤਸਵੀਰ ਪੇਸ਼ ਕੀਤੀ ਗਈ ਹੈ, ਨੂੰ ਅੱਖੋਂ ਪਰੋਖੇ ਕਰਨਾ ਸਾਡੀ ਬਹੁਤ ਵੱਡੀ ਬੇਵਕੂਫੀ ਹੋਵੇਗੀ। ਲੱਖਾ ਸਿਧਾਣਾ ਵਲੋਂ ਮੁੱਖ ਮੰਤਰੀ ਪੰਜਾਬ ਤੋਂ ਮੰਗ ਕੀਤੀ ਗਈ ਹੈ ਕਿ ਸਾਲ 2014 ਤੋਂ ਲੈ ਕੇ ਹੁਣ ਤੱਕ ਯੂਨੀਵਰਸਿਟੀ ਵਿਚ ਜੋ ਜੋ ਬੇਨਿਯਮੀਆਂ ਭਾਵੇਂ ਫੈਕਲਟੀ/ ਡਾਕਟਰਾਂ ਜਾਂ ਹੋਰ ਅਧਿਕਾਰੀਆਂ ਤੇ ਮੁਲਾਜ਼ਮਾਂ ਦੀਆਂ ਕੀਤੀਆਂ ਗਈਆਂ ਭਰਤੀਆਂ ਦੀ ਗੱਲ ਹੋਵੇ ਜਾਂ ਚੋਣਵੇਂ ਬੰਦਿਆਂ ਨੂੰ ਦਿੱਤੀਆਂ ਤਰੱਕੀਆਂ ਦੀ ਗੱਲ ਹੋਵੇ ਜਾਂ ਫਿਰ ਕੈਂਸਰ ਪੀੜਤਾਂ ਦੇ ਇਲਾਜ ਲਈ ਆਈਆਂ ਗਰਾਂਟਾਂ ਦੀ ਕਥਿਤ ਦੁਰਵਰਤੋਂ ਕਰਨ ਵਾਲਿਆਂ ਨੂੰ 'ਕਲੀਨ ਚਿੱਟ' ਦੇਣ ਦੀ ਗੱਲ ਹੋਵੇ ਦੀ ਨਿਰਪੱਖ ਜਾਂਚ ਕਰਵਾਈ ਜਾਵੇ।
ਇਹ ਗੱਲ ਤਾਂ ਬਿਲਕੁਲ ਸੱਚ ਹੈ ਕਿ ਯੂਨੀਵਰਸਿਟੀ/ਕਾਲਜ / ਹਸਪਤਾਲ ਦਾ ਹਾਲ ਬਹੁਤ ਮਾੜਾ ਹੈ। ਮੈਨੂੰ ਯਾਦ ਹੈ ਕਿ ਪਿਛਲੇ ਸਾਲ ਮੋਗਾ ਸ਼ਹਿਰ ਵਲ ਦੇ ਇਕ ਵਿਅਕਤੀ ਦੀ ਲੱਤ ਉਪਰ ਸੱਟ ਵੱਜਣ ਨਾਲ ਉਸ ਦੀ ਲੱਤ ਦੀ ਨਸ ਪੰਕਚਰ ਹੋ ਗਈ ਸੀ । ਨਸ ਪੰਕਚਰ ਹੋਣ ਕਰਕੇ ਖੂਨ ਵਹਿਣ ਲੱਗ ਪਿਆ। ਮਰੀਜ ਦੇ ਨਜ਼ਦੀਕੀ ਉਸ ਨੂੰ ਚੁੱਕ ਕੇ ਜਦੋਂ ਕਿਸੇ ਨੇੜੇ ਦੇ ਹਸਪਤਾਲ ਵਿਚ ਲੈ ਗਏ ਤਾਂ ਉਥੋਂ ਦੇ ਡਾਕਟਰਾਂ ਨੇ ਦੱਸਿਆ ਕਿ ਮਰੀਜ ਨੂੰ ਜਾਂ ਤਾਂ ਫਰੀਦਕੋਟ ਜਾਂ ਫਿਰ ਲੁਧਿਆਣਾ ਵਿਖੇ ਲੈ ਕੇ ਜਾਓ, ਕਿਉਂਕਿ ਮਰੀਜ ਦੀ ਲੱਤ ਦਾ ਇਲਾਜ ਕਰਨ ਲਈ ਪਲਾਸਟਿਕ ਸਰਜਨ ਦਾ ਕੰਮ ਹੈ। ਡਾਕਟਰਾਂ ਦੀ ਸਲਾਹ ਪਿਛੋਂ ਮਰੀਜ ਨੂੰ ਫਰੀਦਕੋਟ ਹਸਪਤਾਲ ਵਿਚ ਲਿਆਂਦਾ ਗਿਆ, ਜਿੱਥੇ ਪਹਿਲਾਂ ਤਾਂ ਡਾਕਟਰਾਂ ਨੇ ਮਰੀਜ ਨੂੰ ਦਾਖਲ ਕਰਨ ਤੋਂ ਹੀ ਸਾਫ ਨਾਂਹ ਕਰ ਦਿੱਤੀ, ਫਿਰ ਜਦੋਂ ਮਰੀਜ ਦੇ ਨਜ਼ਦੀਕੀਆਂ ਨੇ ਮਿੰਨਤਾਂ-ਤਰਲੇ ਕਰਕੇ ਉਸ ਨੂੰ ਦਾਖਲ ਕਰਵਾਇਆ ਤਾਂ ਮਰੀਜ ਦਾ ਇਲਾਜ ਕਰਨ ਤੋਂ ਪਹਿਲਾਂ ਹੀ ਡਾਕਟਰਾਂ ਵਲੋਂ 14-15 ਹਜਾਰ ਰੁਪਏ ਮੁੱਲ ਦੀਆਂ ਦਵਾਈਆਂ ਅਤੇ ਹੋਰ ਡਾਕਟਰੀ ਸਮਾਨ ਬਾਹਰੋਂ ਮੰਗਵਾ ਕੇ ਰੱਖ ਲਿਆ। ਡਾਕਟਰਾਂ ਨੇ ਮਰੀਜ ਦੇ ਜਖਮ ਉਪਰ ਪੱਟੀ ਵਗੈਰਾ ਕਰਨ ਪਿੱਛੋਂ ਢੁੱਕਵਾਂ ਇਲਾਜ ਕਰਨ ਦੀ ਬਜਾਏ ਟਾਲ-ਮਟੋਲ ਕਰਨਾ ਸ਼ੁਰੂ ਕਰ ਦਿੱਤਾ ਗਿਆ। ਲਗਭਗ 2-3 ਘੰਟਿਆਂ ਬਾਅਦ ਮਰੀਜ ਨੂੰ ਕਿਹਾ ਕਿ 'ਹਸਪਤਾਲ ਵਿਚ ਮਾਈਕਰੋ ਪਲਾਸਟਿਕ ਸਰਜਨ ਨਹੀਂ ਹੈ'। ਡਾਕਟਰਾਂ ਨੇ ਮਰੀਜ ਨੂੰ ਲੁਧਿਆਣਾ ਦੇ ਕਿਸੇ ਵੱਡੇ ਹਸਪਤਾਲ ਵਿਚ ਲਿਜਾਣ ਲਈ ਮਜਬੂਰ ਕਰ ਦਿੱਤਾ। ਇਹ ਹਾਲ ਹੈ ਫਰੀਦਕੋਟ ਦੇ ਮੈਡੀਕਲ ਕਾਲਜ ਅਤੇ ਹਸਪਤਾਲ /ਯੂਨੀਵਰਸਿਟੀ ਦਾ!
ਮੈਡੀਕਲ ਕਾਲਜ ਅਤੇ ਹਸਪਤਾਲ ਵਿਚ ਪਲਾਸਟਿਕ ਸਰਜਨ ਨਾ ਹੋਣਾ, ਪੰਜਾਬ ਦੇ ਸਰਕਾਰੀ ਸਿਹਤ ਸਿਸਟਮ ਦੇ ਮੱਥੇ ਉਪਰ ਕਲੰਕ ਨਹੀਂ ਤਾਂ ਹੋਰ ਕੀ ਹੈ?
ਯੂਨੀਵਰਸਿਟੀ ਆਪਣੇ ਆਪ ਵਿੱਚ ਇੱਕ ਖੁਦ-ਮੁਖਤਿਆਰ ਸੰਸਥਾ ਹੈ। ਇਸ ਯੂਨੀਵਰਸਿਟੀ ਅਧੀਨ ਵੱਡੀ ਗਿਣਤੀ ਵਿਚ ਮੈਡੀਕਲ, ਨਰਸਿੰਗ ਅਤੇ ਪੈਰਾਮੈਡੀਕਲ ਇੰਸਟੀਚਿਊਟ ਚੱਲ ਰਹੇ ਹਨ, ਜਿਨ੍ਹਾਂ ਤੋਂ ਯੂਨੀਵਰਸਿਟੀ ਨੂੰ ਫੀਸਾਂ / ਫੰਡਾਂ ਦੇ ਰੂਪ ਵਿਚ ਕਰੋੜਾਂ /ਅਰਬਾਂ ਰੁਪਏ ਦੀ ਆਮਦਨ ਹੁੰਦੀ ਹੈ। ਪਰ ਯੂਨੀਵਰਸਿਟੀ ਵਲੋਂ ਨਾ ਤਾਂ ਸਮਾਜ ਦੇ ਗਰੀਬ ਮਰੀਜ਼ਾਂ ਲਈ ਕੋਈ ਢੁੱਕਵਾਂ ਪ੍ਰਬੰਧ ਕੀਤਾ ਜਾ ਰਿਹਾ ਹੈ ਅਤੇ ਨਾ ਹੀ ਤੀਜਾ ਅਤੇ ਚੌਥਾ ਦਰਜਾ ਮੁਲਾਜ਼ਮਾਂ ਦੀ ਬਿਹਤਰੀ ਲਈ ਕੋਈ ਧਿਆਨ ਦਿੱਤਾ ਜਾ ਰਿਹਾ ਹੈ। ਯੂਨੀਵਰਸਿਟੀ / ਮੈਡੀਕਲ ਕਾਲਜ ਅਤੇ ਹਸਪਤਾਲ ਵਿਚ ਕੱਚੇ /ਪੱਕੇ ਮੁਲਾਜ਼ਮ ਤ੍ਰਾਹ ਤ੍ਰਾਹ ਕਰ ਰਹੇ ਹਨ। ਆਮ ਵਰਗ ਦੇ ਲੋਕਾਂ ਵਲੋਂ ਹਸਪਤਾਲ ਦੀ ਕਾਰਗੁਜ਼ਾਰੀ ਉਪਰ ਅਕਸਰ ਉਂਗਲ ਚੁੱਕੀ ਜਾਂਦੀ ਹੈ ਕਿ ਇਥੇ ਕੇਵਲ 'ਖਾਸ ਮਰੀਜ਼ਾਂ ਲਈ ਖਾਸ ਇਲਾਜ' ਕਰਨ ਦਾ ਪ੍ਰਬੰਧ ਹੈ।
ਜਾਪਦਾ ਹੈ ਕਿ ਸ਼ਾਇਦ ਸਿਹਤ ਮੰਤਰੀ ਚੇਤਨ ਸਿੰਘ ਜੌੜਮਾਜਰਾ ਜਾਂ ਉਨ੍ਹਾਂ ਦੇ ਕਿਸੇ ਨਜਦੀਕੀ ਨੇ ਵੀ ਇਸ ਹਸਪਤਾਲ ਦੀ ਕਾਰਗੁਜ਼ਾਰੀ ਦਾ ਦਰਦ ਕਦੀ ਆਪਣੇ ਪਿੰਡੇ 'ਤੇ ਹੰਢਾਇਆ ਹੋਵੇ! ਚੇਤਨ ਸਿੰਘ ਜੌੜਮਾਜਰਾ ਹਸਪਤਾਲ ਦੀ ਕਾਰਗੁਜ਼ਾਰੀ ਸਬੰਧੀ ਸਾਰਾ ਦਰਦ ਆਪਣੇ ਅੰਦਰ ਲੁਕਾਈ ਬੈਠੇ ਹੋਣ ਅਤੇ ਹੁਣ ਜਦੋਂ ਉਹ ਤਾਕਤ ਵਿੱਚ ਆਏ ਤਾਂ ਉਨ੍ਹਾਂ ਦਾ ਦਰਦ ਜੁਆਲਾਮੁਖੀ ਵਾਗੂੰ ਉਬਾਲਾ ਮਾਰ ਕੇ ਬਾਹਰ ਆ ਗਿਆ ਹੋਵੇ?
ਇਸ ਵਿਚ ਕੋਈ ਸ਼ੱਕ ਨਹੀਂ ਹੈ ਕਿ ਡਾ ਰਾਜ ਬਹਾਦਰ ਇੱਕ ਵਧੀਆ ਸਰਜਨ ਹਨ, ਪਰ ਇਹ ਜਰੂਰੀ ਨਹੀਂ ਹੈ ਕਿ ਉਹ ਇਕ ਵਧੀਆ ਪ੍ਰਸ਼ਾਸਨ ਪ੍ਰਬੰਧਕ ਵੀ ਹੋਣ!
ਹੁਣ ਸੋਚਣ ਵਾਲੀ ਗੱਲ ਤਾਂ ਇਹ ਹੈ ਕਿ 73 ਸਾਲਾ ਉਪ-ਕੁਲਪਤੀ ਹਿਮਾਚਲ ਪ੍ਰਦੇਸ਼ ਦੇ ਰਹਿਣ ਵਾਲੇ ਹਨ, ਕੀ ਉਨ੍ਹਾਂ ਤੋਂ ਸਿਵਾਏ ਪੰਜਾਬ ਵਿਚ ਪੰਜਾਬ ਸਰਕਾਰ ਨੂੰ ਕੋਈ ਪੰਜਾਬੀ ਮਾਹਿਰ ਡਾਕਟਰ ਹੋਣ ਦੇ ਨਾਲ ਨਾਲ ਸੁਲਝਿਆ ਹੋਇਆ ਪ੍ਰਸ਼ਾਸਨ ਪ੍ਰਬੰਧਕ ਹੀ ਨਹੀਂ ਮਿਲਿਆ। ਖੈਰ, ਪੰਜਾਬ ਵਿਚ ਯੂਨੀਵਰਸਿਟੀ ਦਾ ਉਪ-ਕੁਲਪਤੀ ਲਗਾਉਣ ਲਈ ਪੰਜਾਬ ਸਰਕਾਰ ਨੂੰ ਕੋਈ ਅਨੁਸੂਚਿਤ ਜਾਤੀ /ਜਨ-ਜਾਤੀ /ਪੱਛੜੀ ਸ਼੍ਰੇਣੀ ਨਾਲ ਸਬੰਧਿਤ ਕੋਈ 'ਬੰਦਾ' ਤਾਂ ਨਹੀਂ ਸੀ ਦਿਸਣਾ, ਪਰ ਆਪਣੀ ਪਿਰਤ ਅਨੁਸਾਰ ਕਿਸੇ 'ਜੱਟ' ਨੂੰ ਉਪ-ਕੁਲਪਤੀ ਬਣਾ ਕੇ ਬਿਠਾ ਦਿੰਦੀ !
ਇਥੇ ਇਕ ਗੱਲ ਤਾਂ ਜਰੂਰ ਹੈ ਕਿ ਮੁੱਖ ਮੰਤਰੀ ਸ ਮਾਨ ਨੇ ਅੰਦਰ ਬੈਠ ਕੇ ਗੱਲ ਸੁਲਝਾਉਣ ਲਈ ਜੋ ਕਿਹਾ ਹੈ, ਠੀਕ ਹੈ, ਗੱਲ ਅੰਦਰ ਬੈਠ ਕੇ ਸੁਲਝਾ ਲੈਣੀ ਚਾਹੀਦੀ ਸੀ, ਪਰ ਸਿਹਤ ਮੰਤਰੀ ਸਾਹਿਬ ਜਲਦੀ ਗੁੱਸੇ ਵਿਚ ਆ ਗਏ, ਜਿਸ ਕਰਕੇ ਗੱਲ ਦਾ ਖਿਲਾਰਾ ਪੈ ਗਿਆ, ਜਿਸ ਨੂੰ ਸਮੇਟਣ ਲਈ ਦੇਰ-ਸਵੇਰ ਹੋ ਸਕਦੀ ਹੈ।
ਸਿਹਤ ਮੰਤਰੀ ਸਾਹਿਬ ਕਾਹਲੀ ਕਾਹਲੀ ਵਿੱਚ ਪੰਜਾਬ ਦਾ ਵਿਗੜਿਆ ਸਿਹਤ ਢਾਂਚਾ ਬਦਲਣ ਦੇ ਰੌਂਅ ਵਿਚ ਹਨ, ਜਿਸ ਦਾ ਫਾਇਦਾ ਹੋਣ ਦੀ ਬਜਾਏ ਨੁਕਸਾਨ ਹੋ ਰਿਹਾ ਹੈ।
ਇਸ ਤੋਂ ਪਹਿਲਾਂ ਵੀ ਪਿਛਲੇ ਦਿਨੀਂ ਜਦੋਂ ਉਨ੍ਹਾਂ ਨੇ ਸਿਹਤ ਅਧਿਕਾਰੀਆਂ ਦੀਆਂ ਬਦਲੀਆਂ ਕੀਤੀਆਂ ਤਾਂ ਦੇ ਦੌਰਾਨ ਉਨ੍ਹਾਂ ਨੇ ਕੁਝ ਅਜਿਹੇ ਸਿਹਤ ਅਧਿਕਾਰੀਆਂ ਦੀਆਂ ਦੂਰ ਦੂਰ ਬਦਲੀਆਂ ਕਰ ਦਿੱਤੀਆਂ, ਜਿਨ੍ਹਾਂ ਨੇ ਹਸਪਤਾਲਾਂ ਵਿਚ ਰਿਸ਼ਵਤਖੋਰੀ ਨੂੰ ਠੱਲ੍ਹ ਪਾ ਕੇ ਸੁਧਾਰ ਲਿਆਉਣ ਦੀ ਕੋਸ਼ਿਸ਼ ਕੀਤੀ। ਉਦਾਹਰਣ ਦੇ ਤੌਰ 'ਤੇ
ਸਿਵਲ ਹਸਪਤਾਲ ਲੁਧਿਆਣਾ ਪੰਜਾਬ ਭਰ ਦੇ ਸਮੂਹ ਜਿਲ੍ਹਿਆਂ ਦੇ ਸਰਕਾਰੀ ਹਸਪਤਾਲਾਂ ਵਿਚ ਸੱਭ ਤੋਂ ਵੱਡਾ ਹਸਪਤਾਲ ਹੈ, ਦੇ ਵਿੱਚ ਸੁਧਾਰ ਲਿਆਉਣ ਲਈ ਇਥੋਂ ਤਬਦੀਲ ਕੀਤੇ ਗਏ ਐੱਸ. ਐਮ. ਓ. ਡਾ ਅਮਰਜੀਤ ਕੌਰ ਨੇ ਜੋ ਕੰਮ ਕੀਤੇ ਹਨ, ਨੂੰ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ, ਪਰ ਉਸ ਨੂੰ ਉਸ ਦੁਆਰਾ ਕੀਤੇ ਗਏ ਚੰਗੇ ਕੰਮਾਂ ਦੀ ਸਜ਼ਾ ਦੇ ਕੇ ਘਰ ਤੋਂ ਡੇਢ ਸੌ ਕਿਲੋਮੀਟਰ ਦੂਰ ਭੇਜ ਦਿੱਤਾ ਗਿਆ ਹੈ। ਡਾ ਅਮਰਜੀਤ ਕੌਰ ਦਾ ਕਸੂਰ ਸਿਰਫ ਇੰਨਾ ਹੀ ਸੀ ਕਿ ਉਸ ਨੇ ਸਿਵਲ ਹਸਪਤਾਲ ਲੁਧਿਆਣਾ ਵਿਚ ਕਿਸੇ ਨਿੱਜੀ ਵਿਅਕਤੀ ਨੂੰ ਆਪਣਾ ਕਾਰੋਬਾਰ ਚਲਾਉਣ ਲਈ ਸਰਕਾਰੀ ਜਗ੍ਹਾ ਦੇਣ ਤੋਂ ਸਾਫ ਇਨਕਾਰ ਕਰ ਦਿੱਤਾ ਸੀ ਅਤੇ ਇਸ ਦੇ ਨਾਲ ਹੀ ਉਸ ਨੇ ਹਸਪਤਾਲ ਵਿਚ ਚੱਲ ਰਹੇ ਸਾਇਕਲ /ਸਕੂਟਰ /ਕਾਰ ਸਟੈਂਡ ਦਾ ਠੇਕਾ ਚੁੱਪ ਚੁਪੀਤੇ ਕਿਸੇ 'ਖਾਸ ਬੰਦੇ' ਨੂੰ ਦੇਣ ਤੋਂ ਇਨਕਾਰ ਕਰਦਿਆਂ ਬੋਲੀ ਕਰਵਾ ਕੇ 40-50 ਲੱਖ ਰੁਪਏ ਦਾ ਹਸਪਤਾਲ ਨੂੰ ਆਰਥਿਕ ਲਾਭ ਪਹੁੰਚਾਇਆ!
ਸਿਹਤ ਮੰਤਰੀ ਸਾਹਿਬ ਜੀ ਤੁਹਾਡੀ ਸਰਕਾਰ ਨੇ ਅਜੇ ਪੰਜ ਸਾਲ ਚੱਲਣਾ ਹੈ, ਇਸ ਲਈ ਸਿਹਤ ਢਾਂਚੇ ਵਿੱਚ ਸੁਧਾਰ ਲਿਆਉਣ ਲਈ ਤੁਹਾਨੂੰ ਠਰੰਮੇ ਨਾਲ ਚੱਲਣਾ ਚਾਹੀਦਾ ਹੈ। ਅਜੇ ਤਾਂ ਤੁਸੀਂ ਸਿਹਤ ਵਿਭਾਗ ਵਿਚ ਬੈਠੇ ਉਹ ਮੱਗਰਮੱਛ ਫੜਨੇ ਹਨ, ਜਿਨ੍ਹਾਂ ਨੇ ਆਪਣੀ ਡਿਊਟੀ ਦੀ ਥਾਂ ਰਿਸ਼ਵਤ ਤੇ ਕਮਿਸ਼ਨ ਲੈਣਾ ਹੀ ਆਪਣਾ ਧਰਮ ਸਮਝਿਆ ਹੋਇਆ ਹੈ।
ਸਿਹਤ ਮੰਤਰੀ ਜੀ ਤੁਹਾਡੇ 'ਤੇ ਸੂਬੇ ਦੇ ਲੋਕਾਂ ਨੂੰ ਬਹੁਤ ਆਸਾਂ ਹਨ ਕਿ,ਤੁਸੀਂ ਸਿਹਤ ਵਿਭਾਗ ਵਿਚ ਚੱਲ ਰਹੇ 'ਕਮਿਸ਼ਨ ਦੀ ਥਾਂ ਮਿਸ਼ਨ' ਨੂੰ ਪ੍ਰਜਵਲਿਤ ਕਰੋਗੇ!
-ਸੁਖਦੇਵ ਸਲੇਮਪੁਰੀ
09780620233
31 ਜੁਲਾਈ, 2022.

ਅਸਤੀਫਾ ✍️ ਸਲੇਮਪੁਰੀ ਦੀ ਚੂੰਢੀ

-ਝੁੱਗੀ 'ਚ ਰਹਿੰਦੇ ਕਬਾੜੀਏ ਰਾਮੂ ਦਾ ਮੁੰਡਾ , ਜਿਸ ਦਾ ਘਰਦਿਆਂ ਨੇ ਬਹੁਤ ਹੀ ਪਿਆਰ ਨਾਲ ਡੀਸੀ ਨਾਉਂ ਰੱਖਿਆ ਹੋਇਆ ਸੀ, ਚੌਥੀ ਜਮਾਤ ਵਿਚੋਂ ਹੱਟ ਕੇ ਬਾਪ ਨਾਲ ਕਬਾੜ ਚੁਗਣ ਲੱਗ ਪਿਆ ਸੀ। ਇੱਕ ਦਿਨ ਜਦੋਂ ਉਹ ਆਪਣੇ ਬਾਪ ਨਾਲ ਸੜਕ ਕਿਨਾਰੇ ਸੁੱਟੀਆਂ ਖਾਲੀ ਪਲਾਸਟਿਕ ਦੀਆਂ ਬੋਤਲਾਂ ਚੁੱਕ ਰਿਹਾ ਸੀ ਤਾਂ ਨਸ਼ੇ ਵਿਚ ਟੱਲੀ ਹੋਏ ਇਕ ਸਿਰ ਫਿਰੇ ਮੁੰਡੇ ਨੇ ਆਪਣੀ ਕਾਰ ਉਸ ਉਪਰ ਚਾੜ੍ਹ ਦਿੱਤੀ, ਜਿਸ ਪਿੱਛੋਂ ਉਹ ਗੰਭੀਰ ਰੂਪ ਵਿਚ ਜਖਮੀ ਹੋ ਗਿਆ। ਉਸ ਦੇ ਫਟੇ-ਪੁਰਾਣੇ ਕੱਪੜੇ ਵੇਖ ਕੇ ਕਿਸੇ ਨੇ ਵੀ ਉਸ ਨੂੰ ਚੁੱਕਣ ਦਾ ਹੀਆ ਨਾ ਕੀਤਾ। ਲੋਕ ਵੇਖ ਵੇਖ ਕੇ ਉਸ ਦੇ ਕੋਲੋਂ ਲੰਘਦੇ ਜਾਣ। ਜਖਮੀ ਬੇਟੇ ਨੂੰ ਹਸਪਤਾਲ ਵਿਚ ਪਹੁੰਚਾਉਣ ਲਈ ਰਾਮੂ ਨੇ ਇੱਕ ਰਿਕਸ਼ੇ ਵਾਲੇ ਦਾ ਸਹਾਰਾ ਲਿਆ ਅਤੇ ਉਸ ਨੂੰ ਨੇੜੇ ਦੇ ਇਕ ਨਿੱਜੀ ਹਸਪਤਾਲ ਵਿਚ ਲਿਆਂਦਾ। ਰਾਮੂ ਨੇ ਆਪਣੇ ਬੇਟੇ ਦੀ ਗੰਭੀਰ ਹਾਲਤ ਦਾ ਵਾਸਤਾ ਪਾਉਂਦਿਆਂ ਡਾਕਟਰਾਂ ਨੂੰ ਇਲਾਜ ਲਈ ਕਿਹਾ, ਪਰ ਡਾਕਟਰਾਂ ਨੇ ਰਾਮੂ ਵਲ ਵੇਖਦਿਆਂ ਹੀ ਡੀਸੀ ਨੂੰ ਦਾਖਲ ਕਰਨ ਦੀ ਬਜਾਏ ਕਿਸੇ ਸਰਕਾਰੀ ਹਸਪਤਾਲ ਵਿਚ ਲਿਜਾਣ ਲਈ ਸਲਾਹ ਦਿੱਤੀ । ਰਾਮੂ ਹਾਲੋਂ-ਬਹਾਲ ਅਤੇ ਪ੍ਰੇਸ਼ਾਨ ਹੋਇਆ ਆਪਣੇ ਬੇਟੇ ਨੂੰ ਰਿਕਸ਼ੇ ਰਾਹੀਂ ਸਰਕਾਰੀ ਹਸਪਤਾਲ ਵਿਚ ਲੈ ਗਿਆ, ਜਿਥੇ ਡਾਕਟਰਾਂ ਨੇ ਉਸ ਨੂੰ ਇਕ ਅਜਿਹੇ ਬੈੱਡ ਉਪਰ ਪਾ ਦਿੱਤਾ, ਜਿਹੜਾ ਗਲਿਆ ਸੜਿਆ ਹੋਣ ਕਰਕੇ ਬਦਬੂ ਮਾਰ ਰਿਹਾ ਸੀ, ਪਰ ਫਿਰ ਵੀ ਰਾਮੂ ਅਤੇ ਉਸ ਦੇ ਜਖਮੀ ਬੇਟੇ ਨੂੰ ਇਹ ਬੈੱਡ ਬੁਰਾ ਲੱਗਣ ਦੀ ਬਜਾਏ ਜਿੰਦਗੀ ਲਈ ਵਰਦਾਨ ਮਹਿਸੂਸ ਹੋ ਰਿਹਾ ਸੀ । ਜਖਮੀ ਡੀਸੀ ਇਸ ਬੈੱਡ ਉਪਰ ਲਗਭਗ 10 ਦਿਨ ਤੱਕ ਇਲਾਜ ਲਈ ਦਾਖਲ ਰਿਹਾ ਅਤੇ 11ਵੇੰ ਦਿਨ ਜਦੋਂ ਇਲਾਜ ਪਿਛੋਂ ਉਸ ਨੂੰ ਛੁੱਟੀ ਮਿਲੀ ਤਾਂ ਉਹ ਬਹੁਤ ਖੁਸ਼ ਸੀ। ਆਪਣੇ ਘਰ ਜਾਣ ਤੋਂ ਪਹਿਲਾਂ ਡੀਸੀ ਨੇ ਡਾਕਟਰਾਂ ਅਤੇ ਨਰਸਿੰਗ ਸਟਾਫ ਦੇ ਪੈਰੀਂ ਹੱਥ ਲਗਾਉਂਦਿਆਂ ਉਨ੍ਹਾਂ ਦਾ ਦਿਲ ਦੀਆਂ ਗਹਿਰਾਈਆਂ ਚੋਂ ਧੰਨਵਾਦ ਕੀਤਾ। ਡੀਸੀ ਅਤੇ ਰਾਮੂ ਦੀਆਂ ਅੱਖਾਂ ਵਿਚ ਖੁਸ਼ੀ ਦੇ ਹੰਝੂ ਝਲਕ ਰਹੇ ਸਨ। ਰਾਮੂ ਨੇ ਸਾਰੇ ਸਟਾਫ ਅਤੇ ਉਨ੍ਹਾਂ ਦੇ ਬੱਚਿਆਂ ਲਈ ਢੇਰ ਸਾਰੀਆਂ ਦੁਆਵਾਂ ਮੰਗਦਿਆਂ ਉਨ੍ਹਾਂ ਦੇ ਪਰਿਵਾਰਾਂ ਲਈ ਹਮੇਸ਼ਾ ਖੁਸ਼ ਰਹਿਣ ਦੀ ਕਾਮਨਾ ਕੀਤੀ।
ਕੁੱਝ ਦਿਨਾਂ ਬਾਅਦ ਉਸੇ ਹਸਪਤਾਲ ਦੀ ਚੈਕਿੰਗ ਲਈ ਇਕ ਉੱਚ ਅਧਿਕਾਰੀ ਆ ਗਿਆ ਅਤੇ ਉਸ ਨੇ ਹਸਪਤਾਲ ਦੇ ਅਫਸਰ ਨੂੰ ਨਾਲ ਲੈ ਕੇ ਜਿਉਂ ਹੀ ਚੈਕਿੰਗ ਸ਼ੁਰੂ ਕੀਤੀ ਤਾਂ ਉਹ ਸਬੱਬ ਨਾਲ ਉਸੇ ਵਾਰਡ ਵਿਚ ਪਹੁੰਚ ਗਿਆ, ਜਿਥੇ ਡੀਸੀ ਦਾਖਲ ਸੀ। ਉੱਚ ਅਧਿਕਾਰੀ ਨੇ ਆਉਂਦਿਆਂ ਹੀ ਬੈੱਡ ਉਪਰੋਂ ਚਿੱਟੀ ਚਾਦਰ ਚੁੱਕੀ ਤਾਂ ਗਲਿਆ-ਸੜਿਆ ਬੈੱਡ ਨੰਗਾ ਹੋ ਗਿਆ। ਉੱਚ ਅਧਿਕਾਰੀ ਨੇ ਗੁੱਸੇ ਵਿਚ ਆ ਕੇ ਅਫਸਰ ਨੂੰ ਉਸੇ ਬੈੱਡ ਉਪਰ ਪੈਣ ਲਈ ਕਿਹਾ, ਜਿਹੜਾ ਗਲਿਆ-ਸੜਿਆ ਹੋਇਆ ਸੀ। ਅਫਸਰ ਬੈੱਡ ਉਪਰ ਪੈ ਗਿਆ ਪਰ ਬੈੱਡ ਉਪਰ ਪੈਣ ਦੀ ਘਟਨਾ ਨੂੰ ਅਫਸਰ ਨੇ ਆਪਣੀ ਬੇਇੱਜ਼ਤੀ ਮੰਨਦਿਆਂ ਰੋਣਾ ਕੁਰਲਾਉਣਾ ਸ਼ੁਰੂ ਕਰ ਦਿੱਤਾ ਅਤੇ ਆਪਣੀ ਨੌਕਰੀ ਤੋਂ ਅਸਤੀਫਾ ਦੇ ਦਿੱਤਾ। ਕੰਟੀਨ ਵਿਚ ਬੈਠਾ ਕੌਫੀ ਪੀ ਰਿਹਾ ਇੱਕ ਡਾਕਟਰ ਹਸਪਤਾਲ ਵਿਚ ਵਾਪਰੀ ਘਟਨਾਕ੍ਰਮ ਬਾਰੇ ਵਾਰ ਵਾਰ ਸੋਚ ਕੇ ਹੈਰਾਨ ਹੋ ਰਿਹਾ ਸੀ ਕਿ, ਗਰੀਬ ਦੁਆਵਾਂ ਦਿੰਦਾ ਹੈ , ਅਮੀਰ ਅਸਤੀਫਾ ਦਿੰਦਾ ਹੈ।
-ਸੁਖਦੇਵ ਸਲੇਮਪੁਰੀ
09780620233
1 ਅਗਸਤ, 2022.

ਖੁਦਕੁਸ਼ੀ ✍️ ਸਲੇਮਪੁਰੀ ਦੀ ਚੂੰਢੀ

-ਸੰਵਿਧਾਨ ਨਾਲ
ਉਹ
ਸ਼ਰੇਆਮ ਛੇੜਖਾਨੀਆਂ ਕਰਕੇ
ਚਾਰ-ਚੁਫੇਰੇ
ਸਹਿਮ ਦਾ ਮਾਹੌਲ
ਪੈਦਾ ਕਰਨ ਵਿਚ
ਮਸਰੂਫ ਨੇ ।
ਇਸੇ ਕਰਕੇ
ਲੋਕਤੰਤਰ ਰੋਜ
'ਖੁਦਕੁਸ਼ੀ'
ਕਰ ਰਿਹੈ!
-ਸੁਖਦੇਵ ਸਲੇਮਪੁਰੀ
09780620233
5 ਅਗਸਤ, 2022.

ਨੌਂਵੀ ਜਮਾਤ 'ਚ ਪੜਦੀ ਨਬਾਲਿਗਾ ਨਾਲ ਰੇਪ ਕਰਨ ਦੇ ਦੋਸ਼ ਵਿੱਚ ਇੱਕ ਨੌਜਵਾਨ ਤੇ ਪੁਲਿਸ ਵਲੋਂ ਮਾਮਲਾ ਦਰਜ

ਹੁਸਿਆਰਪੁਰ, ਪੁਲਿਸ ਨੂੰ ਦਿੱਤੇ ਬਿਆਨਾਂ ਵਿਚ ਪੀੜਤ ਲੜਕੀ ਦੀ ਮਾਤਾ ਨੇ ਦੱਸਿਆ ਕਿ ਉਸ ਦੀ ਲੜਕੀ ਜਿਸਦੀ ਉਮਰ 14 ਸਾਲ ਹੈ।ਜੋ ਨੌਵੀ ਕਲਾਸ ਵਿੱਚ ਪੜ੍ਹਦੀ ਹੈ ਮਿਤੀ 03/08/22 ਨੂੰ ਉਸਦੇ ਦੇਵਰ ਨੇ ਰਾਤ ਨੂੰ ਘਰ ਆ ਕੇ ਦੱਸਿਆ ਕਿ ਸਾਡੀ ਲੜਕੀ ਨੂੰ ਜਸਕਰਨ ਸਿੰਘ ਉਰਫ ਮੋਜੂ ਪੁੱਤਰ ਸੁਰੇਸ ਕੁਮਾਰ ਵਾਸੀ ਸੱਲਾਂ ਰੋਡ ਟਾਂਡਾ ਜਿਲਾ ਹੁਸਿਆਰਪੁਰ ਆਪਣੇ ਮੋਟਰਸਾਈਕਲ ਤੇ ਬਿਠਾ ਕੇ ਕਿਧਰੇ ਲਿਜਾ ਰਿਹਾ ਸੀ ਜਿਸ ਤੇ ਉਸਨੇ ਆਪਣੀ ਲੜਕੀ ਨੂੰ ਪੁਛਿਆ ਜਿਸਤੇ ਉਸਨੇ ਦੱਸਿਆ ਕਿ ਜਸਕਰਨ ਸਿੰਘ ਉਕਤ ਮੇਰਾ ਇੱਕ ਮਹੀਨੇ ਤੋਂ ਪਿੱਛਾ ਕਰ ਰਿਹਾ ਹੈ। ਜਿਸ ਨੇ ਮੈਨੂੰ ਆਪਣੀਆਂ ਗੱਲਾਂ ਵਿੱਚ ਲੈ ਕੇ ਦੋਸਤੀ ਕਰ ਲਈ ਸੀ ਤੇ ਮੈਨੂੰ ਮਿਲਣ ਲਈ ਕਹਿਣ ਲੱਗਾ ਤੇ ਮੈਨੂੰ ਬਦਨਾਮ ਕਰਨ ਦੀਆਂ ਧਮਕੀਆ ਦੇਣ ਲੱਗਾ ਸੀ। ਮਿਤੀ 29/07/22 ਨੂੰ ਜਸਕਰਨ ਸਿੰਘ ਉਰਫ ਮੋਜੂ ਨੇ ਪੀੜਤ ਲੜਕੀ ਨੂੰ ਆਪਣੀ ਗੱਲਾਂ ਵਿੱਚ ਲੈ ਲਿਆ ਤੇ ਆਪਣੇ ਘਰ ਦੇ ਸਾਹਮਣੇ ਵਾਲੇ ਪਲਾਟ ਵਿੱਚ ਲੈ ਗਿਆ।ਜਿੱਥੇ ਜਸਕਰਨ ਸਿੰਘ ਨੇ ਨਬਾਲਿਗਾ ਨਾਲ ਜਬਰਦਸਤੀ ਰੇਪ ਕੀਤਾ ।ਜਿਸ ਤੇ ਉਕਤ ਦੋਸ਼ੀ ਖਿਲਾਫ ਅਧੀਨ ਧਾਰਾ 376,354-D,506 IPC 4POSCO ACT ਤਹਿਤ ਮੁਕੱਦਮਾ ਦਰਜ ਕੀਤਾ ਗਿਆ

ਬਲੌਜ਼ਮਜ਼ ਕਾਨਵੈਂਟ ਸਕੂਲ ਦੇ ਬੱਚਿਆਂ ਨੇ ਸਿੱਖੇ ਪੈਨਸਿਲ ਸਟੈਂਡ ਬਣਾਉਣੇ

ਜਗਰਾਉ 6 ਅਗਸਤ (ਅਮਿਤਖੰਨਾ): ਬਲੌਜ਼ਮਜ਼ ਕਾਨਵੈਂਟ ਸਕੂਲ ਦੇ ਯੂ.ਕੇ.ਜੀ ਜਮਾਤ ਦੇ ਬੱਚਿਆਂ ਵੱਲੋਂ ਵੱਖ-ਵੱਖ ਰੰਗ-ਬਿਰੰਗੇ ਪੇਪਰਾਂ ਦੀ ਵਰਤੋਂ ਕਰਕੇ ਵੱਖੋ-ਵੱਖਰੇ ਢੰਗ ਦੇ ਪੈਨਸਿਲ ਸਟੈਂਡ ਬਣਾਏ। ਇਸਦੇ ਨਾਲ ਹੀ ਅਧਿਆਪਕਾਂ ਨੇ ਬੱਚਿਆਂ ਨੂੰ ਇਹਨਾਂ ਦੀ ਵਰਤੋਂ ਕਰਨੀ ਵੀ ਸਿਖਾਈ। ਬੱਚਿਆਂ ਦੀ ਇਸ ਗਤੀਵਿਧੀ ਲਈ ਉਤਸੁਕਤਾ ਉਹਨਾਂ ਦੇ ਚਿਹਰਿਆਂ ਤੇ ਝਲਕ ਰਹੀ ਸੀ। ਇਸ ਮੌਕੇ ਸਕੂਲ ਦੇ ਪ੍ਰਿੰਸੀਪਲ ਡਾ:ਅਮਰਜੀਤ ਕੌਰ ਨਾਜ਼ ਨੇ ਕਿਹਾ ਕਿ ਇਹਨਾਂ ਛੋਟੀਆਂ-ਛੋਟੀਆਂ ਗਤੀਵਿਧੀਆਂ ਦੇ ਜ਼ਰੀਏ ਹੀ ਅਸੀਂ ਬੱਚਿਆਂ ਦੇ ਅੰਦਰ ਛੁਪੀ ਕਲਾ ਨੂੰ ਨਿਖਾਰ ਕੇ ਬਾਹਰ ਲਿਆ ਸਕਦੇ ਹਾਂ। ਇਹੋ ਜਿਹੀਆਂ ਕਲਾਵਾਂ ਉਹਨਾਂ ਦੇ ਜੀਵਨ ਵਿਚ ਬਹੁਤ ਹੀ ਮਹੱਤਤਾ ਰੱਖਦੀਆਂ ਹਨ। ਬੱਚੇ ਆਪਣੇ ਅੰਦਰਲੇ ਕਲਾਕਾਰ ਨੂੰ ਖੁਦ ਪਹਿਚਾਨਣਾ ਸਿੱਖਦੇ ਹਨ। ਉਹਨਾਂ ਨੇ ਬੱਚਿਆਂ ਦੁਆਰਾ ਕੀਤੀ ਇਸ ਕੋਸ਼ਿਸ਼ ਦੀ ਸ਼ਲਾਘਾ ਵੀ ਕੀਤੀ। ਇਸ ਮੌਕੇ ਸਕੂਲ ਦੀ ਮੈਨੇਜਿੰਗ ਕਮੇਟੀ ਦੇ ਪ੍ਰੈਜ਼ੀਡੈਂਟ ਸ:ਮਨਪ੍ਰੀਤ ਸਿੰਘ ਬਰਾੜ ਅਤੇ ਸ:ਅਜਮੇਰ ਸਿੰਘ ਰੱਤੀਆਂ ਵੀ ਹਾਜ਼ਰ ਸਨ।

ਸਪਰਿੰਗ ਡਿਊ ਵਿੱਚ ਤੀਆਂ ਦੀਆਂ ਰੋਣਕਾਂ

ਜਗਰਾਉ 6 ਅਗਸਤ (ਅਮਿਤਖੰਨਾ): ਨਾਨਕਸਰ ਸਥਿੱਤ ਸਪਰਿੰਗ ਡਿਊ ਪਬਲਿਕ ਸਕੂਲ ਵਿਖੇ ਤੀਆਂ ਦੀਆਂ ਰੋਣਕਾਂ ਲਗਾਈਆਂ ਗਈਆ। ਇਸ ਸਮਾਗਮ ਦੀ ਸ਼ੁਰੂਆਤ ਪ੍ਰਿੰਸੀਪਲ ਨਵਨੀਤ ਚੌਹਾਨ ਦੇ ਸੰਬੋਧਨ ਨਾਲ ਕੀਤੀ ਗਈ। ਆਏ ਮਹਿਮਾਨਾਂ ਨੂੰ ਸੰਬੋਧਿਤ ਕਰਦਿਆਂ ਉਹਨਾਂ ਨੇ ਕਿਹਾ ਕਿ ਇਹ ਤਿਉਹਾਰ ਸਾਡੇ ਪੰਜਾਬੀ ਸੱਭਿਆਚਾਰ ਦੀ ਪਹਿਚਾਣ ਹੈ। ਪਿੱਛਲੇ ਸਾਲਾਂ ਵਿੱਚ ਬੇਸ਼ੱਕ ਕੋਵਿਡ ਕਾਰਨ ਇਹ ਤਿਉਹਾਰ ਸਕੂਲਾਂ ਵਿੱਚ ਨਹੀਂ ਮਨਾਇਆ ਜਾ ਸਕਿਆ ਪਰ ਇਸ ਸਾਲ ਵਿਿਦਆਰਥੀਆਂ ਵਿੱਚ ਪੂਰਾ ਜੋਸ਼ ਹੈ।ਅਧਿਆਪਕ ਵਿਿਦਆਰਥੀਆਂ ਦੇ ਨਾਲ-ਨਾਲ ਇਸ ਸਾਲ ਮਾਤਾਪਿਤਾ ਵਲੋਂ ਵੀ ਇਸ ਵਿੱਚ ਹਿੱਸਾ ਲਿਆ ਗਿਆ।ਮੰਚ ਸੰਚਾਲਨ ਮੈਡਮ ਬਲਜੀਤ ਕੌਰ ਨੇ ਕੀਤਾ।ਚਾਰੋ ਹਾਊਸ ਦੇ ਇੰਚਾਰਜ ਸਾਹਿਬਾਨਾਂ ਨਾਲ ਮਿਲ ਕੇ ਪੂਰੇ ਸਕੂਲ ਨੂੰ ਫੁਲਕਾਰੀਆਂ, ਪੱਖੀਆਂ, ਚਰਖੇ ਆਦਿ ਪੰਜਾਬੀ ਸੱਭਿਆਚਾਰ ਸਾਮਾਨ ਨਾਲ ਸਜਾਇਆ ਗਿਆ ਅਤੇ ਸਕੂਲ ਨੂੰ ਇੱਕ ਵੱਖਰੀ ਹੀ ਦਿਖ ਦਿੱਤੀ ਗਈ।ਇਸ ਮੌਕੇ ਤੇ ਮਹਿੰਦੀ ਲਗਾਉਣ ਦੇ ਮੁਕਾਬਲੇ, ਪਰਾਦਾਂ ਮੁਕਾਬਲਾ, ਸੱਭਿਆਚਾਰਕ ਗੀਤਾਂ ਦੇ ਮੁਕਾਬਲੇ ਕਰਵਾਏ ਗਏ।ਵਿਿਦਆਰਥਣਾਂ ਨੇ ਪੂਰੇ ਪੰਜਾਬੀ ਪਹਿਰਾਵੇ ਵਿੱਚ ਪੰਜਾਬੀ ਸੱਭਿਆਚਾਰ ਦੀ ਝਲਕ ਪੇਸ਼ ਕੀਤੀ ਗਈ। ਵਾਇਸ ਪ੍ਰਿੰਸੀਪਲ ਬੇਅੰਤ ਕੁਮਾਰ ਨੇ ਸਾਰੇ ਵਿਿਦਆਰਥੀਆਂ, ਅਧਿਆਪਕਾਂ ਅਤੇ ਮਾਤਾਪਿਤਾ ਸਾਹਿਬਾਨ ਨੂੰ ਵਧਾਈ ਦਿੱਤੀ ਅਤੇ ਕਿਹਾ ਕਿ ਸਾਨੂੰ ਸਾਰੀਆਂ ਨੂੰ ਮਿਲ ਕੇ ਆਪਣੇ ਪੁਰਾਤਨ ਸੱਭਿਆਚਾਰ ਨੂੰ ਪੂਰੇ ਵਿਸ਼ਵ ਵਿੱਚ ਫੈਲਾਨਾ ਚਾਹੀਦਾ ਹੈ।ਇਸ ਮੌਕੇ ਵੱਖ-ਵੱਖ ਮੁਕਾਬਲਿਆਂ ਵਿੱਚ ਜੇਤੂ ਵਿਿਦਆਰਥਣਾਂ ਨੂੰ ਮੈਡਮ ਮੋਨਿਕਾ, ਮੈਡਮ ਅਮ੍ਰਿਤਪਾਲ ਕੌਰ ਅਤੇ ਕੋਮਲ ਛਾਬੜਾ ਵਲੋਂ ਸਨਮਾਨਿਤ ਕੀਤਾ ਗਿਆ। ਅੱਜ ਦੀ ਮਿਸ ਤੀਜ ਹਰਮਨਦੀਪ ਕੌਰ, ਦੂਜੇ ਨੰਬਰ ਤੇ ਨਵਜੋਤ ਕੌਰ, ਤੀਜੇ ਨੰਬਰ ਤੇ ਨਾਜਪ੍ਰੀਤ ਕੌਰ, ਮਹਿੰਦੀ ਮੁਕਾਬਲੇ ਵਿੱਚ ਪਹਿਲੇ ਨੰਬਰ ਤੇ ਸੁਪਨੀਤ ਕੌਰ, ਦੂਜੇ ਨੰਬਰ ਤੇ ਨਵਦੀਪ ਕੌਰ, ਤੀਜੇ ਨੰਬਰ ਤੇ ਖੁਸ਼ਦੀਪਕੌਰ, ਪਰਾਦੇਂ ਮੁਕਾਬਲੇ ਵਿੱਚ ਪਹਿਲੇ ਨੰਬਰ ਤੇ ਵੀਰਪ੍ਰੀਤ ਕੌਰ, ਦੂਜੇ ਨੰਬਰ ਤੇ ਗੁਰਮੀਤ ਕੌਰ, ਤੀਜੇ ਨੰਬਰ ਤੇ ਨਾਜਪ੍ਰੀਤ ਕੌਰ,ਵਿਿਦਆਰਥਣਾਂ ਜੇਤੂ ਰਹੀਆਂ। ਇਸ ਮੌਕੇ ਤੇ ਚੇੇਅਰਮੈਨ ਬਲਦੇਵ ਬਾਵਾ, ਪ੍ਰਧਾਨ ਮਨਜੋਤ ਕੁਮਾਰ, ਮੈਨੇਜਿੰਗ ਡਾਇਰੈਕਟਰ ਸੁਖਵਿੰਦਰ ਸਿੰਘ, ਮੈਨੇਜਰ ਮਨਦੀਪ ਦੇ ਨਾਲ ਸਮੂਹ ਸਟਾਫ ਹਾਜਿਰ ਸੀ। ਪ੍ਰਬੰਧਕੀ ਕਮੇਟੀ ਵਲੋਂ ਸਕੂਲ ਦੇ ਇਸ ਉਪਰਾਲੇ ਦੀ ਸ਼ਲਾਘਾ ਕੀਤੀ ਗਈ ਕਿ ਿਵਦਿਆਰਥੀਆਂ ਨੂੰ ਉਚੇਰੀ ਪੜਾਈ ਦੇ ਨਾਲ^ਨਾਲ ਪੰਜਾਬੀ ਸੱਭਿਆਚਾਰ ਬਾਰੇ ਵੀ ਸਕੂਲ ਵਲੋਂ ਪੂਰੀ ਜਾਣਕਾਰੀ ਦਿੱਤੀ ਜਾ ਰਹੀ ਹੈ।ਇਸ ਸਮਾਗਮ ਵਿੱਚ ਸ਼ਿਰਕਤ ਕਰਨ ਵਾਲੇ ਮਾਤਾਪਿਤਾ ਸਾਹਿਬਾਨ ਵਲੋਂ ਵੀ ਇਸ ਸੱਭਿਆਚਾਰਕ ਪ੍ਰੋਗਰਾਮ ਦਾ ਆਨੰਦ ਮਾਣਿਆ ਗਿਆ ਅਤੇ ਸਮੂਹ ਸਟਾਫ ਦੇ ਨਾਲ^ਨਾਲ ਵਿਿਦਆਰਥੀਆਂ ਨੂੰ ਵਧਾਈ ਦਿੱਤੀਗਈ।

ਰੂਪ ਵਾਟਿਕਾ ਸਕੂਲ ਵਿੱਚ ਮਨਾਇਆ ਗਿਆ ਦਸਵੀਂ ਤੇ ਬਾਰ੍ਹਵੀਂ ਜਮਾਤ ਦਾ ਇਨਾਮ ਵੰਡ ਸਮਾਰੋਹ

ਜਗਰਾਉ 6 ਅਗਸਤ (ਅਮਿਤਖੰਨਾ): ਰੂਪ ਵਾਟਿਕਾ ਸਕੂਲ ਵਿੱਚ ਬਾਰ੍ਹਵੀਂ ਅਤੇ ਦਸਵੀਂ ਜਮਾਤ ਦੇ ਵਿਦਿਆਰਥੀਆਂ ਦਾ ਇਨਾਮ ਵੰਡ ਸਮਾਰੋਹ ਕਰਵਾਇਆ ਗਿਆ ਦਸਵੀਂ ਅਤੇ ਬਾਰ੍ਹਵੀਂ ਦੇ ਸ਼ਾਨਦਾਰ ਨਤੀਜੇ ਆਉਣ ਲਈ ਬੱਚਿਆਂ ਨੂੰ ਇਨਾਮ ਵੰਡਣ ਲਈ ਸਕੂਲ ਦੇ ਪ੍ਰਧਾਨ ਰਮੇਸ਼ ਜੈਨ ਸਕੂਲ ਦੇ ਮੈਨੇਜਰ ਧਰਮਪਾਲ ਜੈਨ ਸਕੂਲ ਦੇ ਸੈਕਟਰੀ ਵਿਜੇ ਜੈਨ ਅਤੇ ਸਵਾਮੀ ਰੂਪ ਚੰਦ ਸਕੂਲ ਦੇ ਪ੍ਰਿੰਸੀਪਲ ਰਾਜਪਾਲ ਕੌਰ ਰੂਪ ਵਾਟਿਕਾ ਸਕੂਲ ਦੇ ਪ੍ਰਿੰਸੀਪਲ ਵਿੰਮੀ ਠਾਕੁਰ ਇਸ ਇਨਾਮ ਵੰਡ ਸਮਾਰੋਹ ਵਿੱਚ ਸ਼ਾਮਲ ਹੋਏ ਇਸ ਵਿੱਚ ਬਾਰ੍ਹਵੀਂ ਕਲਾਸ ਦੀ ਕਾਮਰਸ ਵਿਚੋਂ ਭੂਮੀ ਜੈਨ ਪਹਿਲੇ ਨੰਬਰ ਤੇ ਗੌਰਵ ਗੋਇਲ ਦੂਜੇ ਸਥਾਨ ਤੇ ਚਾਹਤ ਤੀਸਰੇ ਸਥਾਨ ਤੇ ਰਹੀ ਬਾਰ੍ਹਵੀਂ ਆਰਟਸ ਵਿਚੋਂ ਦਿਵਿਅਮ ਜੋਤ ਕੌਰ ਪਹਿਲੇ ਸਥਾਨ ਤੇ ਰਮਣੀਕ ਵਰਮਾ ਦੂਜੇ ਸਥਾਨ ਤੇ ਅਤੇ ਤੀਸਰੇ ਸਥਾਨ ਤੇ ਖੁਸ਼ਬੂ ਜੈਨ ਰਹੀ ਨਾਲ ਹੀ ਨੌਨ ਮੈਡੀਕਲ ਵਿੱਚੋਂ ਪਹਿਲੇ ਨੰਬਰ ਤੇ ਰਣਵੀਰ ਸਿੰਘ ਦੂਜੇ ਨੰਬਰ ਤੇ ਗੋਕੁਲ ਕਪੂਰ ਅਤੇ ਮੈਡੀਕਲ ਵਿੱਚੋਂ ਪਹਿਲੇ ਨੰਬਰ ਤੇ ਅਨਮੋਲ ਬਾਂਸਲ ਰਹੇ ਇਸੇ ਤਰ੍ਹਾਂ ਹੀ ਦਸਵੀਂ ਜਮਾਤ ਦੇ ਅਮਨੀਤ ਕੌਰ ਪਹਿਲੇ ਨੰਬਰ ਤੇ ਸਾਕਸ਼ੀ ਦੂਜੇ ਨੰਬਰ ਤੇ ਹਿਮਾਂਸ਼ੀ ਤੀਸਰੇ ਨੰਬਰ ਤੇ ਰਹੀ ਕੁਝ ਬੱਚੇ ਜਿਨ੍ਹਾਂ ਨੂੰ ਐਸਪੀਰੇਸ਼ਨ ਐਵਾਰਡ ਦਿੱਤੇ ਗਏ ਜਿਨ੍ਹਾਂ ਵਿੱਚੋਂ ਬਬੀਤਾ ਕੈਂਟ ਪਲਕ ਸਾਇਆ ਵਰਮਾ ਅੰਸ਼ੁਲ ਅਤੇ ਨਵਨੀਤ ਕੌਰ ਨੂੰ ਵੀ ਸਨਮਾਨਿਤ ਕੀਤਾ ਗਿਆ ਸਕੂਲ ਦੇ ਪ੍ਰਿੰਸੀਪਲ ਵਿੰਮੀ ਠਾਕੁਰ ਮੈਨੇਜਮੈਂਟ ਤੇ ਸਵਾਮੀ ਰੂਪ ਚੰਦ ਜੈਨ ਸਕੂਲ ਦੇ ਪ੍ਰਿੰਸੀਪਲ ਰਾਜਪਾਲ ਕੌਰ ਨੇ ਬੱਚਿਆਂ ਨੂੰ ਐਵਾਰਡ ਨਾਲ ਸਨਮਾਨਿਤ ਕੀਤਾ ਸਕੂਲ ਦੇ ਮੈਨੇਜਮੈਂਟ ਮੈਂਬਰਾਂ ਇਸ ਉਪਲਬਧੀ ਤੇ ਸਕੂਲ ਦੀ ਪ੍ਰਿੰਸੀਪਲ ਵਿੰਮੀ ਠਾਕੁਰ ਨੂੰ ਵਧਾਈ ਦਿੱਤੀ ਤੇ ਬੱਚਿਆਂ ਨੂੰ ਆਉਣ ਵਾਲੇ ਸਮੇਂ ਵਿੱਚ ਹੋਰ ਮਿਹਨਤ ਕਰਨ ਲਈ ਕਿਹਾ ਅੰਤ ਵਿਚ ਸਕੂਲ ਦੇ ਪ੍ਰਿੰਸੀਪਲ ਵਿੰਮੀ ਠਾਕੁਰ ਨੇ ਬੱਚਿਆਂ ਨੂੰ ਵਧਾਈ ਦਿੱਤੀ ਤੇ ਆਉਣ ਵਾਲੇ ਸਮੇਂ ਵਿੱਚ ਬਾਕੀ ਬੱਚਿਆਂ ਨੂੰ ਵੀ ਚੰਗੇ ਨੰਬਰ ਲੈਣ ਲਈ ਪ੍ਰੇਰਿਤ ਕੀਤਾ

ਬਟਾਲੇ ਵਾਲ਼ਾ ਰੋਡ ✍️ ਰਮੇਸ਼ ਕੁਮਾਰ ਜਾਨੂੰ

ਪਾ ਲੈ ਘੁੱਟ ਕੇ ਤੂੰ ਲੱਕ ਨੂੰ ਕਲਾਵਾ
ਬਟਾਲੇ ਵਾਲ਼ਾ ਰੋਡ ਆ ਗਿਆ
ਤੇਰੇ ਨਾਲ ਮੈਂ ਹੁਲਾਰੇ ਪਿਆ ਖਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ

ਕਦੋਂ ਦੀਆਂ ਟੁੱਟੀਆਂ ਨੇ ਸ਼ਹਿਰ ਦੀਆਂ ਸੜਕਾਂ
ਮਿੱਟੀ ਘੱਟਾ ਉੱਡੇ ਪੈਣ ਅੱਖਾਂ ਵਿੱਚ ਰੜਕਾਂ
ਨੀ ਲੱਗੇ ਝੱਟਕਾ ਬਰੇਕ ਜਦੋਂ ਲਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ-----

ਟੋਇਆਂ ਵਿੱਚ ਵੱਜਨ ਤੋਂ ਕਿੰਨਾ ਕੁ ਮੈਂ ਬਚਦਾ
ਸਾਜ਼ ਤੋਂ ਬਿਨਾਂ ਹੀ ਇੱਥੇ,ਮੈਂ ਵੀ ਫਿਰਾਂ ਨੱਚਦਾ
ਪਿੱਛੇ ਬੈਠੀ ਨੂੰ ਮੈਂ ਤੈਨੂੰ ਵੀ ਨਚਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ-----

ਸੜਕਾਂ ਤੇ ਡੂੰਘੇ ਕੁਝ ਇਹੋ ਜਿਹੇ ਟੋਏ ਨੀ
ਨੇਰ੍ਹੇ ਵਿੱਚ ਛੱਡੋ ਉਹ ਤਾਂ ਲੱਭਦੇ ਨਾ ਲੋਏ ਨੀ
ਖੱਬੇ ਜਾਂਦਾ-ਜਾਂਦਾ ਸੱਜੇ ਹੋਈ ਜਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ-----

ਖੋਰੇ ਕਿਹੜੀ ਗੱਲੋਂ ਕੀਤੇ ਰੋਡ ਕਈ ਬੰਦ ਨੇ
ਯੂ ਟਰਨ ਲੈਂਦੇ ਜਿਹੜੇ ਹੁੰਦੇ ਬੜਾ ਤੰਗ ਨੇ
ਦੇ ਵੀਂ ਹੱਥ ਮੈਂ ਵੀ ਹੈਂਡਲ ਘੁੰਮਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ-----

ਗਟਰ ਨੇ ਖੁੱਲ੍ਹੇ, ਖੜ੍ਹਾ ਸ਼ੜਕਾਂ ਤੇ ਪਾਣੀ ਏ
ਕਾਗ਼ਜ਼ਾਂ 'ਚ' ਲਿਖੀ ਹੋਈ ਝੂਠੀ ਜਿਹੀ ਕਹਾਣੀ ਏ
ਕਿਵੇਂ ਛੇਤੀ ਤੈਨੂੰ ਘਰ ਮੈਂ ਪਚਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ-----

ਚੁੰਨੀ ਨਾਲ ਨੱਕ ਘੁੱਟ,ਲਾ ਨਾ ਬਹੁਤੀ ਦੇਰ ਨੀ
ਥਾਂ ਥਾਂ ਤੇ ਲੱਗੇ ਇੱਥੇ ਗੰਦਗੀ ਦੇ ਢੇਰ ਨੀ
ਮੈਂ ਵੀ ਮਾਸਕ ਨੂੰ ਮੂੰਹ ਤੇ ਚੜਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ-----

ਨਸ਼ਿਆਂ ਵੀ ਕੀਤੇ 'ਜਾਨੂੰ' ਇਹਦੇ ਮਾੜੇ ਹਾਲ ਨੇ
ਰੋਕਨਾ ਏ ਜਿੰਨ੍ਹਾਂ ਓਵੀ ਰਲ਼ੇ ਹੋਏ ਨਾਲ ਨੇ
ਗੱਲਾਂ ਘਰ ਜਾ ਕੇ ਹੋਰ ਵੀ ਸੁਣਾਵਾਂ
ਬਟਾਲੇ ਵਾਲ਼ਾ ਰੋਡ ਆ ਗਿਆ-----
ਲੇਖਕ-ਰਮੇਸ਼ ਕੁਮਾਰ ਜਾਨੂੰ
ਫੋਨ ਨੰ:-98153-20080

ਬਲੈਕਮੇਲਿੰਗ ਦੇ ਜਾਲ ਤੋਂ ਬਚਣ ਲਈ ਆਪਣੇ ਡਰ ਦਾ ਸਾਹਮਣਾ ਕਰੋ

ਮਨੁੱਖ ਗਲਤੀਆਂ ਦਾ ਪੁਤਲਾ ਹੈ ਅਤੇ ਜਾਣੇ-ਅਣਜਾਣੇ, ਸਿੱਧੇ-ਅਸਿੱਧੇ ਰੂਪ ਵਿੱਚ ਗਲਤੀਆਂ ਹੋ ਜਾਂਦੀਆਂ ਹਨ ਪਰੰਤੂ ਉਹਨਾਂ ਗਲਤੀਆਂ ਦੀ ਆੜ ਵਿੱਚ ਦੂਜੇ ਵਿਅਕਤੀ ਦੁਆਰਾ ਤੁਹਾਨੂੰ ਆਪਣੇ ਹਿੱਤ ਪੂਰਨ ਲਈ ਜ਼ਬਰਦਸਤੀ ਮਜ਼ਬੂਰ ਕਰਨਾ ਬਲੈਕਮੇਲਿੰਗ ਦੇ ਸਿਰਲੇਖ ਅਧੀਨ ਆਉਂਦਾ ਹੈ। ਸਮਾਜ ਦੇ ਵੱਖੋ ਵੱਖਰੇ ਕੋਨਿਆਂ ਵਿੱਚ ਔਨਲਾਇਨ ਅਤੇ ਔਫਲਾਇਨ, ਸਿੱਧੇ ਅਸਿੱਧੇ ਢੰਗਾਂ ਨਾਲ ਬਲੈਕਮੇਲਿੰਗ ਦਾ ਧੰਦਾ ਵੱਧ-ਫੁੱਲ ਰਿਹਾ ਹੈ ਅਤੇ ਨਾ ਜਾਣੇ ਕਿੰਨੇ ਹੀ ਇਸ ਗੋਰਖਧੰਦੇ ਦਾ ਸ਼ਿਕਾਰ ਹੋਏ ਪੀੜਤ ਲੋਕ ਘੁੱਟਣ ਭਰੀ, ਡਰਾਉਣੀ, ਬੇਬਸ ਤੇ ਅੰਦਰੋਂ ਅੰਦਰੀ ਘਿਨੌਣੀ ਜ਼ਿੰਦਗੀ ਜੀਅ ਰਹੇ ਹਨ।

ਬਲੈਕਮੇਲਿੰਗ ਜ਼ਬਰਦਸਤੀ ਦਾ ਇੱਕ ਢੰਗ ਹੈ ਜਿਸ ਵਿੱਚ ਕਿਸੇ ਵਿਅਕਤੀ ਜਾਂ ਲੋਕਾਂ ਦੇ ਵਰਗ ਨੂੰ ਉਹਨਾਂ ਬਾਰੇ ਪੂਰੀ ਤਰ੍ਹਾਂ ਨਾਲ ਸੱਚੀ ਜਾਂ ਗਲਤ ਜਾਣਕਾਰੀ ਨੂੰ ਜਾਰੀ ਕਰਨ, ਜਨਤਕ ਕਰਨ ਦੀ ਧਮਕੀ ਦਿੱਤੀ ਜਾਂਦੀ ਹੈ ਜਦੋਂ ਤੱਕ ਕਿ ਬਲੈਕਮੇਲਰ ਦੀ ਮੰਗ ਪੂਰੀ ਨਹੀਂ ਕੀਤੀ ਜਾਂਦੀ। ਇਹ ਆਮਤੌਰ ਤੇ ਹਾਨੀਕਾਰਕ ਜਾਣਕਾਰੀ ਹੁੰਦੀ ਹੈ ਜਿਸ ਦਾ ਪੀੜਤ ਦੇ ਮਾਨਸਿਕ, ਵਿਅਕਤੀਗਤ, ਸਮਾਜਿਕ ਜੀਵਨ, ਆਰਥਿਕਤਾ, ਰੁਜ਼ਗਾਰ ਆਦਿ ਤੇ ਮਾੜਾ ਪ੍ਰਭਾਵ ਪੈਣ ਦਾ ਖਦਸ਼ਾ ਹੁੰਦਾ ਹੈ, ਉਸਨੂੰ ਨੁਕਸਾਨਿਆ ਜਾ ਸਕਦਾ ਹੈ ਅਤੇ ਕਈ ਹਾਲਤਾਂ ਵਿੱਚ ਉਸ ਉੱਪਰ ਅਪਰਾਧਿਕ ਮਾਮਲਾ ਬਣਨ ਅਤੇ ਸਜ਼ਾ ਦਾ ਮੁੱਢ ਬਣ ਸਕਦੀ ਹੈ।

ਬਲੈਕਮੇਲਿੰਗ ਕਰਨ ਵਾਲੇ ਬਲੈਕਮੇਲਰ ਲੋਕਾਂ ਨੂੰ ਮਜ਼ੂਬਰ ਕਰਕੇ ਉਹਨਾਂ ਤੋਂ ਪੈਸੇ, ਸੰਸਾਧਨ ਅਤੇ ਰੁਤਵੇ ਹੰਢਾ ਰਹੇ ਹਨ ਅਤੇ ਔਰਤਾਂ ਦੇ ਮਾਮਲੇ ਵਿੱਚ ਤਾਂ ਬਲੈਕਮੇਲਰਾਂ ਦੁਆਰਾ ਹੋਰ ਨਿੱਜੀ ਮੁਫ਼ਾਦਾ ਨਾਲ ਨਾਲ ਸਰੀਰਕ ਸ਼ੋਸਣ ਆਮ ਵਰਤਾਰਾ ਹੈ। ਬਲੈਕਮੇਲਰਾਂ ਦੁਆਰਾ ਹੱਦੋਂ ਵੱਧ ਪ੍ਰਤਾੜਿਤ ਕਰਨ ਤੇ ਕਈ ਵਾਰ ਮਜ਼ਬੂਰ ਵਿਅਕਤੀ ਦੀ ਮਾਨਸਿਕ ਮਨੋਦਸ਼ਾ ਅਜਿਹੀ ਸਥਿਤੀ ਵਿੱਚ ਜਾ ਰਹਿੰਦੀ ਹੈ ਕਿ ਉਹ ਆਪਣੇ ਡਰ ਦਾ ਮੁਕਾਬਲਾ ਨਹੀਂ ਕਰ ਪਾਉਂਦਾ ਤੇ ਆਤਮਹੱਤਿਆ ਕਰ ਲੈਂਦਾ ਹੈ।

ਜੇਕਰ ਤੁਹਾਨੂੰ ਕੋਈ ਬਲੈਕਮੇਲ ਕਰ ਰਿਹਾ ਹੈ ਤਾਂ ਸਭ ਤੋਂ ਪਹਿਲਾਂ ਆਪਣੇ ਡਰ ਦਾ ਸਾਹਮਣਾ ਕਰਨਾ ਚਾਹੀਦਾ ਹੈ ਕਿਉਂਕਿ ਕਈ ਵਾਰ ਸਾਡਾ ਡਰ ਅਸਲ ਵਿੱਚ ਉਸ ਬਲੈਕਮੇਲਿੰਗ ਤੋਂ ਵੱਡਾ ਹੋ ਨਿਬੜਦਾ ਹੈ ਅਤੇ ਦਿਨ-ਬ-ਦਿਨ ਤੁਹਾਨੂੰ ਮਾਨਸਿਕ ਤਣਾਅ ਦੀ ਅਜਿਹੀ ਉਲਝਣ ਵਿੱਚ ਫਸਾ ਛੱਡਦਾ ਹੈ ਕਿ ਉਸਤੋਂ ਬਾਹਰ ਆਉਣਾ ਤੁਹਾਡੇ ਲਈ ਹੋਰ ਔਖਾ ਹੁੰਦਾ ਜਾਂਦਾ ਹੈ। ਇਸ ਦੀ ਕੀ ਗਾਰੰਟੀ ਹੈ ਕਿ ਜਦੋਂ ਤੱਕ ਬਲੈਕਮੇਲਰ ਦੀ ਮੰਗ ਪੂਰੀ ਕਰਦੇ ਰਹੋਗੇ ਤਾਂ ਉਦੋਂ ਤੱਕ ਉਹ ਚੁੱਪ ਰਹੇਗਾ ਅਤੇ ਉਸਤੋਂ ਬਾਅਦ ਫੇਰ? ਸਮੱਸਿਆ ਦਾ ਪਰਨਾਲਾ ਤਾਂ ਉੱਥੇ ਦਾ ਉੱਥੇ ਹੀ ਹੈ। ਸਮੇਂ ਨਾਲ ਬਲੈਕਮੇਲਰ ਦੀ ਲਾਲਸਾ ਵੱਧਣ ਦੀ ਸੰਭਾਵਨਾ ਜ਼ਿਆਦਾ ਹੈ ਅਤੇ ਤੁਸੀਂ ਸਹਿਮ ਦੇ ਅਜਿਹੇ ਤਣਾਅਪੂਰਨ ਮਾਹੌਲ ਵਿੱਚ ਮਾਨਸਿਕ ਰੋਗੀ ਦੀ ਸਥਿਤੀ ਵਿੱਚ ਵੀ ਜਾ ਸਕਦੇ ਹੋ।

ਭਾਰਤੀ ਦੰਡ ਸੰਹਿਤਾ,1860 ਦੀ ਧਾਰਾ 384 ਤਹਿਤ ਬਲੈਕਮੇਲਿੰਗ ਇੱਕ ਗੰਭੀਰ ਅਪਰਾਧ ਹੈ। ਜੇਕਰ ਕੋਈ ਬਲੈਕਮੇਲ ਕਰਦਾ ਹੈ ਤਾਂ ਜ਼ਰੂਰੀ ਹੋਣ ਤੇ ਉਸ ਸੰਬੰਧੀ ਪੁਲਿਸ ਨੂੰ ਦਰਖਾਸਤ ਦਿੱਤੀ ਜਾ ਸਕਦੀ ਹੈ। ਬਲੈਕਮੇਲਰ ਦੀਆਂ ਨਜ਼ਾਇਜ਼ ਮੰਗਾਂ ਮੰਨਕੇ, ਚੁੱਪ ਰਹਿ ਕੇ, ਸ਼ੋਸ਼ਣ ਸਹਿ ਕੇ ਉਸਦੇ ਨਾਪਾਕ ਇਰਾਦਿਆਂ ਨੂੰ ਮਜ਼ਬੂਤੀ ਨਹੀਂ ਦੇਣੀ ਚਾਹੀਦੀ।

ਉਤਾਰ ਚੜਾਅ ਜ਼ਿੰਦਗੀ ਦਾ ਹਿੱਸਾ ਹਨ, ਚੰਗੀਆਂ ਮਾੜੀਆਂ ਇਨਸਾਨਾਂ ਨਾਲ ਹੀ ਹੁੰਦੀਆਂ ਹਨ। ਬਲੈਕਮੇਲਿੰਗ ਦਾ ਸ਼ਿਕਾਰ ਹੋਣ ਤੋਂ ਬਿਹਤਰ ਹੈ ਕਿ ਆਪਣੇ ਵਿੱਚ ਹਿੰਮਤ ਜੁਟਾਉ ਅਤੇ ਆਪਣੇ ਡਰ ਅਤੇ ਆਪਣੇ ਵਿਰੋਧੀ ਸਥਿਤੀ ਦਾ ਸਾਹਮਣਾ ਕਰੋ। ਬਲੈਕਮੇਲਿੰਗ ਦਾ ਆਧਾਰ ਤੁਹਾਡੇ ਸੰਬੰਧੀ ਜਾਣਕਾਰੀ ਜਨਤਕ ਹੋਣ ਤੇ ਕਾਨੂੰਨ, ਪਰਿਵਾਰ ਜਾਂ ਸਮਾਜ ਦੀ ਨਜ਼ਰ ਵਿੱਚ ਸ਼ਰਮਿੰਦਾ ਜਾਂ ਦੋਸ਼ੀ ਸਾਬਿਤ ਹੋ ਸਕਦੇ ਹੋ, ਸੱਚੀ ਜਾਂ ਝੂਠੀ ਸਜ਼ਾ ਮਿਲ ਸਕਦੀ ਹੈ ਪਰੰਤੂ ਤੁਸੀਂ ਆਤਮਿਕ ਤੌਰ ਤੇ ਜ਼ਰੂਰ ਦ੍ਰਿੜ ਹੋਵੋਗੇ ਅਤੇ ਬਲੈਕਮੇਲਿੰਗ ਦੀ ਗਮਗੀਨ ਕੋਠੜੀ, ਅਪਰਾਧਬੋਧ ਵਿੱਚੋਂ ਜ਼ਰੂਰ ਬਾਹਰ ਨਿਕਲੋਗੇ।

ਆਪਣੀ ਜ਼ਿੰਦਗੀ ਨੂੰ ਆਪਣੀਆਂ ਸ਼ਰਤਾਂ ਦੇ ਜਿਊਣ ਦਾ ਮਾਦਾ ਰੱਖੋ ਤੇ ਜ਼ਿੰਦਗੀ ਨੂੰ ਕਿਸੇ ਵੀ ਮੋੜ ਤੇ ਨਵੇਂ ਸਿਰੇ ਤੋਂ ਸ਼ੁਰੂ ਕਰ ਸਕਦੇ ਹੋ ਕਿਉਂਕਿ ਰੋਜ਼ਾਨਾ ਚੜਦਾ ਸੂਰਜ ਸਾਨੂੰ ਇਹੋ ਸਿੱਖਿਆ ਦਿੰਦਾ ਹੈ ਕਿ ਰੋਜ਼ ਨਵਾਂ ਦਿਨ, ਜ਼ਿੰਦਗੀ ਨੂੰ ਨਵੀਂ ਸ਼ੁਰੂਆਤ ਦੇਣ ਦਾ ਸਮਾਂ ਹੈ।

ਗੋਬਿੰਦਰ ਸਿੰਘ ਢੀਂਡਸਾ

ਪਿੰਡ ਤੇ ਡਾਕ. ਬਰੜ੍ਹਵਾਲ (ਧੂਰੀ)

ਮੋਬਾਇਲ ਨੰਬਰ – 92560-66000

ਮੁਫਤ ਚੈਕ ਅੱਪ ਲਗਾਇਆ

ਹਠੂਰ,6,ਅਗਸਤ-(ਕੌਸ਼ਲ ਮੱਲ੍ਹਾ)- ਇਲਾਕੇ ਦੀ ਸ਼ਾਨ ਅਤੇ ਮਾਣ ਸੰਤ ਨਰਸੰਿਗ ਹੋਮ ਦੇ ਮੁੱਖੀ ਡਾ.ਹਰੀਸ਼ ਲੂਥਰਾ, ਡਾ: ਲਵ ਲੂਥਰਾ ਅਤੇ ਕੁੱਸ਼ ਲੂਥਰਾ ਨੇ ਡਾ:ਅਬੰਦੇਕਰ ਭਵਨ ਵਖਿੇ ‘ਵੈਰੀ ਕੋਜ਼’ ਨਾੜੀਆਂ ਦੇ ਇਲਾਜ ਲਈ ਮੁਫਤ ਚੈੱਕ ਅੱਪ ਕੈਂਪ ਦਾ ਆਯਜੋਨ ਕੀਤਾ ।ਇਸ ਕੈਂਪ ਵਿਚ ਬਹੁਤ ਸਾਰੀਆਂ ਬੀਮਾਰੀਆਂ ਦੇ ਮੁਫਤ ਚੈਕ ਅੱਪ ਕੀਤੇ ਗਏ ਅਤੇ ਹੋਰ ਬਹੁਤ ਸਾਰੀਆਂ ਬਮਿਾਰੀਆਂ ਪ੍ਰਤੀ ਸਾਰੇ ਮਰੀਜ਼ਾਂ ਨੂੰ ਜਾਗਰੂਕ ਵੀ ਕੀਤਾ ਗਆਿ। ਇਸ ਮੌਕੇ ਹਲਕਾ ਦਾਖਾ ਦੇ ਐ.ਐਲ.ਏ.ਮਨਪ੍ਰੀਤ ਸੰਿਘ ਇਆਲੀ ਅਤੇ ਆਪ ਪਾਰਟੀ ਦੇ ਹਲਕਾ ਇੰਚਾਰਜ ਏ.ਐੱਸ.ਕੰਗ ਵਿਸ਼ੇਸ ਤੌਰ ਤੇ ਹਾਜ਼ਰ ਹੋਏ।ਇਸ ਮੌਕੇ ਨੈਸਨਲ ਅਤੇ ਸਟੇਟ ਐਵਾਰਡ ਪ੍ਰਾਪਤ ਲੇਖਕ ਅਮਰੀਕ ਸਿੰਘ ਤਲਵੰਡੀ ਨੇ ਸਮੁੱਚੇ ਲੂਥਰਾ ਪਰਵਿਾਰ ਵੱਲੋਂ ਕੀਤੇ ਗਏ ਇਸ ਪਵੱਿਤਰ ਤੇ ਮਹਾਨ ਕਾਰਜ ਦੀ ਭਰਪੂਰ ਪ੍ਰਸ਼ੰਸ਼ਾ ਕੀਤੀ।ਇਸ ਮੌਕੇ ਅੰਬੇਡਕਰ ਮਸ਼ਿਨ ਵੈਲਫੇਅਰ ਸੁਸਾਇਟੀ ਨੇ ਇਸ ਕੈਂਪ ਦੀ ਸਫਲਤਾ ਲਈ ਭਰਪੂਰ ਸਹਯਿੋਗ ਦੱਿਤਾ।ਇਸ ਮੌਕੇ ਵੱਡੀ ਗਿਣਤੀ ਵਿਚ ਇਲਾਕਾ ਨਿਵਾਸੀ ਹਾਜ਼ਰ ਸਨ।

ਛਾਦਾਰ ਅਤੇ ਫਲਦਾਰ ਬੂਟੇ ਲਾਏ

ਹਠੂਰ,6,ਅਗਸਤ-(ਕੌਸ਼ਲ ਮੱਲ੍ਹਾ)-ਪੰਜਾਬ ਸਰਕਾਰ ਦੇ ਦਿਸਾ ਨਿਰਦੇਸਾ ਅਨੁਸਾਰ ਅੱਜ ਸਮੂਹ ਗ੍ਰਾਮ ਪੰਚਾਇਤ ਦੇਹੜਕਾ ਦੀ ਅਗਵਾਈ ਹੇਠ ਪਿੰਡ ਦੇਹੜਕਾ ਵਿਖੇ ਦੋ ਹਜ਼ਾਰ ਵੱਖ-ਵੱਖ ਕਿਸਮਾ ਦੇ ਬੂਟੇ ਲਾਏ ਗਏ।ਇਸ ਮੌਕੇ ਉਨ੍ਹਾ ਨਾਲ ਸਮੂਹ ਗ੍ਰਾਮ ਪੰਚਾਇਤ ਦੇਹੜਕਾ ਅਤੇ ਮਨਰੇਗਾ ਕਾਮੇ ਹਾਜ਼ਰ ਸਨ।

ਫੋਟੋ ਕੈਪਸ਼ਨ:-ਮਨਰੇਗਾ ਕਾਮੇ ਬੂਟੇ ਲਾਉਦੇ ਹੋਏ।

ਛਾਦਾਰ ਅਤੇ ਫਲਦਾਰ ਬੂਟੇ ਲਾਏ

ਹਠੂਰ,6,ਅਗਸਤ-(ਕੌਸ਼ਲ ਮੱਲ੍ਹਾ)-ਸਮੂਹ ਗ੍ਰਾਮ ਪੰਚਾਇਤ ਡੱਲਾ ਵੱਲੋ ਲੈਂਡ ਮਾਰਗੇਜ਼ ਬੈਂਕ ਜਗਰਾਉ ਦੇ ਡਾਇਰੈਕਟਰ ਨਿਰਮਲ ਸਿੰਘ ਡੱਲਾ ਦੀ ਅਗਵਾਈ ਹੇਠ ਪਿੰਡ ਡੱਲਾ ਵਿਖੇ 2500 ਬੂਟੇ ਲਾਏ ਗਏ।ਇਸ ਮੌਕੇ ਗੱਲਬਾਤ ਕਰਦਿਆ ਡਾਇਰੈਕਟਰ ਨਿਰਮਲ ਸਿੰਘ ਨੇ ਦੱਸਿਆ ਕਿ ਪਿੰਡ ਡੱਲਾ ਤੋ ਪਿੰਡ ਮੱਲ੍ਹਾ ਵਾਲੀ ਸੜਕ ਤੇ ਇੱਕ ਹਜ਼ਾਰ ਬੂਟੇ ਲਾਏ ਗਏ ਹਨ।ਇਸ ਤੋ ਇਲਾਵਾ ਸਰਕਾਰੀ ਸਕੂਲਾ,ਦਾਣਾ ਮੰਡੀ ਅਤੇ ਪਿੰਡ ਦੀਆ ਸਾਂਝੀ ਥਾਵਾ ਤੇ 1500 ਬੂਟੇ ਲਾਏ ਗਏ ਹਨ।ਜਿਸ ਵਿਚ ਨਿੰਮ,ਵਰਮਾ ਡੇਕ,ਪਿੱਪਲ,ਬੋਹੜ,ਅਮਰੂਦ,ਸੁਹਾਜਣਾ,ਜਾਮਣ ਅਤੇ ਹੋਰ ਰਵਾਇਤੀ ਬੂਟੇ ਲਾਏ ਗਏ ਹਨ।ਜਿਨ੍ਹਾ ਦੀ ਸਮੇਂ-ਸਮੇਂ ਤੇ ਗਰਾਮ ਪੰਚਾਇਤ ਡੱਲਾ ਵੱਲੋ ਦੇਖ-ਭਾਲ ਕੀਤੀ ਜਾਵੇਗੀ।ਇਸ ਮੌਕੇ ਉਨ੍ਹਾ ਪੰਜਾਬ ਸਰਕਾਰ,ਬੀ ਡੀ ਪੀ ਓ ਜਗਰਾਉ ਅਤੇ ਮਨਰੇਗਾ ਕਾਮਿਆ ਦਾ ਧੰਨਵਾਦ ਕੀਤਾ।ਇਸ ਮੌਕੇ ਉਨ੍ਹਾ ਨਾਲ ਪ੍ਰਧਾਨ ਧੀਰਾ ਸਿੰਘ, ਪ੍ਰਧਾਨ ਤੇਲੂ ਸਿੰਘ, ਐਡਵੋਕੇਟ ਰੁਪਿੰਦਰਪਾਲ ਸਿੰਘ, ਕਮਲਜੀਤ ਸਿੰਘ ਜੀ ਓ ਜੀ, ਯੂਥ ਆਗੂ ਕਰਮਜੀਤ ਸਿੰਘ ਕੰਮੀ,ਇਕਬਾਲ ਸਿੰਘ,ਬਲਵੀਰ ਸਿੰਘ ਸਰਾਂ,ਜਗਦੇਵ ਸਿੰਘ ਫੌਜੀ, ਜੋਰਾ ਸਿੰਘ, ਗੁਰਚਰਨ ਸਿੰਘ ਸਿੱਧੂ,ਸੂਬੇਦਾਰ ਦੇਵੀ ਚੰਦ ਸ਼ਰਮਾਂ,ਹਰਵਿੰਦਰ ਕੁਮਾਰ ਸ਼ਰਮਾਂ,ਗੁਰਨਾਮ ਸਿੰਘ ਆਦਿ ਹਾਜ਼ਰ ਸਨ।

ਮੁਕੱਦਮੇ ਦੇ ਦੋਸ਼ੀਆਂ ਦੀ ਗ੍ਰਿਫਤਾਰੀ ਲਈ ਧਰਨਾ136ਵੇਂ ਦਿਨ ਵੀ ਜਾਰੀ

ਜਗਰਾਉ,ਹਠੂਰ,5,ਅਗਸਤ-(ਕੌਸ਼ਲ ਮੱਲ੍ਹਾ) -ਪੰਜਾਬ ਪੁਲਿਸ ਦੇ ਅੱਤਿਆਚਾਰਾਂ ਖਿਲਾਫ਼ ਪੀੜ੍ਹਤ ਪਰਿਵਾਰ ਅਤੇ ਇਨਸਾਫ਼ਪਸੰਦ ਜਨਤਕ ਜੱਥੇਬੰਦੀਆਂ ਵਲੋਂ ਸਾਂਝੇ ਤੌਰ 'ਤੇ ਸਥਾਨਕ ਸ਼ਹਿਰੀ ਥਾਣੇ ਅੱਗੇ ਦਿੱਤੇ ਜਾ ਰਿਹਾ ਅਣਮਿਥੇ ਸਮੇਂ ਦਾ ਧਰਨਾ ਜਿਥੇ ਅੱਜ 136ਵੇਂ ਦਿਨ ਜਾਰੀ ਰਿਹਾ। ਧਰਨਾਕਾਰੀਆਂ ਨੂੰ ਸੰਬੋਧਨ ਕਰਨ ਤੋਂ ਬਾਦ ਪ੍ਰੈਸ ਨੂੰ ਜਾਰੀ ਬਿਆਨ 'ਚ ਕਿਰਤੀ ਕਿਸਾਨ ਯੂਨੀਅਨ ਜਿਲ੍ਹਾ ਪ੍ਰਧਾਨ ਤਰਲੋਚਨ ਸਿੰਘ ਝੋਰੜਾਂ, ਪੇਂਡੂ ਮਜ਼ਦੂਰ ਯੂਨੀਅਨ ਦੇ ਜਿਲ੍ਹਾ ਪ੍ਰਧਾਨ ਅਵਤਾਰ ਸਿੰਘ ਰਸੂਲਪੁਰ, ਕਿਸਾਨ ਸਭਾ ਦੇ ਆਗੂ ਨਿਰਮਲ ਸਿੰਘ ਧਾਲੀਵਾਲ ਨੇ ਦੋਸ਼ ਲਗਾਇਆ ਕਿ ਰਾਜ ਵਿੱਚ ਅਾਮ ਲੋਕ ਇਨਸਾਫ਼ ਨੂੰ ਤਰਸ ਚੁੱਕੇ ਹਨ। ਉਨ੍ਹਾਂ ਕਿਹਾ ਕਿਰਤੀ ਲੋਕ ਤੇ ਪੀੜ੍ਹਤ ਪਰਿਵਾਰ ਦੇ ਮੈਂਬਰ ਪਿਛਲੇ

136 ਦਿਨਾਂ ਤੋਂ ਥਾਣੇ ਮੂਹਰੇ ਪੱਕਾ ਧਰਨਾ ਲਗਾਈ ਇਨਸਾਫ਼ ਦੀ ਉਡੀਕ ਵਿੱਚ ਬੈਠੇ ਹਾਂ ਪਰ ਕੋਈ ਵੀ ਸਤਾਧਾਰੀ ਨੁਮਾਇੰਦਾ ਪਰਿਵਾਰ ਦਾ ਦਰਦ ਸੁਣਨ ਨਹੀਂ ਆਇਆ ਜਦੋਂਕਿ ਵੋਟਾਂ ਸਮੇਂ ਇਹ ਲੋਕ ਅੱਧੀ ਰਾਤ ਨੂੰ ਵੀ ਗਧੇ ਨੂੰ ਬਾਪੂ ਕਹਿੰਦੇ ਫਿਰਦੇ ਰਹਿੰਦੇ ਹਨ। ਆਗੂਆਂ ਨੇ ਪੰਜਾਬ ਸਰਕਾਰ ਨੂੰ ਸਖਤ ਚਿਤਾਵਨੀ ਦਿੱਤੀ ਕਿ ਜਾਂ ਤਾਂ ਦੋਸ਼ੀਆਂ ਨੂੰ ਜਲਦੀ ਗ੍ਰਿਫਤਾਰ ਕਰੋ ਜਾਂ ਫਿਰ ਆਉਣ ਵਾਲੇ ਦਿਨਾਂ 'ਚ ਸਤਾਧਾਰੀ ਨੁਮਾਇੰਦਾ ਲੋਕਾਂ ਨੂੰ ਮਜ਼ਦੂਰਾਂ-ਕਿਸਾਨਾਂ ਦੇ ਜਨਤਕ ਰੋਹ ਦਾ ਸਾਹਮਣਾ ਕਰਨ ਲਈ ਤਿਆਰ ਰਹਿਣਾ ਪਵੇਗਾ। ਇਸ ਸਮੇਂ ਪੇਂਡੂ ਮਜ਼ਦੂਰ ਯੂਨੀਅਨ (ਮਸ਼ਾਲ) ਦੇ ਆਗੂ ਬਲਦੇਵ ਸਿੰਘ ਫੌਜ਼ੀ, ਸੁਖਦੇਵ ਸਿੰਘ ਮਾਣੂੰਕੇ, ਬਖਤਾਵਰ ਸਿੰਘ ਜਗਰਾਉਂ ਤੇ ਬੀਕੇਯੂ(ਡਕੌਂਦਾ) ਦੇ ਜੱਗਾ ਸਿੰਘ ਢਿੱਲੋਂ ਤੇ ਰਾਮਤੀਰਥ ਸਿੰਘ ਲੀਲ੍ਹਾ ਨੇ ਵੀ ਸਤਾਧਾਰੀ ਸਿਆਸੀ ਧਿਰਾਂ ਨੂੰ ਚਿਤਾਵਨੀ ਦਿੱਤੀ ਕਿ ਕਿਸਾਨਾਂ-ਮਜ਼ਦੂਰਾਂ ਦੇ ਹੱਕੀ ਸੰਘਰਸ਼ ਨੂੰ ਜਾਣ-ਬੁੱਝ ਕੇ ਅਣਦੇਖਿਆ ਕਰਨਾ ਮਹਿੰਗਾ ਪਵੇਗਾ। ਉਹਨਾਂ ਹਲਕਾ ਵਿਧਾਇਕ ਨੂੰ ਵੀ ਕਰੜੇ ਹੱਥੀ ਲੈਂਦਿਆਂ ਕਿਹਾ ਇਸੇ ਕਰਕੇ ਆਮ ਲੋਕਾਂ ਦਾ ਵਿਸਵਾਸ਼ ਲੀਡਰਾਂ ਤੋਂ ਉਠਦਾ ਜਾ ਰਿਹਾ ਕਿ ਬੀਬੀ ਪਹਿਲਾਂ ਸਿਰਫ਼ ਵੋਟਾਂ ਲੈਣ ਲਈ ਧਰਨਿਆਂ ਵਿੱਚ ਆਉਂਦੀ ਸੀ ਅਤੇ ਜਿੱਤ ਕੇ ਗਰੀਬਾਂ ਨੂੰ ਭੁੱਲ ਗਈ ਹੈ। ਉਨ੍ਹਾਂ ਯਾਦ ਕਰਵਾਇਆ ਕਿ ਸੈਂਕੜੇ ਲੋਕਾਂ ਦੀ ਹਾਜ਼ਰੀ ਵਿੱਚ ਬੀਬੀ ਨੇ ਪੀੜ੍ਹਤ ਪਰਿਵਾਰ ਨੂੰ ਇਨਸਾਫ਼ ਦਿਵਾਉਣ ਦਾ ਬਿਆਨ ਮੀਡੀਆ ਨੂੰ ਵੀ ਦਿੱਤਾ ਸੀ ਹੁਣ ਉਹ ਵਾਅਦੇ ਕਿਥੇ ਗਏ? ਇਸ ਸਮੇਂ ਭਾਰਤੀ ਕਿਸਾਨ ਯੂਨੀਅਨ ਏਕਤਾ(ਡਕੌਂਦਾ) ਦੇ ਕੁੰਡਾ ਸਿੰਘ ਕਾਉੰਕੇ, ਬਾਬਾ ਬੰਤਾ ਸਿੰਘ ਡੱਲਾ, ਦਸਮੇਸ਼ ਕਿਸਾਨ-ਮਜ਼ਦੂਰ ਯੂਨੀਅਨ(ਰਜ਼ਿ) ਦੇ ਹਰੀ ਸਿੰਘ ਚਚਰਾੜੀ, ਕਿਰਤੀ ਕਿਸਾਨ ਯੂਨੀਅਨ ਦੇ ਆਗੂ ਰੂਪ ਸਿੰਘ ਝੋਰੜਾਂ ਨੇ ਮੁੱਖ ਮੰਤਰੀ ਪੰਜਾਬ ਭਗਵੰਤ ਸਿੰਘ ਮਾਨ ਤੋਂ ਮੰਗ ਕੀਤੀ ਏ ਕਿ ਗੈਰ-ਜ਼ਮਾਨਤੀ ਧਰਾਵਾਂ ਅਧੀਨ ਦਰਜ ਦੇ ਦੋਸ਼ੀਆਂ ਨੂੰ ਸੀਖਾਂ ਪਿੱਛੇ ਬੰਦ ਕੀਤਾ ਜਾਵੇ ਤਾਂ ਕਿ ਪੀੜ੍ਹਤ ਪਰਿਵਾਰ ਨੂੰ ਇਨਸਾਫ਼ ਮਿਲ ਸਕੇ ਅਤੇ ਆਮ ਲੋਕਾਂ ਦਾ ਵਿਸਵਾਸ਼ ਕਾਨੂੰਨ ਵਿਚ ਬਣਿਆ ਰਹੇ। ਮ੍ਰਿਤਕਾ ਕੁਲਵੰਤ ਕੌਰ ਰਸੂਲਪੁਰ ਦੀ ਬਿਰਧ ਮਾਤਾ ਸੁਰਿੰਦਰ ਕੌਰ ਰਸੂਲਪੁਰ ਨੇ ਕਿਹਾ ਕਿ ਉਨ੍ਹਾਂ ਦਾ ਪਰਿਵਾਰ ਡੇਢ ਦਹਾਕੇ ਤੋਂ ਨਿਆਂ ਦੀ ਮੰਗ ਕਰਦਾ ਆ ਰਿਹਾ ਹੈ ਪਰ ਕਿਸੇ ਵੀ ਸਰਕਾਰ ਨੇ ਨਿਆਂ ਨਹੀਂ ਦਿੱਤਾ। ਭਲਾਈ ਮੰਚ ਦੇ ਆਗੂ ਦਰਸ਼ਨ ਸਿੰਘ ਧਾਲੀਵਾਲ ਤੇ ਮਹਿਲਾ ਆਗੂ ਮਨਪ੍ਰੀਤ ਕੌਰ ਧਾਲੀਵਾਲ ਨੇ ਕਿਹਾ ਕਿ ਅਸੀਂ ਕੈਪਟਨ ਅਮਰਿੰਦਰ ਸਿੰਘ ਦੀ ਕਾਂਗਰਸ ਸਰਕਾਰ ਤੇ ਪ੍ਰਕਾਸ਼ ਸਿੰਘ ਬਾਦਲ਼ ਦੀ ਅਕਾਲੀ-ਭਾਜਪਾ ਸਰਕਾਰ ਸਮੇਤ ਦੋਵਾਰਾ ਬਣੀ ਕੈਪਟਨ ਤੇ ਚਰਨਜੀਤ ਸਿੰਘ 'ਚੰਨੀ' ਸਰਕਾਰ ਨੂੰ ਹਜ਼ਾਰਾਂ ਚਿੱਠੀਆਂ-ਪੱਤਰ ਲਿਖੇ ਸਨ ਪਰ ਕਿਸੇ ਸਰਕਾਰ ਨੇ ਇਨਸਾਫ਼ ਦਿੱਤਾ। ਉਨ੍ਹਾਂ ਕਿਹਾ ਕਿ ਭਾਵੇਂ ਪਹਿਲੀਆਂ ਸਰਕਾਰਾਂ ਇਨਸਾਫ਼ ਨਹੀਂ ਦੇ ਸਕੀਆਂ ਪਰ ਮੌਜੂਦਾ ਸਰਕਾਰ ਵੀ ਪਹਿਲੀਆਂ ਸਰਕਾਰਾਂ ਵਰਗੀ ਹੀ ਲੱਗ ਰਹੀ ਏ ਜੋ 136 ਦਿਨਾਂ ਤੋਂ ਬੈਠੇ ਧਰਨਾਕਾਰੀਆਂ ਦੀ ਗੱਲ਼ ਸੁਣਨ ਨੂੰ ਤਿਆਰ ਨਹੀਂ ਹੈ, ਫਿਰ ਉਨ੍ਹਾਂ ਦਾ ਪਰਿਵਾਰ ਇਨਸਾਫ਼ ਲਈ ਲੜਦਾ ਰਹੇਗਾ। ਧਰਨੇ ਵਿੱਚ ਭਾਰਤੀ ਕਿਸਾਨ ਯੂਨੀਅਨ ਏਕਤਾ (ਡਕੌਂਦਾ) ਦੇ ਆਗੂ ਕੁੰਡਾ ਸਿੰਘ ਕਾਉਂਕੇ, ਬਾਬਾ ਬੰਤਾ ਸਿੰਘ ਡੱਲਾ, ਪੇਂਡੂ ਮਜ਼ਦੂਰ ਯੂਨੀਅਨ ਦੇ ਆਗੂ ਬੌਰਾ ਸਿੰਘ, ਦਸਮੇਸ਼ ਕਿਸਾਨ ਯੂਨੀਅਨ ਦੇ ਹਰੀ ਸਿੰਘ, ਜੱਥੇਦਾਰ ਚੜ੍ਤ ਸਿੰਘ ਬਾਰਦੇਕੇ, ਗੁਰਚਰਨ ਸਿੰਘ, ਗੁਰਮੀਤ ਸਿੰਘ, ਅਵਤਾਰ ਸਿੰਘ, ਬਚਨ ਸਿੰਘ ਗੋਲਡੀ, ਬਲਵਿੰਦਰ ਬੱਬੀ ਵੀ ਹਾਜ਼ਰ ਸਨ।

ਸਕੂਲ ਦੇ ਪੰਜ ਵਿਿਦਆਰਥੀਆ ਦੀ ਫੀਸ ਭਰੀ

ਜਗਰਾਉ,ਹਠੂਰ,5,ਅਗਸਤ-(ਕੌਸ਼ਲ ਮੱਲ੍ਹਾ)- ਇਲਾਕੇ ਦੀ ਨਾਮਵਰ ਵਿੱਦਿਅਕ ਸੰਸਥਾ ਮੀਰੀ ਪੀਰੀ ਪਬਲਿਕ ਸੀਨੀਅਰ ਸੈਕੰਡਰੀ ਸਕੂਲ ਕੁੱਸਾ ਦੇ ਪੰਜ ਲੋੜਵੰਦ ਵਿਿਦਆਰਥੀਆ ਦੀ ਐਸ ਜੀ ਪੀ ਸੀ ਦੇ ਹਲਕਾ ਮੈਬਰ ਬੀਬੀ ਨਰਿੰਦਰ ਕੌਰ ਰਣੀਆ ਵੱਲੋ 25 ਹਜ਼ਾਰ ਦੀ ਫੀਸ ਦਾ ਚੈਂਕ ਸਕੂਲ ਦੀ ਪ੍ਰਿੰਸੀਪਲ ਪਰਮਜੀਤ ਕੌਰ ਮੱਲ੍ਹਾ ਨੂੰ ਭੇਟ ਕੀਤਾ ਗਿਆ।ਇਸ ਮੌਕੇ ਹਲਕਾ ਮੈਬਰ ਬੀਬੀ ਨਰਿੰਦਰ ਕੌਰ ਰਣੀਆ ਨੇ ਐਸ ਜੀ ਪੀ ਸੀ ਵੱਲੋ ਲੋੜਵੰਦ ਬੱਚਿਆ ਨੂੰ ਦਿੱਤੀਆ ਜਾ ਰਹੀਆ ਲੋਕ ਭਲਾਈ ਦੀਆ ਸਕੀਮਾ ਬਾਰੇ ਵਿਸਥਾਰਪੂਰਵਕ ਚਾਨਣਾ ਪਇਆ।ਇਸ ਮੌਕੇ ਸਕੂਲ ਦੀ ਪ੍ਰਿੰਸੀਪਲ ਪਰਮਜੀਤ ਕੌਰ ਮੱਲ੍ਹਾ ਅਤੇ ਵਾਈਸ ਪ੍ਰਿੰਸੀਪਲ ਕਸਮੀਰ ਸਿੰਘ ਨੇ ਹਲਕਾ ਮੈਬਰ ਬੀਬੀ ਨਰਿੰਦਰ ਕੌਰ ਰਣੀਆ ਅਤੇ ਐਸ ਜੀ ਪੀ ਸੀ ਦਾ ਧੰਨਵਾਦ ਕਰਦਿਆ ਕਿਹਾ ਕਿ ਸਿੱਖਾ ਦੀ ਸਿਰਮੌਰ ਸੰਸਥਾ ਐਸ ਜੀ ਪੀ ਸੀ ਵੱਲੋ ਪਹਿਲਾ ਵੀ ਸਮੇਂ-ਸਮੇਂ ਤੇ ਸਕੂਲ ਦੇ ਹੋਣਹਾਰ ਵਿਿਦਆਰਥੀਆ ਦਾ ਵੱਡਾ ਮਾਣ-ਸਨਮਾਨ ਕੀਤਾ ਗਿਆ ਹੈ।ਇਸ ਮੌਕੇ ਸਕੂਲ ਦੀ ਪ੍ਰਬੰਧਕੀ ਕਮੇਟੀ ਵੱਲੋ ਬੀਬੀ ਨਰਿੰਦਰ ਕੌਰ ਰਣੀਆ ਨੂੰ ਵਿਸ਼ੇਸ ਤੌਰ ਤੇ ਸਨਮਾਨਿਤ ਕੀਤਾ ਗਿਆ।ਇਸ ਮੌਕੇ ਉਨ੍ਹਾ ਨਾਲ ਵਾਈਸ ਪ੍ਰਿੰਸੀਪਲ ਕਸਮੀਰ ਸਿੰਘ,ਡਾ:ਚਮਕੌਰ ਸਿੰਘ,ਭਾਈ ਨਿਰਮਲ ਸਿੰਘ ਖਾਲਸਾ ਮੀਨੀਆ,ਹਰਪਾਲ ਸਿੰਘ ਮੱਲ੍ਹਾ, ਜਸਵਿੰਦਰ ਕੌਰ,ਰਮਨਦੀਪ ਕੌਰ,ਧਾਰਮਿਕ ਅਧਿਆਪਕ ਇੰਦਰਜੀਤ ਸਿੰਘ ਰਾਮਾ ਅਤੇ ਸਕੂਲ ਦਾ ਸਮੂਹ ਸਟਾਫ ਹਾਜ਼ਰ ਸੀ।

ਬੀ. ਬੀ .ਐਸ. ਬੀ ਕਾਨਵੈਂਟ ਸਕੂਲ ਸਿਧਵਾਂ ਬੇਟ ਦੇ ਵਿਹੜੇ ਵਿੱਚ ਲੱਗੀਆਂ ਤੀਆਂ ਦੀਆਂ ਰੌਣਕਾ

ਜਗਰਾਉ,ਹਠੂਰ,5,ਅਗਸਤ-(ਕੌਸ਼ਲ ਮੱਲ੍ਹਾ)-ਇਲਾਕੇ ਦੀ ਨਾਮਵਰ ਵਿਿਦਅਕ ਸੰਸਥਾ ਬੀ. ਬੀ. ਐਸ. ਬੀ ਕਾਨਵੈਂਟ ਸਕੂਲ ਸਿਧਵਾਂ ਬੇਟ ਦੇ ਵਿਹੜੇ ਵਿੱਚ ਹਰ ਸਾਲ ਦੀ ਤਰਹਾ ਤੀਆ ਦਾ ਤਿਉਹਾਰ ਬੜੀ ਹੀ ਧੁਮ ਧਾਮ ਨਾਲ ਮਨਾਇਆ ਗਿਆ ।ਇਸ ਮੌਕੇ ਸਕੂਲ ਦੀ ਪ੍ਰਬੰਧਕੀ ਕਮੇਟੀ ਦੇ ਚੇਅਰਮੈਨ ਸਤੀਸ਼ ਕਾਲੜਾ,ਵਾਈਸ ਚੇਅਰਮੈਨ ਹਰੀਕ੍ਰਿਸ਼ਨ ਭਗਵਾਨ ਦਾਸ ਅਤੇ ਸਕੂਲ ਦੇ ਪਿੰ੍ਰਸੀਪਲ ਅਨੀਤਾ ਕਾਲੜਾ ਨੇ ਰੀਬਨ ਕੱਟ ਕੇ ਰੰਗਾ-ਰੰਗ ਪ੍ਰੋਗਰਾਮ ਦੀ ਸੁਰੂਆਤ ਕੀਤੀ ।ਇਸ ਮੌਕੇ ਪੰਜਾਬੀ ਸੱਭਿਆਚਾਰ ਨਾਲ ਸਬੰਧਿਤ ਵਸਤੂਆ ਦੀ ਪ੍ਰਦਰਸਨੀ ਲਾਈ ਗਈ ਜਿਸ ਵਿੱਚ ਬਾਗ, ਫੁਲਕਾਰੀਆ, ਹੱਥੀ ਕੱਢੀਆਂ ਚਾਦਰਾ ਹੱਥੀ ਬੁਣੀਆਂ ਦਰੀਆਂ ਅਤੇ ਪੁਰਾਤਨ ਪਿੱਤਲ ਦੇ ਬਰਤਨ ਖਿੱਚ ਦਾ ਕੇਂਦਰ ਬਣੇ।ਇਸ ਮੌਕੇ ਸਕੂਲੀ ਵਿਿਦਆਰਥਣਾ ਨੇ ਲੋਕ ਗੀਤ, ਗਿੱਧਾ,ਭੰਗੜਾ, ਮਹਿੰਦੀ ਲਗਾਉਣਾ, ਪਰਾਂਦੀ ਪਾਉਣਾ,ਬੋਲੀਆ ਪੇਸ ਕੀਤੀਆ।ਇਸ ਮੌਕੇ ਬੱਚਿਆ ਨੇ ਛੋਲੇ ਪੂਰੀਆ ਅਤੇ ਖੀਰ ਦਾ ਆਨੰਦ ਮਾਣਿਆ।ਅੰਤ ਵਿਚ ਸਕੂਲ ਦੀ ਪ੍ਰਬੰਧਕੀ ਕਮੇਟੀ ਵੱਲੋ ਸਮੂਹ ਮਹਿਮਾਨਾ ਨੂੰ ਵਿਸ਼ੇਸ ਤੌਰ ਤੇ ਸਨਮਾਨਿਤ ਕੀਤਾ ਗਿਆ।ਇਸ ਮੌਕੇ ਉਨ੍ਹਾ ਨਾਲ ਸਕੂਲ ਚੇਅਰਮੈਨ ਸਤੀਸ ਕਾਲੜਾ,ਪ੍ਰਧਾਨ ਰਜਿੰਦਰ ਬਾਵਾ, ਵਾਈਸ ਚੇਅਰਮੈਨ ਹਰਕ੍ਰਿਸ਼ਨ ਭਗਵਾਨਦਾਸ ਬਾਵਾ, ਵਾਈਸ ਪ੍ਰੈਜ਼ੀਡੈਂਟ ਸਨੀ ਅਰੋੜਾ, ਮੈਨੇਜਿੰਗ ਡਾਇਰੈਕਟਰ ਸ਼ਾਮ ਸੁੰਦਰ ਭਾਰਦਵਾਜ,ਡਇਰੈਕਟਰ ਰਾਜੀਵ ਸੱਗੜ ਹਾਜ਼ਰ ਸਨ।

ਪੰਜਾਬ ਇਨਸਾਈਟ ਐਕਸਕਲੂਸਿਵ ਦੋ ਸ਼ੂਟਰ ਗ੍ਰਿਫ਼ਤਾਰ

ਐਮ.ਸੀ. ਮੁਹੰਮਦ ਅਕਬਰ (ਭੋਲੀ) ਦੇ ਕਤਲ ਦੀ ਗੁੱਥੀ ਸੁਲਝੀ , ਤਿੰਨ ਸਾਜਿਸ਼ਕਰਤਾ ਪਹਿਲਾਂ ਹੀ ਪੁਲਿਸ ਹਿਰਾਸਤ ਵਿੱਚ , ਤਾਰਾ ਕੌਨਵੇਂਟ ਸਕੂਲ, ਆਦਮਵਾਲ ਰੋਡ ਤੇ ਫੜੇ ਗਏ ਸ਼ੂਟਰ , ਦੇਸੀ ਕੱਟਾ(ਪਿਸਤੌਲ) ਅਤੇ ਜਿੰਦਾ ਕਾਰਤੂਸ ਬਰਾਮਦ

ਮਾਲੇਰਕੋਟਲਾ (ਡਾਕਟਰ ਸੁਖਵਿੰਦਰ ਬਾਪਲਾ) ਪ੍ਰਸਿੱਧ ਸਮਾਜ ਸੇਵੀ ਅਤੇ ਵਾਰਡ ਨੰਬਰ 18 ਦੇ ਮੌਜੂਦਾ ਕੌਂਸਲਰ ਮੁਹੰਮਦ ਅਕਬਰ ਉਰਫ ਭੋਲੀ ਦੇ ਕਤਲ ਦੀ ਗੁੱਥੀ ਪੂਰੀ ਤਰ੍ਹਾਂ ਸੁਲਝਾਉਣ ਦਾ ਦਾਅਵਾ ਅੱਜ ਜਿ਼ਲ੍ਹਾ ਮਾਲੇਰਕੋਟਲਾ ਦੀ ਐਸ.ਐਸ.ਪੀ. ਮੈਡਮ ਅਵਨੀਤ ਕੌਰ ਵੱਲੋਂ ਕੀਤਾ ਗਿਆ। ‘ਭੋਲੀ’ ਨੂੰ ਦੋ ਨੌਜਵਾਨਾਂ ਵੱਲੋਂ 31 ਜੁਲਾਈ ਐਤਵਾਰ ਨੂੰ ਉਹਨਾਂ ਦੇ ਮਾਲੇਰਕੋਟਲਾ ਲੁਧਿਆਣਾ ਰੋਡ ਤੇ ਸਥਿਤ ਜਿੰਮ ਅੰਦਰ ਦਾਖਲ ਹੋ ਕੇ ਨੇੜੇ ਤੋਂ ਦਿਲ ਵਿੱਚ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ। ਐਸ.ਐਸ.ਪੀ. ਅਵਨੀਤ ਕੌਰ ਨੇ ਅੱਜ ਪੱਤਰਕਾਰਾਂ ਨੂੰ ਦੱਸਿਆ ਕਿ ਇਸ ਮਾਮਲੇ ਵਿੱਚ ਤਿੰਨ ਵਿਅਕਤੀਆਂ ਨੂੰ ਪਹਿਲਾਂ ਹੀ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਿਆ ਹੈ ਅਤੇ ‘ਭੋਲੀ’ ਤੇ ਗੋਲੀ ਚਲਾਉਣ ਵਾਲੇ ਸ਼ੂਟਰਾਂ ਨੂੰ ਵੀ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ। ਉਹਨਾਂ ਦੱਸਿਆ ਕਿ ਪੁਲਿਸ ਨੇ ਨੌਧਰਾਣੀ ਚੌਂਕ ਵਿੱਚ ਨਾਕਾਬੰਦੀ ਕੀਤੀ ਹੋਈ ਸੀ ਜਿਥੇ ਕਿਸੇ ਮੁਖਬਰ ਨੇ ਇਤਲਾਹ ਦਿੱਤੀ ਕਿ ‘ਭੋਲੀ’ ਨੂੰ ਸ਼ੂਟ ਕਰਨ ਵਾਲੇ ਨੌਜਵਾਨ ਆਦਮਵਾਲ ਰੋਡ ਤੇ ਤਾਰਾ ਕੌਨਵੈਂਟ ਸਕੂਲ ਪਾਸ ਮੌਜੂਦ ਹਨ। ਪੁਲਿਸ ਨੇ ਤੁਰੰਤ ਤਾਰਾ ਕੌਨਵੈਂਟ ਸਕੂਲ ਪਾਸ ਨਾਕਾਬੰਦੀ ਕਰਕੇ ਇਹਨਾਂ ਸ਼ੂਟਰਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਉਹਨਾਂ ਦੱਸਿਆ ਕਿ ਪਹਿਲਾਂ ਗ੍ਰਿਫ਼ਤਾਰ ਕੀਤੇ ਤਿੰਨ ਦੋਸ਼ੀਆਂ ਦਾ 8 ਅਗਸਤ ਤੱਕ ਪੁਲਿਸ ਰਿਮਾਂਡ ਲਿਆ ਜਾ ਚੁੱਕਾ ਹੈ। ਉਹਨਾਂ ਦੱਸਿਆ ਕਿ ‘ਭੋਲੀ’ ਦਾ ਮੁੱਖ ਮੁਲਜ਼ਮ ਨਾਲ ਢਾਈ ਕਰੋੜ ਰੁਪਏ ਦਾ ਲੈਣ ਦੇਣ ਚਲਦਾ ਸੀ ਜਿਸ ਨੂੰ ਹੜਪਨ ਦੀ ਨਿਯਤ ਨਾਲ ਉਸਨੇ ‘ਭੋਲੀ’ ਨੂੰ ਮਾਰਨ ਦੀ ਸੁਪਾਰੀ 20 ਲੱਖ ਰੁਪਏ ਵਿੱਚ ਦੇ ਦਿੱਤੀ।

ਮਹਿਲਕਲਾਂ ਲੋਕ ਘੋਲ ਦੇ 25 ਵਰ੍ਹੇ

ਸ਼ਹੀਦ ਕਿਰਨਜੀਤ ਕੌਰ ਦੇ ਸ਼ਰਧਾਂਜਲੀ ਸਮਾਗਮ 12 ਅਗਸਤ ਦਾਣਾ ਮੰਡੀ ਮਹਿਲਕਲਾਂ ਪੁੱਜੋ-ਗੁਰਬਿੰਦਰ ਕਲਾਲਾ

ਸਰਕਾਰੀ ਹਾਈ ਸਕੂਲ ਰਾਏਸਰ, ਚੰਨਣਵਾਲ, ਛੀਨੀਵਾਲ ਕਲਾਂ ਅਤੇ ਮੂੰਮ ਵਿਖੇ ਸਕੂਲ ਵਿਦਿਆਰਥੀਆਂ, ਅਧਿਆਪਕਾਂ ਨਾਲ ਰਚਾਇਆ ਸਾਰਥਿਕ ਸੰਵਾਦ

ਬਰਨਾਲਾ /ਮਹਿਲ ਕਲਾਂ 4 ਅਗਸਤ- (ਗੁਰਸੇਵਕ ਸੋਹੀ) - ਸ਼ਹੀਦ ਕਿਰਨਜੀਤ ਕੌਰ ਕਤਲ ਕਾਂਡ ਵਿਰੋਧੀ ਐਕਸ਼ਨ ਕਮੇਟੀ ਵੱਲੋਂ ਉਲੀਕੀ ਗਈ ਪੑਚਾਰ ਮੁਹਿੰਮ ਨੂੰ ਜਾਰੀ ਰੱਖਦਿਆਂ ਲੋਕ ਕਵੀ ਸੰਤ ਰਾਮ ਉਦਾਸੀ ਸੀਨੀਅਰ ਸੈਕੰਡਰੀ ਸਕੂਲ ਰਾਏਸਰ ਤੋਂ ਸ਼ੁਰੂ ਹੋਈ ਮੁਹਿੰਮ, ਚੁਹਾਣਕੇ ਖ਼ੁਰਦ, ਸਹਿਜੜਾ, ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਚੰਨਣਵਾਲ, ਛੀਨੀਵਾਲ ਕਲਾਂ ਤੋਂ ਹੁੰਦੀ ਹੋਈ ਸੰਤ ਈਸ਼ਰ ਦਾਸ ਯਾਦਗਾਰੀ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਮੂੰਮ ਵਿਖੇ ਸਮਾਪਤ ਹੋਈ। ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਮੂੰਮ ਵਿਖੇ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਨਾਲ ਸੰਵਾਦ ਰਚਾਉਂਦਿਆਂ ਗੁਰਬਿੰਦਰ ਸਿੰਘ ਕਲਾਲਾ, ਨਰਾਇਣ ਦੱਤ, ਗੁਰਮੀਤ ਸੁਖਪੁਰਾ,ਜਰਨੈਲ ਸਿੰਘ ਚੰਨਣਵਾਲ ਅਤੇ ਬਿੱਕਰ ਸਿੰਘ ਔਲਖ ਨੇ ਵਿਦਿਆਰਥਣਾਂ,ਅਧਿਆਪਕ,ਅਧਿਆਪਕਾਵਾਂ ਮਹਿਲਕਲਾਂ ਲੋਕ ਘੋਲ ਦੇ ਇਤਿਹਾਸ ਵਿੱਚ ਅਧਿਆਪਕਾਂ,ਵਿਦਿਆਰਥੀਆਂ ਵੱਲੋਂ ਨਿਭਾਈ ਮਿਸਾਲੀ ਦੀ ਭੂਮਿਕਾ ਦੀ ਜੋਰਦਾਰ ਸ਼ਲਾਘਾ ਕੀਤੀ। ਆਗੂਆਂ ਨੇ ਔਰਤ ਮੁਕਤੀ ਦਾ ਚਿੰਨ੍ਹ ਬਣੀ ਕਿਰਨਜੀਤ ਕੌਰ ਦੀ ਜੂਝ ਮਰਨ ਦੀ ਭਾਵਨਾ ਨੂੰ ਪੑੇਰਨਾ ਸਰੋਤ ਦੱਸਿਆ। ਕਾਤਲ ਦੋਸ਼ੀਆਂ ਨੂੰ ਗੑਿਫਤਾਰ ਕਰਾਉਣ,ਮਿਸਾਲੀ ਸਜਾਵਾਂ ਦਿਵਾਉਣ ਤੋਂ ਵੀ ਅੱਗੇ ਤਿੰਨ ਲੋਕ ਆਗੂਆਂ ਦੀ ਨਿਹੱਕੀ ਉਮਰ ਕੈਦ ਸਜ਼ਾ ਰੱਦ ਕਰਾਉਣ ਦੇ ਅਹਿਮ ਫੈਸਲਾਕੁੰਨ ਪੜਾਅ ਤੱਕ ਐਕਸ਼ਨ ਕਮੇਟੀ ਮਹਿਲਕਲਾਂ ਦੀ ਢਾਲ ਤੇ ਤਲਵਾਰ ਬਨਣ ਦੇ ਕੁਰਬਾਨੀ ਭਰੇ ਹਰ ਕਦਮ ਨੂੰ ਸਲਾਮ ਕੀਤੀ। ਅਧਿਆਪਕ ਅਤੇ ਵਿਦਿਆਰਥੀ ਵੀ ਸਮਾਜ ਦਾ ਅਹਿਮ ਹਿੱਸਾ ਹੁੰਦੇ ਹਨ। ਸਮੇਂ ਸਮੇਂ ਤੇ ਵਾਪਰੇ ਵਰਤਾਰਿਆਂ ਵਿੱਚ ਅਹਿਮ ਚੇਤੰਨ ਭੂਮਿਕਾ ਨਿਭਾਉਂਦੇ ਹਨ। ਇਨ੍ਹਾਂ ਹਰ ਮੋੜ'ਤੇ ਬਿਨੵਾਂ ਕਿਸੇ ਡਰ, ਭੈਅ ਅਤੇ ਦਹਿਸ਼ਤ ਦੇ ਭੂਮਿਕਾ ਨਵਾਂ ਇਤਿਹਾਸ ਸਿਰਜਿਆ ਹੈ। ਅਧਿਆਪਕ ਆਗੂਆਂ ਬਲਜਿੰਦਰ ਪ੍ਰਭੂ ਅਤੇ ਰਜਿੰਦਰ ਕੁਮਾਰ ਨੇ ਕਿਹਾ ਕਿ ਮਹਿਲਕਲਾਂ ਦੀ ਧਰਤੀ'ਤੇ ਬਲ ਰਹੀ ਸੰਘਰਸ਼ ਦੀ ਸੂਹੀ ਲਾਟ ਸ਼ਹੀਦ ਕਿਰਨਜੀਤ ਕੌਰ ਦਾ ਇਸ ਵਾਰ ਦਾ ਬਰਸੀ ਸਮਾਗਮ ਮੋਦੀ ਹਕੂਮਤ ਦੇ ਫਿਰਕੂ ਫਾਸ਼ੀ ਹੱਲੇ ਖਿਲਾਫ਼ ਸੇਧਤ ਹੋਵੇਗਾ। ਮੋਦੀ ਹਕੂਮਤ ਸਿਹਤ ਤੇ ਸਿੱਖਿਆ ਵਰਗੇ ਮਨੁੱਖ ਦੀਆਂ ਬੁਨਿਆਦੀ ਲੋੜਾਂ ਦੀ ਪੂਰਤੀ ਕਰਨ ਵਾਲੇ ਅਦਾਰੇ ਵੀ ਕਾਰਪੋਰੇਟ ਘਰਾਣਿਆਂ ਨੂੰ ਵੇਚ ਰਹੀ ਹੈ। ਆਰਥਿਕ ਸੁਧਾਰਾਂ ਦਾ ਲੋਕ ਵਿਰੋਧੀ ਏਜੰਡਾ ਲਾਗੂ ਕਰਨ ਲਈ ਜਬਰ ਦਾ ਸਹਾਰਾ ਲੈ ਰਹੀ ਹੈ। ਲੋਕਾਂ ਦੇ ਹੱਕ ਵਿੱਚ ਅਵਾਜ਼ ਉਠਾਉਣ ਵਾਲੇ ਲੇਖਕਾਂ, ਸਮਾਜਿਕ ਕਾਰਕੁਨਾਂ, ਵਕੀਲਾਂ,ਬੁੱਧੀਜੀਵੀਆਂ,ਪੱਤਰਕਾਰਾਂ ਨੂੰ ਦੇਸ਼ ਧੑੋਹ ਵਰਗੇ ਬਦਨਾਮ ਕਾਨੂੰਨਾਂ ਰਾਹੀਂ ਸਾਲਾਂ ਬੱਧੀ ਸਮੇਂ ਤੋਂ ਜੇਲੵਾਂ ਵਿੱਚ ਡੱਕਿਆ ਹੋਇਆ ਹੈ। ਮੋਦੀ ਹਕੂਮਤ ਦੇ ਇਸ ਹੱਲੇ ਨੂੰ ਸਾਂਝੀ ਆਵਾਜ਼ ਬੁਲੰਦ ਕਰਕੇ ਹੀ ਭਾਂਜ ਦਿੱਤੀ ਜਾਵੇਗੀ। ਅਧਿਆਪਕ ਆਗੂਆਂ ਨੇ ਨੌਜਵਾਨ ਵਿਦਿਆਰਥੀਆਂ ਨੂੰ 12 ਅਗਸਤ ਦਾਣਾ ਮੰਡੀ ਮਹਿਲਕਲਾਂ ਪੁੱਜਣ ਦੀ ਜੋਰਦਾਰ ਅਪੀਲ ਕੀਤੀ। ਇਸ ਸਮੇਂ ਸ੍ਰੀ ਹਰੀਸ਼ ਬਾਂਸਲ, ਬਬਲਜੀਤ ਸਿੰਘ, ਹਰਜਿੰਦਰ ਸਿੰਘ, ਕਰਮਜੀਤ ਸਿੰਘ, ਜਤਿੰਦਰ ਸਿੰਘ ਆਦਿ ਹਾਜ਼ਰ ਸਨ।

ਪੰਜਾਬ ਸਰਕਾਰ ਵੱਲੋਂ ਪੈਨਸ਼ਨਰਾਂ ਦੀਆਂ ਮੰਗਾਂ ਨੂੰ ਪੂਰੀਆਂ ਕਰਨ ਲਈ ਅਣਗੌਲਿਆ ਕੀਤਾ ਜਾ ਰਿਹਾ- ਪੰਡੋਰੀ

ਪੈਨਸ਼ਨਰਜ ਵੈੱਲਫ਼ੇਅਰ ਐਸੋਸੀਏਸ਼ਨ ਯੂਨਿਟ ਬਲਾਕ ਮਹਿਲ ਕਲਾਂ ਦੀ ਮੀਟਿੰਗ ਹੋਈ

ਬਰਨਾਲਾ /ਮਹਿਲ ਕਲਾਂ 04 ਅਗਸਤ (ਗੁਰਸੇਵਕ ਸੋਹੀ ) ਪੈਨਸ਼ਨਰਜ਼ ਵੈੱਲਫੇਅਰ ਐਸੋਸੀਏਸ਼ਨ ਯੂਨਿਟ ਬਲਾਕ ਮਹਿਲ ਕਲਾਂ ਵਲੋਂ ਬਲਾਕ ਪ੍ਰਧਾਨ ਦਰਸ਼ਨ ਸਿੰਘ ਪੰਡੋਰੀ ਦੀ ਪ੍ਰਧਾਨਗੀ ਹੇਠ ਸਮੂਹ ਪੈਨਸ਼ਨਰਜ ਬਲਾਕ ਪੱਧਰੀ ਮੀਟਿੰਗ ਬੀਡੀਪੀਓ ਦਫ਼ਤਰ ਮਹਿਲ ਕਲਾਂ ਵਿਖੇ ਹੋਈ। ਇਸ ਮੌਕੇ ਪੈਨਸ਼ਨਰਜ਼ ਵੈੱਲਫੇਅਰ ਐਸੋਸੀਏਸ਼ਨ ਯੂਨਿਟ ਬਲਾਕ ਮਹਿਲ ਕਲਾਂ ਦੇ ਪ੍ਰਧਾਨ ਮਾਸਟਰ ਦਰਸ਼ਨ ਸਿੰਘ ਪੰਡੋਰੀ, ਜਨਰਲ ਸਕੱਤਰ ਸੁਰਿੰਦਰ ਕੁਮਾਰ ਰਾਏਸਰ, ਖ਼ਜ਼ਾਨਚੀ ਪਵਨ ਕੁਮਾਰ ਮਹਿਲ ਖੁਰਦ ਨੇ ਕਿਹਾ ਕਿ ਜਥੇਬੰਦੀ ਵੱਲੋਂ ਪਿਛਲੇ ਸਮੇਂ ਤੋਂ ਵੱਖ ਵੱਖ ਭਾਗਾਂ ਵਿੱਚੋਂ ਸੇਵਾਮੁਕਤ ਹੋਏ ਪੈਨਸ਼ਨਰਜ ਦੀਆਂ ਮੰਗਾਂ ਪੇਅ ਕਮਿਸ਼ਨ ਦੀ ਰਿਪੋਰਟ ਲਾਗੂ ਕਰਵਾਉਣ ਬੇਸ਼ਕ ਪੁਰਾਣੀ ਪੈਨਸ਼ਨ 2.59 ਪੈਨਸ਼ਨ ਵਾਅਦੇ ਨਾਲ ਦਿੱਤੀ ਜਾਵੇ। ਡੀ ਏ ਦੀਆਂ ਬਕਾਇਆ ਕਿਸ਼ਤਾਂ ਜਾਰੀ ਕੀਤੀਆਂ ਜਾਣ, ਪੇਅ ਕਮਿਸ਼ਨ ਦਾ ਏਰੀਆ ਇੱਕ ਕਿਸ਼ਤ ਵਿਚ ਮਿਲਾਕੇ ਦੇਣ, ਕੈਸ਼ਲੈੱਸ ਸਕੀਮ ਨੂੰ ਲਾਗੂ ਕਰਨ, ਬਲਾਕ ਲੈਵਲ ਤੇ ਪੈਨਸ਼ਨਰਜ਼ ਰੂਮ ਦੇਣ ਦੀਆਂ ਮੰਗਾਂ ਦੀ ਪ੍ਰਾਪਤੀ ਲਈ ਲਗਾਤਾਰ ਕਾਂਗਰਸ ਸਰਕਾਰ ਦੇ ਕਾਰਜਕਾਲ ਤੋਂ ਸੰਘਰਸ਼ ਲੜਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਉਸ ਸਮੇਂ ਜਥੇਬੰਦੀ ਦੇ ਆਗੂਆਂ ਵੱਲੋਂ ਮੁੱਖ ਮੰਤਰੀ ਮੰਤਰੀਆਂ ਵਿਧਾਇਕਾਂ ਤੇ ਹਲਕਾ ਇੰਚਾਰਜ ਮੰਗ ਪੱਤਰ ਵੀ ਦਿੱਤੇ ਗਏ ਪਰ ਕਿਸੇ ਵੀ ਆਗੂ ਜਾਂ ਅਧਿਕਾਰੀ ਨੇ ਪੈਨਸ਼ਨਰਾਂ ਦੀਆਂ ਮੰਗਾਂ ਨੂੰ ਪੂਰੀਆਂ ਕਰਵਾਉਣ ਲਈ ਕੋਈ ਧਿਆਨ ਨਹੀਂ ਦਿੱਤਾ। ਜਥੇਬੰਦੀ ਵੱਲੋਂ ਪੈਨਸ਼ਨਰਾਂ ਦੀਆਂ ਭਖਦੀਆਂ ਮੰਗਾਂ ਦੀ ਪ੍ਰਾਪਤੀ 29 ਜੁਲਾਈ ਨੂੰ ਡਿਪਟੀ ਕਮਿਸ਼ਨਰ ਬਰਨਾਲਾ ਦੇ ਦਫ਼ਤਰ ਧਰਨਾ ਦੇ ਕੇ ਮੰਗ ਪੱਤਰ ਵੀ ਦਿੱਤਾ ਗਿਆ ਅਤੇ ਇਸ ਤੋਂ ਪਹਿਲਾਂ ਪੰਜਾਬ ਸਰਕਾਰ ਦੇ ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਨੂੰ ਪੈਨਸ਼ਨਰਾਂ ਦੀਆਂ ਮੰਗਾਂ ਨੂੰ ਪੂਰੇ ਕਰਵਾਉਣ ਸਬੰਧੀ ਮੰਗ ਪੱਤਰ ਵੀ ਦਿੱਤਾ ਗਿਆ। ਉਨ੍ਹਾਂ ਵੱਲੋਂ ਵਿਸ਼ਵਾਸ ਦਿਵਾਇਆ ਗਿਆ ਸੀ ਪੈਨਸ਼ਨਰਾਂ ਦੀਆਂ ਮੰਗਾਂ ਨੂੰ ਪਹਿਲ ਦੇ ਅਧਾਰ ਤੇ ਪੂਰਾ ਕੀਤਾ ਜਾਵੇਗਾ, ਪਰ ਹੁਣ ਤਕ ਜਥੇਬੰਦੀ ਨੂੰ ਝੂਠੇ ਲਾਰੇ ਤੇ ਫੋਕੇ ਵਾਅਦਿਆਂ ਤੋ ਸਵਾਏ ਸਰਕਾਰਾਂ ਨੇ ਕੁਝ ਨਹੀਂ ਦਿੱਤਾ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਪੈਨਸ਼ਨਰਾਂ ਦੀਆਂ ਮੰਗਾਂ ਨੂੰ ਪੂਰੀਆਂ ਕਰਨ ਲਈ ਅਣਗੌਲਿਆ ਕੀਤਾ ਜਾ ਰਿਹਾ ਹੈ। ਜੇਕਰ ਪੰਜਾਬ ਸਰਕਾਰ ਨੇ ਪੈਨਸ਼ਨਰਾਂ ਮੰਗਾਂ ਨੂੰ ਪੂਰੀਆਂ ਨਾ ਕੀਤਾ ਤਾਂ ਜਥੇਬੰਦੀ ਅਗਲਾ ਤਿੱਖਾ ਸੰਘਰਸ਼ ਵਿੱਢਣ ਲਈ ਮਜਬੂਰ ਹੋਵੇਗੀ । ਇਸ ਮੌਕੇ ਬ੍ਰਿਜ ਲਾਲ ਸ਼ਰਮਾ ਮਹਿਲ ਕਲਾਂ, ਮਾਸਟਰ ਕੇਵਲ ਸਿੰਘ ਗਹਿਲ, ਰੂਪ ਸਿੰਘ ਗਹਿਲ, ਮਾਸਟਰ ਦਰਸ਼ਨ ਸਿੰਘ ਠੁੱਲੀਵਾਲ, ਸਰੂਪ ਚੰਦ ਸਿੰਗਲਾ, ਸੋਹਣ ਸਿੰਘ ਭੈਣੀ, ਗੁਰਵਿੰਦਰ ਸਿੰਘ, ਸੁਖਦੇਵ ਸਿੰਘ ਵਜੀਦਕੇ ਖੁਰਦ ਤੋ ਇਲਾਵਾ ਹੋਰ ਵੱਡੀ ਗਿਣਤੀ ਵਿੱਚ ਜਥੇਬੰਦੀ ਦੇ ਵਰਕਰ ਤੇ ਆਗੂ ਹਾਜ਼ਰ ਸਨ।