ਪੰਜਾਬ

ਖੇਡ ਪ੍ਰਮੋਟਰ ਨੂੰ ਕੀਤਾ ਸਨਮਾਨਿਤ

ਹਠੂਰ,24,ਫਰਵਰੀ-(ਕੌਸ਼ਲ ਮੱਲ੍ਹਾ)-ਪਿਛਲੇ ਮਹੀਨੇ ਪਏ ਬੇਮੌਸਮੇ ਮੀਂਹ ਕਰਨ ਪਿੰਡ ਚਕਰ ਦੀਆ ਤਿੰਨੇ ਝੀਲਾ ਦਾ ਪਾਣੀ ਓਵਰਫਲੋ ਹੋ ਗਿਆ ਸੀ ਅਤੇ ਪਿੰਡ ਚਕਰ ਦੀ ਸੀਵਰੇਜ ਕਮੇਟੀ ਨੂੰ ਦਿਨ-ਰਾਤ ਇੱਕ ਕਰਕੇ ਝੀਲਾ ਵਿਚੋ ਪਾਣੀ ਕੱਢਣ ਲਈ ਕਾਫੀ ਜੱਦੋ ਜਹਿਦ ਕਰਨੀ ਪਈ ਸੀ।ਝੀਲਾ ਦਾ ਪਾਣੀ ਕੱਢਣ ਅਤੇ ਝੀਲਾ ਦੀ ਸਫਾਈ ਕਰਨ ਤੇ ਲੱਖਾ ਰੁਪਏ ਦਾ ਖਰਚਾ ਆ ਰਿਹਾ ਹੈ।ਇਸ ਗੱਲ ਨੂੰ ਮੱਦੇਨਜਰ ਰੱਖਦਿਆ ਉੱਘੇ ਖੇਡ ਪ੍ਰਮੋਟਰ ਜਗਵੀਰ ਸਿੰਘ ਯੂ ਕੇ ਨੇ ਆਪਣੀ ਕਿਰਤ ਕਮਾਈ ਵਿਚੋ ਪਿੰਡ ਦੀ ਸੀਵਰੇਜ ਕਮੇਟੀ ਨੂੰ 51 ਹਜ਼ਾਰ ਰੁਪਏ ਦੀ ਸਹਾਇਤਾ ਰਾਸੀ ਦਿੱਤੀ।ਇਸ ਮੌਕੇ ਸਮੂਹ ਸੀਵਰੇਜ ਕਮੇਟੀ ਵੱਲੋ ਖੇਡ ਪ੍ਰਮੋਟਰ ਜਗਵੀਰ ਸਿੰਘ ਯੂ ਕੇ ਨੂੰ ਵਿਸ਼ੇਸ ਤੌਰ ਤੇ ਸਨਮਾਨਿਤ ਕਰਦਿਆ ਕਿਹਾ ਕਿ ਇਸ ਤੋ ਪਹਿਲਾ ਵੀ ਜਗਵੀਰ ਸਿੰਘ ਯੂ ਕੇ ਨੇ ਪਿੰਡ ਦੇ ਵਿਕਾਸ ਕਾਰਜਾ ਵਿਚ ਵੱਡਾ ਯੋਗਦਾਨ ਪਾਇਆ ਹੈ ਅਤੇ ਹਰ ਸਾਲ ਪਿੰਡ ਚਕਰ ਵਿਖੇ ਫਰੀ ਕੈਸਰ ਚੈੱਕਅੱਪ ਕੈਪ ਲਗਾਉਦੇ ਹਨ।ਇਸ ਮੌਕੇ ਉਨ੍ਹਾ ਨਾਲ ਸਾਬਕਾ ਸਰਪੰਚ ਜਵਾਹਰ ਸਿੰਘ ਕਿੰਗਰਾ,ਸੂਬੇਦਾਰ ਗੁਰਮੇਲ ਸਿੰਘ,ਮਾਸਟਰ ਹਰਦੀਪ ਸਿੰਘ,ਜੱਗਾ ਯੂਕੇ,ਜਗਦੀਸ ਸਿੰਘ ਮਾਣੂੰਕੇ,ਮਨਪ੍ਰੀਤ ਸਿੰਘ,ਦੁੱਲਾ ਸਿੰਘ,ਬਾਈ ਰਛਪਾਲ ਸਿੰਘ ਸਿੱਧੂ,ਪ੍ਰਿੰਸੀਪਲ ਸਤਨਾਮ ਸਿੰਘ,ਸੁਖਦੀਪ ਸਿੰਘ ਬਾਠ,ਸੰਦੀਪ ਸਿੰਘ,ਸੁੱਖਾ ਚਕਰ,ਨੋਨੀ ਚਕਰ,ਅਮਨਾ ਕਿੰਗਰਾ,ਅਵਤਾਰ ਸਿੰਘ,ਜਗਪਾਲ ਸਿੰਘ,ਪ੍ਰਿਤਪਾਲ ਸਿੰਘ,ਗੋਗਾ ਚਕਰ,ਪ੍ਰੀਤਮ ਸਿੰਘ,ਰਾਜਾ ਸਿੰਘ,ਗੁਰਪ੍ਰੀਤ ਸਿੰਘ,ਨੰਬਭਦਾਰ ਦਰਸਨ ਸਿੰਘ,ਮੁਕੱਦ ਸਿੰਘ ਤੋ ਇਲਾਵਾ ਸੀਵਰੇਜ ਕਮੇਟੀ ਚਕਰ ਹਾਜ਼ਰ ਸੀ।
ਫੋਟੋ ਕੈਪਸਨ:- ਖੇਡ ਪ੍ਰਮੋਟਰ ਜਗਵੀਰ ਸਿੰਘ ਯੂ ਕੇ ਨੂੰ ਸਨਮਾਨਿਤ ਕਰਦੀ ਹੋਈ ਸੀਵਰੇਜ ਕਮੇਟੀ ਚਕਰ

ਮਾਂ ਬੋਲੀ "ਪੰਜਾਬੀ" ਨੂੰ ਸਮਰਪਿਤ ਵਿਸ਼ੇਸ਼ ਗੁਰਮਤਿ ਸਮਾਗਮ

ਗੁਰਦੁਆਰਾ ਸ੍ਰੀ ਭਜਨਗੜ੍ਹ ਸਾਹਿਬ ਮੋਤੀ ਬਾਗ ਗਲੀ ਨੰਬਰ 3 ਕੱਚਾ ਮਲਕ ਰੋਡ ਜਗਰਾਉਂ

ਮਿਤੀ 26-02-2022 ਦਿਨ ਸ਼ਨਿੱਚਰਵਾਰ ਨੂੰ ਸ਼ਾਮ 06 ਤੋਂ ਰਾਤ 09 ਤੱਕ ਹਫਤਾਵਾਰੀ ਗੁਰਮਤਿ ਸਮਾਗਮ, ਮਾਂ ਬੋਲੀ "ਪੰਜਾਬੀ" ਨੂੰ ਸਮਰਪਿਤ ਹੋਣਗੇ।
ਜਿਸ ਵਿੱਚ ਕਵੀ ਦਰਬਾਰ,ਕਥਾ, ਕੀਰਤਨ, ਗੁਰਮਤਿ ਵਿਚਾਰਾਂ ਹੋਣਗੀਆਂ।

ਪੰਜਾਬ ਦੇ ਮਸ਼ਹੂਰ ਕਵੀ ਰਸ਼ਪਾਲ ਸਿੰਘ ਜੀ ਪਾਲ "ਪੰਜਾਬ ਦਾ ਰਫ਼ੀ" ਵਿਸ਼ੇਸ਼ ਤੌਰ ਤੇ ਸ਼ਿਰਕਤ ਕਰਨਗੇ।

ਆਪ ਜੀ ਸਭ ਨੂੰ ਪਰਿਵਾਰ ਸਮੇਤ ਦਰਸ਼ਨ ਦੇਣ ਲਈ ਬੇਨਤੀ ਹੈ ਜੀ।
ਸਮਾਪਤੀ ਰਾਤ 09 ਤੇ ਗੁਰੂ ਦਾ ਲੰਗਰ ਅਤੁੱਟ ਵਰਤੇਗਾ ਜੀ।

ਪ੍ਰਬੰਧਕ ਸੇਵਾਦਾਰ
ਗੁਰਦੁਆਰਾ ਸ੍ਰੀ ਭਜਨਗੜ੍ਹ ਸਾਹਿਬ ਮੋਤੀ ਬਾਗ ਗਲੀ ਨੰਬਰ 3 ਕੱਚਾ ਮਲਕ ਰੋਡ ਜਗਰਾਉਂ

(ਜਾਣਕਾਰੀ ਬਲਦੇਵ ਜਗਰਾਉਂ)

ਠੀਕਰੀਵਾਲ ਵਿਖੇ ਤੇਂਦੂਏ ਨੂੰ ਫੜਨ ਲਈ ਪਿੰਜਰਾ ਲਗਾਇਆ

ਤੇਂਦੂਏ ਦੀ ਲੋਕਾਂ ਚ ਭਾਰੀ ਦਹਿਸ਼ਤ

ਮਹਿਲ ਕਲਾਂ/ਬਰਨਾਲਾ- 23 ਫ਼ਰਵਰੀ (ਗੁਰਸੇਵਕ ਸੋਹੀ) ਮਹਿਲ ਕਲਾਂ ਖੇਤਰ ਦੇ ਪਿੰਡਾਂ ਵਿੱਚ ਤੇਂਦੂਆ ਦੀ ਦਹਿਸ਼ਤ ਬਰਕਰਾਰ ਹੈ ਅਤੇ ਤੇਂਦੂਆ ਵੱਖ ਵੱਖ ਪਿੰਡਾਂ ਵਿੱਚ ਘੁੰਮ ਰਿਹਾ ਹੈ । ਐਵਰ ਗ੍ਰੀਨ ਸੋਸਾਇਟੀ ਠੀਕਰੀਵਾਲ ਦੇ ਪ੍ਰਧਾਨ ਕਮਲਪ੍ਰੀਤ ਸਿੰਘ ਨੇ ਦੱਸਿਆ ਕਿ ਜੰਗਲੀ ਜਾਨਵਰ ਤੇਂਦੂਆ ਨਾਲ ਲੋਕਾਂ ਚ ਪੂਰੀ ਦਹਿਸ਼ਤ ਫੈਲੀ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਜੰਗਲਾਤ ਮਹਿਕਮੇ ਦੇ ਰੇਂਜ ਅਫਸਰ ਗੁਰਪਾਲ ਸਿੰਘ ਵੱਲੋਂ ਸੁਸਾਇਟੀ ਤੇ ਨਗਰ ਨਿਵਾਸੀਆਂ ਦੇ ਸਹਿਯੋਗ ਨਾਲ ਪਿੰਡ ਠੀਕਰੀਵਾਲ ਤੇ ਨਾਈਵਾਲਾ ਸੜਕ ਦੇ ਨਜ਼ਦੀਕ ਇਕ ਧਾਰਮਕ ਅਸਥਾਨ ਸੱਦੂਆਣਾ ਵਿਖੇ ਪਿੰਜਰਾ ਲਗਾਇਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਸ ਜਗ੍ਹਾ ਤੇ 25 ਫਰਵਰੀ ਤੋਂ ਲੈ ਕੇ 27 ਫਰਵਰੀ ਤਕ ਇਕ ਧਾਰਮਕ ਸਮਾਗਮ ਸਾਲਾਨਾ ਹੁੰਦਾ ਹੈ ।ਜਿਸ ਨੂੰ ਲੈ ਕੇ ਲੋਕਾਂ ਚ ਦਹਿਸ਼ਤ ਹੈ ਕਿ ਉਕਤ ਸਮਾਗਮ ਡਰਦੇ ਕਾਰਨ ਨਾ ਹੋਵੇ ।ਪਰ ਮਹਿਕਮੇ ਨੇ ਪਹਿਲਾਂ ਕੋਈ ਧਿਆਨ ਨਹੀਂ ਦਿੱਤਾ ਤੇ ਅੱਜ ਸਵੇਰੇ ਜੰਗਲੀ ਜਾਨਵਰ ਦੀਆਂ ਪੈੜਾਂ ਵੀ ਦੇਖੀਆਂ ਗਈਆਂ। ਉਨ੍ਹਾਂ ਖ਼ਦਸ਼ਾ ਜ਼ਾਹਰ ਕੀਤਾ ਕਿ ਜੰਗਲੀ ਜਾਨਵਰ ਦੋ ਹੋ ਸਕਦੇ ਹਨ । ਇਸ ਸਬੰਧੀ ਭਾਰਤੀ ਕਿਸਾਨ ਯੂਨੀਅਨ ਕਾਦੀਆਂ ਦੇ ਜ਼ਿਲਾ ਪ੍ਰੈੱਸ ਸਕੱਤਰ ਡਾ ਜਰਨੈਲ ਸਿੰਘ ਸਹੌਰ ਨੇ ਦੱਸਿਆ ਕਿ 22 ਫਰਵਰੀ ਦੀ ਰਾਤ ਨੂੰ ਪਿੰਡ ਸਹੌਰ ਦੇ ਇੱਕ ਕਿਸਾਨ ਦੀ ਕੋਠੀ ਵਿਚ ਲੱਗੇ ਸੀ ਸੀ ਟੀ ਵੀ ਕੈਮਰਿਆਂ ਵਿਚ ਜੰਗਲੀ ਜਾਨਵਰ ਨੂੰ ਘੁੰਮਦੇ ਹੋਏ ਦੇਖਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਜੋ ਸੋਸ਼ਲ ਮੀਡੀਆ ਉੱਪਰ ਤੇਂਦੂਏ ਨੂੰ ਫੜੇ ਜਾਣ ਦੀਆਂ ਵੀਡੀਓ ਪਾਈ ਗਈ ਹੈ ,ਉਨ੍ਹਾਂ ਵਿਚ ਕੋਈ ਸੱਚਾਈ ਨਹੀਂ ਹੈ ।ਉਨ੍ਹਾਂ ਕਿਹਾ ਕਿ ਲੋਕਾਂ ਨੂੰ ਜੰਗਲੀ ਜਾਨਵਰ ਤੋਂ ਸੁਚੇਤ ਰਹਿਣਾ ਚਾਹੀਦਾ ਹੈ । ਉਨ੍ਹਾਂ ਕਿਹਾ ਕਿ ਤੇਂਦੂਏ ਦੇ ਘੁੰਮਣ ਕਾਰਨ ਪਿੰਡਾਂ ਵਿਚ ਦਹਿਸ਼ਤ ਦਾ ਮਾਹੌਲ ਬਣਿਆ ਹੋਇਆ ਹੈ ।ਉਨ੍ਹਾਂ ਜ਼ਿਲ੍ਹਾ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਕਿ ਵੋਟਾਂ ਤੋਂ ਪਹਿਲਾਂ ਸਾਡਾ ਜਮ੍ਹਾ ਕਰਵਾਇਆ ਗਿਆ ਅਸਲਾ ਰਾਤ ਸਣੇ ਸੁਰੱਖਿਆ ਕਰਨ ਲਈ ਸਾਨੂੰ ਵਾਪਸ ਦਿੱਤਾ ਜਾਵੇ। ਇਸ ਮੌਕੇ ਅੰਮ੍ਰਿਤਪਾਲ ਸਿੰਘ ਹਰਜੀਤ ਸਿੰਘ ਕੇਵਲ ਸਿੰਘ ਵੀ ਹਾਜ਼ਰ ਸਨ ।

ਉਘੇ ਸਮਾਜ ਸੇਵੀ ਤੇ ਨੌਜਵਾਨ ਆਗੂ ਗਗਨ ਕਾਲਖ ਦੀ ਵਿਆਹ ਪਾਰਟੀ ਤੇ ਵਧਾਈਆਂ ਦੇਣ ਪੁੱਜੇ ਆਗੂ

ਗਗਨ ਕਾਲਖ ਹਮੇਸ਼ਾ ਸਮਾਜ ਸੇਵਾ ਦੇ ਕਾਰਜਾਂ ਨੂੰ ਸਮਰਪਿਤ...ਵਿਧਾਇਕ ਇਆਲੀ, ਸ਼ਿਵਾਲਿਕ, ਡਾ ਕਾਲਖ.

ਮਹਿਲ ਕਲਾਂ/ਬਰਨਾਲਾ- 23 ਫਰਵਰੀ (ਗੁਰਸੇਵਕ ਸੋਹੀ) -ਉਘੇ ਸਮਾਜ ਸੇਵੀ ਤੇ ਨੌਜਵਾਨ ਆਗੂ ਮਨਿੰਦਰਜੀਤ ਸਿੰਘ ਗਗਨ ਕਾਲਖ ਵਿਆਹ ਬੰਧਨ ਦੇ ਪਵਿੱਤਰ ਰਿਸ਼ਤੇ ਵਿੱਚ ਬੱਝ ਗਏ, ਜਿੱਥੇ ਪਿੰਡ ਪੱਧਰ ਤੋ ਇਲਾਵਾ ਇਲਾਕੇ ਭਰ ਵਿੱਚ ਖੁਸੀਆਂ ਦਾ ਮਾਹੌਲ ਹੈ। ਕਿਓਂਕਿ ਗਗਨ ਕਾਲਖ ਬਹੁਤ ਹੀ ਨਰਮ ਦਿੱਲ ਤੇ ਮਿਲਾਪੜੇ ਸੁਭਾਅ ਦਾ ਨੌਜਵਾਨ ਹੈ , ਜੋ ਹਮੇਸ਼ਾ ਸਮਾਜ ਸੇਵੀ ਕੰਮਾਂ ਨੂੰ ਸਮਰਪਿਤ ਰਹਿੰਦਾ ਹੈ ।
ਇਸ ਮੌਕੇ ਜਿੱਥੇ ਪਰਿਵਾਰਕ ਰਿਸ਼ਤੇਦਾਰਾਂ ਪਿੰਡ ਵਾਸੀਆਂ ਤੇ ਐਨ ਆਰ ਆਈ ਦੋਸਤਾਂ ਨੇ ਵਿਆਹ ਪਾਰਟੀ ਦੀਆਂ, ਕਲੋਸਟਨ ਗਰੈਂਡ ਪੈਲਸ ਵਿੱਚ ਸਾਮਲ ਹੌਕੇ ਖੁਸੀਆਂ ਮਨਾਈਆਂ, ਉਥੇ ਸੁਭਾਗੀ ਜੋੜੀ ਨੂੰ ਅਸ਼ੀਰਵਾਦ ਦੇਣ ਲਈ ਵਿਧਾਇਕ ਮਨਪ੍ਰੀਤ ਸਿੰਘ ਜੀ ਇਆਲੀ ਤੇ ਵਿਧਾਇਕ ਦਰਸਨ ਸਿੰਘ ਜੀ ਸ਼ਿਵਾਲਿਕ ਵਿਸੇਸ਼ ਤੌਰ ਤੇ ਹਾਜਰ ਸਨ। ਉਹਨਾਂ ਨਾਲ ਡਾਕਟਰ ਜਸਵਿੰਦਰ ਕਾਲਖ ਜਰਨਲ ਸਕੱਤਰ ਮੈਡੀਕਲ ਪ੍ਰੈਕਟੀਸ਼ਨਰ ਪੰਜਾਬ ਤੇ ਡਾ ਭਗਵੰਤ ਬੜੂੰਦੀ ਵਾਇਸ ਚੇਅਰਮੈਨ ਲੁਧਿਆਣਾ ,ਡਾ ਯੂਨਿਸ ਦਿਓਲ ਪੱਖੋਵਾਲ ਵੀ ਉਚੇਚੇ ਤੌਰ ਤੇ ਸਮਾਰੋਹ ਵਿੱਚ ਸਾਮਲ ਸਨ।
ਆਗੂਆਂ ਨੇ ਇਸ ਮੌਕੇ ਬੋਲਦਿਆਂ ਕਿਹਾ ਕਿ ਗਗਨ ਕਾਲਖ ਅਕਾਲੀ ਦਲ ਬਾਦਲ ਹਲਕਾ ਗਿੱਲ ਦਾ ਨੌਜਵਾਨ ਆਗੂ ਹੈ, ਪਰ ਪਾਰਟੀਬਾਜ਼ੀ ਤੋ ਉਪਰ ਉਠ ਕੇ ਹਮੇਸ਼ਾ ਸਮਾਜ ਸੇਵਾ ਨੂੰ ਸਮਰਪਿਤ ਰਹਿੰਦਾ ਹੈ। ਇਸ ਮੌਕੇ ਵੱਖ ਵੱਖ ਸਿਆਸੀ ਪਾਰਟੀਆਂ ਇਲਾਕੇ ਭਰ ਦੇ ਪੰਚ, ਸਰਪੰਚ, ਚੇਅਰਮੈਨ ਤੇ ਜਥੇਬੰਦੀਆਂ ਦੇ ਨੁਮਾਇੰਦਿਆਂ ਤੋ ਇਲਾਵਾ ਸਮੂਹ ਨਗਰ ਨਿਵਾਸੀ ਪਰਿਵਾਰਕ , ਐਨ ਆਰ ਆਈ ਰਿਸ਼ਤੇਦਾਰ ਤੇ ਦੋਸਤ ਹਾਜਰ ਸਨ।
ਉੱਘੇ ਪੰਜਾਬੀ ਫਿਲਮ ਐਕਟਰ ਰਾਜਵੀਰ ਜਵੰਦਾ ਤੇ ਐਲੀ ਮਾਂਗਟ ਨੇ ਵਿਆਹ ਪਾਰਟੀ ਵਿੱਚ ਸਾਮਲ ਸਾਰਿਆਂ ਨੂੰ ਆਪਣੀ ਕਲਾ ਰਾਹੀਂ ਝੂਮਣ ਲਾ ਦਿੱਤਾ।

ਯੂਕਰੇਨ ਅੰਦਰ ਸਾਮਰਾਜੀ ਦੇਸ਼ਾਂ ਦੀ ਦਖਲਅੰਦਾਜ਼ੀ ਦਾ ਵਿਰੋਧ ਕਰੋ..ਇਨਕਲਾਬੀ ਕੇਂਦਰ,ਪੰਜਾਬ

ਮਹਿਲਕਲਾਂ/ਬਰਨਾਲਾ- 23 ਫਰਵਰੀ (ਗੁਰਸੇਵਕ ਸੋਹੀ ) - ਰੂਸ ਵੱਲੋਂ ਯੂਕਰੇਨ ਦੇ ਵੱਖਵਾਦੀ ਕਹੇ ਜਾਂਦੇ ਇਲਾਕਿਆਂ (ਡੋਨੇਤਸਕ ਅਤੇ ਲੁਹਾਂਸਕ) ਨੂੰ ਇੱਕਤਰਫਾ ਮਾਨਤਾ ਦੇਣ ਨਾਲ ਸਾਮਰਾਜੀ ਖਹਿਭੇੜ ਹੋਰ ਤਿੱਖਾ ਹੋਣ ਨਾਲ ਯੂਕਰੇਨ ਦਾ ਸੰਕਟ ਹੋਰ ਗਹਿਰਾ ਹੋ ਗਿਆ ਹੈ । ਰੂਸ ਇਸ ਨੂੰ 'ਅਮਨ ਬਹਾਲੀ' ਦੇ ਨਾਂ ਹੇਠ ਜਾਇਜ਼ ਠਹਿਰਾ ਰਿਹਾ ਹੈ ਅਤੇ ਦੂਜੇ ਪਾਸੇ ਅਮਰੀਕਾ ਇਸ ਨੂੰ ਯੂਕਰੇਨ 'ਤੇ ਹਮਲਾ ਗਰਦਾਨ ਕੇ ਇਸ ਦਾ ਵਿਰੋਧ ਕਰ ਰਿਹਾ ਹੈ । ਇਨਕਲਾਬੀ ਕੇਂਦਰ, ਪੰਜਾਬ ਦੇ ਸੂਬਾਈ ਪ੍ਰਧਾਨ ਨਰਾਇਣ ਦੱਤ ਅਤੇ ਜਨਰਲ ਸਕੱਤਰ ਕੰਵਲਜੀਤ ਖੰਨਾ ਨੇ ਇੱਕ ਪ੍ਰੈਸ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਅਸਲ ਵਿੱਚ ਇੱਕ ਪਾਸੇ ਰੂਸ ਵੱਲੋਂ ਯੂਕਰੇਨ ਦੇ ਇਲਾਕਿਆਂ ਨੂੰ ਮਾਨਤਾ ਦੇ ਕੇ ਯੂਕਰੇਨ ਦੀ ਪ੍ਰਭੂਸੱਤਾ ਉੱਤੇ ਹਮਲਾ ਹੈ। ਦੂਜੇ ਪਾਸੇ ਅਮਰੀਕਨ ਅਤੇ ਪੱਛਮੀ ਸਾਮਰਾਜੀ ਦੇਸ਼ਾਂ ਵੱਲੋ ਯੂਕਰੇਨ ਨੂੰ ਨਾਟੋ ਵਿੱਚ ਸ਼ਾਮਿਲ ਕਰਕੇ ਰੂਸ ਦੀ ਘੇਰਾਬੰਦੀ ਕਰਨ ਦੇ ਅਮਲ ਨੂੰ ਤੇਜ ਕਰਨਾ ਹੈ। ਇਨਕਲਾਬੀ ਕੇਂਦਰ ਦੇ ਆਗੂਆਂ ਨੇ ਕਿਹਾ ਕਿ ਮੌਜੂਦਾ ਸਮੇਂ ਦੁਨੀਆਂ ਅੰਦਰ ਸਾਮਰਾਜੀ ਪ੍ਰਬੰਧ ਦਾ ਆਰਥਿਕ ਸੰਕਟ ਵਧ ਰਿਹਾ ਹੈ ਅਤੇ ਸਾਮਰਾਜੀ ਦੇਸ਼ਾਂ ਵਿਚਕਾਰ ਆਪਣੇ ਮਾਲ ਵੇਚਣ ਲਈ ਦੁਨੀਆਂ ਅੰਦਰ ਆਪਣੇ ਪ੍ਰਭਾਵ ਖੇਤਰ ਵਧਾਉਣ ਲਈ ਮੁਕਾਬਲੇਬਾਜ਼ੀ ਤੇਜ਼ ਹੋ ਗਈ ਹੈ ।
ਯੂਕਰੇਨ ਯੁੱਧ ਦਾ ਪ੍ਰਭਾਵ ਸਾਰੇ ਵਿਸ਼ਵ ਅੰਦਰ ਪੈਣਾ ਅਤੇ ਇਸ ਯੁੱਧ ਦਾ ਸਭ ਤੋਂ ਵੱਧ ਖਮਿਆਜ਼ਾ ਯੂਕਰੇਨ ਦੇ ਲੋਕਾਂ ਨੂੰ ਭੁਗਤਣਾ ਪੈਣਾ ਹੈ । ਇਸ ਕਰਕੇ ਯੂਕਰੇਨ ਦੇ ਲੋਕਾਂ ਨੂੰ ਸਾਮਰਾਜ ਦੇ ਕਿਸੇ ਵੀ ਧੜੇ ਦੇ ਹੱਕ ਵਿੱਚ ਨਹੀਂ ਖੜਨਾ ਚਾਹੀਦਾ ਅਤੇ ਉਨ੍ਹਾਂ ਨੂੰ ਸਾਮਰਾਜੀ ਅਤੇ ਪੂੰਜੀਵਾਦੀ ਤਾਕਤਾਂ ਦੇ ਖ਼ਿਲਾਫ਼ ਆਵਾਜ਼ ਉਠਾ ਕੇ ਯੂਕਰੇਨ ਦਾ ਭਵਿੱਖ ਆਪਣੇ ਹੱਥ ਵਿੱਚ ਲੈਣਾ ਚਾਹੀਦਾ ਹੈ । ਇਨਕਲਾਬੀ ਕੇਂਦਰ ਦੇ ਆਗੂਆਂ ਨੇ ਲੋਕਾਂ ਨੂੰ ਸੱਦਾ ਦਿੰਦਿਆਂ ਕਿਹਾ ਹੈ ਕਿ ਯੂਕਰੇਨ ਸਮੇਤ ਦੁਨੀਆਂ ਭਰ ਦੇ ਲੋਕਾਂ ਨੂੰ ਯੂਕਰੇਨ ਉਪਰ ਠੋਸੀ ਜਾ ਰਹੀ ਨਿਹੱਕੀ ਸਾਮਰਾਜੀ ਜੰਗ ਦਾ ਵਿਰੋਧ ਕਰਦਿਆਂ ਯੂਕਰੇਨ ਦੀ ਖੁਦਮੁਖਤਿਆਰੀ ਅਤੇ ਅਮਨ-ਸ਼ਾਂਤੀ ਦੀ ਬਹਾਲੀ ਲਈ ਆਵਾਜ਼ ਉਠਾਣੀ ਚਾਹੀਦੀ ਹੈ।

ਸਜ਼ਾਵਾਂ ਪੂਰੀਆਂ ਹੋਣ ਤੇ, ਬੰਦੀ ਸਿੰਘਾਂ ਨੂੰ ਰਿਹਾਅ ਨਾ ਕਰਨਾ ,ਕੁਰਬਾਨੀਆਂ ਦੇਣ ਵਾਲੀ ਸਿੱਖ ਕੌਮ ਦਾ ਇਹ ਕਿੱਦਾਂ ਦਾ ਸਨਮਾਨ - ਸ਼ਹਿਜ਼ਾਦ

ਮੁੱਲਾਂਪੁਰ ਦਾਖਾ 23 ਫਰਵਰੀ ( ਸਤਵਿੰਦਰ ਸਿੰਘ ਗਿੱਲ ) ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਭੁੱਖ ਹਡ਼ਤਾਲ ਦਾ ਤੀਜਾ ਦਿਨ ਸਜ਼ਾਵਾਂ ਪੂਰੀਆਂ ਕਰ ਚੁੱਕੇ ਬੰਦੀ ਸਿੰਘਾਂ ਲਈ ਹਾਅ ਦਾ ਨਾਅਰਾ ਮਾਰਨ ਵਾਲਿਆਂ 'ਚ ਇੰਦਰਜੀਤ ਸਿੰਘ ਸਹਿਜਾਦ , ਝਲਮਣ ਸਿੰਘ ਸਰਾਭਾ ਅਮਰੀਕਾ ਵਾਲੇ,ਕੁਲਜੀਤ ਸਿੰਘ ਭੰਮਰਾ ਸਰਾਭਾ ,ਬਲੌਰ ਸਿੰਘ ਸਰਾਭਾ ,ਲਖਬੀਰ ਸਿੰਘ ਸਰਾਭਾ,ਬਲਦੇਵ ਸਿੰਘ ਦੇਵ ਸਰਾਭਾ ਆਦਿ ਮੋਰਚੇ ਤੇ ਡਟੇ ਹੋਏ ਸਨ । ਇਸ ਮੌਕੇ ਇੰਦਰਜੀਤ ਸਿੰਘ ਸ
ਸ਼ਹਿਜਾਦ ਨੇ ਆਖਿਆ ਕਿ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਜੀ ਦੀ ਜਨਮ ਭੂਮੀ ਜੱਦੀ ਪਿੰਡ ਸਰਾਭਾ ਵਿਖੇ ਲੱਗੇ ਮੋਰਚੇ ਚ ਸਮੂਹ ਇਨਸਾਫ਼ ਪਸੰਦ ਸਾਥੀ ਜ਼ਰੂਰ ਆਪਣੀ ਹਾਜ਼ਰੀ ਲਵਾਉਣ ਤਾਂ ਜੋ ਆਪਣੀਆਂ ਸਜ਼ਾਵਾਂ ਪੂਰੀਆਂ ਕਰ ਚੁੱਕੇ ਬੰਦੀ ਸਿੰਘਾਂ ਨੂੰ ਜਲਦ ਰਿਹਾਅ ਕਰਵਾਇਆ ਜਾ ਸਕੇ ।ਉਨ੍ਹਾਂ ਅੱਗੇ ਆਖਿਆ ਕਿ ਕਿਸੇ ਵੀ ਦੇਸ਼ ਦਾ ਕਾਨੂੰਨ ਨਹੀਂ ਕਿ ਸਜ਼ਾਵਾਂ ਪੂਰੀਆਂ ਕਰਨ ਤੋਂ ਬਾਅਦ ਵੀ ਉਨ੍ਹਾਂ ਨੂੰ ਜੇਲ੍ਹ ਤੋਂ ਰਿਹਾਅ ਨਾ ਕੀਤਾ ਜਾਵੇ ਇਹ ਘੱਟ ਗਿਣਤੀ ਕੌਮਾਂ ਅਤੇ ਬੰਦੀ ਸਿੰਘਾਂ ਨਾਲ ਅੱਤਿਆਚਾਰ ਹੈ ਜੇ ਕਰ ਉਨ੍ਹਾਂ ਵੱਲੋਂ ਕੋਈ ਕਾਨੂੰਨ ਦੇ ਉਲਟ ਕੰਮ ਕੀਤਾ ਤਾਂ ਉਨ੍ਹਾਂ ਨੂੰ ਸਜ਼ਾਵਾਂ ਮਿਲੀਆਂ ਜੋ ਬੰਦੀ ਸਿੰਘਾਂ ਵੱਲੋਂ ਭੁਗਤੀਆਂ ਵੀ ਚੁੱਕੇ ਨੇ ਉਸ ਤੋਂ ਬਾਅਦ ਵੀ ਉਨ੍ਹਾਂ ਨੂੰ ਨਹੀਂ ਰਿਹਾਅ ਕੀਤਾ ਜਾ ਰਿਹਾ । ਦੇਸ਼ ਨੂੰ ਯਾਦ ਕਰਵਾਉਣ ਲਈ ਸਭ ਤੋਂ ਵੱਧ ਕੁਰਬਾਨੀਆਂ ਦੇਣ ਵਾਲੀ ਸਿੱਖ ਕੌਮ ਦਾ ਇਹ ਕਿੱਦਾਂ ਦਾ ਸਨਮਾਨ । ਉਨ੍ਹਾਂ ਆਖ਼ਰ ਵਿੱਚ ਆਖਿਆ ਕਿ ਸਾਨੂੰ ਸਾਰਿਆਂ ਨੂੰ ਇਕ ਮੰਚ ਤੇ ਇਕੱਠੇ ਹੋ ਕੇ ਆਵਾਜ਼ ਬੁਲੰਦ ਕਰਨੀ ਚਾਹੀਦੀ ਹੈ ਤਾਂ ਜੋ ਜਿੱਤਾਂ ਪ੍ਰਾਪਤ ਕਰ ਸਕੀਏ ਬੰਦੀ ਸਿੰਘ ਰਿਹਾਈ ਹੋ ਜਾਣ । ਇਸ ਮੌਕੇ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਲੋਕ ਭਲਾਈ ਮੰਚ ਦੇ ਸਰਪ੍ਰਸਤ ਇੰਦਰਜੀਤ ਸਿੰਘ ਸਹਿਜਾਦ , ਸਾਬਕਾ ਸਰਪੰਚ ਜਗਤਾਰ ਸਿੰਘ ਸਰਾਭਾ ,ਬਲੌਰ ਸਿੰਘ ਸਰਾਭਾ , ਕੈਪਟਨ ਕਮਿੱਕਰ ਸਿੰਘ ਪੰਚ ਸਰਾਭਾ, ਪਹਿਲਵਾਨ ਰਣਜੀਤ ਸਿੰਘ ਲੀਲ , ਬਹਾਦਰ ਸਿੰਘ ਟੂਸਾ,ਸੁਖਪ੍ਰੀਤ ,ਸਰਾਭਾ ਭਿੰਦਾ,ਰੂਬੀ ਸਰਾਭਾ, ਸਰਾਭਾ ਪਰਦੀਪ ਸਿੰਘ ਅੱਬੂਵਾਲ, ਚੰਦਰ ਸ਼ੇਖਰ ਮਥਰਾ ,ਸੁਭਾਸ਼ ਸ਼ਰਮਾ ,ਬਿੰਦਰ ਸਿੰਘ ਸਰਾਭਾ,ਜੱਗਧੂੜ ਸਿੰਘ ਸਰਾਭਾ ਆਦਿ ਹਾਜ਼ਰ ਸਨ ।

ਦੀਪ ਸਿੱਧੂ ਦੀ ਅਚਾਨਕ ਮੌਤ ਨਾਲ ਪੰਜਾਬੀ ਕੌਮ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਪਿਆ-ਪ੍ਰਧਾਨ ਮੋਹਣੀ

ਪੰਜਾਬੀ ਕੌਮ ਨੇ ਇੱਕ ਹੋਰ ਗਵਾ ਲਿਆ ਕੌਮ ਦਾ ਹੀਰਾ ਵੀਰ ਦੀਪ ਸਿੱਧੂ
ਅਜੀਤਵਾਲ ( ਬਲਵੀਰ ਸਿੰਘ ਬਾਠ ) ਪਿਛਲੇ ਦਿਨੀਂ ਪੰਜਾਬੀ ਕੌਮ ਨੇ ਇੱਕ ਨਿਧੜਕ ਕੌਮ ਦਾ ਹੀਰਾ ਗਵਾ ਲਿਆ ਜਿਸ ਨਾਲ ਸਿੱਖ ਕੌਮ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਪਿਆ ਇਨ੍ਹਾਂ ਸ਼ਬਦਾਂ ਦਾ ਪ੍ਰਗਟਾਵਾ ਪ੍ਰਧਾਨ ਮਨਜੀਤ ਸਿੰਘ ਮੋਹਣੀ ਨੇ ਜਨਸ਼ਕਤੀ ਨਿਊਜ਼ ਨਾਲ ਗੱਲਬਾਤ ਕਰਦਿਆਂ ਪ੍ਰਗਟ ਕੀਤਾ ਉਨ੍ਹਾਂ ਕਿਹਾ ਕਿ ਜਿਸ ਇਨਸਾਨ ਨੇ ਸਾਨੂੰ ਸਭ ਤੋਂ ਵੱਧ ਲੋੜ ਹੁੰਦੀ ਹੈ ਉਸ ਇਨਸਾਨ ਦੇ ਉਸ ਪਰਮਾਤਮਾ ਨੂੰ ਵੀ ਓਨੀ ਹੀ ਲੋੜ ਹੁੰਦੀ ਹੈ ਪਰ ਦਿਲ ਦਿਲ ਦੀਆਂ ਗਹਿਰਾਈਆਂ ਚੋਂ ਅਫ਼ਸੋਸ ਪ੍ਰਗਟ ਕਰਦਿਆਂ ਨੌਜਵਾਨ ਨਿਧੜਕ ਕੌਮ ਦੇ ਹੀਰੇ ਬੀਰ ਦੀਪ ਸਿੱਧੂ ਦੀ ਸੜਕ ਹਾਦਸੇ ਵਿੱਚ ਦੇਹਾਂਤ ਹੋਣ ਦੀ ਖਬਰ ਨੇ ਦਿਲ ਨੂੰ ਵਲੂੰਧਰ ਕੇ ਰੱਖ ਦਿੱਤਾ ਸੀ ਇਸ ਖ਼ਬਰ ਤੇ ਬਿਲਕੁੱਲ ਵੀ ਯਕੀਨ ਨਹੀਂ ਹੋਇਆ ਮੈਨੂੰ ਆਏਂ ਲੱਗਿਆ ਕਿ ਜਿਵੇਂ ਇਕਦਮ ਦਿਲ ਦੀ ਧੜਕਣ ਹੀ ਰੁਕ ਗਈ ਹੋਵੇ ਕਿਉਂਕਿ ਕਿਸਾਨੀ ਅੰਦੋਲਨ ਤੋਂ ਲੈ ਕੇ ਪੰਜਾਬ ਦੇ ਹਰ ਦੁੱਖ ਸੁੱਖ ਦੇ ਭਾਈਵਾਲ ਵੀਰ ਦੀਪ ਸਿੱਧੂ ਦੇ ਅਚਾਨਕ ਚਲੇ ਜਾਣ ਨਾਲ ਸਿੱਖ ਕੌਮ ਅਤੇ ਪੰਜਾਬੀਅਤ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਪਿਆ ਹੈ ਜਿਸ ਨੂੰ ਕਿਸੇ ਵੀ ਕੀਮਤ ਤੇ ਪੂਰਾ ਨਹੀਂ ਕੀਤਾ ਜਾ ਸਕਦਾ ਉਨ੍ਹਾਂ ਕਿਹਾ ਕਿ ਬੀਰ ਦੀ ਆਤਮਿਕ ਸ਼ਾਂਤੀ ਲਈ ਰੱਖੇ ਨਮਿੱਤ ਸ੍ਰੀ ਸਹਿਜ ਪਾਠ ਜੀ ਦੇ ਪਾਠਾਂ ਦੇ ਭੋਗ ਮਿਤੀ ਚੌਵੀ ਤਰੀਕ ਨੂੰ ਦੀਵਾਨ ਟੋਡਰ ਮੱਲ ਹਾਲ ਦੇ ਵਿਚ ਪਾਏ ਜਾਣਗੇ ਸੋ ਸਭ ਸੰਗਤਾਂ ਨੂੰ ਨਿਮਰਤਾ ਸਾਹਿਤ ਬੇਨਤੀ ਕੀਤੀ ਜਾਂਦੀ ਹੈ ਤਾਂ ਜੋ ਇਸ ਕੌਮੀ ਯੋਧੇ ਨੂੰ ਸਾਰੀ ਸੰਗਤ ਸ਼ਰਧਾ ਦੇ ਫੁੱਲ ਭੇਟ ਕਰ ਸਕੀਏ ਇਹੀ ਸਾਡੇ ਪੰਜਾਬੀ ਕੌਮ ਦੀ ਕੌਮ ਦੇ ਹੀਰੇ ਨਿਧੜਕ ਯੋਧੇ ਲਈ ਸੱਚੀ ਸ਼ਰਧਾਂਜਲੀ ਹੋਵੇਗੀ

ਸੱਚ ਤੇ ਪਹਿਰਾ ਦੇਣ ਵਾਲਾ ਸੀ ਦੀਪ ਸਿੱਧੂ-VIDEO

ਮੁਡਿਆਂ ਨੇ ਗੁਰਦੁਆਰਾ ਸਾਹਿਬ ਦੇ ਪ੍ਰਧਾਨ ਨੂੰ ਕੀਤੀ ਗਾਲੀ-ਗਲੋਚ ਸ਼ਾਰਰਤੀ ਅਨਸਰਾਂ ਵੱਲੋਂ ਕੀਤਾ ਜਾ ਰਿਹਾ ਅਜਿਹਾ ਕੰਮ ,

ਪੱਤਰਕਾਰ ਰਣਜੀਤ ਸਿੰਘ ਰਾਣਾ

ਫੇਸਬੁੱਕ ਵੀਡੀਓ ਦੇਖਣ ਲਈ ਇਸ ਲਿੰਕ ਉਪਰ ਕਲਿੱਕ ਕਰੋ; https://fb.watch/bk_6jm4suq/

ਪ੍ਰਭ ਆਸਰਾ ਫੇਰੂਰਾਈ ਬਣ ਰਿਹਾ ਨਿਆਸਰਿਆਂ ਦਾ ਘਰ -VIDEO

ਜ਼ਰੂਰਤਮੰਦਾਂ ਦੀ ਸੇਵਾ ਵੱਡੀ ਸੇਵਾ
ਪੱਤਰਕਾਰ ਸਤਪਾਲ ਸਿੰਘ ਦੇਹਡ਼ਕਾ

ਫੇਸਬੁੱਕ ਵੀਡੀਓ ਦੇਖਣ ਲਈ ਇਸ ਲਿੰਕ ਉਪਰ ਕਲਿੱਕ ਕਰੋ ; https://fb.watch/bkZCqYRn3G/

ਪੰਜਾਬ ਦੀ ਰਾਣੀ ਪੰਜਾਬੀ ✍️ ਰਮੇਸ਼ ਕੁਮਾਰ ਜਾਨੂੰ

ਵਿੱਚ ਪੰਜਾਬੀ ਬੋਲਦੇ, ਗੁਰੂਆਂ ਦੀ ਬਾਣੀ ਨੂੰ
ਤਖ਼ਤ ਬੈਠਾ ਕੇ ਰੱਖਿਓ, ਪੰਜਾਬ ਦੀ ਰਾਣੀ ਨੂੰ

ਇਸ ਦੀ ਗੋਦੀ ਬੈਠੀਆਂ,ਕਈ ਹੋਰ ਭਾਸ਼ਾਵਾਂ ਵੀ
ਰਹੇ ਉੱਚਾ ਇਹਦਾ ਰੁਤਬਾ, ਸਦਾ ਕਰਾਂ ਦੁਆਵਾਂ ਜੀ
ਭੁੱਲ ਨਾ ਜਾਇਓ ਸਾਥੀਓ, ਬਚਪਨ ਦੀ ਹਾਣੀ ਨੂੰ
ਤਖ਼ਤ ਬੈਠਾ ਕੇ ਰੱਖਿਓ, ਪੰਜਾਬ ਦੀ ਰਾਣੀ ਨੂੰ।।

ਸਿਰ ਤੇ ਤਾਜ ਹੈ ਰੱਖਣਾ, ਮਾਂ ਬੋਲੀ ਕਹਿੰਦੇ ਨੇ
ਫਿਰ ਕਿਉਂ ਇਹਨੂੰ ਬੋਲਣ ਤੇ, ਜ਼ੁਰਮਾਨੇ ਪੈਂਦੇ ਨੇ
ਰਲ ਕੇ ਸਾਰੇ ਰੋਕੀਏ, ਵੰਡ ਇਸ ਕਾਣੀ ਨੂੰ
ਤਖ਼ਤ ਬੈਠਾ ਕੇ ਰੱਖਿਓ, ਪੰਜਾਬ ਦੀ ਰਾਣੀ ਨੂੰ।।

ਹਿੰਦੀ,ਅੰਗਰੇਜ਼ੀ,ਉਰਦੂ,ਅਰਬੀ, ਥੋੜੀ ਜਿਹੀ ਘੋਲਾਂ ਗੇ
ਸਮੁੰਦਰੋਂ ਪਾਰ ਵੀ ਜਾ ਕੇ, ਅਸੀਂ ਪੰਜਾਬੀ ਬੋਲਾਂਗੇ
ਅਰਸ਼ਾਂ ਤੱਕ ਲੈ ਜਾਵਣਾ, ਪਹਿਚਾਣ ਪੁਰਾਣੀ ਨੂੰ
ਤਖ਼ਤ ਬੈਠਾ ਕੇ ਰੱਖਿਓ, ਪੰਜਾਬ ਦੀ ਰਾਣੀ ਨੂੰ।।

ਸਾਰੇ ਜੱਗ ਤੇ ਰਾਜ ਕਰੇਗੀ, ਸਾਡੀ ਇਹ ਪੰਜਾਬੀ
ਸਾਡੇ ਸਿਰ ਦਾ ਤਾਜ ਬਣੇਗੀ, ਸਾਡੀ ਇਹ ਪੰਜਾਬੀ
ਕੰਡੇ ਬਣ ਕੇ ਸਾਂਭਿਓ, ਫੁੱਲਾਂ ਦੀ ਟਾਹਣੀ ਨੂੰ
ਤਖ਼ਤ ਬੈਠਾ ਕੇ ਰੱਖਿਓ, ਪੰਜਾਬ ਦੀ ਰਾਣੀ ਨੂੰ।।

ਗੁਰੂਆਂ ਦੀ ਏ ਲਾਡਲੀ, ਕਵੀਆਂ ਦਾ ਮਾਣ ਹੈ
ਇਹਦੇ ਅੱਖਰਾਂ ਵਿਚ ਮੁਹੱਬਤਾਂ,ਅੰਤਾਂ ਦਾ ਗਿਆਨ ਹੈ
ਅਸੀਂ ਭਰਕੇ ਬੁੱਕਾਂ ਡੀਕੀਏ, ਇਸ ਵਗਦੇ ਪਾਣੀ ਨੂੰ
ਤਖ਼ਤ ਬੈਠਾ ਕੇ ਰੱਖਿਓ, ਪੰਜਾਬ ਦੀ ਰਾਣੀ ਨੂੰ।।

ਮਾਹੀਏ,ਢੋਲੇ, ਗਿੱਧਾ, ਭੰਗੜਾ, ਸ਼ਾਨ ਪੰਜਾਬੀ ਦੀ
ਰੀਸ 'ਰਮੇਸ਼' ਨਾ ਹੋਣੀ ਕਿਸੇ ਤੋਂ, ਠਾਠ ਨਵਾਬੀ ਦੀ
ਵਿੱਚ ਪੰਜਾਬੀ 'ਜਾਨੂੰ' ਕਹਿੰਦੇ,ਦਿਲਬਰਜਾਨੀ ਨੂੰ
ਤਖ਼ਤ ਬੈਠਾ ਕੇ ਰੱਖਿਓ, ਪੰਜਾਬ ਦੀ ਰਾਣੀ ਨੂੰ।।

ਲੇਖਕ-ਰਮੇਸ਼ ਕੁਮਾਰ ਜਾਨੂੰ
ਫੋਨ ਨੰ:-98153-20080

ਜ਼ਿਲ੍ਹਾ ਲੁਧਿਆਣਾ ਦੇ 14 ਹਲਕਿਆਂ ਦੀਆਂ ਈ.ਵੀ.ਐਮ. ਮਸ਼ੀਨਾਂ ਨੂੰ ਕੇਂਦਰੀ ਸੁਰੱਖਿਆ ਬਲਾਂ ਦੀ ਨਿਗਰਾਨੀ ਵਿਚ ਸਟਰਾਂਗ ਰੂਮਾਂ ਵਿਚ ਰੱਖਿਆ

ਜਗਰਾਉ 22 ਫਰਵਰੀ (ਅਮਿਤ ਖੰਨਾ) ਜ਼ਿਲ੍ਹਾ ਲੁਧਿਆਣਾ ਦੇ 14 ਵਿਧਾਨ ਸਭਾ ਹਲਕਿਆਂ ਦੀਆਂ ਵੋਟਾਂ ਦੀ ਗਿਣਤੀ ਲੁਧਿਆਣਾ ਸ਼ਹਿਰ ਵਿਚ ਬਣੇ 14 ਗਿਣਤੀ ਕੇਂਦਰਾਂ ਵਿਚ ਹੋਵੇਗੀ | 14 ਹਲਕਿਆਂ ਦੀਆਂ ਈ.ਵੀ.ਐਮ. ਮਸ਼ੀਨਾਂ ਨੂੰ ਕੇਂਦਰੀ ਸੁਰੱਖਿਆ ਬਲਾਂ ਦੀ ਨਿਗਰਾਨੀ ਵਿਚ ਸਟਰਾਂਗ ਰੂਮਾਂ ਵਿਚ ਰੱਖਿਆ ਗਿਆ ਹੈ | ਲੁਧਿਆਣਾ ਸ਼ਹਿਰ ਵਿਚ 14 ਥਾਵਾਂ 'ਤੇ 14 ਹਲਕਿਆਂ ਦੀਆਂ ਈ.ਵੀ.ਐਮ. ਮਸ਼ੀਨਾਂ ਰੱਖੀਆਂ ਗਈਆਂ ਹਨ | ਈ.ਵੀ.ਐਮ. ਮਸ਼ੀਨਾਂ 'ਤੇ 24 ਘੰਟੇ ਸੀ.ਸੀ.ਟੀ.ਵੀ. ਕੈਮਰਿਆਂ ਰਾਹੀਂ ਨਜ਼ਰ ਰੱਖੀ ਜਾਵੇਗੀ, ਜੋ ਕੈਮਰੇ ਚੋਣ ਕਮਿਸ਼ਨ ਨਾਲ ਤੇ ਜ਼ਿਲ੍ਹਾ ਚੋਣ ਅਧਿਕਾਰੀ ਨਾਲ ਜੁੜੇ ਹੋਣਗੇ | ਸਟਰਾਂਗ ਰੂਮਾਂ ਦੇ ਬਾਹਰ ਕੇਂਦਰੀ ਸੁਰੱਖਿਆ ਬਲ ਤਾਇਨਾਤ ਕੀਤੇ ਗਏ ਹਨ ਤੇ ਸਟਰਾਂਗ ਰੂਮਾਂ ਦੇ ਦਰਵਾਜ਼ਿਆਂ ਦੇ ਬਾਹਰ ਪੰਜਾਬ ਪੁਲਿਸ ਦੀ ਸੁਰੱਖਿਆ ਹੋਵੇਗੀ | ਜ਼ਿਲ੍ਹਾ ਲੁਧਿਆਣਾ ਦੇ 14 ਵਿਧਾਨ ਸਭਾ ਹਲਕਿਆਂ ਵਿਚ ਸਾਲ 2017 ਵਿਚ 74.81 ਫ਼ੀਸਦੀ ਪੋਿਲੰਗ ਹੋਈ ਸੀ, ਜਦਕਿ ਸਾਲ 2022 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਜ਼ਿਲ੍ਹਾ ਲੁਧਿਆਣਾ ਦੇ 14 ਵਿਧਾਨ ਸਭਾ ਹਲਕਿਆਂ ਵਿਚ 65.68 ਫ਼ੀਸਦੀ ਪੋਲਿੰਗ ਹੋਈ ਹੈ, ਜਦਕਿ ਸਾਲ 2017 ਵਿਚ 2022 ਨਾਲੋਂ 9.06 ਫ਼ੀਸਦੀ ਜ਼ਿਆਦਾ 74.74 ਫ਼ੀਸਦੀ ਪੋਲਿੰਗ ਹੋਈ ਸੀ | ਜ਼ਿਲ੍ਹਾ ਲੁਧਿਆਣਾ ਵਿਚ 2022 ਦੀਟਾਂ ਵਿਧਾਨ ਸਭਾ ਚੋਣਾਂ ਵਿਚ ਹਲਕਾ ਦਾਖਾ 'ਚ 75.63 ਫ਼ੀਸਦੀ, ਸਮਰਾਲਾ 'ਚ 75.49 ਫ਼ੀਸਦੀ, ਰਾਏਕੋਟ 'ਚ 72.33 ਫ਼ੀਸਦੀ, ਖੰਨਾ 'ਚ 74.41 ਫ਼ੀਸਦੀ, ਪਾਇਲ 'ਚ 76.12 ਫ਼ੀਸਦੀ, ਗਿੱਲ 'ਚ 67.07 ਫ਼ੀਸਦੀ, ਲੁਧਿਆਣਾ ਪੂਰਬੀ 'ਚ 66.23 ਫ਼ੀਸਦੀ, ਸਾਹਨੇਵਾਲ 'ਚ 67.43 ਫ਼ੀਸਦੀ, ਜਗਰਾਉਂ 'ਚ 67.54 ਫ਼ੀਸਦੀ, ਆਤਮ ਨਗਰ 'ਚ 61.25 ਫ਼ੀਸਦੀ, ਲੁਧਿਆਣਾ ਉੱਤਰੀ 'ਚ 61.26 ਫ਼ੀਸਦੀ, ਹਲਕਾ ਦੱਖਣੀ 'ਚ 59.04 ਫ਼ੀਸਦੀ, ਹਲਕਾ ਲੁਧਿਆਣਾ ਕੇਂਦਰੀ 'ਚ 61.77 ਫ਼ੀਸਦੀ ਅਤੇ ਹਲਕਾ ਲੁਧਿਆਣਾ ਪੱਛਮੀ 'ਚ 63.73 ਫ਼ੀਸਦੀ ਪੋਿਲੰਗ ਹੋਈ | ਜ਼ਿਲ੍ਹਾ ਲੁਧਿਆਣਾ ਵਿਚ 2017 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਹਲਕਾ ਦਾਖਾ 'ਚ 81.52 ਫ਼ੀਸਦੀ, ਸਮਰਾਲਾ 'ਚ 80.85 ਫ਼ੀਸਦੀ, ਰਾਏਕੋਟ 'ਚ 78.70 ਫ਼ੀਸਦੀ, ਖੰਨਾ 'ਚ 78.87 ਫ਼ੀਸਦੀ, ਪਾਇਲ 'ਚ 82.67 ਫ਼ੀਸਦੀ, ਗਿੱਲ 'ਚ 75.77 ਫ਼ੀਸਦੀ, ਲੁਧਿਆਣਾ ਪੂਰਬੀ 'ਚ 70.46 ਫ਼ੀਸਦੀ, ਸਾਹਨੇਵਾਲ 'ਚ 76.22 ਫ਼ੀਸਦੀ, ਜਗਰਾਉਂ 'ਚ 77.53 ਫ਼ੀਸਦੀ, ਆਤਮ ਨਗਰ 'ਚ 67.82 ਫ਼ੀਸਦੀ, ਲੁਧਿਆਣਾ ਉੱਤਰੀ 'ਚ 68.36 ਫ਼ੀਸਦੀ, ਹਲਕਾ ਦੱਖਣੀ 'ਚ 67.95 ਫ਼ੀਸਦੀ, ਹਲਕਾ ਲੁਧਿਆਣਾ ਕੇਂਦਰੀ 'ਚ 69.71 ਫ਼ੀਸਦੀ ਅਤੇ ਹਲਕਾ ਲੁਧਿਆਣਾ ਪੱਛਮੀ ਵਿਚ 69.03 ਫ਼ੀਸਦੀ ਪੋਿਲੰਗ ਹੋਈ ਸੀ | ਹਲਕਾ ਖੰਨਾ ਦਾ ਸਟਰਾਂਗ ਰੂਮ ਅਪਲਾਇਡ ਸਾਇੰਸ ਇਮਾਰਤ ਗੁਰੂ ਨਾਨ ਦੇਵ ਪੋਲੀਟੈਕਨਿਕ ਕਾਲਜ ਲੁਧਿਆਣਾ, ਹਲਕਾ ਸਮਰਾਦਾ ਦਾ ਸਟਰਾਂਗ ਰੂਮ ਐਸ.ਸੀ.ਡੀ. ਸਰਕਾਰੀ ਕਾਲਜ ਲੜਕਿਆਂ ਲੁਧਿਆਣਾ ਦੇ ਕੰਨਿਆ ਸਾਂਝਾ ਕਮਰਾ ਨੰਬਰ 2, ਹਲਕਾ ਸਾਹਨੇਵਾਲ ਦਾ ਸਟਰਾਂਗ ਰੂਮ ਖਾਲਸਾ ਕੰਨਿਆ ਸੀਨੀਅਰ ਸੈਕੰਡਰੀ ਸਕੂਲ ਕਾਲਜ ਰੋਡ ਲੁਧਿਆਣਾ, ਹਲਕਾ ਲੁਧਿਆਣਾ ਪੂਰਬੀ ਦਾ ਸਟਰਾਂਗ ਰੂਮ ਐਸ.ਸੀ.ਡੀ. ਸਰਕਾਰੀ ਕਾਲਜ ਲੜਕਿਆਂ ਲੁਧਿਆਣਾ ਦੇ ਪਹਿਲੀ ਮੰਜ਼ਿਲ ਲਾਇਬ੍ਰੇਰੀ ਹਾਲ, ਲੁਧਿਆਣਾ ਦੱਖਣੀ ਦਾ ਸਟਰਾਂਗ ਰੂਮ ਕੇ.ਵੀ.ਐਮ. ਸਕੂਲ ਸਿਵਲ ਲਾਇਨਜ਼ ਲੁਧਿਆਣਾ, ਹਲਕਾ ਆਤਮ ਨਗਰ ਦਾ ਸਟਰਾਂਗ ਰੂਮ ਕਮਰਾ ਨੰਬਰ ਸੀ-9 ਤੇ ਸੀ-10 ਨਵੀਂ ਵਰਕਸ਼ਾਪ ਇਮਾਰਤ ਗੁਰੂ ਨਾਨਕ ਦੇਵ ਪੋਲੀਟੈਕਨਿਕ ਕਾਲਜ ਗਿੱਲ ਰੋਡ ਲੁਧਿਆਣਾ, ਹਲਕਾ ਲੁਧਿਆਣਾ ਕੇਂਦਰੀ ਦਾ ਸਟਰਾਂਗ ਰੂਮ ਆਡੀਟੋਰੀਅਮ ਆਰਿਆ ਕਾਲਜ ਸਿਵਲ ਲਾਇਨਜ਼ ਲੁਧਿਆਣਾ, ਲੁਧਿਆਣਾ ਪੱਛਮੀ ਦਾ ਸਟਰਾਂਗ ਰੂਮ ਪੀ.ਏ.ਯੂ. ਜ਼ਿੰਮਨੇਜ਼ੀਅਮ ਹਾਲਕਾ ਪਹਿਲੀ ਮੰਜ਼ਿਲ, ਲੁਧਿਆਣਾ ਉੱਤਰੀ ਦਾ ਸਟਰਾਂਗ ਰੂਮ ਸਰਕਾਰੀ ਸੀਨੀਅਰ ਸੈਕੰਡਰੀ ਸਮਾਰਟ ਸਕੂਲ ਪੀ.ਏ.ਯੂ. ਲੁਧਿਆਣਾ, ਹਲਕਾ ਗਿੱਲ ਦਾ ਸਟਰਾਂਗ ਰੂਮ ਜੀ.ਐਮਟੀ. ਲੈਬ ਐਸ.ਆਰ.ਐਸ. ਸਰਕਾਰੀ ਪੋਲੀਟੈਕਨਿਕ ਕਾਲਜ ਲੜਕੀਆਂ ਰਿਸ਼ੀ ਨਗਰ ਲੁਧਿਆਣਾ, ਹਲਕਾ ਪਾਇਲ ਦਾ ਸਟਰਾਂਗ ਰੂਮ ਸਰਕਾਰੀ ਕਾਲਜ ਲੜਕੀਆਂ ਲੁਧਿਆਣਾ, ਹਲਕਾ ਦਾਖਾ ਦਾ ਸਟਰਾਂਗ ਰੂਮ ਸੁਖਦੇਵ ਭਵਨ ਪੀ.ਏ.ਯੂ. ਲੁਧਿਆਣਾ, ਹਲਕਾ ਰਾਏਕੋਟ ਦਾ ਸਟਰਾਂਗ ਰੂਮ ਮਾਲਵਾ ਸੈਂਟਰਲ ਕਾਲਜ ਆਫ਼ ਐਜੂਕੇਸ਼ਨ ਲੜਕੀਆਂ ਲੁਧਿਆਣਾ ਅਤੇ ਹਲਕਾ ਜਗਰਾਉਂ ਦਾ ਸਟਰਾਂਗ ਰੂਮ ਪਿ੍ਖਿਆ ਹਾਲ ਪੀ.ਏ.ਯੂ. ਲੁਧਿਆਣਾ ਵਿਖੇ ਬਣਾਇਆ ਗਿਆ ਹੈ | ਸਟਰਾਂਗ ਰੂਮ ਵਾਲੀਆਂ ਥਾਵਾਂ ਦੇ ਨਾਲ ਬੜੇ ਗਿਣਤੀ ਕੇਂਦਰਾਂ ਵਿਚ ਹੀ ਈ.ਵੀ.ਐਮ. ਮਸ਼ੀਨਾਂ ਰਾਹੀਂ ਵੋਟਾਂ ਦੀ ਗਿਣਤੀ ਹੋਵੇਗੀ |

ਰੌਸ਼ਨੀ ਮੇਲੇ ਸਬੰਧੀ ਸਾਰੀਆਂ ਤਿਆਰੀਆਂ ਮੁਕੰਮਲ

ਜਗਰਾਉ 22 ਫਰਵਰੀ (ਅਮਿਤ ਖੰਨਾ) ਜਗਰਾਉਂ ਦਾ ਪ੍ਰਸਿੱਧ ਇਤਿਹਾਸਕ ਮੇਲਾ 24 ਫਰਵਰੀ ਤੋਂ ਸ਼ੁਰੂ ਹੋਣ ਜਾ ਰਿਹਾ ਹੈ । ਇਸ ਸਬੰਧੀ ਸਾਰੀਆਂ ਤਿਆਰੀਆਂ ਲਗਭਗ ਮੁਕੰਮਲ ਹੋ ਗਈਆਂ ਹਨ । ਇਹ ਮੇਲਾ ਬਾਬਾ ਮੋਹਕਮ ਦੀਨ ਦੀ ਦਰਗਾਹ ਤੇ ਲੱਗਦਾ ਹੈ । ਇਸ ਮੇਲੇ ਤੇ ਲੋਕ ਦੂਰ ਦੁਰਾਡਿਓਂ, ਦੇਸ- ਪਰਦੇਸ ਤੋਂ ਚੌਂਕੀਆਂ ਭਰਨ ਲਈ ਆਉਂਦੇ ਹਨ। ਹਜ਼ਰਤ ਬਾਬਾ ਮੋਹਕਮ ਦੀਨ ਦੀ ਦਰਗਾਹ ਵਿਖੇ ਗੱਦੀ ਨਸ਼ੀਨ ਬਾਬਾ ਨੂਰਦੀਨ ਨਕਸ਼ਬੰਦੀ ਜੀ ਸੇਵਾ ਕਰ ਰਹੇ ਹਨ । ਜਾਣਕਾਰੀ ਦਿੰਦਿਆਂ ਉਨ੍ਹਾਂ ਦੱਸਿਆ ਕਿ ਮੇਲੇ ਸਬੰਧੀ ਸਾਰੀਆਂ ਤਿਆਰੀਆਂ ਲਗਭਗ ਮੁਕੰਮਲ ਹੋ ਗਈਆਂ ਹਨ । ਉਨ੍ਹਾਂ ਦੱਸਿਆ ਕਿ ਇਸ ਮੇਲੇ ਵਿਚ ਲੱਖਾਂ ਲੋਕ ਹਾਜ਼ਰੀ ਭਰਦੇ ਹਨ । ਉਨ੍ਹਾਂ ਦੱਸਿਆ ਕਿ 24 ਫਰਵਰੀ ਤੋਂ ਲੈ ਕੇ 8 ਮਾਰਚ ਤੱਕ ਲੰਗਰ ਅਤੁੱਟ ਵਰਤੇਗਾ। ਬਾਬਾ ਜੀ ਨੇ ਇੱਥੇ ਆਉਣ ਵਾਲੀਆਂ ਸੰਗਤਾਂ ਨੂੰ ਜੀ ਆਇਆਂ ਆਖਿਆ ਅਤੇ ਸੰਗਤਾਂ ਨੂੰ ਅਪੀਲ ਕੀਤੀ ਹੈ ਕਿ ਕੋਰੋਨਾ ਮਹਾਂਮਾਰੀ ਦੇ ਸਬੰਧਤ ਜੋ ਸਰਕਾਰ ਦੀਆਂ ਹਦਾਇਤਾਂ ਹਨ ਉਨ੍ਹਾਂ ਦੀ ਪਾਲਣਾ ਜ਼ਰੂਰ ਕਰਨ । ਰੋਸ਼ਨੀ ਦਾ ਮੇਲਾ ਜਗਰਾਉਂ ਦੇ ਲਾਗਲੇ ਪਿੰਡ ਪੋਨਾ ਵਿਖੇ ਵੀ 24 ਫਰਵਰੀ ਤੋਂ 26 ਫਰਵਰੀ ਤਕ ਚੱਲੇਗਾ । ਮੇਲੇ ਵਿੱਚ ਆਈਆਂ ਸੰਗਤਾਂ ਪਹਿਲਾਂ ਜਗਰਾਉਂ ਪੀਰ ਬਾਬਾ ਮੋਹਕਮਦੀਨ ਦੀ ਦਰਗਾਹ ਉਪਰ ਚੌਂਕੀ ਚੌਂਕੀਆਂ ਭਰਦੇ ਹਨ ਅਤੇ ਬਾਅਦ ਵਿੱਚ ਪਿੰਡ ਪੋਨਾ ਵਿਖੇ ਸੰਗਤਾਂ ਚੌਂਕੀ ਭਰਦੀਆਂ ਹਨ। ਪਿੰਡ ਪੋਨਾ ਵਿਖੇ ਵੀ ਮੇਲੇ ਸਬੰਧੀ ਸਾਰੇ ਪ੍ਰਬੰਧ ਮੁਕੰਮਲ ਕੀਤੇ ਜਾ ਚੁੱਕੇ ਹਨ ।

ਸੰਯੁਕਤ ਕਿਸਾਨ ਮੋਰਚੇ ਵਲੋ ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੇ ਮੁੱਖ ਦਫ਼ਤਰ ਮੁਹਾਲੀ ਵਿਖੇ 28 ਫਰਵਰੀ ਨੂੰ ਰੋਸ ਪ੍ਰਦਰਸ਼ਨ

ਗੁਰੂ ਸਾਹਿਬਾਨਾਂ ਦੇ ਇਤਿਹਾਸ ਅਤੇ ਬਾਬਾ ਬੰਤਾ ਸਿੰਘ ਜੀ ਖ਼ਿਲਾਫ਼ ਗਲਤ ਭੰਡੀ ਪ੍ਰਚਾਰ ਵਿਰੁੱਧ ਲੋਕਾਂ ਨੂੰ ਇਕੱਠੇ ਹੋਣ ਲਈ ਅਪੀਲ - ਬਲਦੇਵ ਸਿੰਘ ਸਿਰਸਾ

ਮੋਹਾਲੀ , 21 ਫ਼ਰਵਰੀ ( ਕੁਲਦੀਪ ਸਿੰਘ ਦੌਧਰ ) ਪੰਜਾਬ ਸਕੂਲ ਸਿੱਖਿਆ ਬੋਰਡ ਵੱਲੋਂ ਗੁਰੂ ਸਹਿਬਾਨ ਸਿੱਖ ਇਤਿਹਾਸ ਬਾਬਾ ਬੰਦਾ ਸਿੰਘ ਬਹਾਦਰ ਜੀ ਦੇ ਖ਼ਿਲਾਫ਼ ਭੰਡੀ ਪ੍ਰਚਾਰ ਤੇ ਇਤਿਹਾਸ ਨੂੰ ਬੰਦ ਕਰਵਾਉਣ ਲਈ 28 ਫਰਵਰੀ ਸੋਮਵਾਰ ਨੂੰ ਸਵੇਰੇ 10 ਵਜੇ ਪੰਜਾਬ ਸਕੂਲ ਸਿੱਖਿਆ ਬੋਰਡ ਫੇਜ਼ ਅੱਠ ਮੁਹਾਲੀ ਵਿਖੇ ਹੁੰਮ ਹੁਮਾ ਕੇ ਪਹੁੰਚਣ ਦਾ ਸੱਦਾ । ਪੰਜਾਬ ਦੇ ਸਕੂਲਾਂ ਅੰਦਰ ਸਿੱਖ ਇਤਿਹਾਸ ਨੂੰ ਤੋੜ ਮੋੜ ਕੇ ਛਾਪਣ ਤੇ ਗ਼ਲਤ ਗ਼ਲਤ ਸ਼ਬਦਾਵਲੀ ਵਰਤਣ ਵਾਲੇ ਦੋਸ਼ੀਆਂ ਨੂੰ ਸਖ਼ਤ ਤੋਂ ਸਖ਼ਤ ਸਜ਼ਾਵਾਂ ਗਵਾਉਣ ਕਟਹਿਰੇ ਵਿੱਚ ਖੜ੍ਹਾ ਕਰਨ ਅਤੇ ਇਸ ਇਤਿਹਾਸ ਨੂੰ ਤਬਦੀਲ ਕਰਕੇ ਸਹੀ ਇਤਿਹਾਸ ਦੀ ਜਾਣਕਾਰੀ ਨੂੰ ਸਿਲੇਬਸ ਅੰਦਰ ਲਾਗੂ ਕਰਨ ਲਈ ਪਿਛਲੇ ਸੱਤ ਫਰਵਰੀ ਤੋਂ ਲਗਾਤਾਰ ਮੁੱਖ ਸਿੱਖਿਆ ਦਫਤਰ ਦੇ ਬਾਹਰ ਮੋਹਾਲੀ ਵਿਖੇ ਕਿਸਾਨ ਜਥੇਬੰਦੀਆਂ ਵੱਲੋਂ ਦਿਨ ਰਾਤ ਦਾ ਧਰਨਾ ਚੱਲ ਰਿਹਾ ਹੈ । ਹੁਣ ਉਨ੍ਹਾਂ ਅਠਾਈ ਫਰਵਰੀ ਨੂੰ ਇਕ ਵੱਡੇ ਇਕੱਠ ਲਈ ਸਮੂਹ ਪੰਥ ਦਰਦੀਆਂ ਨੂੰ ਬੇਨਤੀ ਕੀਤੀ ਹੈ । ਇਸ ਸਮੇਂ ਗੱਲਬਾਤ ਕਰਦਿਆਂ ਭਾਈ ਬਲਦੇਵ ਸਿੰਘ ਸਿਰਸਾ ਅਤੇ ਜਗਜੀਤ ਸਿੰਘ ਡੱਲੇਵਾਲ ਨੇ ਲੋਕਾਂ ਨੂੰ ਬੇਨਤੀ ਕਰਦੇ ਆਖਿਆ ਕਿ ਆਓ ਸਾਰੇ ਇਕੱਠੇ ਹੋ ਕੇ ਸਾਡੇ ਗੁਰੂਆਂ ਪ੍ਰਤੀ ਗ਼ਲਤ ਅਤੇ ਭੱਦੀ ਸ਼ਬਦਾਵਲੀ ਵਰਤਣ ਵਾਲੇ ਲੋਕਾਂ ਨੂੰ ਕਟਹਿਰੇ ਵਿੱਚ ਖੜ੍ਹਾ ਕਰੀਏ ਇਥੇ ਆਪਣੇ ਇਤਿਹਾਸ ਆਪਣੀ ਕਲਚਰ ਅਤੇ ਆਪਣੀ ਮਾਂ ਬੋਲੀ ਨੂੰ ਬਚਾਈਏ ।ਨੋਟ ; ਹੋਰ ਜਾਣਕਾਰੀ ਲਈ ਫੋਟੋ ਵਿਚ ਲੱਗੇ ਇਸ਼ਤਿਹਾਰ ਨੂੰ ਜ਼ਰੂਰ ਪੜ੍ਹ ਲਵੋ ।

ਸਫਾਈ ਸੇਵਕ ਯੂਨੀਅਨ ਆਗੂ ਸਮਸਿਆਵਾਂ ਅਤੇ ਮੰਗਾਂ ਨੂੰ ਲੇ ਕੇ ਚੰਡੀਗੜ੍ਹ ਵਿਖੇ ਉਚ ਅਧਿਕਾਰੀਆਂ ਨੂੰ ਮਿਲੇ

ਜਗਰਾਉਂ, 21 ਫਰਵਰੀ ( ਕੁਲਦੀਪ ਸਿੰਘ ਕੋਮਲ ਮੋਹਿਤ ਗੋਇਲ)ਅੱਜ ਮਿਤੀ 21-02-2022 ਨੂੰ ਸਫਾਈ ਸੇਵਕ ਯੂਨੀਅਨ ਪੰਜਾਬ ਪ੍ਰਧਾਨ ਸ਼੍ਰੀ ਅਸ਼ੋਕ ਸਾਰਵਾਨ ਜੀ ਦੀ ਅਗਵਾਈ ਹੇਠ ਨਗਰ ਕੌਂਸਲ ਜਗਰਾਓਂ ਵਿਖੇ ਕੰਮ ਕਰਦੇ ਸਫਾਈ ਕਰਮਚਾਰੀਆਂ /ਸੀਵਰਮੈਨਾ ਨੂੰ ਦਰਪੇਸ਼ ਆਰਹੀਆ ਸਮੱਸਿਆਵਾਂ ਅਤੇ ਮੰਗਾਂ ਸਬੰਧੀ ਸਫਾਈ ਸੇਵਕ ਯੂਨੀਅਨ ਪੰਜਾਬ ਦੇ ਜਰਨਲ ਸਕੱਤਰ ਸ੍ਰੀ ਰਮੇਸ਼ ਗੇਚੰਡ, ਜ਼ਿਲਾ ਪ੍ਰਧਾਨ ਅਰੁਣ ਗਿੱਲ,ਕਨਵੀਨਰ ਪੰਜਾਬ ਸ੍ਰੀ ਕੁਲਦੀਪ ਸ਼ਰਮਾ ਅਤੇ ਰਵੀ ਕੁਮਾਰ ਵੱਲੋਂ ਸ੍ਰੀ ਰਾਕੇਸ਼ ਗਰਗ ਜੁਆਇੰਟ ਡਾਇਰੈਕਟਰ ਸਥਾਨਕ ਸਰਕਾਰਾਂ ਪੰਜਾਬ ਚੰਡੀਗੜ੍ਹ ਜੀ ਨੂੰ ਮਿਲਿਆ ਗਿਆ ਜਿਸ ਵਿਚ ਕੁੱਝ ਮੁੱਖ ਮੰਗਾਂ ਨੂੰ ਲੈ ਕੇ ਡਾਇਰੈਕਟਰ ਸਾਹਿਬ ਨਾਲ ਵਿਚਾਰ ਵਟਾਂਦਰਾ ਕੀਤਾ ਗਿਆ ਜਿਨ੍ਹਾਂ ਵਿੱਚ ਕੱਚੇ ਸਫਾਈ ਸੇਵਕ /ਸੀਵਰਮੈਨਾ ਨੂੰ ਕੰਟਰੈਕਟ ਬੇਸ ਤੇ ਕਰਨ ਸਬੰਧੀ ਆਰਜੀ ਮੇਟਾਂ ਨੂੰ ਸਿਨਿਆਰਟੀ ਕਮ ਮੈਰਿਟ ਦੇ ਆਧਾਰ ਤੇ ਰੱਖਣ ਸਬੰਧੀ ਮਾਣਯੋਗ ਡਾਇਰੈਕਟੋਰੇਟ ਵੱਲੋਂ ਪੱਤਰ ਜਾਰੀ ਹੋਣ ਤੇ ਵੀ ਅਮਲੀ ਜਾਮਾ ਨਾ ਪਹਿਨਾਉਣ ਤੇ ਰੋਸ ਜਤਾਇਆ ਗਿਆ ਸੀਵਰਮੈਨਾ ਨੂੰ 04-09-14 ਸਾਲੀ ਤਰੱਕੀ ਪੇਅ ਫਿਕਸਿੰਗ ਅਤੇ ਸਾਲ 2019 ਨੂੰ ਫਿਟਰ ਕੁਲੀ ਪ੍ਰੀਤਮ ਸਿੰਘ ਦੀ ਨਗਰ ਕੌਂਸਲ ਜਗਰਾਉਂ ਵਿਖੇ ਡਿਉਟੀ ਦੋਰਾਨ ਮੋਤ ਹੋਣ ਉਪਰੰਤ ਦੋ ਸਾਲ ਬੀਤ ਜਾਣ ਦੇ ਬਾਵਜੂਦ ਵੀ ਤਰਸ ਦੇ ਆਧਾਰ ਤੇ ਨੌਕਰੀ ਦੇਣ ਤੋਂ ਗੁਮਰਾਹ ਕੀਤਾ ਜਾ ਰਿਹਾ ਹੈ ਕਿਉਂਕਿ ਨਗਰ ਕੌਂਸਲ ਜਗਰਾਓਂ ਵੱਲੋਂ ਇਹ ਕਹਿ ਕੇ ਟਾਲਿਆ ਜਾ ਰਿਹਾ ਹੈ ਕਿ ਸੀਵਰ ਬੋਰਡ ਵੱਲੋਂ ਇਹ ਸਾਰੇ ਭੱਤੇ ਅਤੇ ਨੌਕਰੀ ਦਿੱਤੀ ਜਾਣੀ ਹੈ ਪ੍ਰੰਤੂ ਡਾਇਰੈਕਟਰ ਸਾਹਿਬ ਜੀ ਦੇ ਜਾਇਜ ਮੰਗਾ ਨੂੰ ਸੁਣਨ ਤੋਂ ਬਾਅਦ ਸਫਾਈ ਸੇਵਕ ਯੂਨੀਅਨ ਪੰਜਾਬ ਨੂੰ ਇਹ ਭਰੋਸਾ ਦਿੱਤਾ ਗਿਆ ਕਿ ਇਨ੍ਹਾਂ ਸਾਰੀਆਂ ਜਾਇਜ ਮੰਗਾਂ ਦਾ ਨਿਪਟਾਰਾ ਜਲਦ ਹੀ ਕਰਵਾ ਦਿੱਤਾ ਜਾਵੇਗਾ ਅਤੇ ਜੋ ਕਰਮਚਾਰੀ ਜਿੱਥੇ ਕੰਮ ਕਰਦਾ ਹੈ ਜਿੱਥੋਂ ਤਨਖਾਹ ਲੈਂਦਾ ਹੈ ਉਥੇ ਹੀ ਸਾਰੇ ਭੱਤੇ ਅਤੇ ਤਰਸ ਆਧਾਰਤ ਨੌਕਰੀ ਵੀ ਉਸ ਦਫਤਰ ਵੱਲੋਂ ਹੀ ਲੈਣ ਦਾ ਹੱਕਦਾਰ ਹੈ ਇਸ ਸਬੰਧੀ ਅਤੇ ਆਰਜੀ ਮੇਟਾਂ ਸਬੰਧੀ ਡਾਇਰੈਕਟਰ ਸਾਹਿਬ ਵੱਲੋਂ ਕਾਰਜ ਸਾਧਕ ਅਫ਼ਸਰ ਨਗਰ ਕੌਂਸਲ ਜਗਰਾਓਂ ਸ਼੍ਰੀ ਅਸ਼ੋਕ ਕੁਮਾਰ ਜੀ ਨਾਲ ਫੋਨ ਰਾਹੀਂ ਰਾਬਤਾ ਕਾਇਮ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਪ੍ਰੰਤੂ ਕਾਰਜ ਸਾਧਕ ਅਫ਼ਸਰ ਜੀ ਦਾ ਫੋਨ ਨੈਟਵਰਕ ਕਵਰੇਜ ਸ਼ੇਤਰ ਚੋਂ ਬਾਹਰ ਹੋਣ ਤੇ ਰਾਬਤਾ ਕਾਇਮ ਨਹੀਂ ਹੋ ਸਕਿਆ ਡਾਇਰੈਕਟਰ ਸਾਹਿਬ ਵੱਲੋਂ ਸਫਾਈ ਸੇਵਕ ਯੂਨੀਅਨ ਪੰਜਾਬ ਨੂੰ ਭਰੋਸਾ ਦਿੱਤਾ ਕਿ 2 - 4 ਦਿਨਾ ਅੰਦਰ ਇਨਾ ਮੰਗਾ ਦਾ ਨਿਪਟਾਰਾ ਜਲਦ ਤੋਂ ਜਲਦ ਕੀਤਾ ਜਾਵੇਗਾ ਸਫਾਈ ਸੇਵਕ ਯੂਨੀਅਨ ਪੰਜਾਬ ਵੱਲੋਂ ਮੰਗਾਂ ਜਲਦੀ ਪੁਰੀਆ ਕਰਵਾਉਣ ਦੀ ਅਪੀਲ ਕੀਤੀ ਮੰਗਾ ਪੁਰੀਆ ਨਾ ਹੋਣ ਦੀ ਸੂਰਤ ਵਿੱਚ ਸਫਾਈ ਸੇਵਕ ਯੂਨੀਅਨ ਪੰਜਾਬ ਵੱਲੋਂ ਨਗਰ ਕੌਂਸਲ ਜਗਰਾਓਂ ਵਿਖੇ ਹੜਤਾਲ ਕੀਤੀ ਜਾਵੇ ਗੀ ਜਿਸਦੀ ਸਾਰੀ ਜਿੰਮੇਵਾਰੀ ਨਗਰ ਕੌਂਸਲ ਜਗਰਾਓਂ ਦੀ ਹੋਵੇਗੀ

ਬੀਮਾਰ ਪਏ ਪ੍ਰਸਿੱਧ ਲੋਕ ਗਾਇਕ ਅਮਰਜੀਤ ਗੁਰਦਾਸਪੁਰੀ ਦਾ ਹਾਲ ਚਾਲ ਪੁੱਛਿਆ ਉਪ ਮੁੱਖ ਮੰਤਰੀ ਸਃ ਸੁਖਜਿੰਦਰ ਸਿੰਘ ਰੰਧਾਵਾ ਨੇ

ਲੁਧਿਆਣਾਃ 21 ਫਰਵਰੀ ( ਗੁਰਕੀਰਤ ਜਗਰਾਉਂ) ਪਿਛਲੇ ਦੋ ਹਫ਼ਤੇ ਤੋਂ ਜ਼ਿੰਦਗੀ ਮੌਤ ਦੀ ਲੜਾਈ ਲੜ ਰਹੇ ਪ੍ਰਸਿੱਧ ਪੰਜਾਬੀ ਲੋਕ ਗਾਇਕ ਤੇ ਪੰਜਾਬ ਵਿੱਚ ਇਪਟਾ ਲਹਿਰ ਦੇ ਬਾਨੀਆਂ ਵਿੱਚੋਂ ਸਿਰਕੱਢ ਕਲਾਕਾਰ ਅਮਰਜੀਤ ਗੁਰਦਾਸਪੁਰੀ ਦੀ ਸਿਹਤ ਦਾ ਪਤਾ ਲੈਣ ਲਈ ਪੰਜਾਬ ਦੇ ਉਪ ਮੁੱਖ ਮੰਤਰੀ ਸਃ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਅੱਜ ਉਨ੍ਹਾਂ ਦੇ ਜੱਦੀ ਪਿੰਡ ਉੱਦੋਵਾਲੀ ਪੁੱਜੇ। ਅਮਰਜੀਤ ਗੁਰਦਾਸਪੁਰੀ ਉਨ੍ਹਾਂ ਦੇ ਪਿਤਾ ਜੀ ਸਃ ਸੰਤੋਖ ਸਿੰਘ ਰੰਧਾਵਾ ਜੀ ਦੇ ਵੀ ਨਿਕਟਵਰਤੀ ਸਾਥੀ ਰਹੇ ਹਨ। ਗੁਰਦਾਸਪੁਰੀ ਆਪਣੇ ਜੁਆਨ ਪੁੱਤਰ ਪਰਮ ਸੁਨੀਲ ਸਿੰਘ ਰੰਧਾਵਾ ਦੀ ਦਸੰਬਰ ਮਹੀਨੇ ਚ ਹੋਈ ਮੌਤ ਕਾਰਨ ਦਿਲ ਛੱਡ ਗਏ ਸਨ ਅਤੇ ਲਗਪਗ ਦਸ ਦਿਨ ਅੰਮ੍ਰਿਤਸਰ ਦੇ ਸਿੱਧੀ ਹਸਪਤਾਲ ਚ ਦਾਖ਼ਲ ਰਹਿ ਕੇ ਪਰਸੋਂ ਹੀ ਪਿੰਡ ਪਰਤੇ ਹਨ। ਸਃ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਗੁਰਦਾਸਪੁਰੀ ਜੀ ਤੋਂ ਜਦ ਹੀਰ ਸੁਣਨ ਦੀ ਇੱਛਾ ਦੱਸੀ ਤਾਂ ਉਹ ਬੋਲ ਤਾਂ ਨਹੀਂ ਸਕੇ ਪਰ ਮੁਸਕਰਾ ਕੇ ਹੱਥਾਂ ਦੇ ਇਸ਼ਾਰੇ ਨਾਲ ਕਹਿ ਗਏ ਕਿ ਪੁੱਤਰਾ ਦਸ ਮਾਰਚ ਨੂੰ ਸੁਣਾਵਾਂਗਾ, ਜਿਸ ਦਿਨ ਤੇਰਾ ਨਤੀਜਾ ਆਵੇਗਾ।
ਅੱਜ ਉਦੋਵਾਲੀ ਤੋਂ ਪਰਤ ਕੇ ਸਃ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਦੇ ਚੇਅਰਮੈਨ ਪ੍ਰੋਃ ਗੁਰਭਜਨ ਸਿੰਘ ਗਿੱਲ ਨੂੰ ਦੱਸਿਆ ਕਿ ਅਮਰਜੀਤ ਗੁਰਦਾਸਪੁਰੀ ਜੀ ਦੀ ਸਿਹਤ ਭਾਵੇਂ ਬਹੁਤੀ ਠੀਕ ਨਹੀਂ ਪਰ ਮਨੋਬਲ ਪੂਰਾ ਕਾਇਮ ਹੈ।
ਵਰਨਣ ਯੋਗ ਗੱਲ ਇਹ ਹੈ ਸਾਡੇ ਚੋਂ ਬਹੁਤਿਆਂ ਦਾ ਬਚਪਨ ਤੇ ਜਵਾਨੀ ਅਮਰਜੀਤ ਗੁਰਦਾਸਪੁਰੀ ਜੀ ਦੇ ਗੀਤਾਂ ਦੀ ਛਾਵੇਂ ਵਿਕਸਤ ਹੋਈ ਹੈ।

ਬਾਲਾ ਜਰਨੈਲ ਦੀ ਸਰਜਮੀਨ ‘ਤੇ ਬੰਦੀ ਸਿੰਘਾਂ ਦੀ ਰਿਹਾਈ ਲਈ ਸਾਥੀਆਂ ਸਮੇਤ ਭੁੱਖ ਹੜਤਾਲ ਲਈ ਬੈਠਾ ਦੇਵ ਸਰਾਭਾ

‘ਹੇਰਾਂ’ ਵਲੋਂ-ਉਬਲਦੇ ਕੌਮੀ ਜਜ਼ਬੇ ‘ਚ ਪਿਛੋਕੜ ਅਤੇ ਭਵਿੱਖ ਦੇ ਪੱਖਾਂ ਤੋਂ ਸੁਚੇਤ ਕੌਮ ਵਲੋਂ ਹੰਢਾਏ ਜਾ ਰਹੇ ਪੱਖਾਂ ਤੋਂ ਜਾਣਕਾਰੀ ਕੀਤੀ ਸਾਂਝੀ
ਮੁੱਲਾਪੁਰ ਦਾਖਾ 21 ਫਰਵਰੀ (ਸਤਵਿੰਦਰ ਸਿੰਘ ਗਿੱਲ )-ਪੰਥਕ ਜਜ਼ਬੇ ਦੇ ਉਛਾਲ ‘ਚ ਬਲਦੇਵ ਸਿੰਘ ‘ਦੇਵ ਸਰਾਭਾ’ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਲੋਕ ਭਲਾਈ ਮੰਚ ਪੰਜਾਬ, ਆਪਣੇ ਸਹਿਯੋਗੀ ਭਾ: ਰਾਜਦੀਪ ਸਿੰਘ ਆਂਡਲੂ ਸੂਬਾ ਮੈਂਬਰ ਪੰਥਕ ਅਕਾਲੀ ਲਹਿਰ, ਸੁੱਖਵਿੰਦਰ ਸਿੰਘ ਅੱਬੂਪੁਰ ਮੀਤ ਪ੍ਰਧਾਨ ਸ਼ੋ੍ਰਮਣੀ ਅਕਾਲੀ ਦਲ ਅੰਮ੍ਰਿਤਸਰ ਸਰਕਲ ਸਿਧਵਾਂ ਬੇਟ, ਜਗਤਾਰ ਸਿੰਘ ਭੈਣੀ ਬੜਿੰਗ ਪੰਥਕ ਅਕਾਲੀ ਲਹਿਰ , ਮੋਹਣ ਸਿੰਘ ਬਗਸ਼ੀਪੁਰ ਸ਼੍ਰੀ ਗੁਰੂ ਗ੍ਰੰਥ ਸਾਹਿਬ ਸਤਿਕਾਰ ਕਮੇਟੀ ਆਦਿ ਪੰਜ ਸਾਥੀਆਂ ਸਮੇਤ ਸਜਾ ਪੂਰੀ ਕਰ ਚੁੱਕੇ ਕਾਲ ਕੋਠੜੀਆਂ ‘ਚ ਬੰਦ ਬੇਇਨਸਾਫੀ ਦੇ ਸ਼ਿਕਾਰ ਬੰਦੀ ਸਿੰਘਾਂ ਦੀ ਰਿਹਾਈ ਅਤੇ ਸੌਦਾ ਸਾਧ ਦੀ ਫਰਲੋ ਨੂੰ ਰੱਦ ਕਰਵਾਉਣ ਲਈ ਪੰਥਕ ਜਥੇਬੰਦੀਆਂ ਦੇ ਸਹਿਯੋਗ ਨਾਲ ਬਾਲਾ ਜਰਨੈਲ ਸ਼ਹੀਦ ਕਰਤਾਰ ਸਿੰਘ ਜੀ ਸਰਾਭਾ ਦੀ ਸਰਜ਼ਮੀਨ ਪਿੰਡ ਸਰਾਭਾ ਦੇ ਮੁੱਖ ਚੌਕ ‘ਚ ਉਨ੍ਹਾਂ ਦੀ ਯਾਦ ਨੂੰ ਤਾਜਾ ਕਰਵਾਉਦੀ ਯਾਦਗਰ ਸਾਹਮਣੇ ਅੱਜ ਸਵੇਰੇ 10 ਵਜ਼ੇ ਭੁੱਖ ਹੜਤਾਲ ‘ਤੇ ਬੈਠੇ। ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ‘ਦੇਵ ਸਰਾਭਾ ਨੇ ਦੱਸਿਆ ਕਿ ਉਹ ਸ੍ਰ: ਜਸਪਾਲ ਸਿੰਘ ਹੇਰਾਂ ਸੰਪਾਦਕ ਰੋਜਾਨਾ ਪਹਿਰੇਦਾਰ ਦੀ ਪ੍ਰੇਰਣਾ ਸਦਕਾ ਪੰਥਕ ਕਾਰਜ਼ਾਂ ਨੂੰ ਸਮਰਪਿਤ ਹੋਏ ਹਨ। ਉਨ੍ਹਾਂ ਦੀ ਮਨਸ਼ਾ ਕਿਸੇ ਸਿਆਸੀ ਪੂਰਤੀ ਜਾਂ ਕਿਸੇ ਦੇ ਵਿਰੋਧ ਵਿਚ ਨਹੀਂ ਸਗੋਂ ਹੱਕ-ਇਨਸਾਫ ਲਈ ਜੂਝਣ ਦੇ ਜਜ਼ਬੇ ‘ਚੋਂ ਉਪਜਿਆ ਪੱਖ ਹੈ, ਜਿਸਦੀ ਮਿਸਾਲ ਬੀਤੇ ਕੱਲ ਆਪਣੇ ਵਲੋਂ ਵੋਟ ਦਾ ਬਾਈਕਾਟ ਕਰਨਾ ਅਤੇ ਅੱਜ ਤੋਂ ਰੋਜਾਨਾ ਦਿਨ-ਭਰ ਭੁੱਖ ਹੜਤਾਲ ‘ਤੇ ਬੈਠਣਾ ਹੈ। ਇਸ ਮੌਕੇ ਵਿਸ਼ੇਸ਼ ਤੌਰ ‘ਤੇ ਪੁੱਜੇ ਸ੍ਰ: ਜਸਪਾਲ ਸਿੰਘ ਹੇਰਾਂ ਬਿਪਰਵਾਦੀ ਤਾਕਤਾਂ ਦੇ ਸ਼ਿਕੰਜੇ ‘ਚ ਅਜੋਕੇ ਅਖੌਤੀ ਪੰਥਕ ਆਗੂਆਂ ਦੀ ਕੌਮੀ ਕਾਰਜ਼ਾਂ ਵਿਚਲੀ ਵਜ਼ਹਾ-ਏ-ਕਮਜੋਰੀ ਦੇ ਪੱਖਾਂ ਅਤੇ ਉਬਲਦੇ ਕੌਮੀ ਜਜ਼ਬੇ ‘ਚ ਪਿਛੋਕੜ ਅਤੇ ਭਵਿੱਖ ਦੇ ਪੱਖਾਂ ਤੋਂ ਸੁਚੇਤ ਕੌਮ ਵਲੋਂ ਹੰਢਾਏ ਜਾ ਰਹੇ ਪੱਖਾਂ ਤੋਂ ਜਾਣਕਾਰੀ ਸਾਂਝੀ ਕੀਤੀ। ਭੁੱਖ ਹੜਤਾਲ ‘ਤੇ ਬੈਠੇ ‘ਦੇਵ ਸਰਾਭਾ’ ਤੇ ਸਾਥੀਆਂ ਨੂੰ ਹੌਸਲਾ ਵਧਾਉਦਿਆਂ ਹਰਦੀਪ ਸਿੰਘ ਸਰਾਭਾ, ਇੰਦਰਜੀਤ ਸਿੰਘ ਸਹਿਜ਼ਾਦ, ਸਾਬਕਾ ਸਰਪੰਚ ਜਗਤਾਰ ਸਿੰਘ ਸਰਾਭਾ, ਗੁਰਮੀਤ ਸਿੰਘ ਬਰਸਾਲ, ਨਿਰਭੈ ਸਿੰਘ ਬਖਸ਼ੀਪੁਰ, ਜਗਦੇਵ ਸਿੰਘ ਬਖਸ਼ੀਪੁਰ, ਜਥੇ: ਲਾਭ ਸਿੰਘ ਬਰਸਾਲ, ਬਲਦੇਵ ਸਿੰਘ ਬਖਸ਼ੀਪੁਰ, ਕੁਲਜੀਤ ਸਿੰਘ ਭੰਵਰਾ, ਜਸਵੀਰ ਸਿੰਘ ਸਾ; ਸਰਪੰਚ ਟੂਸੇ, ਰਮੇਸ਼ਵਰ ਸਿੰਘ ਟੂਸੇ, ਬਿੰਦਰ ਸਰਾਭਾ ਆਦਿ ਨੇ ਪੰਥਕ ਜਜ਼ਬੇ ਵਿਚ ਵਾਧਾ ਕੀਤਾ।

ਪਿੰਡ ਗਹਿਲ ਵਿਖੇ ਸਾਲਾਨਾ ਜੋੜ ਮੇਲਾ ਬੜੀ ਸ਼ਰਧਾ ਅਤੇ ਧੂਮਧਾਮ ਨਾਲ ਮਨਾਇਆ ਜਾ ਰਿਹਾ ਹੈ

ਮਹਿਲ ਕਲਾਂ /ਬਰਨਾਲਾ- 21 ਫਰਵਰੀ -(ਗੁਰਸੇਵਕ ਸਿੰਘ ਸੋਹੀ)- ਹਲਕਾ ਮਹਿਲ ਕਲਾਂ ਦੇ ਪਿੰਡ ਗਹਿਲ ਵਿਖੇ ਜਥੇਦਾਰ ਬਲਦੇਵ ਸਿੰਘ ਚੂੰਘਾ ਮੈਂਬਰ SGPC ਦੀ ਯੋਗ ਅਗਵਾਈ ਵਿੱਚ ਹਰ ਸਾਲ ਦੀ ਤਰਾਂ ਇਸ ਵਾਰ ਵੀ ਸਲਾਨਾ ਜੋੜ ਮੇਲਾ ਵੱਡਾ ਘੱਲੂਘਾਰਾ ਮਿਤੀ 21-22-23 ਫ਼ਰਵਰੀ 2022 ਨੂੰ ਮਨਾਇਆਂ ਜਾ ਰਿਹਾ ਹੈ। ਜਿਸ ਸੰਬੰਧੀ ਮਿਤੀ 21-2-22 ਨੂੰ ਸਵੇਰੇ 7:30 ਵਜੇ ਤੋਂ ਪੰਜ ਪਿਆਰਿਆ ਦੀ ਅਗਵਾਈ ਵਿੱਚ ਨਗਰ ਕੀਰਤਨ ਰਵਾਨਾ ਹੋਵੇਗਾ। ਦੋ ਦਿਨ ਧਾਰਮਿਕ ਦੀਵਾਨ ਸਜਣਗੇ ਜਿਸ ਵਿੱਚ ਭਾਈ ਰਮਨਦੀਪ ਸਿੰਘ ਦੀਵਾਨਾ ਦਾ ਢਾਡੀ ਜਥਾ, ਬੀਬਾ ਸੁਖਪਾਲ ਕੌਰ ਬਡਬਰ ਦਾ ਢਾਡੀ ਜਥਾ, ਗੁਰਮੇਲ ਸਿੰਘ ਕਾਲੇਕੇ ਦਾ ਢਾਡੀ ਜਥਾ ਅਤੇ ਹੋਰ ਵੀ ਰਾਗੀ ਢਾਡੀ ਜਥੇ ਪੁੱਜ ਰਹੇ ਹਨ ।
ਇਸ ਤੋਂ ਇਲਾਵਾ ਦੀਵਾਨਾ ਵਿੱਚ ਭਾਈ ਗਗਨਦੀਪ ਸਿੰਘ ਹਜ਼ੂਰੀ ਰਾਗੀ ਜਥਾ ਸੱਚ ਖੰਡ ਸ੍ਰੀ ਦਰਬਾਰ ਸਾਹਿਬ ਅਤੇ ਬਾਬਾ ਪਰਮਿੰਦਰ ਸਿੰਘ ਜੀ ਖਾਲਸਾ ਭਾਈਰੂਪੇ ਵਾਲੇ ਦੋ ਰੋਜ਼ਾ ਦੀਵਾਨ ਸਜਾਉਣਗੇ। ਇਸ ਸਮੇ ਭਾਈ ਅਮਰੀਕ ਸਿੰਘ ਮੈਨੇਜਰ, ਭਾਈ ਜਸਪਾਲ ਸਿੰਘ ਇੰਚਾਰਜ ਗਹਿਲ, ਬਾਬਾ ਸੁਰਜੀਤ ਸਿੰਘ ਹੈੱਡ ਗ੍ਰੰਥੀ, ਗਗਨਦੀਪ ਸਿੰਘ ਸਟੋਰ ਕੀਪਰ, ਬਾਬਾ ਗੁਰਵਿੰਦਰ ਸਿੰਘ ਹੈੱਡ ਗ੍ਰੰਥੀ ਅਤੇ ਪਿੰਡ ਦੇ ਪਤਵੰਤੇ ਸੱਜਣ ਹਾਜ਼ਰ ਸਨ।

ਭਵਿੱਖ ਦਾ ਫੈਸਲਾ ✍️ ਸਲੇਮਪੁਰੀ ਦੀ ਚੂੰਢੀ

ਵੋਟਰੋ! ਜਰਾ ਸੰਭਲ ਕੇ ਖੇਡਣਾ, ਤੁਹਾਡਾ ਅਤੇ ਤੁਹਾਡੇ ਪੰਜਾਬ ਦਾ ਭਵਿੱਖ ਤੁਹਾਡੇ ਹੱਥ ਵਿਚ ਹੈ। ਤੁਸੀਂ ਆਪਣਾ ਅਤੇ ਆਪਣੇ ਪੰਜਾਬ ਦੇ ਭਵਿੱਖ ਦਾ ਫੈਸਲਾ ਅੱਜ ਕਰਨਾ ਹੈ। ਜੇ ਤੁਸੀਂ ਠੀਕ ਨਾ ਖੇਡੇ ਤਾਂ ਤੁਹਾਡੀ ਅਤੇ ਤੁਹਾਡੇ ਪੰਜਾਬ ਦੀ ਹਾਰ ਪੱਕੀ!
-ਸੁਖਦੇਵ ਸਲੇਮਪੁਰੀ
09780620233
20 ਫਰਵਰੀ, 2022.

ਜਨ ਸ਼ਕਤੀ ਨਿਊਜ਼ ਦੇ ਪੱਤਰਕਾਰ ਜਸਮੇਲ ਗ਼ਾਲਿਬ ਦਾ ਦਿਲ ਦਾ ਦੌਰਾ ਪੈਣ ਨਾਲ ਹੋਇਆ ਦੇਹਾਂਤ

ਹਜ਼ਾਰਾਂ ਸੇਜਲ ਅੱਖਾਂ ਨੇ ਪੱਤਰਕਾਰ ਜਸਮੇਲ ਗ਼ਾਲਿਬ ਨੂੰ ਦਿੱਤੀ ਅੰਤਮ ਵਿਦਾਇਗੀ

ਜਿਸ ਤਰ੍ਹਾਂ ਮਨੁੱਖ ਦੇ ਸਰੀਰ ਅੰਦਰ ਰੀੜ੍ਹ ਦੀ ਹੱਡੀ ਦਾ ਸੰਬੰਧ ਹੈ ਉਸ ਤਰ੍ਹਾਂ ਦਾ ਸਬੰਧ ਜਸਮੇਲ ਗ਼ਾਲਿਬ ਦਾ ਜਨ ਸ਼ਕਤੀ ਨਿਊਜ਼ ਪੰਜਾਬ ਦੇ ਨਾਲ ਸੀ ਜੋ ਇੱਕ ਝਟਕੇ ਨਾਲ ਟੁੱਟ ਗਿਆ - ਅਮਨਜੀਤ ਸਿੰਘ ਖਹਿਰਾ

ਜਗਰਾਉਂ , 21 ਫ਼ਰਵਰੀ (ਗੁਰਦੇਵ ਗ਼ਾਲਿਬ ) ਗੁਰੂ ਸਾਹਿਬਾਨਾਂ ਦੇ ਹੁਕਮ ਅਨੁਸਾਰ ਜਦੋਂ ਮੌਤ ਦਾ ਬੁਲਾਵਾ ਆ ਜਾਵੇ ਫਿਰ ਤੇ ਫਿਰ ਪਲ ਵਿੱਚ ਹੀ ਸਭ ਕੁਝ ਬੀਤ ਜਾਂਦਾ ਹੈ ਤੇ ਉਸ ਤੋਂ ਪਿੱਛੇ ਯਾਦਾਂ ਰਹਿ ਜਾਂਦੀਆਂ ਹਨ ਜਿਨ੍ਹਾਂ ਨੂੰ ਯਾਦ ਕਰਕੇ ਅਸੀਂ ਸਮੇਂ ਬਾਰੇ ਸੋਚ ਸਕਦੇ ਹਾਂ ਇਸੇ ਤਰ੍ਹਾਂ ਦੀ ਇਕ ਬਹੁਤ ਹੀ ਦੁਖਦਾਈ ਘਟਨਾ ਵਾਪਰੀ ਪੱਤਰਕਾਰ ਜਸਮੇਲ ਸਿੰਘ ਗ਼ਾਲਿਬ ਜੋ ਆਪਣੇ ਪਿੱਛੇ ਇਕ ਨੌੰ ਸਾਲ ਇੱਕ ਸੱਤ ਸਾਲ ਬੱਚੇ ਅਤੇ ਆਪਣੀ ਪਤਨੀ ਅਤੇ ਚਾਹੁਣ ਵਾਲਿਆਂ ਨੂੰ ਰੋਂਦਾ ਕੁਰਲਾਉਂਦਾ ਛੱਡ ਕੇ ਇਸ ਫ਼ਾਨੀ ਸੰਸਾਰ ਨੂੰ ਅਲਵਿਦਾ ਆਖ ਗਿਆ । ਸਵੇਰੇ ਨਿੱਤ ਦੀ ਤਰ੍ਹਾਂ ਗੁਰਦੁਆਰਾ ਸਾਹਿਬ ਹਾਜ਼ਰੀ ਲਗਵਾ ਆਪਣੇ ਕੰਮਕਾਰ ਵਿੱਚ ਮਸਰੂਫ਼ ਹੋਇਆ ਰੋਜ਼ਾਨਾ ਦੀ ਤਰ੍ਹਾਂ ਬੀਤੀ ਰਾਤ ਦੀਆਂ ਖ਼ਬਰਾਂ ਨੂੰ ਇਲੈਕਟ੍ਰੋਨਿਕ ਮੀਡੀਆ ਉੱਪਰ ਸ਼ੇਅਰ ਕਰਨ ਤੋਂ ਬਾਅਦ ਅੱਜ ਸਪੈਸ਼ਲ ਵੋਟਾਂ ਦਾ ਦਿਨ ਹੋਣ ਕਾਰਨ ਜਦੋਂ ਘਰ ਅੰਦਰ ਹੀ ਆਪਣੇ ਕੰਮ ਨਿਪਟਾ ਰਿਹਾ ਸੀ ਅਚਾਨਕ ਉਲਟੀ ਆਉਣ ਤੋਂ ਬਾਅਦ ਬਾਥਰੂਮ ਵਿਚ ਡਿੱਗ ਪਿਆ । ਜਿਸ ਉਪਰੰਤ ਪਰਿਵਾਰ ਅਤੇ ਨਜ਼ਦੀਕੀਆਂ ਵੱਲੋਂ ਚੱਕ ਜਗਰਾਉਂ ਦੇ ਹਸਪਤਾਲ ਪਹੁੰਚਾਇਆ ਗਿਆ ਜਿੱਥੇ ਸੀਰੀਅਸ ਹੋਣ ਤੇ ਕੁਝ ਮਿੰਟਾਂ ਬਾਅਦ ਹੀ ਲੁਧਿਆਣੇ ਰੈਫ਼ਰ ਕਰ ਦਿੱਤਾ ਜਿਸ ਤੋਂ ਬਾਅਦ ਮੁੱਲਾਂਪੁਰ ਕੋਲ ਆਪਣੇ ਆਖ਼ਰੀ ਸਾਹ ਲੈਂਦਿਆਂ ਸਵਾਸਾਂ ਦੀ ਪੂੰਜੀ ਪੂਰੀ ਕੀਤੀ । ਇਸ ਅਚਨਚੇਤ ਮੌਤ ਦੇ ਨਾਲ ਜਿੱਥੇ ਉਨ੍ਹਾਂ ਦੀ ਧਰਮਪਤਨੀ ਦੋ ਬੱਚੇ ਨੌੰ ਸਾਲ ਅਤੇ ਸੱਤ ਸਾਲ ਉਮਰ ਬਹੁਤ ਹੀ ਗਹਿਰੇ ਸਦਮੇ ਵਿੱਚ ਹਨ ਉਥੇ ਜਨ ਸ਼ਕਤੀ ਨਿਊਜ਼ ਨਾਲ ਜੁੜੇ ਹੋਏ ਅਨੇਕਾਂ ਲੋਕਾਂ ਨੂੰ ਵੀ ਗਹਿਰਾ ਸਦਮਾ ਲੱਗਾ ਹੈ । ਇਸ ਸਮੇਂ ਜਨ ਸ਼ਕਤੀ ਨਿਊਜ਼ ਦੇ ਮਾਲਕ ਅਮਨਜੀਤ ਸਿੰਘ ਖਹਿਰਾ ਨੇ ਇੰਗਲੈਂਡ ਤੋਂ ਪ੍ਰੈੱਸ ਨਾਲ ਗੱਲਬਾਤ ਕਰਦੇ ਦੱਸਿਆ ਪੱਤਰਕਾਰ ਜਸਮੇਲ ਗ਼ਾਲਿਬ ਆਪਣੇ ਪਰਿਵਾਰ ਆਪਣੇ ਚਾਹੁਣ ਵਾਲੇ ਅਤੇ ਸਾਡੇ ਨਾਲ ਲੰਮਾ ਸਮਾਂ ਜੱਦੋ ਜਹਿਦ ਕਰਕੇ ਜੋੜਿਆ ਹੋਇਆ ਰਿਸ਼ਤਾ ਕੁਝ ਹੀ ਮਿੰਟਾਂ ਵਿੱਚ ਤੋਡ਼ ਕੇ ਸਦਾ ਲਈ ਇਸ ਫਾਨੀ ਸੰਸਾਰ ਤੋਂ ਦੂਰ ਹੋ ਗਿਆ । ਜਿਸ ਦਾ ਵਿਸ਼ਵਾਸ਼ ਕਰਨਾ ਕਿ ਮੌਤ ਇਸ ਤਰ੍ਹਾਂ ਵੀ ਆ ਜਾਂਦੀ ਹੈ ਬਹੁਤ ਔਖਾ ਹੈ । ਉਨ੍ਹਾਂ ਅੱਗੇ ਆਖਿਆ ਮੌਤ ਤੋਂ ਤਕਰੀਬਨ ਇੱਕ ਘੰਟਾ ਪਹਿਲਾਂ ਅੱਜ ਦੇ ਚੋਣਾਂ ਦੇ ਸੰਬੰਧ ਵਿਚ ਆਪਣੀ ਖ਼ਬਰ ਨੂੰ ਸਮੁੱਚੇ ਪੰਜਾਬ ਵਾਸੀਆਂ ਦੇ ਸਾਹਮਣੇ ਰੱਖਣਾ ਉਸ ਦੀ ਕੰਮ ਪ੍ਰਤੀ ਇਕ ਅਹਿਮ ਮਿਸਾਲ ਹੈ । ਉਨ੍ਹਾਂ ਜਿਥੇ ਪਰਿਵਾਰ ਦੇ ਨਾਲ ਹਰ ਵਕਤ ਖੜ੍ਹਨ ਦਾ ਭਰੋਸਾ ਦਿੱਤਾ ਉਥੇ ਖਹਿਰਾ ਨੇ ਜਸਮੇਲ ਗ਼ਾਲਿਬ ਦੀ ਮੌਤ ਨੂੰ ਨਾ ਪੂਰਾ ਹੋਣ ਵਾਲਾ ਘਾਟਾ ਦੱਸਿਆ । ਅੱਜ ਪੱਤਰਕਾਰ ਜਸਮੇਲ ਗ਼ਾਲਿਬ ਦੇ ਅੰਤਮ ਸੰਸਕਾਰ ਸਮੇਂ ਉਚੇਚੇ ਤੌਰ ਤੇ ਬੀਬੀ ਸਰਬਜੀਤ ਕੌਰ ਮਾਣੂਕੇ ਵਿਧਾਇਕ ਆਮ ਆਦਮੀ ਪਾਰਟੀ ਹਲਕਾ ਜਗਰਾਓਂ ਅਤੇ ਉਮੀਦਵਾਰ ਆਮ ਆਦਮੀ ਪਾਰਟੀ ਇਸ ਦੁੱਖ ਦੀ ਘੜੀ ਵਿੱਚ ਪਰਿਵਾਰ ਦੇ ਨਾਲ ਦੁੱਖ ਸਾਂਝਾ ਕਰਨ ਲਈ ਪਹੁੰਚੇ । ਇਸ ਸਮੇਂ ਪ੍ਰੈੱਸ ਕਲੱਬ ਦੇ ਪ੍ਰਧਾਨ ਰਣਜੀਤ ਸਿੰਘ ਰਾਣਾ ਅਤੇ ਉਨ੍ਹਾਂ ਦੀ ਸਮੁੱਚੀ ਟੀਮ ਇਲਾਕੇ ਭਰ ਤੋਂ ਪੰਚ ਸਰਪੰਚ ਅਤੇ ਹੋਰ ਸਤਿਕਾਰਯੋਗ ਸ਼ਖ਼ਸੀਅਤਾਂ ਨੇ ਇਸ ਦੁੱਖ ਦੀ ਘੜੀ ਵਿੱਚ ਪਰਿਵਾਰ ਦੇ ਨਾਲ ਹਮਦਰਦੀ ਪ੍ਰਗਟਾਉਂਦਿਆਂ ਦੁੱਖ ਦਾ ਪ੍ਰਗਟਾਵਾ ਕੀਤਾ ।

ਵੋਟ ਪਾ ਕੇ ਲਾੜਾ ਚੜ੍ਹਿਆ ਬਰਾਤ

ਹਠੂਰ,20,ਫਰਵਰੀ-(ਕੌਸਲ ਮੱਲ੍ਹਾ)-ਪਿੰਡ ਮੱਲ੍ਹਾ ਦਾ ਨੌਜਵਾਨ ਵੋਟ ਪਾ ਕੇ ਚੜ੍ਹਿਆ ਬਰਾਤ,ਇਸ ਸਬੰਧੀ ਗੱਲਬਾਤ ਕਰਦਿਆ ਲਾੜਾ ਬਣਿਆ ਪਰਮਿੰਦਰ ਸਿੰਘ ਸਿੱਧੂ ਪੁੱਤਰ ਸੱਤਪਾਲ ਸਿੰਘ ਮੱਲ੍ਹਾ ਨੇ ਦੱਸਿਆ ਕਿ ਅੱਜ ਮੈਂ ਪਹਿਲੀ ਵਾਰ ਆਪਣੀ ਵੋਟ ਪਾਈ ਹੈ ਅਤੇ ਮੈ ਆਪਣਾ ਮੌਲਿਕ ਅਧਿਕਾਰ ਦੀ ਵਰਤੋ ਕਰਦਿਆ ਸਵੇਰੇ ਅੱਠ ਵੱਜ ਕੇ ਪੰਜ ਮਿੰਟ ਤੇ ਆਪਣੇ ਮਨਪਸੰਦੀ ਦੇ ਉਮੀਦਵਾਰ ਨੂੰ ਵੋਟ ਪਾਈ ਹੈ।ਉਨ੍ਹਾ ਦੱਸਿਆ ਕਿ ਪਹਿਲੀ ਵਾਰ ਵੋਟ ਪਾਉਣ ਤੇ ਚੋਣ ਅਧਿਕਾਰੀਆ ਨੇ ਮੈਨੂੰ ਪ੍ਰਸ਼ੰਸਾ ਪੱਤਰ ਦੇ ਕੇ ਸਨਮਾਨਿਤ ਕੀਤਾ।ਜਿਸ ਕਰਕੇ ਮੈ ਉਨ੍ਹਾ ਦਾ ਧੰਨਵਾਦ ਕਰਦਾ ਹਾਂ।ਉਨ੍ਹਾ ਦੱਸਿਆ ਕਿ ਬਰਾਤ ਵਿਚ ਸਿਰਫ 13 ਵਿਅਕਤੀ ਹੀ ਜਾ ਰਹੇ ਹਨ ਅਤੇ ਇਹ ਵਿਆਹ ਸਾਦੇ ਢੰਗ ਨਾਲ ਕੀਤਾ ਗਿਆ ਹੈ।ਉਨ੍ਹਾ ਸਮੂਹ ਵੋਟਰਾ ਨੂੰ ਅਪੀਲ ਕੀਤੀ ਕਿ ਸਾਨੂੰ ਆਉਣ ਵਾਲੀ ਨਵੀ ਸਰਕਾਰ ਲਈ ਵੋਟ ਦੀ ਜਰੂਰ ਵਰਤੋ ਕਰਨੀ ਚਾਹੀਦੀ ਹੈ ਤਾਂ ਜੋ ਅਸੀਂ ਆਪਣੇ ਮਨਪਸੰਦ ਦੀ ਸਰਕਾਰ ਬਣਾ ਸਕੀਏ।ਇਸ ਮੌਕੇ ਉਨ੍ਹਾਂ ਨਾਲ ਜਸਵੰਤ ਸਿੰਘ,ਜਗਦੇਵ ਸਿੰਘ,ਜਗਸੀਰ ਸਿੰਘ,ਭਾਈ ਅਮਰਜੀਤ ਸਿੰਘ ਖਾਲਸਾ,ਗੁਰਬਚਨ ਸਿੰਘ,ਗੁਰਚਰਨ ਸਿੰਘ,ਠੇਕੇਦਾਰ ਅਮਰਜੀਤ ਸਿੰਘ,ਪ੍ਰੀਤ ਸਟੂਡੀਓ,ਜਗਦੀਸ਼ ਸਿੰਘ,ਬਲਜੀਤ ਕੌਰ,ਸਨਦੀਪ ਕੌਰ,ਕੁਲਦੀਪ ਕੌਰ ਆਦਿ ਹਾਜ਼ਰ ਸਨ।
ਫੋਟੋ ਕੈਪਸ਼ਨ:- ਲਾੜਾ ਪਰਮਿੰਦਰ ਸਿੰਘ ਸਿੱਧੂ ਆਪਣਾ ਪ੍ਰਸ਼ੰਸਾ ਪੱਤਰ ਦਿਖਾਉਦਾ ਹੋਇਆ