ਪੰਜਾਬ

ਹੈਲਪਲਾਈਨ ਨੰਬਰ 8054002351 ਤੇ ਦਿੱਤੀ ਜਾ ਸਕਦੀ ਹੈ ਜਾਣਕਾਰੀ

ਲੁਧਿਆਣਾ 25 ਫਰਵਰੀ-(ਗੁਰਕੀਰਤ ਜਗਰਾਉਂ/ਗੁਰੂਦੇਵ ਗ਼ਾਲਿਬ )- ਯੂਕਰੇਨ ਵਿੱਚ ਫਸੇ ਜ਼ਿਲ੍ਹੇ ਨਾਲ ਸਬੰਧਤ ਵਿਦਿਆਰਥੀਆਂ ਅਤੇ ਹੋਰ ਵਿਅਕਤੀਆਂ ਦੀ ਜਾਣਕਾਰੀ ਇਕੱਠੀ ਕਰਨ ਲਈ ਜਿਲ੍ਹਾ ਪ੍ਰਸ਼ਾਸਨ ਲੁਧਿਆਣਾ ਵਲੋਂ  ਇਕ ਹੈਲਪਲਾਈਨ ਨੰਬਰ 8054002351 ਸਥਾਪਤ ਕੀਤਾ ਗਿਆ ਹੈ, ਤਾਂ ਜੋ ਅਜਿਹੇ ਵਿਅਕਤੀਆਂ ਦੀ ਜਾਣਕਾਰੀ ਰਾਜ ਸਰਕਾਰ ਰਾਹੀਂ ਸਬੰਧਤ ਅਧਿਕਾਰੀਆਂ ਨੂੰ ਭੇਜੀ ਜਾ ਸਕੇ। 

ਡਿਪਟੀ ਕਮਿਸ਼ਨਰ ਲੁਧਿਆਣਾ ਸ਼੍ਰੀ ਵਰਿੰਦਰ ਕੁਮਾਰ ਸ਼ਰਮਾ ਨੇ ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਜ਼ਿਲ੍ਹੇ ਨਾਲ ਸਬੰਧਤ ਯੂਕਰੇਨ ਵਿੱਚ ਫਸੇ ਹੋਏ ਵਿਅਕਤੀਆਂ ਦੀ ਸੂਚਨਾ ਇਸ ਲਈ ਇਕੱਤਰ ਕੀਤੀ ਜਾ ਰਹੀ ਹੈ ਤਾਂ ਜੋ ਇਹ ਸੂਚਨਾ ਮੰਗੇ ਜਾਣ ਤੇ ਰਾਜ ਸਰਕਾਰ ਰਾਹੀਂ ਵਿਦੇਸ਼ ਮੰਤਰਾਲੇ ਨੂੰ ਸਮੇਂ ਸਿਰ ਮੁਹੱਈਆ ਕਰਵਾਈ ਜਾ ਸਕੇ। 

ਡਿਪਟੀ ਕਮਿਸ਼ਨਰ ਨੇ ਅਪੀਲ ਕਰਦਿਆਂ ਕਿਹਾ ਕਿ ਜ਼ਿਲ੍ਹੇ ਨਾਲ ਸਬੰਧਤ ਜਿਹੜ੍ਹੇ ਵਿਅਕਤੀਆਂ ਦੇ ਪਰਿਵਾਰਕ ਮੈਂਬਰ ਯੂਕਰੇਨ ਵਿੱਚ ਫਸੇ ਹਨ ਉਹ ਤੁਰੰਤ ਸੂਚਨਾ ਮੁਹੱਈਆ ਕਰਵਾਉਣ ਅਤੇ ਇਸ ਸੂਚਨਾ ਵਿੱਚ ਯੂਕਰੇਨ ਗਏ ਵਿਅਕਤੀ ਦਾ ਨਾਮ, ਪਿਤਾ ਦਾ ਨਾਮ, ਲੁਧਿਆਣਾ ਵਿਖੇ ਪਤਾ ਮੋਬਾਈਲ ਨੰਬਰ ਪਾਸਪੋਰਟ ਨੰਬਰ, ਯੂਨੀਵਰਸਿਟੀ/ਕਾਲਜ ਦਾ ਨਾਮ, ਯੂਕਰੇਨ ਵਿੱਚ ਉਨਾਂ ਦੇ ਰਿਹਾਇਸ਼ ਦਾ ਪਤਾ ਅਤੇ ਮੋਬਾਈਲ ਨੰਬਰ ਆਦਿ ਸਮੇਤ ਵੱਧ ਤੋਂ ਵੱਧ ਜਾਣਕਾਰੀ ਸਾਂਝੀ ਕੀਤੀ ਜਾਵੇ।

ਸੁਵੱਖਤੇ  ਗੁਰੂ ਘਰ ਦੇ ਸਪੀਕਰ ਚੋਂ ਜਦੋਂ ਪਾਠੀ ਸਿੰਘ ਦੀ ਆਵਾਜ਼ ਉਸ ਦੇ ਕੰਨੀਂ ਪੈਣੀ ਉਹ ਇੱਕ ਦਮ ਉੱਭੜਵਾਹੇ  ਵਾਂਗੂੰ ਉੱਠ ਪੈਂਦੀ ਹੈ  । ਸਿਰ ਤੋਂ ਲੈ ਕੇ ਪੈਰਾਂ ਦੀਆਂ ਤਲੀਆਂ ਦੇ ਹੇਠਾਂ ਤੱਕ ਤ੍ਰੇਲੀਓ -ਤ੍ਰੇਲੀ ਹੋਇਆ ਉਸ ਦਾ ਸਰੀਰ ਝੂਠਾ ਪੈ ਜਾਂਦਾ ਸੀ  ।  ਹੱਥ -ਪੈਰ ਤਾਂ ਜਾਣੋ ਸੁੰਨ ਹੋ ਕੇ ਕੰਮ ਹੀ ਛੱਡ ਜਾਂਦੇ ਸੀ, ਪੋਹ ਦੇ ਮਹੀਨੇ ਦੀਆਂ ਸਰਦ ਕਾਲੀਆਂ ਰਾਤਾਂ ਦਾ ਪਹਿਲਾ ਪਹਿਰ, ਕੁੱਕੜ ਦੀ ਬਾਂਗ ਰੋਂਦੇ ਹੋਏ ਕੁੱਤਿਆਂ ਦੀਆਂ ਹੂਕਾਂ, ਸ਼ੀ-ਸ਼ੀ ਦੀਆਂ ਆਵਾਜ਼ਾਂ ਸੁਣ ਕੇ ਉਸ ਦਾ ਦਿਲ ਨਿਕਲ ਕੇ ਬਾਹਰ ਨੂੰ ਆਉਂਦਾ ਸੀ  ।ਮੰਜੇ ਤੇ ਪਈ ਦੀ ਜਦੋਂ  ਉਸ ਦੀ ਅੱਖ ਖੁੱਲ੍ਹਦੀ ਹੈ ਤਾਂ ਉਹ ਟਸਰ ਦੇ ਗਦੈਲੇ ‘ਤੇ ਖੱਦਰ ਦੀ ਫੁੱਲਾਂ ਵਾਲੀ ਰਜਾਈ ਚੋਂ ਬਾਹਰ ਨਿਕਲਦੀ, ਸਾਹੋ ਸਾਹ ਹੋਈ  ਅੱਖਾਂ ਫੇਰਦੀ ਹੋਈ, ਉਹ ਆਪਣੇ ਖਿੱਲਰੇ ਲੰਮੇ ਕਾਲੇ ਵਾਲਾਂ ਦਾ ਜੂੜਾ ਬਣਾਉਂਦੇ ਹੋਏ, ਇਕ ਦਮ ਮੰਜੀ ਤੋਂ ਉੱਠਦੀ ਚੱਕਵੇਂ ਪੈਰੀਂ ਸਵਾਤ ਦਾ ਇੱਕ ਗੇੜਾ ਕੱਢ  ਕੇ ਸਹਿਮ ਅਤੇ ਈਰਖਾ ਨਾਲ ਭਰੀ ਪੀਤੀ ਆਪਣੀ ਮਾਂ ਦੇ ਮੰਜੇ ਕੋਲ ਆ ਕੇ  ਮਾਂ ਨੂੰ ਘੂਕ ਸੁੱਤੀ ਪਈ ਨੂੰ ਦੇਖਦੀ ਹੈ  । ਉਹ ਸੋਚਣ ਲੱਗਦੀ ਹੈ  “ਕਿੰਨੀ ਬੇਫ਼ਿਕਰੀ ਨਾਲ ਸੁੱਤੀ ਪਈ ਏ ਮਾਂ ਮੇਰੇ ਪਰਿਵਾਰ ਮੇਰੇ ਬਾਪ ਮੇਰੇ ਭੈਣ- ਭਰਾਵਾਂ ਨੂੰ ਧੋਖੇ ਵਿਚ ਰੱਖ ਕੇ  ,ਮੇਰੀ ਆਤਮਾ ਦਾ ਚੈਨ ਅਤੇ ਸਕੂਨ ਸਾਰਾ ਕੁਝ ਖੋਹ ਕੇ,  ਮੇਰੀ ਅੰਮੀਏ ਮਾਵਾਂ ਕਦੇ ਇੰਜ ਨਹੀਂ ਕਰਦੀਆਂ  …….।“”ਆਪਣੇ ਮੂੰਹ ਨੂੰ ਹੱਥਾਂ ਨਾਲ ਢੱਕ ਕੇ ਇਨ੍ਹਾਂ ਖ਼ਿਆਲਾਂ ਦੀ ਕਸ਼ਮਕਸ਼ ਵਿੱਚ ਉਹ ਭੱਜ ਜਾਂਦੀ ਹੈ  ।ਘਰ ਦੇ ਪਿਛਲੇ ਪਾਸੇ ਡੰਗਰਾਂ ਵਾਲੇ ਵਿਹੜੇ ਵਿੱਚ ਬਣੀ ਤੂੜੀ ਵਾਲੀ ਸਵਾਤ ਵਿੱਚ ਚਲੀ ਜਾਂਦੀ ਹੈ।

                 ਪਰਮ ਚੌਦਾਂ ਕੁ ਸਾਲਾਂ ਦੀ ਮਲੂਕ  ਜਿਹੀ ਕੁੜੀ ਹੈ  ।ਅੱਠਵੀਂ ਜਮਾਤ ਵਿੱਚ ਪੜ੍ਹਦਿਆਂ ਉਸ ਨੂੰ ਦਸੰਬਰ ਮਹੀਨੇ ਦੀਆਂ ਵੱਡੇ ਦਿਨਾਂ ਦੀਆਂ ਛੁੱਟੀਆਂ ਹੋ ਜਾਂਦੀਆਂ ਹਨ। ਘਰ ਵਿੱਚ ਰਹਿਣ ਕਰਕੇ ਉਹ ਆਪਣੀ ਮਾਂ ਨਾਲ  ਘਰ ਦੇ ਕੰਮ- ਧੰਦੇ ਵਿੱਚ ਹੱਥ ਵਟਾਉਂਦੀ ਹੈ। ਮਾਂ ,ਪਰਮ ਨੂੰ ਘਰ ਦੇ ਛੋਟੇ- ਛੋਟੇ ਕੰਮ ਕਰਨ ਨੂੰ ਕਹਿ ਦਿੰਦੀ ਹੈ ,ਕਿਉਂਕਿ ਉਸ ਦੇ ਵੱਡੇ ਭੈਣ- ਭਰਾ ਆਪਣੇ ਆਪਣੇ ਰੋਜ਼ਾਨਾ ਦੇ ਕੰਮਾਂ ਵਿੱਚ ਰੁੱਝੇ ਰਹਿੰਦੇ ਸਨ ।ਸਿਆਲ ਦੇ ਦਿਨ ਬੇਹੱਦ ਠੰਡੇ ਅਤੇ ਛੋਟੇ  ਹੋਣ ਕਰਕੇ  ਉਨ੍ਹਾਂ ਦਾ ਸਮਾਂ ਖੇਤ ਦੇ ਕੰਮਾਂ ਵਿੱਚ ਹੀ ਲੰਘ ਜਾਂਦਾ । ਉਨ੍ਹਾਂ ਕੋਲ ਸਮੇਂ ਦੀ ਘਾਟ ਪੈ ਜਾਂਦੀ। ਉਸ ਸਮੇਂ ਪਰਮ ਆਪਣੀ ਮਾਂ ਦੇ ਨਾਲ  ਮਾਂ ਛੋਟੇ -ਛੋਟੇ ਕੰਮਾਂ ਵਿੱਚ ਉਨ੍ਹਾਂ ਦਾ ਹੱਥ ਵਟਾਉਂਦੀ ਸੀ  ।ਉਹ ਸਵੇਰੇ -ਸ਼ਾਮ ਧੂਫ਼ ਬੱਤੀ ਕਰਦੀ , ਕੱਚੀ ਲੱਸੀ ਦਾ ਛਿੱਟਾ ਦਿੰਦੀ ਤੇ ਪਾਣੀ ਕੋਲੇ ‘ ਤੇ ਡੋਲਦੀ  ਇਹੋ ਜਿਹੇ ਨਿੱਕੇ- ਨਿੱਕੇ ਕੰਮਾਂ ਚੋਂ ਹੀ ਇਕ ਕੰਮ ਸੀ  ,ਨਿੱਤ ਦਿਨ ਗੁਰੂ ਘਰ ਚੋਂ ਪਿੰਡ ਦੇ ਘਰਾਂ ਵਿਚ ਆਉਣ ਵਾਲੇ  ਗੁਰੂ ਘਰ ਦੇ ਸੇਵਾਦਾਰ ਨੂੰ ਦੁੱਧ ਅਤੇ ਪ੍ਰਾਸ਼ਾਦੇ ਦੀ ਸੇਵਾ ਕਰਨਾ। ਜਦੋਂ ਹੀ ਸੀ  ਸੇਵਾਦਾਰ ਪਰਮ ਦੇ ਘਰ ਦੇ ਅੰਦਰ ਆ ਕੇ (ਪਿੰਡਾਂ ਵਿਚ ਬਗੈਰ ਇਜਾਜ਼ਤ ਦੀ ਘਰ ਦੇ ਅੰਦਰ ਆਉਣ ਦਾ ਰਿਵਾਜ ਹੈ। ਪਿੰਡਾਂ ਦੇ ਘਰਾਂ ਨੂੰ  ਦੇ ਬਾਹਰਲੇ ਦਰਵਾਜ਼ੇ ਸਾਰਾ ਦਿਨ ਖੁੱਲ੍ਹੇ ਹੀ ਰਹਿੰਦੇ ਹਨ । )ਸਤਨਾਮ ਵਾਹਿਗੁਰੂ ਕਹਿੰਦਾ ਤਾਂ ਉਹ ਤੇਜ਼ੀ ਨਾਲ ਝਲਾਨੀ ਦੇ ਅੰਦਰ ਜਾਲੀ ਵਿੱਚ ਪਈ ਦੁੱਧ ਦੀ ਗੜਵੀ( ਜੋ ਮੱਝਾਂ ਦੀਆਂ ਧਾਰਾਂ ਕੱਢਣ ਦੇ ਤੁਰੰਤ  ਬਾਅਦ ਭਰ ਕੇ ਰੱਖ ਦਿੱਤੀ ਜਾਂਦੀ ਸੀ )ਚੁੱਕਦੀ, ਪੋਣੇ ਚੋਂ ਇੱਕ ਰੋਟੀ ਕੱਢ ਕੇ ਵਾਹੋ -ਦਾਹੀ ਭੱਜਦੀ  , ਭੱਜ ਕੇ ਸੇਵਾਦਾਰ ਨੂੰ ਫੜਾ ਦਿੰਦੀ ।ਉਹ ਸੇਵਾਦਾਰ ਦੇ ਛੇਤੀ ਨਾਲ ਘਰ ਚੋਂ ਬਾਹਰ ਨਿਕਲਣ ਦਾ ਇੰਤਜ਼ਾਰ ਕਰਦੀ ।ਅੰਦਰੋਂ - ਅੰਦਰੀ ਕਾਹਲੀ ਜਿਹੀ ਪੈਣ ਲੱਗਦੀ ।ਜਦੋਂ ਸੇਵਾਦਾਰ ਉੱਥੋਂ ਚਲਿਆ ਜਾਂਦਾ ਤਾਂ ਉਹ ਸੋਚਾਂ ਵਿੱਚ ਡੁੱਬ ਜਾਂਦੀ। ਕਦੇ ਉਹ ਸੋਚਦੀ,  “ਕੱਲ੍ਹ   ਨੂੰ ਮੈਂ ਬਾਬਾ ਜੀ ਨੂੰ ਕਹਿ ਹੀ ਦੇਣਾ ਹੈ ਕਿ  ਸਾਡੀ ਮੱਝ ਹੁਣ ਤੋਕੜ ਹੋ ਗਈ ਹੈ। ਦੁੱਧ ਘੱਟ ਦੇਣ ਲੱਗ ਗਈ ਹੈ  ।ਸਿਆਲਾਂ ਦੇ ਦਿਨ ਹੋਣ ਕਰਕੇ ਅਸੀਂ ਰੋਟੀ ਵੀ ਹੁਣ ਦੇਰੀ ਨਾਲ ਪਕਾਉਂਦੇ ਹਾਂ  ।ਤੁਸੀਂ ਹੁਣ ਸਾਡੇ ਘਰ ਨਾ ਆਇਆ ਕਰੋ  ।“ਅਜਿਹੀਆਂ ਪ੍ਰਸਥਿਤੀਆਂ ਦੇ ਵਸ ਪੈ ਕੇ ਪਰਮ ਦਾ ਬਾਲ ਮਨ ਇਕ ਮਨ ਦੀ ਵੇਦਨਾ ਦੀ ਪੀੜ ਹੰਢਾ ਰਿਹਾ ਸੀ। ਉਸ ਦੇ ਦਿਲ ਦਿਮਾਗ ਵਿੱਚ  ਅਚਨਚੇਤੇ ਹੀ ਇੱਕ ਵਹਿਮ ਘਰ ਕਰ ਗਿਆ ਸੀ ,ਜੋ ਇਸ ਉਮਰੇ ਅਕਸਰ ਹੀ ਕਮਜ਼ੋਰ ਭਾਵਨਾਵਾਂ ਵਾਲੇ ਇਨਸਾਨ ,ਬੇਸ਼ੱਕ ਉਹ  ਹੋਵੇ ਨਰ ਹੋਵੇ ਜਾਂ ਮਾਦਾ  ਦੋਵਾਂ ਦਾ ਹੀ ਮਾਨਸਿਕ ਸੰਤੁਲਨ ਵਿਗਾੜ ਦਿੰਦਾ ਹੈ। ਛੋਟੀ ਜਿਹੀ ਘਟਨਾ ਵੀ ਉਸ ਦੇ ਮਨ ਨੂੰ ਡਰ ਅਤੇ ਸਹਿਮ ਅੰਦਰ ਜਕੜ  ਲੈਂਦੀ ਹੈ  ।ਅਜਿਹਾ ਹੀ ਇੱਕ ਡਰ ਪਰਮ ਦੇ ਸੀਨੇ ਅੰਦਰ ਘਰ ਕਰ ਕੇ ਬੈਠ ਗਿਆ ਸੀ ।ਉਹ ਗੁਰੂ ਘਰ ਦੇ ਸੇਵਾਦਾਰ, ਜੋ ਉਨ੍ਹਾਂ ਦੇ ਘਰ ਰੋਜਾਨਾ ਹੀ ਆਉਂਦਾ ਸੀ  ।ਇਕ ਦਿਨ ਉਹ ਆਪਣੀ ਮਾਂ ਨੂੰ ਉਸ ਸੇਵਾਦਾਰ ਨੂੰ ਦੁੱਧ ਪ੍ਰਸ਼ਾਦਾ ਫੜਾਉਣ ਤੋਂ ਬਾਅਦ ਉਸ ਦੇ ਨਾਲ ਹੱਸ -ਹੱਸ ਕੇ ਗੱਲਾਂ ਕਰਦਿਆਂ ਦੇਖਦੀ ਹੈ  ।ਉਸ ਹਾਲਤ ਦੇ ਵਿੱਚ ਪਰਮ ਕਿਸੇ ਸ਼ੱਕ ਦੇ ਨਾਲ ਭਰ ਜਾਂਦੀ ਹੈ  ।ਉਹ ਲੁਕ- ਲੁਕ ਕੇ ਆਪਣੀ ਮਾਂ ਅਤੇ ਸੇਵਾਦਾਰ ‘ਤੇ ਨਿਗ੍ਹਾ ਰੱਖਣ ਲੱਗਦੀ ਹੈ  ।ਹੁਣ ਜਦੋਂ ਵੀ ਸੇਵਾਦਾਰ ਸਤਨਾਮ- ਵਾਹਿਗੁਰੂ ਦੀ ਆਵਾਜ਼ ਦਿੰਦਾ ਹੈ ਤਾਂ, ਮਾਂ ਪਰਮ ਨੂੰ ਆਵਾਜ਼ ਦਿੰਦੀ ਹੈ , “ਕੁੜੇ ਪਰਮ ਕਿੱਥੇ ਚਲੀ ਜਾਂਦੀ ਹੈ  ,ਆਹ ਭਾਈ ਜੀ ਨੂੰ ਪ੍ਰਸ਼ਾਦਾ ਫੜਾ ਕੇ ਆ  ,ਪਤਾ ਹੀ ਨਹੀਂ ਅੱਜਕੱਲ੍ਹ ਇਸ ਕੁੜੀ ਨੂੰ ਕੀ ਹੋ ਗਿਆ ਹੈ  ।ਇਸ ਨਿੱਕੇ ਜਿਹੇ ਕੰਮ ਤੋਂ ਵੀ ਟਾਲ ਮਟੋਲ ਕਰਨ ਲੱਗੀ ਹੈ  ।“ਪਰਮ ਗੱਲ ਨੂੰ ਅਣਸੁਣੀ ਕਰ ਦਿੰਦੀ ਹੈ  ।ਸੇਵਾਦਾਰ ਐਨੀ ਗੱਲ ਸੁਣ ਕੇ ਸਤਨਾਮ ਵਾਹਿਗੁਰੂ ਬੋਲਦਾ ਹੈ  ।ਆਖ਼ਰ ਪਰਮ ਦੀ ਮਾਂ ਆਪ ਹੀ ਉੱਠ ਕੇ ਸੇਵਾਦਾਰ ਨੂੰ ਰੋਟੀ ਅਤੇ ਦੁੱਧ ਫੜਾ ਦਿੰਦੀ ਹੈ  ।ਸੇਵਾਦਾਰ  ਖੱਦਰ ਦੇ ਕੱਪੜੇ ਨਾਲ ਬਣੀ ਇੱਕ ਬਗਲੀ ਜਿਹੀ ਜੋ ਉਸ ਨੇ ਮੋਢਿਆਂ ਤੇ ਟੰਗੀ ਹੁੰਦੀ ,ਉਸ ਵਿਚ ਰੋਟੀ ਰੱਖ ਕੇ ਢੱਕ ਦਿੰਦਾ ਹੈ  । ਪੌਣਾਂ ਬੰਨ੍ਹ ਕੇ ਢਕੀ ਹੋਈ ਬਾਲਟੀ ਵਿੱਚ ਗੜਵੀ ਦੁੱਧ ਦੀ ਉਲਟਾ ਦਿੰਦਾ ਹੈ। ਦੁੱਧ ਪੋਣੇ ਰਾਹੀਂ ਪੁਣ ਕੇ ਬਾਲਟੀ ਅੰਦਰ   ਚਲਿਆ ਜਾਂਦਾ ਹੈ ਤੇ ਸੇਵਾਦਾਰ ਸਤਨਾਮ ਵਾਹਿਗੁਰੂ  ਵਾਹਿਗੁਰੂ ਬੋਲਦਾ ਹੈ ।ਇਹ ਉਸ ਦਾ ਨਿੱਤ ਨੇਮ ਕਾਰਜ ਸੀ  ।

                     ਹੁਣ ਜਦੋਂ ਵੀ ਸੇਵਾਦਾਰਉਨ੍ਹਾਂ ਦੇ ਘਰ ਆਉਂਦਾ  ਤਾਂ ਪਰਮ ਉਸ ਨੂੰ ਲੁਕ -ਲੁਕ ਕੇ ਦੇਖਦੀ ਰਹਿੰਦੀ ਸੀ ।ਪਰਮ ਦੀ ਮਾਂ ਸੇਵਾਦਾਰ ਦੇ ਆਉਂਦਿਆਂ ਹੀ ਇੱਕ ਖ਼ੁਸ਼ੀ ਜਿਹੀ ਨਾਲ ਭਰ ਜਾਂਦੀ ।ਸੇਵਾਦਾਰ ਅਤੇ ਪਰਮ  ਦੀ ਮਾਂ  ਇੱਕ ਦੂਜੇ ਨੂੰ ਚੁੱਪ -ਚਾਪ ਮੋਹ ਭਰੀ ਨਜ਼ਰ ਨਾਲ ਦੇਖਦੇ ਤੇ ਇਕ ਸਰੂਰ ਜਿਹੇ ਨਾਲ ਭਰ ਜਾਂਦੇ  ।ਪਰਮ ਦੀ ਮਾਂ ਇਕ ਸਰਦੇ ਪੁੱਜਦੇ ਜ਼ਿਮੀਂਦਾਰ ਦੀ ਨੂੰਹ ਸੀ । ਉਹ ਵਿਆਹ ਕੇ ਆਉਂਦਿਆਂ ਹੀ ਜ਼ਿੰਮੇਵਾਰੀਆਂ ਦੀਆਂ ਚੱਕੀਆਂ ਵਿੱਚ ਪਿਸਣ ਲੱਗ ਗਈ ਸੀ  ।ਆਮ ਸਰਦੇ -ਪੁਜਦੇ ਘਰਾਂ ਦੀ ਤਰ੍ਹਾਂ ਪਰਮ ਦੇ ਘਰ ਦਾ ਵੀ ਇਹੀ ਹਾਲ ਸੀ ਕਿ ਔਰਤਾਂ ਨੂੰ ਘਰ ਦੇ ਅੰਦਰ ਹੀ ਡੱਕ ਕੇ ਰੱਖਿਆ ਜਾਂਦਾ ਸੀ। ਉਹ ਸਿਰਫ਼ ਘਰ ਦੇ ਕੰਮ -ਕਾਜ  ਹੀ ਕਰਦੀਆਂ ਸਨ  ।ਅਜਿਹੇ ਹਾਲਾਤਾਂ ਵਿੱਚ ਕਿਸੇ  ਇਨਸਾਨ  ਦਾ ਵੀ  ਆਪਣੇ ਮਨ ਦੇ ਚੈਨ ਸਕੂਨ ਲਈ ਪਟੜੀ ਤੋਂ ਉਤਰ ਜਾਣਾ ਕੋਈ ਵੱਡੀ ਗੱਲ ਵੀ ਨਹੀਂ ਸੀ  ਹੋ ਸਕਦੀ  ।ਸ਼ਾਇਦ ਪਰਮ ਦੀ ਮਾਂ ਨੂੰ ਵੀ ਉਸ ਸੇਵਾਦਾਰ ਦੀ ਮੋਹ ਭਰੀ ਤੱਕਣੀ ਚੋਂ ਮਨ ਦੇ ਵਲਵਲੇ ਸ਼ਾਂਤ ਕਰਨ ਦੀ ਦਵਾ ਮਿਲ ਗਈ ਹੋਵੇ  ।

        ਪਰਮ ਸੋਚਦੀ ਰਹਿੰਦੀ , “ਇਹ ਬਾਬਾ ਦੁਨੀਆਂ ਜਹਾਨ ਛੱਡ ਕਿਉਂ ਨਹੀਂ ਦਿੰਦਾ। ਇਹ ਮੇਰੀ ਮਾਂ ਨੂੰ ਲੈ ਕੇ ਕਿਧਰੇ ਭੱਜ ਹੀ ਜਾਵੇਗਾ ।ਮੇਰੀ ਮਾਂ ਬਾਬੇ ਦੇ ਇਸ਼ਕ ਵਿੱਚ  ਕੀ ਪਤਾ ਕੀ ਕਰ ਜਾਵੇ  ।“ਅਜਿਹੀ ਉਧੇੜ ਬੁਣ ਦੇ ਚੱਕਰਾਂ ਵਿਚ ਪਈ ਪਰਮ ਮਾਨਸਿਕ ਤੌਰ ਤੇ ਬਿਮਾਰ ਹੋ ਚੁੱਕੀ ਸੀ ।ਉਸ ਦੇ ਦਿਨ ਦਾ ਆਰਾਮ ਰਾਤਾਂ ਦੀ ਨੀਂਦ  ਉੱਡ ਚੁੱਕੀ ਸੀ  ।ਹੁਣ ਉਸ ਨੂੰ ਗੁਰੂ ਘਰ ਦੇ ਸਪੀਕਰ ਦੀ ਆਵਾਜ਼ ਬਿਲਕੁਲ ਵੀ ਚੰਗੀ ਨਹੀਂ ਲੱਗਦੀ ਸੀ ।ਇਹ ਆਵਾਜ਼ ਉਸ ਨੂੰ ਮੌਤ ਦਾ ਕੋਈ ਮਾਤਮ ਗਾਉਂਦੀ ਲੱਗਦੀ ਸੀ  ।ਘਰ ਦੇ ਪਿਛਵਾੜੇ ਬਣੀ ਹੋਈ ,ਤੂੜੀ ਵਾਲੀ ਸਵਾਤ ਵਿਚ ਜਾ ਕੇ ਉਸ ਨੂੰ ਗੁਰੂ ਘਰ ਦੇ ਸਪੀਕਰ ਚੋਂ ਆਉਂਦੀ ਗੁਰੂ ਬਾਣੀ ਦੀ ਅਵਾਜ਼ ਸੁਣਨੋਂ ਬੰਦ ਹੋ ਗਈ ਸੀ  ।ਉਹ ਇੱਕ ਮਾਨਸਿਕ ਬੋਝ ਦੇ ਥੱਲੇ ਏਨੀ ਦੱਬ ਗਈ ਸੀ ਕਿ ਉਸ ਦੇ ਕੰਨ ਹੀ ਬੋਲੇ ਹੋ ਗਏ ਸਨ  ।ਸਰੀਰ ਸੁੰਨ ਹੋ ਰਿਹਾ ਸੀ। ਉਹ ਨਿੰਮੋਝਾਣੀ ਹੋਈ, ਖਿੱਲਰੇ ਵਾਲ, ਸਾਹ ਸੱਤ ਨਿਕਲਿਆ ਹੋਇਆ ਸਰੀਰ ਲੈ ਕੇ ਕੰਧ ਨਾਲ ਢੋਅ ਲਾ ਕੇ ਖੜ੍ਹ ਜਾਂਦੀ ਹੈ  । ਕੁਝ ਪਲਾਂ ਬਾਅਦ ਉਹ ਲੀਰੋ -ਲੀਰ ਹੋਈ  ਹੌਲੀ- ਹੌਲੀ  ਅੱਖਾਂ ਖੋਲ੍ਹਦੀ ਹੈ ਅਤੇ ਸਵਾਤ ਦੇ ਨਾਲ ਵਾਲੇ ਸਿਰਕੀਆਂ ਵਾਲੇ ਛੱਤੜੇ ਵਿੱਚ ਚਲੀ ਜਾਂਦੀ ਹੈ  ।ਉਹ ਉੱਥੇ ਪਈ ਇੱਕ ਸਪਰੇਅ ਵਾਲੀ ਸ਼ੀਸ਼ੀ ਚੁੱਕਦੀ ਹੈ ਅਤੇ ਇੱਕੋ ਹੀ ਸਾਹੇ ਗੱਟ- ਗੱਟ ਕਰਕੇ ਪੀ ਜਾਂਦੀ ਹੈ  ।ਦਿਨ ਚੜ੍ਹਦਿਆਂ ਹੀ ਪਰਿਵਾਰ ਵਿੱਚ ਚੀਕ- ਚੰਘਿਆੜਾ ਪੈ ਜਾਂਦਾ ਹੈ  ।ਇਸ ਮਲੂਕ ਜਿਹੀ ਜਿੰਦ ਦੇ   ਮੌਤ ਦੇ ਕਾਰਨਾਂ ਦਾ  ਕਿਸੇ ਨੂੰ ਵੀ ਕੁਝ ਪਤਾ ਨਹੀਂ ਲੱਗਦਾ ।ਇੱਕ ਮਾਨਸਿਕ ਪੀੜ ਹੰਢਾਅ ਰਹੀ ਜਵਾਨ ਕੁੜੀ ਦੀ ਮੌਤ ਜਿੰਨੇ ਮੂੰਹ ਓਨੀਆਂ ਗੱਲਾਂ ਹੋਣ ਲੱਗਦੀਆਂ ਹਨ  ………

ਵੀਰਪਾਲ ਕੌਰ ਕਮਲ 

8569001590

 ਪਿਛਲੇ ਸਾਲ, ਜ਼ੀ 5 ਨੇ 'ਰੱਜ ਕੇ ਵੇਖੋ' ਮੁਹਿੰਮ ਦੀ ਸ਼ੁਰੂਆਤ ਦੇ ਨਾਲ ਪੰਜਾਬੀ ਭਾਸ਼ਾ ਦੇ ਵਿਿਸ਼ਆਂ ਨੂੰ ਪੰਜਾਬੀ ਪ੍ਰਸ਼ੰਸਕਾਂ ਤੱਕ ਪਹੁੰਚਾਇਆ, ਜਿਸ ਨੇ ਉੱਚ ਪੱਧਰੀ ਪੰਜਾਬੀ ਫ਼ਿਲਮਾਂ ਅਤੇ ਡਰਾਮਿਆਂ ਨਾਲ ਦਰਸ਼ਕਾਂ ਦਾ ਮਨੋਰੰਜਨ ਵੀ ਕੀਤਾ। ਉਨ੍ਹਾਂ ਨੇ ਪਰਿਵਾਰਕ ਡਰਾਮਿਆਂ ਤੋਂ ਲੈ ਕੇ ਰੋਮਾਂਸ ਤੱਕ ਦੀਆਂ ਕਈ ਫਿਲਮਾਂ ਰਿਲੀਜ਼ ਕੀਤੀਆਂ ਹਨ, ਇਸੇ ਮੁਹੀਮ ਨੂੰ ਅੱਗੇ ਵਧਾਉਂਦੇ ਹੋਏ ਹੁਣ ਉਨ੍ਹਾਂ ਨੇ 'ਯਾਰ ਅਣਮੁੱਲੇ ਰਿਟਰਨਜ਼' ਦਾ ਸੀਕਵਲ ਰਿਲੀਜ਼ ਕਰਨ ਦਾ ਫੈਸਲਾ ਕੀਤਾ ਹੈ ਤਾਂ ਜੋ ਆਪਣੇ ਦਰਸ਼ਕਾਂ ਨੂੰ ਆਪਣੇ ਦੋਸਤਾਂ ਨਾਲ ਜਸ਼ਨ ਮਨਾਉਣ ਦਾ ਇੱਕ ਹੋਰ ਕਾਰਣ ਬਣੇ।ਪਹਿਲਾਂ ਕਦੇ ਨਹੀਂ ਹੋਣ ਵਾਲਾ ਮਨੋਰੰਜਨ ਕਰਨ ਦੇ ਵਾਅਦੇ ਨਾਲ, ਸਫਲ ਫਿਲਮ 'ਯਾਰ ਅਣਮੁੱਲੇ' ਦੇ ਸੀਕਵਲ ਨੇ ਦੋਸਤੀ ਦੇ ਸਾਰੇ ਅਸੂਲਾਂ ਨੂੰ ਪੂਰਾ ਕੀਤਾ। ਫਿਲਮ ਤਿੰਨ ਦੋਸਤਾਂ, ਉਨ੍ਹਾਂ ਦੇ ਬੰਧਨ, ਦਿਲ ਟੁੱਟਣ ਅਤੇ ਰੋਮਾਂਸ ਦੀ ਕਹਾਣੀ ਨੂੰ ਦਰਸ਼ਾਉਂਦਾ ਹੈ। ਸਕ੍ਰੀਨਪਲੇ, ਕਹਾਣੀ ਅਤੇ ਇਸਦੇ ਡਾਇਲੌਗ ਗੁਰਜਿੰਦ ਮਾਨ ਦੁਆਰਾ ਲਿਖੇ ਗਏ ਹਨ ਅਤੇ ਇਸਦੇ ਨਿਰਦੇਸ਼ਕ ਹੈਰੀ ਭੱਟੀ ਹਨ। ਉਹ ਹਰੀਸ਼ ਵਰਮਾ, ਪ੍ਰਭ ਗਿੱਲ, ਯੁਵਰਾਜ ਹੰਸ, ਨਵਪ੍ਰੀਤ ਬੰਗਾ, ਨਿਕੀਤ ਢਿੱਲੋਂ, ਜਸਲੀਨ ਸਲੇਚ, ਰਾਣਾ ਜੰਗਬਹਾਦਰ ਅਤੇ ਅਤੇ ਹੋਰ ਸ਼ਾਨਦਾਰ ਕਾਸਟ ਨਾਲ ਦਰਸ਼ਕਾਂ ਦਾ ਮਨੋਰੰਜਨ ਕਰਣਗੇ।ਨਿਰਦੇਸ਼ਕ ਹੈਰੀ ਭੱਟੀ ਨੇ ਟਿੱਪਣੀ ਕੀਤੀ, "ਮੈਂ ਹਮੇਸ਼ਾ ਅਜਿਹੀਆਂ ਕਹਾਣੀਆਂ ਸੁਣਾਉਣ ਲਈ ਇੰਤਜ਼ਾਰ ਕੀਤਾ ਜਿਨ੍ਹਾਂ ਨਾਲ ਲੋਕ ਜੁੜ ਸਕਣ, ਇਸੇ ਇਰਾਦੇ ਨਾਲ 'ਯਾਰ ਅਣਮੁੱਲੇ ਰਿਟਰਨਜ਼' ਹੁਣ 190+ ਦੇਸ਼ਾਂ ਦੇ ਦਰਸ਼ਕਾਂ ਤਕ ਜ਼ੀ 5 ਰਾਹੀਂ ਪੁੱਜੇਗੀ, ਤੇ ਲੋਕ ਦਿੱਲੋਂ ਇਸ ਫਿਲਮ ਨਾਲ ਹੱਸ ਸਕਣਗੇ ਅਤੇ ਜੁੜ ਸਕਣਗੇ।ਪ੍ਰਭ ਗਿੱਲ ਨੇ ਕਿਹਾ, “ਯਾਰ ਅਣਮੁੱਲੇ ਦੇ ਪਹਿਲੇ ਚੈਪਟਰ ਨੂੰ ਦੇਸ਼ ਭਰ ਦੇ ਦਰਸ਼ਕਾਂ ਵੱਲੋਂ ਬਹੁਤ ਪਿਆਰ ਮਿਿਲਆ ਸੀ। ਅਸੀਂ ਇੱਕ ਟੀਮ ਵਜੋਂ 'ਯਾਰ ਅਣਮੁੱਲੇ ਰਿਟਰਨਜ਼' ਨੂੰ ਤੋਹਫ਼ੇ ਵਜੋਂ ਦਰਸ਼ਕਾਂ ਨੂੰ ਦੇਣਾ ਚਾਹੁੰਦੇ ਸੀ। 'ਯਾਰ ਅਣਮੁੱਲੇ ਰਿਟਰਨਜ਼' ਉਹਨਾਂ ਲਈ ਓਟੀਟੀ ਪ੍ਰੀਮੀਅਰ ਰਾਹੀਂ ਕਿਸੇ ਵੀ ਸਮੇਂ ਅਤੇ ਕਿਸੇ ਵੀ ਥਾਂ 'ਤੇ ਦੇਖਣ ਲਈ ਉਪਲਬਧ ਹੋਵੇਗੀ।ਅਭਿਨੇਤਾ ਹਰੀਸ਼ ਵਰਮਾ ਨੇ ਕਿਹਾ, "ਜਦੋਂ ਮੈਂ ਸਕ੍ਰਿਪਟ ਪੜ੍ਹੀ, ਮੈਂ ਇਸ ਫਿਲਮ ਬਾਰੇ ਬਹੁਤ ਖੁਸ਼ ਸੀ, ਅਤੇ ਬਾਕਸ ਆਫਿਸ 'ਤੇ ਸਫਲਤਾ ਤੋਂ ਬਾਦ , ਮੈਂ ਹੁਣ ਵੀ ਇਸ ਲਈ ਉੰਨਾ ਹੀ ਉਤਸ਼ਾਹਿਤ ਹਾਂ।" ਉਸਨੇ ਅੱਗੇ ਕਿਹਾ, "ਮੈਂ ਉਮੀਦ ਕਰਦਾ ਹਾਂ ਕਿ ਤੁਸੀਂ, ਤੁਹਾਡਾ ਪਰਿਵਾਰ ਅਤੇ ਦੋਸਤ ਇਸ ਨੂੰ ਇਕੱਠੇ ਦੇਖੋਗੇ ਅਤੇ ਤੁਹਾਡੇ ਆਪਣੇ ਜੀਵਨ ਦੇ ਕੁੱਛ ਹਿੱਸਿਆਂ ਨੂੰ ਇਸ ਫਿਲਮ ਰਾਹੀਂ ਜੋੜੋਂਗੇ ਅਤੇ ਯਾਦ ਰਖੋਂਗੇ।'ਯਾਰ ਅਣਮੁੱਲੇ ਰਿਟਰਨਜ਼' ਦਾ ਪ੍ਰੀਮੀਅਰ 4 ਮਾਰਚ 2022 ਨੂੰ ਵਿਸ਼ੇਸ਼ ਤੌਰ 'ਤੇ ਜ਼ੀ 5 'ਤੇ ਹੋਵੇਗਾ।

ਹਰਜਿੰਦਰ ਸਿੰਘ

  ਗੁਰਪ੍ਰੀਤ ਸਿੰਘ ਨੇ ਅੱਠਵੀਂ ਜਮਾਤ ਆਪਣੇ ਪਿੰਡ ਵਾਲੇ ਮਿਡਲ ਸਕੂਲ ਵਿੱਚੋਂ ਪਾਸ ਕਰਕੇ ਨੌਵੀੰ ਜਮਾਤ ਵਿੱਚ ਮੇਰੇ ਸਕੂਲ ਵਿੱਚ ਦਾਖਲਾ ਲਿਆ ਸੀ। ਦੇਖਣ ਨੂੰ ਤਾਂ ਗੁਰਪ੍ਰੀਤ ਵਧੀਆ ਲੱਗਦਾ ਸੀ ਪਰ ਜਦੋਂ ਪੜ੍ਹਾਈ ਦੀ ਗੱਲ ਆਈ ਤਾਂ ਉਹ ਜਵਾਂ ਈ ਕੋਰਾ ਪੇਜ ਸੀ। ਮੇਰਾ ਮਤਲਬ ਉਸਨੂੰ ਕੁਝ ਵੀ ਨਹੀਂ ਆਉਂਦਾ ਸੀ। 

            "ਯਾਰ ਕਮਾਲ ਹੈ ਗੁਰਪ੍ਰੀਤ ਮੈਨੂੰ ਸਮਝ ਨਹੀਂ ਆਉਂਦੀ ਕਿ ਤੂੰ ਅੱਠ ਜਮਾਤਾਂ ਪਾਸ ਕਿਵੇਂ  ਕਰ ਲਈਆਂ।ਪਹਿਲਾਂ ਨਹੀਂ ਪੜਿਆ ਤਾਂ ਕੋਈ ਨਾ ਹੁਣ ਹੀ ਪੜ੍ਹ ਲਿਆ ਕਰ। ਕੱਲ੍ਹ ਨੂੰ ਕੀ ਕਰੇਗਾ। " ਜਦੋਂ ਵੀ ਕੋਈ ਅਧਿਆਪਕ ਕਲਾਸ ਵਿੱਚਆਉਂਦਾ ਉਸਨੂੰ ਇਹ ਹੀ ਸ਼ਬਦ ਬੋਲਦਾ ਹੁੰਦਾ ਸੀ ਪਰ ਧੰਨ ਦਾ ਉਹ ਮੁੰਡਾ ਸੀ ਜਿਸਦੇ ਕੰਨ ਉੱਤੇ ਕਦੇ ਵੀ ਜੂੰ ਨਹੀਂ ਸਰਕਦੀ ਸੀ। ਉਹ ਤਾਂ ਬਸ ਨੀਵੀਂ ਪਾ ਕੇ ਖੜ੍ਹਾ ਰਹਿੰਦਾ ਸੀ। ਕਈ ਵਾਰ ਤਾਂ ਗੁੱਸੇ ਵਿੱਚ ਕੋਈ ਨਾ ਕੋਈ ਅਧਿਆਪਕ ਉਸਦੇ ਥੱਪੜ ਵੀ ਮਾਰ ਦਿੰਦਾ ਸੀ। ਪਰ ਇੱਕ ਉਹ ਸੀ ਮਾਂ ਦਾ ਪੁੱਤ ਜਿਸਨੇ ਨਾ ਤਾਂ ਕਦੇ ਗੁੱਸਾ ਕੀਤਾ ਸੀ ਤੇ ਨਾ ਹੀ ਸਕੂਲ ਦਾ ਕੋਈ ਵੀ ਕੰਮ। ਉਸਦੀ ਕਿਸਮਤ ਸੀ ਕਿ ਸਾਲ ਦੇ ਅੰਤ ਵਿੱਚ ਮਹਾਂਮਾਰੀ ਆ ਗਈ ਤੇ ਉਹ ਵੀ ਬਾਕੀ ਵਿਦਿਆਰਥੀਆਂ ਦੇ ਵਾਂਗ ਨੋਵੀਂ ਜਮਾਤ ਪਾਸ ਕਰਕੇ ਦਸਵੀਂ ਵਿੱਚ ਆ ਗਿਆ ਤੇ ਅਗਲੇ ਸਾਲ ਤੱਕ ਇੰਝ ਹੀ ਚੱਲਦਾ ਰਿਹਾ ਤੇ ਬਿਨਾਂ ਪੜਿਆ ਹੀ ਉਹ ਦਸਵੀਂ ਜਮਾਤ ਵੀ ਪਹਿਲੇ ਦਰਜੇ ਵਿੱਚ ਪਾਸ ਕਰ ਗਿਆ। 

           ਇੱਧਰ ਗੁਰਪ੍ਰੀਤ ਨੇ ਦਸਵੀਂ ਪਾਸ ਕੀਤੀ ਹੀ ਸੀ ਕਿ ਡਾਕਖ਼ਾਨੇ ਵਿੱਚ ਨੋਕਰੀਆਂ ਨਿਕਲ ਆਈਆਂ। ਪਹਿਲੇ ਦਰਜੇ ਵਿੱਚ ਦਸਵੀਂ ਪਾਸ ਕੀਤੀ ਹੋਣ ਕਰਕੇ ਤੇ ਕੋਟੇ ਵਿੱਚ ਗੁਰਪ੍ਰੀਤ ਨੂੰ ਡਾਕਖਾਨੇ ਵਿੱਚ ਨੋਕਰੀ ਵੀ ਮਿਲ ਗਈ। ਨੋਕਰੀ ਮਿਲਦੇ ਹੀ ਉਹ ਅਗਲੇ ਦਿਨ ਸਕੂਲ ਵਿੱਚ ਮਠਿਆਈ ਦਾ ਡੱਬਾ ਲੈ ਕੇ ਆ ਗਿਆ। 

          "ਸਰ ਜੀ ਸਤਿ ਸ੍ਰੀ ਅਕਾਲ। "ਡੱਬਾ ਅੱਗੇ ਕਰਦੇ ਹੋਏ ਗੁਰਪ੍ਰੀਤ ਨੇ ਮੇਰੇ ਪੈਰੀਂ ਹੱਥ ਲਗਾ ਦਿੱਤੇ। 

                   "ਉਏ ਤੈਨੂੰ ਐਨੀ ਕਿਹੜੀ ਕਾਹਲੀ ਸੀ ਵਿਆਹ ਦੀ ਦਸਵੀਂ ਪਾਸ ਕਰਦੇ ਹੀ ਵਿਆਹ ਕਰਵਾ ਲਿਆ! "ਮੈਂ ਬੜੀ ਹੈਰਾਨੀ ਨਾਲ ਡੱਬਾ ਦੇਖਦੇ ਹੀ ਉਸਨੂੰ ਬਿਨਾਂ ਸੁਣੇ ਹੀ ਬੋਲ ਪਿਆ। 

      " ਸਰ ਜੀ ਵਿਆਹ ਨਹੀਂ ਜੀ ਮੈਨੂੰ ਡਾਕਖਾਨੇ ਵਿੱਚ ਸਰਕਾਰੀ ਨੌਕਰੀ ਮਿਲੀ ਹੈ ਜੀ।ਇਸ ਲਈ ਮੈਂ ਤੁਹਾਡਾ ਮੂੰਹ ਮਿੱਠਾ ਕਰਵਾਉਣ ਲਈਆਇਆਂ ਹਾਂ। "

              "ਡਾਕਖਾਨੇ ਵਿੱਚ ਨੋਕਰੀ ਮਿਲ ਗਈ ਹੈ। ਇਹ ਤਾਂ ਬਹੁਤ ਵਧੀਆ ਗੱਲ ਹੈ ਪਰ ਪੁੱਤਰ ਤੂੰ ਇੱਥੇ ਕਰੇਗਾ ਕੀ? ਤੈਨੂੰ ਲਿਖਣਾ ਪੜਨਾ ਤਾਂ ਆਉਂਦਾ ਨਹੀਂ। "

          "ਸਰ ਜੀ ਆਪੇ ਹੀ ਵੇਖੀ ਜਾਵੇਗੀ। "

       ਲਗਭਗ ਸੱਤ ਮਹੀਨਿਆਂ ਬਾਅਦ ਗੁਰਪ੍ਰੀਤ ਇੱਕ ਦਿਨ ਫ਼ੇਰ ਸਕੂਲ ਵਿੱਚ ਬਰਫ਼ੀ ਦਾ ਡੱਬਾ ਲੈ ਕੇ ਆਇਆਂ। 

      " ਸਰ ਜੀ ਸਤਿ ਸ੍ਰੀ ਅਕਾਲ। "

    "ਆਹ ਤਾਂ ਪੱਕਾ ਹੀ ਤੇਰੇ ਵਿਆਹ ਵਾਲਾ ਡੱਬਾ ਹੈ, ਕਿਉਂ ਕਿੱਥੇ ਕਰਵਾ ਲਿਆ ਵਿਆਹ ਫ਼ੇਰ? " 

                    "ਨਹੀਂ ਸਰ ਜੀ ਮੈਂ ਵਿਆਹ ਨਹੀਂ ਕਰਵਾਇਆ। "

         ""ਜੇ ਤੇਰਾ ਨਹੀਂ ਤਾਂ ਤੇਰੀ ਭੈਣ ਦਾ ਵਿਆਹ ਹੋ ਗਿਆ। "

            " ਨਹੀਂ ਸਰ ਜੀ। "

    "ਯਾਰ ਫ਼ੇਰ ਕੀ ਤੇਰੀ ਤਰੱਕੀ ਹੋ ਗਈ ਹੈ। "

      " ਤੁਸੀਂ ਇਹ ਹੀ ਸਮਝ ਲਵੋਂ ਸਰ ਜੀ। "

           "ਇਹ ਹੀ ਸਮਝ ਲਵਾਂ, ਇਸਦਾ ਮਤਲਬ ਤਰੱਕੀ ਵੀ ਨਹੀਂ ਹੋਈ। ਫ਼ੇਰ ਕਿਸ ਖੁਸ਼ੀ ਵਿੱਚ ਮੂੰਹ ਮਿੱਠਾ ਕਰਵਾ ਰਿਹਾ ਹੈ। "

           "ਸਰ ਜੀ ....... ਮੈਨੂੰ ਤੁਹਾਡੀ ਸਮਝਾਈ ਗੱਲ ਦੇਰੀ ਨਾਲ ਹੀ ਸਹੀ ਪਰ ਸਮਝ ਆ ਗਈ ਹੈ ਜੀ ਇਸ ਲਈ।"

           ""ਕਿਹੜੀ ਗੱਲ ਗੁਰਪ੍ਰੀਤ? "

       "ਇਹ ਹੀ ਜੀ ਕੀ ਪੜ੍ਹਾਈ ਬਹੁਤ ਜਰੂਰੀ ਹੈ।ਜਦੋਂ ਮੈਨੂੰ ਨੋਕਰੀ ਮਿਲੀ ਤਾਂ ਮੈਨੂੰ ਕੁਝ ਵੀ ਲਿਖਣਾ ਪੜਨਾ  ਨਹੀਂ ਆਉਂਦਾ ਸੀ ਤੇ ਪੂਰੇ ਦਫ਼ਤਰ ਵਿੱਚ ਮੇਰਾ ਮਜ਼ਾਕ ਬਣ ਜਾਂਦਾ ਸੀ। ਕੋਈ ਵੀ ਕੰਮ ਦੇਣ ਤੋਂ ਪਹਿਲਾਂ ਮੈਨੂੰ ਮਜ਼ਾਕ ਕਰਦਾ ਕਿ ਤੈਨੂੰ ਦਸਖਤ ਕਰਨ ਤੋਂ ਵੱਧ ਕੁਝ ਵੀ ਆਉਂਦਾ। ਤੈਨੂੰ ਕੰਮ ਕੀ ਦੇਣਾ ਹੈ। ਤੂੰ ਤਾਂ ਸਰਕਾਰੀ ਜਵਾਈ ਵਾਲੀ ਗੱਲ ਨੂੰ ਸੱਚ ਸਾਬਿਤ ਕਰ ਦਿੱਤਾ ਹੈ। ਉਹਨਾਂ ਦੀਆਂ ਗੱਲਾਂ ਸੁਣ- ਸੁਣ ਕੇ ਮੈਨੂੰ ਆਪਣੇ ਆਪ ਉੱਤੇ ਹੀ ਸ਼ਰਮ ਆਉਣ ਲੱਗ ਪਈ। ਮੈਂ ਇੱਕ ਦਿਨ ਸੋਚਿਆਂ ਕਿ ਕਿਉਂ ਨਾ ਮੈਂ  ਨੋਕਰੀ ਹੀ ਛੱਡ ਦੇਵਾਂ ਪਰ ਮੈਨੂੰ ਤੁਹਾਡੀ ਸਮਝਾਈ ਗੱਲ ਯਾਦ ਆਈ ਕਿ ਸਿੱਖਣ ਦੀ ਕੋਈ ਉਮਰ ਨਹੀਂ ਹੁੰਦੀ। ਬਸ ਫ਼ੇਰ ਕੀ ਸੀ ਮੈਂ ਪਹਿਲਾਂ ਪੜਨਾ ਤੇ ਫ਼ੇਰ ਹੌਲੀ- ਹੌਲੀ ਲਿਖਣਾ ਵੀ ਸਿੱਖ ਲਿਆ। ਮੈਂ ਅੱਜ ਆਪਣੇ ਸਾਰੇ ਦਫ਼ਤਰੀ ਕੰਮ ਆਪ ਕਰ ਰਿਹਾ ਹਾਂ। ਅਸਲ ਵਿੱਚ ਤਾਂ ਮੈਂ ਅੱਜ ਹੀ ਨੋਕਰੀ ਦੇ ਯੋਗ ਹੋਇਆਂ ਹਾਂ।ਇਸ ਲਈ ਤੁਹਾਡਾ ਮੂੰਹ ਮਿੱਠਾ ਕਰਵਾਉਣ ਲਈ ਆਇਆਂ ਹਾਂ। ਅੱਜ ਸਰ ਜੀ ਤੁਸੀਂ ਮੇਰੇ ਉੱਤੇ ਮਾਣ ਕਰ ਸਕਦੇ ਹੋ ਤੇ ਆਖ ਸਕਦੇ ਹੋ ਕਿ ਗੁਰਪ੍ਰੀਤ  ਸਾਡਾ ਵਿਦਿਆਰਥੀ ਹੈ।ਕਾਸ਼..! ਜੇਕਰ ਮੈਂ ਤੁਹਾਡੀਆਂ ਗੱਲਾ ਵੱਲ ਉਸ ਸਮੇਂ ਧਿਆਨ ਦਿੱਤਾ ਹੁੰਦਾ। "

               ਉਸ ਦੀਆਂ ਗੱਲਾ ਸੁਣ ਕੇ ਮੈਨੂੰ ਬਹੁਤ ਹੈਰਾਨੀ ਹੋ ਰਹੀ ਸੀ। 

        "ਗੁਰਪ੍ਰੀਤ ਮੇਰੀ ਇੱਕ ਗੱਲ ਹੋਰ ਮੰਨੇਗਾ। "

           " ਹੁਕਮ ਕਰੋ ਸਰ ਜੀ। "

     "ਤੂੰ ਆਪਣੇ ਸਕੂਲ ਦੇ ਬੱਚਿਆਂ ਨਾਲ ਆਪਣੇ ਇਹ ਵਿਚਾਰ ਜਰੂਰ ਸਾਂਝੇ ਕਰ ਤਾਂ ਜੋ ਉਹ ਵੀ ਤੇਰੇ ਵੱਲੋਂ ਕੀਤੀ ਮਿਹਨਤ ਤੋਂ ਸਿੱਖਿਆ ਲੈ ਸਕਣ। "

         "ਜਰੂਰ ਸਰ ਜੀ ਜਰੂਰ ਮੈਂ ਸਵੇਰੇ ਹੀ ਸਵੇਰ ਦੀ ਸਭਾ ਵਿੱਚ ਹਾਜ਼ਰ ਹੋ ਜਾਵਾਂਗਾ। "

                           ਸੰਦੀਪ ਦਿਉੜਾ

                        8437556667

ਜਗਰਾਉਂ 25ਫਰਵਰੀ (ਕੁਲਦੀਪ ਸਿੰਘ ਕੋਮਲ ਮੋਹਿਤ ਗੋਇਲ) ਜਗਰਾਉਂ ਵਿਖੇ ਮੇਲਾ ਰੋਸ਼ਨੀ ਨੂੰ ਮੁੱਖ ਰੱਖਦਿਆਂ ਬੁਟਿਆਂ ਦੀ ਪ੍ਰਦਰਸ਼ਨੀ ਲਗਾਈ ਗਈ ਜਿਸ ਵਿੱਚ ਗਰੀਨ ਪੰਜਾਬ ਮਿਸ਼ਨ ਦੀ ਟੀਮ ਵੱਲੋਂ ਬੁਟਿਆਂ ਦੀ ਸਾਂਭ ਸੰਭਾਲ ਲਈ ਪ੍ਰੇਰਿਤ ਕੀਤਾ ਗਿਆ, ਬਹੁਤ ਵੱਡੀ ਗਿਣਤੀ ਵਿਚ ਲੋਕ ਇਸ ਪ੍ਰਦਰਸ਼ਨੀ ਨੂੰ ਦੇਖਣ ਲਈ ਪਹੁੰਚੇ, ਗਰੀਨ ਪੰਜਾਬ ਮਿਸ਼ਨ ਦੇ ਆਗੂ ਬੁਲਾਰਿਆਂ ਨੇ ਕਿਹਾ ਕਿ ਲੋਕ ਇਸ ਮੌਕੇ ਤੇ ਬੜੇ ਹੀ ਉਤਸ਼ਾਹ ਨਾਲ ਹਿੱਸਾ ਲਿਆ। ਉਨ੍ਹਾਂ ਨੇ ਕਿਹਾ ਕਿ ਇਸ ਪ੍ਰਦਰਸ਼ਨੀ ਅੰਦਰ ਹਰ ਤਰ੍ਹਾਂ ਦੇ ਬੁਟਿਆਂ ਵਾਰੇ ਜਾਣਕਾਰੀ ਦਿੱਤੀ ਗਈ ਕਿ ਕਿਵੇਂ ਉਨ੍ਹਾਂ ਦੀ ਸਹੀ ਸਾਂਭ-ਸੰਭਾਲ ਕਰਨੀ ਹੈ , ਰੋਸ਼ਨੀ ਦੇ ਮੇਲੇ ਤੇ ਇਸ ਪ੍ਰਦਰਸ਼ਨੀ ਲੲਈ ਦਰਸ਼ਕਾਂ ਦਾ ਵਿਸ਼ੇਸ਼ ਧਿਆਨ ਸੀ ਅਤੇ ਗਰੀਨ ਪੰਜਾਬ ਮਿਸ਼ਨ ਵੱਲੋਂ ਵੀ ਬਹੁਤ ਵਧੀਆ ਉਪਰਾਲਾ ਹੈ ਤਾਂ ਕਿ ਲੋਕ ਪੰਜਾਬ ਦੇ ਹਰੇ ਭਰੇ ਮਾਹੌਲ ਨੂੰ ਸਾਂਭ ਸੰਭਾਲ ਸਕਨ।

ਲੋਕਾਂ ਵੋਟਾਂ ਪਾਤੀਆਂ, ਮਨਮਰਜ਼ੀ ਦਾ ਨੱਪ ਬਟਨ।

ਧੜਮੱਚੜ ਗਲੀਏਂ ਪੈਂਦਾ ਸੀ, ਖਤਮ ਹੋਈ ਹੁਣ ਟਸ਼ਨ।

ਸੋਚ ਵਿਚਾਰ ਪੰਜਾਬੀਆਂ,ਚੁਣ ਲਈ ਹੈ ਸਰਕਾਰ।

ਸੰਵਿਧਾਨਕ ਹੱਕ ਹੈ ਵੋਟ ਦਾ,ਵਰਤ ਲਿਆ ਹਥਿਆਰ।

ਨਿਵੇਕਲੀ ਵੇਖੀ ਇਸ ਵਾਰ, ਵੋਟਰਾਂ ਦੀ ਇੱਕ ਚਾਲ।

ਘੇਰ ਘੇਰ ਕੇ ਸਿਆਸੀਆਂ ਨੂੰ,ਪੁੱਛਦੇ ਰਹੇ ਸਵਾਲ।

ਇੱਕ ਦੋ ਥਾਵਾਂ ਨੂੰ ਛੱਡ ਕੇ,ਰਿਹਾ ਪੰਜਾਬ ਚ ਅਮਨ ਅਮਾਨ।

ਸ਼ਾਬਾਸ਼ ਪੰਜਾਬੀਓ,ਤੁਹਾਡੀ ਇਹੀ ਹੈ ਪਹਿਚਾਣ।

ਵੋਟਰਾਂ ਫਰਜ਼ ਨਿਭਾਤਾ,ਹੁਣ ਸਰਕਾਰ ਦੇ ਪਾਲੇ ਗੇਂਦ।

ਵੇਖੋ ਮੰਜਾ ਬੁਣ ਬਿਠਾਉਣਗੇ,ਕਿ ਉਧੇੜ ਦੇਣਗੇ ਪੈਂਦ?

ਵਿਆਹ ਵਰਗਾ ਮਾਹੌਲ ਸੀ,ਵੋਟਾਂ ਵੇਲੇ ਇਸ ਵਾਰ।

ਜਿਨ੍ਹਾਂ ਪਹਿਲੀ ਵਾਰ ਪਾਈ ਵੋਟ,ਮਿਲਿਆ ਹੈ ਸਤਿਕਾਰ।

ਬਦਲਾਅ ਹੈ ਆਉਣਾ ਚਾਹੀਦਾ,ਸੀ ਹਰ ਵੋਟਰ ਦੀ ਸੋਚ।

ਪਰ ਸਿਆਸੀ ਭਰਮਾ ਕੇ ਵੋਟਰ ਨੂੰ,ਕਰਦੇ ਰਹੇ ਅਪਰੋਚ।

ਅਮਨ ਅਮਾਨ ਰਿਹਾ ਇਸ ਲਈ, ਕਿਉਂਕਿ ਵੋਟਰ ਰਿਹਾ ਚੁੱਪ।

ਕਹਾਵਤ ਸਿਆਣਿਆਂ ਦੀ ਇਹੀ ਹੈ,ਇੱਕ ਚੁੱਪ ਸੌ ਸੁੱਖ।

ਮੈਨੀਫੈਸਟੋ ਵਾਲੇ ਫਰਜ਼,ਸਰਕਾਰ ਜੇ ਦੇਵੇ ਨਿਭਾਅ।

ਸੁਪਨੇ ਸਾਕਾਰ ਹੋਣਗੇ,ਸਵਾਦ ਵੀ ਜਾਊ ਆ।

ਦੱਦਾਹੂਰੀਏ ਦਿਲ ਦੇ ਵਲਵਲੇ,ਦਿੱਤੇ ਤੁਹਾਨੂੰ ਸੁਣਾ।

ਤੁਹਾਡੇ ਮਨ ਵਿੱਚ ਕੀ ਹੈ, ਕਮੈਂਟਸ ਲਿਖ ਕੇ ਦਿਓ ਬਤਾ।

ਜਸਵੀਰ ਸ਼ਰਮਾਂ ਦੱਦਾਹੂਰ

ਸ੍ਰੀ ਮੁਕਤਸਰ ਸਾਹਿਬ

95691-49556

ਹਠੂਰ,24,ਫਰਵਰੀ-(ਕੌਸ਼ਲ ਮੱਲ੍ਹਾ)-ਕਿਸਾਨੀ ਸੰਘਰਸ ਦੇ ਯੋਧੇ ਫਿਲਮੀ ਅਦਾਕਾਰ ਸਵ:ਦੀਪ ਸਿੱਧੂ ਦੀ ਯਾਦ ਵਿਚ ਕਰਵਾਏ ਗਏ ਸਰਧਾਜਲੀ ਸਮਾਗਮ ਵਿਚ ਪਹੁੰਚਣ ਲਈ ਅੱਜ ਸਮੂਹ ਗ੍ਰਾਮ ਪੰਚਾਇਤ ਡੱਲਾ ਦੀ ਅਗਵਾਈ ਹੇਠ ਪਿੰਡ ਡੱਲਾ ਤੋ ਸ੍ਰੀ ਫਤਿਹਗੜ੍ਹ ਸਾਹਿਬ ਲਈ ਇੱਕ ਵੱਡਾ ਕਾਫਲਾ ਰਵਾਨਾ ਹੋਇਆ।ਇਸ ਮੌਕੇ ਗੱਲਬਾਤ ਕਰਦਿਆ ਪ੍ਰਧਾਨ ਨਿਰਮਲ ਸਿੰਘ ਡੱਲਾ ਨੇ ਕਿਹਾ ਕਿ ਪਿੰਡ ਡੱਲਾ ਤੋ ਦੋ ਬੱਸਾ ਸਰਧਾਜਲੀ ਸਮਾਗਮ ਲਈ ਰਵਾਨਾ ਹੋਈਆ ਹਨ ਜਿਨ੍ਹਾ ਵਿਚ ਇੱਕ ਬੱਸ ਵਿਚ ਬਜੁਰਗ,ਨੌਜਵਾਨ ਵੀਰ ਹਨ ਅਤੇ ਦੂਜੀ ਬੱਸ ਵਿਚ ਬੀਬੀਆ ਹਨ।ਇਸ ਮੌਕੇ ਉਨ੍ਹਾ ਕਿਹਾ ਕਿ ਫਿਲਮੀ ਅਦਾਕਾਰ ਸਵ:ਦੀਪ ਸਿੱਧੂ ਦੀ ਮੌਤ ਇੱਕ ਰੋਡ ਹਾਦਸਾ ਨਹੀ ਹੈ ਇਹ ਇੱਕ ਸੋਚੀ ਸਮਝੀ ਸਾਜਿਸ ਤਹਿਤ ਕਤਲ ਹੋਇਆ ਹੈ ਜਿਸ ਦੀ ਅਸੀ ਉੱਚ ਪੱਧਰੀ ਜਾਚ ਚਾਹੁੰਦੇ ਹਾਂ ਕਿਉਕਿ ਦੀਪ ਸਿੱਧੂ ਕਿਸਾਨੀ ਸੰਘਰਸ ਸੁਰੂ ਹੋਣ ਸਮੇਂ ਤੋ ਹੀ ਕੇਂਦਰ ਸਰਕਾਰ ਦੀਆ ਅੱਖਾ ਵਿਚ ਰੜਕਦਾ ਸੀ ਜਿਸ ਕਰਕੇ ਸਾਨੂੰ ਯਕੀਨ ਹੈ ਕਿ ਇਹ ਇੱਕ ਕਤਲ ਹੋਇਆ ਹੈ।ਇਸ ਮੌਕੇ ਉਨ੍ਹਾ ਦੀਪ ਸਿੱਧੂ ਅਮਰ ਰਹੇ ਦੇ ਨਾਅਰੇ ਲਾ ਕੇ ਕਾਫਲਾ ਰਵਾਨਾ ਕੀਤਾ।ਇਸ ਮੌਕੇ ਉਨ੍ਹਾ ਨਾਲ ਪ੍ਰਧਾਨ ਧੀਰਾ ਸਿੰਘ,ਪਰਿਵਾਰ ਸਿੰਘ,ਗੁਰਨਾਮ ਸਿੰਘ,ਜੱਸਾ ਸਿੰਘ,ਰਣਜੀਤ ਸਿੰਘ,ਰਾਜਾ ਸਿੰਘ,ਭੁਪਿੰਦਰ ਸਿੰਘ,ਰਛਪਾਲ ਸਿੰਘ,ਬੰਤਾ ਸਿੰਘ,ਗੁਰਜੰਟ ਸਿੰਘ,ਕਰਮਜੀਤ ਸਿੰਘ,ਇਕਬਾਲ ਸਿੰਘ, ਪ੍ਰਧਾਨ ਤੇਲੂ ਸਿੰਘ, ਜੋਰਾ ਸਿੰਘ,ਗੁਰਚਰਨ ਸਿੰਘ ਆਦਿ ਹਾਜ਼ਰ ਸਨ।
ਫੋਟੋ ਕੈਪਸਨ:-ਪਿੰਡ ਡੱਲਾ ਤੋ ਸ੍ਰੀ ਫਤਿਹਗੜੂ ਸਾਹਿਬ ਸਰਹੰਦ ਲਈ ਕਾਫਲਾ ਰਵਾਨਾ ਹੁੰਦਾ ਹੋਇਆ

ਕਮੇਟੀ ਵੱਲੋਂ ਸੰਤ ਬਲਵੀਰ ਸਿੰਘ ਘੁੰਨਸ ਤੇ ਅਕਾਲੀ ਆਗੂਆਂ ਦਾ ਸਨਮਾਨ

ਮਹਿਲ ਕਲਾਂ/ ਬਰਨਾਲਾ- 24 ਫਰਵਰੀ- (ਗੁਰਸੇਵਕ ਸੋਹੀ)- ਇਤਿਹਾਸਕ ਪਿੰਡ ਗਹਿਲ ਵਿਖੇ ਵੱਡੇ ਘੱਲੂਘਾਰੇ ਦੇ ਸਹੀਦਾਂ ਦੀ ਯਾਦ ਨੂੰ  ਸਮਰਪਿਤ ਕਰਵਾਏ ਜਾ ਰਹੇ ਸ਼ਲਾਨਾ ਤਿੰਨ ਰੋਜਾਂ ਧਾਰਮਿਕ ਸਮਾਗਮਾਂ ਦੇ ਦੂਜੇ ਦਿਨ ਸਾਬਕਾ ਸੰਸਦੀ ਸਕੱਤਰ ਤੇ ਹਲਕਾ ਮਹਿਲ ਕਲਾਂ ਦੇ ਇੰਚਾਰਜ ਸੰਤ ਬਲਵੀਰ ਸਿੰਘ ਘੁੰਨਸ ਵੱਲੋਂ ਵਿਸ਼ੇਸ਼ ਤੌਰ ਤੇ ਸ਼ਮੂਲੀਅਤ ਕਰਦਿਆਂ ਘੱਲੂਘਾਰੇ ਦੇ ਮਹਾਨ ਸ਼ਹੀਦਾਂ ਨੂੰ ਸਿਜਦਾ ਕੀਤਾ। ਇਸ ਮੌਕੇ ਸੰਤ ਬਲਵੀਰ ਸਿੰਘ ਘੁੰਨਸ ਨੇ ਕਿਹਾ ਕਿ ਉਸ ਸਮੇਂ ਦੀ ਜਾਲਮ ਮੁਗਲ ਹਕੂਮਤ ਵੱਲੋਂ ਇਸ ਘੱਲੂਘਾਰੇ 'ਚ 35 ਹਜਾਰ ਸਿੰਘਾਂ ਸਿੰਘਣੀਆਂ ਤੇ ਬੱਚਿਆਂ ਨੂੰ ਸਹੀਦ ਕਰ ਦਿੱਤਾ ।ਪਰ ਜੱਥੇਦਾਰ ਜੱਸਾ ਸਿੰਘ ਆਹਲੂਵਾਲੀਆਂ ਦੀ ਅਗਵਾਈ 'ਚ ਸਿੱਖਾਂ ਨੇ ਮੁਗਲ ਫੌਜ ਦਾ ਡਟ ਕੇ ਮੁਕਾਬਲਾ ਕੀਤਾ, ਉਸ 'ਚ ਮੁਗਲ ਫੌਜ ਨੂੰ ਮੂੰਹ ਦੀ ਖਾਣੀ ਪਈ । ਉਨ੍ਹਾਂ ਕਿਹਾ ਕਿ ਮਹਾਨ ਸ਼ਹੀਦਾ ਦੀਆਂ ਕੁਰਬਾਨੀਆਂ ਸਾਡੇ ਲਈ ਪ੍ਰੇਰਨਾਂਸ੍ਰੋਤ ਹਨ। ਇਸ ਮੌਕੇ ਜੱਥੇਦਾਰ ਬਲਦੇਵ ਸਿੰਘ ਚੁੰਘਾ ਮੈਂਬਰ ਸ੍ਰੋਮਣੀ ਗੁਰਦੁਆਰਾ ਕਮੇਟੀ ਤੇ ਮੈਨੇਜਰ ਅਮਰੀਕ ਸਿੰਘ ਦੀ ਅਗਵਾਈ ਵਿਚ ਸੰਤ ਬਲਵੀਰ ਸਿੰਘ ਘੁੰਨਸ ਅਤੇ ਜੱਥੇਦਾਰ ਗੁਰਮੇਲ ਸਿੰਘ ਛੀਨੀਵਾਲ,ਸਰਕਲ ਪ੍ਰਧਾਨ ਜਥੇਦਾਰ ਸੁਖਵਿੰਦਰ ਸਿੰਘ ਸੁੱਖਾ,ਜਥੇਦਾਰ ਬਚਿੱਤਰ ਸਿੰਘ ਰਾਏਸਰ ਦਾ ਸਨਮਾਨ ਕੀਤਾ ਗਿਆ ।ਇਸ ਮੌਕੇ ਜਗਦੇਵ ਸਿੰਘ ਸੰਧੂ, ਬਲਵੀਰ ਸਿੰਘ ਮਾਨ, ਸੁਰਜੀਤ ਸਿੰਘ ਸਿੱਧੂ,ਗੁਰਮੇਲ ਸਿੰਘ ਸੰਧੂ, ਜਸਪਾਲ ਸਿੰਘ ਇੰਚਾਰਜ, ਸੁਰਜੀਤ ਸਿੰਘ ਪ੍ਰਧਾਨ, ਬਲਦੇਵ ਸਿੰਘ ਬੀਹਲਾ, ਜਸਵਿੰਦਰ ਸਿੰਘ ਲੱਧੜ, ਰਾਜ ਸਿੰਘ ਹੰਢਿਆਇਆ, ਕਥਾ ਵਾਚਕ ਸਤਨਾਮ ਸਿੰਘ, ਰਮਨਦੀਪ ਸਿੰਘ ਦੀਵਾਨਾ, ਹਰਜਿੰਦਰ ਸਿੰਘ ਦੀਵਾਨਾ ਹਾਜਰ ਸਨ।

ਹਠੂਰ,24,ਫਰਵਰੀ-(ਕੌਸ਼ਲ ਮੱਲ੍ਹਾ)-ਕੁਝ ਦਿਨ ਪਹਿਲਾ ਜਨ ਸਕਤੀ ਨਿਊਜ ਪੰਜਾਬ ਦੇ ਪੱਤਰਕਾਰ ਜਸਮੇਲ ਸਿੰਘ ਗਾਲਿਬ ਅਚਾਨਕ ਦਿਲ ਦਾ ਦੌਰਾ ਪੈਣ ਕਾਰਨ ਇਸ ਦੁਨੀਆ ਨੂੰ ਸਦਾ ਲਈ ਅਲਵਿਦਾ ਆਖ ਗਏ ਸਨ।ਇਸ ਦੁੱਖ ਦੀ ਘੜੀ ਵਿਚ ਜਗਰਾਓ,ਹਠੂਰ,ਸਿੱਧਵਾ ਬੇਟ,ਭੂੰਦੜੀ,ਹੰਬੜਾ,ਮੁੱਲਾਪੁਰਾ,ਚੌਕੀਮਾਨ,ਰਾਏਕੋਟ,ਗੁਰੂਸਰ ਸੁਧਾਰ,ਅਜੀਤਵਾਲ,ਲੋਹਟਬੱਦੀ ਆਦਿ ਸਟੇਸਨਾ ਦੇ ਪੱਤਰਕਾਰਾ ਵੱਲੋ ਪਰਿਵਾਰ ਨਾਲ ਦੁੱਖ ਦਾ ਪ੍ਰਗਟਾਵਾ ਕੀਤਾ ਗਿਆ।ਜਸਮੇਲ ਸਿੰਘ ਗਾਲਿਬ ਦੀ ਵਿਛੜੀ ਰੂਹ ਦੀ ਸ਼ਾਤੀ ਲਈ ਪ੍ਰਕਾਸ ਕੀਤੇ ਸ੍ਰੀ ਸਹਿਜ ਪਾਠਾ ਦੇ ਭੋਗ ਇੱਕ ਮਾਰਚ ਦਿਨ ਮੰਗਲਵਾਰ ਨੂੰ ਦੁਪਹਿਰ ਇੱਕ ਵਜੇ ਪਿੰਡ ਗਾਲਿਬ ਰਣ ਸਿੰਘ ਵਾਲਾ ਦੇ ਸ੍ਰੀ ਗੁਰਦੁਆਰਾ ਸਾਹਿਬ ਵਿਖੇ ਪਾਏ ਜਾਣਗੇ।ਇਸ ਸਰਧਾਜਲੀ ਸਮਾਗਮ ਵਿਚ ਪੱਤਰਕਾਰ ਭਾਈਚਾਰੇ ਵੱਲੋ ਅਤੇ ਰਾਜਨੀਤਿਕ ਆਗੂਆ ਵੱਲੋ ਸਰਧਾ ਦੇ ਫੁੱਲ ਭੇਂਟ ਕੀਤੇ ਜਾਣਗੇ।
ਫੋਟੋ ਕੈਪਸਨ:-ਜਸਮੇਲ ਸਿੰਘ ਗਾਲਿਬ ਦੀ ਫਾਇਲ ਫੋਟੋ