ਪੰਜਾਬ

            ਮਹਿਲ ਕਲਾਂ/ਬਰਨਾਲਾ- 13 ਜੁਲਾਈ- (ਗੁਰਸੇਵਕ ਸਿੰਘ ਸੋਹੀ)- ਕੇਂਦਰ ਸਰਕਾਰ ਵੱਲੋਂ ਤਿੰਨ ਲਿਆਂਦੇ ਕਿਸਾਨ ਵਿਰੋਧੀ ਖੇਤੀ ਕਾਨੂੰਨਾਂ ਨੂੰ ਰੱਦ ਕਰਾਉਣ ਨੂੰ ਲੈ ਕੇ ਦਿੱਲੀ ਬਾਰਡਰ ਤੇ ਪਿੰਡ ਮਹਿਲ ਖੁਰਦ ਦੀ ਮਾਤਾ ਦਲੀਪ ਕੌਰ ਲਗਾਤਾਰ ਦਿੱਲੀ ਧਰਨੇ ਤੇ ਸੱਤ ਮਹੀਨੇ ਤੋਂ ਸੰਘਰਸ਼ ਵਿਚ ਬੈਠੀ ਹੋਈ ਅੱਜ ਵਾਪਸ ਪਿੰਡ ਪਰਤੀ ਉਨ੍ਹਾਂ ਨੂੰ  ਮਹਿਲ ਕਲਾਂ ਟੋਲ ਪਲਾਜ਼ੇ ਤੇ ਕਿਸਾਨ ਜਥੇਬੰਦੀਆਂ ਵੱਲੋਂ ਵਿਸ਼ੇਸ਼ ਸਨਮਾਨਤ ਕੀਤਾ ਗਿਆ। ਉਨ੍ਹਾਂ ਕਿਹਾ ਕਿ ਸਾਨੂੰ ਮਾਣ ਹੈ ਪੰਜਾਬ ਦੀਆਂ ਬੀਬੀਆਂ ਤੇ ਜੋ ਦਿਨ ਰਾਤ ਕਿਸਾਨੀ ਸੰਘਰਸ਼ ਵਿੱਚ ਵੱਧ ਚੜ੍ਹ ਕੇ ਹਿੱਸਾ ਪਾ ਰਹੀਆਂ ਹਨ । ਪ੍ਰੈੱਸ ਨਾਲ ਗੱਲਬਾਤ ਕਰਦੇ ਹੋਏ ਬੀਕੇਯੂ ਡਕੌਂਦਾ ਦੇ ਬਲਾਕ ਪ੍ਰਧਾਨ ਜਗਤਾਰ ਸਿੰਘ ਮੂੰਮ ਨੇ ਕਿਹਾ ਹੈ ਕਿ ਕੇਂਦਰ ਦੀ ਮੋਦੀ ਸਰਕਾਰ ਨੇ ਪਹਿਲਾਂ ਨੋਟਬੰਦੀ ਜੀਐੱਸਟੀ ਵਰਗੇ ਫ਼ੈਸਲਿਆਂ ਨੇ ਦੇਸ਼ ਦੇ ਹਰ ਵਰਗ ਨੂੰ ਆਰਥਕ ਪੱਖੋਂ ਬੁਰੀ ਤਰ੍ਹਾਂ ਝੰਜੋੜ ਕੇ ਰੱਖ ਦਿੱਤਾ ਉਨ੍ਹਾਂ ਕਿਹਾ ਕਿ ਕੇਂਦਰ ਸਰਕਾਰ ਕਿਸਾਨ ਹਿਤੈਸ਼ੀ ਨਹੀਂ ਬਲਕਿ ਕਿਸਾਨ ਵਿਰੋਧੀ ਸਾਬਤ ਹੋਈ ਅਤੇ ਤਿੰਨ ਲਿਆਂਦੇ ਕਿਸਾਨ ਵਿਰੋਧੀ ਖੇਤੀ ਕਾਲੇ ਕਾਨੂੰਨ ਨੂੰ ਕਿਸਾਨਾਂ ਤੇ ਜ਼ਬਰਦਸਤੀ ਥੋਪਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਅਤੇ ਜੇਕਰ ਕੇਂਦਰ ਸਰਕਾਰ ਨੇ ਛੇਤੀਂ ਕਿਸਾਨਾਂ ਦੀ ਗੱਲ ਨਾ ਸੁਣੀ ਤਾ ਸਰਕਾਰ ਨੂੰ ਹੋਰ ਤਿੱਖੇ ਸੰਘਰਸ਼ਾ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ ਤੇ  ਕੇਂਦਰ ਸਰਕਾਰ ਕਾਰਪੋਰੇਟ ਜਗਤ ਦੇ ਹੱਥਾਂ ਦੀ ਕਠਪੁੱਤਲੀ ਬਣ ਕੇ ਦੇਸ਼ ਦੇ ਕਿਸਾਨਾਂ ਨਾਲ ਧੋਖਾ ਕਰ ਰਹੀ ਹੈ। ਉਨ੍ਹਾਂ ਕੇਂਦਰ ਸਰਕਾਰ ਦੇ ਅੜੀਅਲ ਰਵੱਈਏ ਦੀ ਸਖ਼ਤ ਨਿਖੇਧੀ ਕਰਦਿਆਂ ਕਿਹਾ ਕਿ ਕੇਂਦਰ ਸਰਕਾਰ ਹੁਣ ਤਾਨਾਸ਼ਾਹੀ ਰੂਪ ਅਖ਼ਤਿਆਰ ਕਰ ਚੁੱਕੀ ਹੈ ਤੇ ਇਸਦਾ ਖਮਿਆਜ਼ਾ ਦੇਸ਼ ਦੀ ਜਨਤਾ ਨੂੰ ਜਾਨਾਂ ਦੇ ਕੇ ਭਰਨਾ ਪੈ ਰਿਹਾ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਕਿਸਾਨੀ ਘੋਲ ਦਾ ਮੁੱਖ ਮੰਤਵ ਨਵੇਂ ਖੇਤੀ ਸੁਧਾਰ ਕਾਨੂੰਨਾਂ ਨੂੰ ਰੱਦ ਕਰਵਾ ਕੇ ਐੱਮਐੱਸਪੀ ਨੂੰ ਕਾਨੂੰਨੀ ਜਾਮਾ ਪਵਾਉਣਾ ਹੈ ਤੇ ਖੇਤੀ ਕਾਨੂੰਨਾਂ ਦੀ ਵਾਪਸੀ ਤੱਕ ਕਿਸਾਨ ਸੰਘਰਸ਼ ਜਾਰੀ ਰੱਖਿਆ ਜਾਵੇਗਾ। ਉਨਾਂ ਕਿਹਾ ਕਿ ਕੇਂਦਰ ਸਰਕਾਰ ਵੱਲੋਂ ਜਦੋਂ ਤੱਕ ਤਿੰਨ ਕਾਲੇ ਕਾਨੂੰਨਾਂ ਨੂੰ ਖ਼ਾਰਜ ਕਰ ਕੇ ਐੱਮਐੱਸਪੀ ਨੂੰ ਪੂਰੇ ਦੇਸ਼ 'ਚ ਕਾਨੂੰਨੀ ਰੂਪ ਵਿੱਚ ਲਾਗੂ ਨਹੀਂ ਕੀਤਾ ਜਾਂਦਾ ਉਦੋਂ ਤੱਕ ਕਿਸਾਨ ਸੰਘਰਸ਼ ਜਾਰੀ ਰੱਖਿਆ ਜਾਵੇਗਾ। ਅਖੀਰ ਦੇ ਵਿੱਚ ਉਨ੍ਹਾਂ ਸਮੂਹ ਪੰਜਾਬ ਦੀਆਂ ਬੀਬੀਆਂ ਨੂੰ ਮਾਤਾ ਦਲੀਪ ਕੌਰ ਦੀ ਤਰ੍ਹਾਂ ਆਪਣੇ ਹੱਕਾਂ ਦੀ ਪ੍ਰਾਪਤੀ ਲਈ ਕਾਫ਼ਲੇ ਬੰਨ੍ਹ ਕੇ ਦਿੱਲੀ ਕਿਸਾਨ ਅੰਦੋਲਨ ਚ ਸ਼ਮੂਲੀਅਤ ਕਰਨ ਦੀ ਅਪੀਲ ਕੀਤੀ । ਇਸ ਸਮੇਂ ਉਨ੍ਹਾਂ ਨਾਲ ਜਗਰਾਜ ਸਿੰਘ, ਸਟੇਜ ਸੈਕਟਰੀ ਮਾਸਟਰ ਗੁਰਮੇਲ ਸਿੰਘ, ਅਜਮੇਰ ਮਹਿਲ ਕਲਾਂ, ਮਲਕੀਤ ਸਿੰਘ ਮਹਿਲ ਕਲਾਂ ਹਾਜ਼ਰ ਸਨ।

ਜਗਰਾਉਂ ਜੁਲਾਈ 2021(ਕੁਲਦੀਪ ਸਿੰਘ ਕੋਮਲ ਮੋਹਿਤ ਗੋਇਲ)
ਅੱਜ ਨਗਰ ਕੌਂਸਲ ਜਗਰਾਉਂ ਵਲੋਂ ਮਾਣਯੋਗ ਪ੍ਰਧਾਨ ਜਤਿੰਦਰ ਪਾਲ ਰਾਣਾ ਜੀ ਅਤੇ ਕਾਰਜ ਸਾਧਕ ਅਫ਼ਸਰ ਸ੍ਰੀ ਪ੍ਰਦੀਪ ਕੁਮਾਰ ਦੋਧਰੀਆ ਜੀ ਦੇ ਦਿਸ਼ਾ ਨਿਰਦੇਸ਼ਾਂ ਅਨੁਸਾਰ ਸੈਨਟਰੀ ਇੰਸਪੈਕਟਰ ਅਨਿਲ ਕੁਮਾਰ ਅਤੇ ਸੀ ਐਂਫ ਸੀਮਾ ਦੀ ਦੇਖ-ਰੇਖ ਵਿੱਚ ਪੰਜਾਬ ਸਰਕਾਰ ਦੀਆਂ ਹਦਾਇਤਾਂ ਅਨੁਸਾਰ ਅੱਜ 850ਅਖਬਾਰਾ ਦੇ ਲਿਫਾਫੇ ਮੋਟੀਵੇਟਰਾ ਦੇ ਸਹਿਯੋਗ ਨਾਲ ਗਰੀਬ ਪਰਿਵਾਰਾਂ ਦੇ ਲੋਕਾਂ ਨਾਲ ਮਿਲ ਕੇ ਅਖ਼ਬਾਰਾਂ ਤੋਂ ਲਿਫਾਫੇ ਬਣਾਏ ਗਏ ਅਤੇ ਇਸ ਦੋਰਾਨ ਇਹਨਾਂ ਪਰਿਵਾਰਾਂ ਨੂੰ ਅਖ਼ਬਾਰਾਂ ਤੋਂ ਲਿਫਾਫੇ ਬਣਾਉਣ ਦੀ ਸਿਖਲਾਈ ਦਿੱਤੀ ਗਈ, ਅਤੇ ਉਹਨਾਂ ਨੂੰ ਮੋਟੀਵੇਟ ਕੀਤਾ ਗਿਆ ਕਿ ਕਿਸ ਤਰ੍ਹਾਂ ਉਹ ਆਪਣੇ ਵਿਹਲੇ ਸਮੇਂ ਨੂੰ ਵਰਤੋ ਵਿੱਚ ਲਿਆ ਕੇ ਆਪਣੀ ਅਤੇ ਆਪਣੇ ਪਰਿਵਾਰ ਦੀ ਮਾਲੀ ਸਹਾਇਤਾ ਕਰ ਸਕਦੇ ਹਨ ਅਤੇ ਪਬਲਿਕ ਨੂੰ ਪਲਾਸਟਿਕ ਦੇ ਲਿਫਾਫੇ ਦੀ ਵਰਤੋਂ ਨਾਂ ਕਰਨ ਸਬੰਧੀ ਅਵੇਅਰ ਕੀਤਾ ਅਤੇ ਲੋਕਾਂ ਨੂੰ ਵੇਸਟ ਅਖ਼ਬਾਰਾਂ ਤੋਂ ਲਿਫਾਫੇ ਆਦਿ ਬਣਾ ਕੇ ਸੋਰਸ ਇਨਕਮ ਸੰਬਦੀ ਵੀ ਅਵੇਅਰ ਕੀਤਾ ਗਿਆ। ਇਸ ਮੌਕੇ ਮੋਟੀਵੇਟਰ ਰਮਨਦੀਪ ਕੌਰ, ਅਕਾਸ਼ ਦੋਧਰੀਆ,ਮਹੀਰ ਦੋਧਰੀਆ,ਰਵੀ ਕੁਮਾਰ, ਧਰਮਵੀਰ ਹਾਜ਼ਰ ਸਨ।

ਜ਼ਿਲ੍ਹਾ ਜਨਰਲ ਸਕੱਤਰ ਬਣੇ ਡਾਕਟਰ ਗੁਰਤੇਜ ਮਚਾਕੀ ........

ਮਹਿਲ ਕਲਾਂ/ਬਰਨਾਲਾ-ਜੁਲਾਈ- (ਗੁਰਸੇਵਕ ਸਿੰਘ ਸੋਹੀ)- ਮੈਡੀਕਲ ਪ੍ਰੈਕਟੀਸ਼ਨਜ ਐਸੋਸੀਏਸਨ ਜਿਲਾ ਫਰੀਦਕੋਟ ਦੇ ਪ੍ਰਧਾਨ ਸਵਰਗਵਾਸੀ ਡਾਕਟਰ ਜਗਜੀਤ ਸਿੰਘ ਖਾਲਸਾ ਦੀ ਮੌਤ ਹੋਣ ਤੋਂ ਬਾਅਦ ਜਿਲ੍ਹਾ ਫਰੀਦਕੋਟ ਦੇ ਪ੍ਰਧਾਨ ਦੇ ਅਹੁਦੇ ਨੂੰ ਪੂਰਾ ਕਰਨ ਲਈ ਮੈਡੀਕਲ ਪ੍ਰੈਕਟੀਸ਼ਨਜ ਐਸੋਸੀਏਸ਼ਨ ਦੀ ਉਚ ਪੱਧਰੀ ਕਮੇਟੀ ਵੱਲੋਂ ਸਮੂਹ ਬਲਾਕ ਪ੍ਰਧਾਨ, ਖਜਾਨਚੀ, ਜਰਨਲ ਸਕੱਤਰ ਅਤੇ ਜਿਲ੍ਹਾ ਡੈਲੀਗੇਟ ਦੀ ਸਹਿਮਤੀ ਨਾਲ ਸੇਰੇ ਪੰਜਾਬ ਢਾਬਾ ਕੋਟਕਪੂਰਾ ਵਿਖੇ ਡੈਲੀਗੇਟ ਇਜਲਾਸ ਕੀਤਾ ਗਿਆ । ਜਿਸ ਵਿੱਚ ਜਿਲ੍ਹਾ ਫਰੀਦਕੋਟ ਦੇ ਚੱਲ ਰਹੇ ਐਕਟਿੰਗ ਪ੍ਰਧਾਨ ਡਾਕਟਰ ਕੋਰ ਸਿੰਘ ਸੂਰਘੂਰੀ ਨੇ ਚੱਲ ਰਹੀ ਕਮੇਟੀ ਨੂੰ ਭੰਗ ਕਰਕੇ ਅਤੇ ਨਵੀਂ ਜਿਲ੍ਹਾ ਕਮੇਟੀ ਚੁਣਨ ਦੀ ਪ੍ਰਕਿਰਿਆ ਨੂੰ ਪੂਰਨ ਬਹੁਮਤ ਨਾਲ ਚੁਣਨ ਲਈ ਕਿਹਾ। ਜਿਸ ਵਿੱਚ ਮੈਡੀਕਲ ਪ੍ਰੈਕਟੀਸ਼ਨਰਜ ਐਸੋਸੀਏਸ਼ਨ ਬਲਾਕ ਫਰੀਦਕੋਟ ਦੇ ਪ੍ਰਧਾਨ ਡਾਕਟਰ ਰਸ਼ਪਾਲ ਸਿੰਘ ਸੰਧੂ ਨੂੰ ਜਿਲ੍ਹਾ ਫਰੀਦਕੋਟ ਦੇ ਪ੍ਰਧਾਨ ਦੇ ਅਹੁਦੇ ਲਈ ਨਿਵਾਜਿਆ ਗਿਆ ।ਬਲਾਕ ਸਾਦਿਕ ਦੇ ਪ੍ਰਧਾਨ ਡਾਕਟਰ ਗੁਰਤੇਜ ਮਚਾਕੀ ਨੂੰ ਜਿਲ੍ਹਾ ਫਰੀਦਕੋਟ ਦੇ ਜਨਰਲ ਸਕੱਤਰ ਦੇ ਅਹੁਦੇ ਲਈ ਚੁਣਿਆ ਗਿਆ। ਡਾਕਟਰ ਐਚ ਐਸ ਵੋਹਰਾ ਨੂੰ ਖਜਾਨਚੀ,ਡਾਕਟਰ ਕੋਰ ਸਿੰਘ ਸੂਰਘੂਰੀ ਨੂੰ ਚੇਅਰਮੈਨ,ਡਾਕਟਰ ਵੀਰਪਾਲ ਸਿੰਘ ਡੋਡ ਸੀਨੀਅਰ ਮੀਤ ਪ੍ਰਧਾਨ,ਡਾਕਟਰ ਗੁਰਸ਼ਰਨਜੀਤ ਸਿੰਘ ਪ੍ਰੈਸ ਸਕੱਤਰ,ਡਾਕਟਰ ਗੁਰਪਾਲ ਸਿੰਘ ਮੋੜ ਸਰਪ੍ਰਸਤ,ਡਾਕਟਰ ਵੈਦ ਬਗੀਚਾ ਸਿੰਘ ਮਨਚੰਦਾ ਸਰਪ੍ਰਸਤ,ਡਾਕਟਰ ਬਲਵਿੰਦਰ ਸਿੰਘ ਸਿਵਿਆਂ ਮੁੱਖ ਸਲਾਹਕਾਰ,ਡਾਕਟਰ ਗੁਰਦੀਪ ਸਿੰਘ ਬਰਾੜ ਮੀਤ ਪ੍ਰਧਾਨ, ਡਾਕਟਰ ਜਗਸੀਰ ਸਿੰਘ ਔਲਖ ਮੀਤ ਪ੍ਰਧਾਨ,ਡਾਕਟਰ ਰਕੇਸ਼ ਕੁਮਾਰ ਜੈਤੋ ਮੀਤ ਪ੍ਰਧਾਨ ਨੂੰ ਜਿਲ੍ਹਾ ਫਰੀਦਕੋਟ ਦੇ ਅਹੁਦਿਆਂ ਲਈ ਸਰਬਸੰਮਤੀ ਨਾਲ  ਚੁਣਿਆ ਗਿਆ ।ਅਖੀਰ ਵਿੱਚ ਨਵੀਂ ਚੁਣੀ ਗਈ ਜਿਲ੍ਹਾ ਕਮੇਟੀ ਵੱਲੋਂ ਆਪਣੇ ਅਹੁਦੇ ਕਬੂਲਦਿਆਂ ਸਾਰੇ ਮੈਂਬਰਾਂ ਨੂੰ ਵਿਸਵਾਸ ਦੁਆਇਆ ਕਿ ਉਹ ਆਪਣੀ ਜਥੇਬੰਦੀ ਲਈ ਪੂਰੀ ਤਨਦੇਹੀ ਨਾਲ ਕੰਮ ਕਰਨਗੇ ਅਤੇ ਜਲਦੀ ਹੀ ਮੈਡੀਕਲ ਪ੍ਰੈਕਟੀਸ਼ਨਰ ਐਸੋਸੀਏਸ਼ਨ ਦੀਆਂ ਲੰਮੇ ਸਮੇਂ ਤੋਂ ਲਟਕਦੀਆ ਆ ਰਹੀਆਂ ਮੰਗਾਂ ਨੂੰ ਮਨਵਾਉਣ ਲਈ ਸਰਕਾਰ ਵਿਰੁੱਧ ਸਘਰੰਸ਼ ਕਰਨ ਦਾ ਐਲਾਨ ਕਰਨਗੇ ।
ਇਹ ਚੋਣ ਡਾ ਜਗਦੇਵ ਚਹਿਲ, ਡਾ ਜਰਨੈਲ ਡੋਡ, ਡਾ ਜੀਤ ਪੱਖੀ, ਡਾ. ਇਕਬਾਲ ਸਿੰਘ, ਡਾ ਗੁਰਤੇਜ ਖਾਲਸਾ, ਡਾ ਜਗਸੀਰ ਕੋਟਕਪੂਰਾ, ਡਾ ਜਸਵਿੰਦਰ ਖੀਵਾ,ਡਾ ਕਸ਼ਮੀਰ ਸਿੰਘ ਜੈਤੋ,ਆਦਿ ਉਚ ਪੱਧਰੀ ਕਮੇਟੀ ਮੈਂਬਰਾਂ ਦੀ ਹਾਜ਼ਰੀ ਵਿੱਚ ਸਰਬਸੰਮਤੀ ਨਾਲ ਕੀਤੀ ਗਈ।ਇਸ ਨਵੀਂ ਚੁਣੀ ਗਈ ਕਮੇਟੀ ਨੂੰ ਸਮੂਹ ਬਲਾਕਾਂ ਦੇ ਪ੍ਰਧਾਨ ਅਤੇ ਮੈਂਬਰਾਂ ਵੱਲੋਂ ਵਧਾਈ ਦਿੱਤੀ ਜਿਨ੍ਹਾਂ ਡਾਕਟਰ ਗੁਰਨੈਬ ਸਿੰਘ ਮੱਲ੍ਹਾ ਬਲਾਕ ਪ੍ਰਧਾਨ ਬਾਜਾਖਾਨਾ,ਡਾਕਟਰ ਮੰਦਰ ਸਿੰਘ ਸੰਘਾ ਬਲਾਕ ਪ੍ਰਧਾਨ ਪੰਜਗਰਾਈਂ,ਡਾਕਟਰ ਸੁਖਚੈਨ ਸਿੰਘ ਸੰਧੂ ਬਲਾਕ ਪ੍ਰਧਾਨ ਕੋਟਕਪੂਰਾ,ਡਾਕਟਰ ਹਰਭਜਨ ਸਿੰਘ ਸੇਵੇਵਾਲਾ ਬਲਾਕ ਪ੍ਰਧਾਨ ਜੈਤੋ,ਡਾਕਟਰ ਅਮ੍ਰਿਤਵੀਰ ਸਿੰਘ ਸਿੱਧੂ ਬਲਾਕ ਪ੍ਰਧਾਨ ਖਾਰਾ,ਡਾਕਟਰ ਗੁਰਦੀਪ ਸਿੰਘ ਬਰਾੜ ਬਲਾਕ ਪ੍ਰਧਾਨ ਬਰਗਾੜੀ,ਬਲਾਕ ਸਾਦਿਕ ਦੇ ਸੀਨੀਅਰ ਮੀਤ ਪ੍ਰਧਾਨ ਡਾਕਟਰ ਸੁਰਜੀਤ ਸਿੰਘ ਸੇਰ ਸਿੰਘ ਵਾਲਾ ਅਤੇ ਮੀਤ ਪ੍ਰਧਾਨ ਡਾਕਟਰ ਭਾਰਤ ਭੂਸ਼ਨ ਜੀ,ਬਲਾਕ ਫਰੀਦਕੋਟ ਦੇ ਸੀਨੀਅਰ ਮੀਤ ਪ੍ਰਧਾਨ ਡਾਕਟਰ ਸੇਵਕ ਸਿੰਘ ਬਰਾੜ ਨੇ ਵਧਾਈ ਦਿੱਤੀ।

ਸਿੱਧਵਾਂ ਬੇਟ (ਜਸਮੇਲ ਗ਼ਾਲਿਬ)ਪੰਜਾਬ ਦੀ ਕੈਪਟਨ ਸਰਕਾਰ ਵੱਲੋਂ ਪਿੰਡਾਂ ਦੇ ਵਿਕਾਸ ਦੀਆਂ ਹਨ੍ਹੇਰੀਆਂ ਲਿਆ ਦਿੱਤੀਆਂ ਹਨ।ਜਿੱਥੇ ਪੰਜਾਬ ਦੀ ਸਰਕਾਰ ਵੱਲੋਂ ਪਿੰਡਾਂ ਦੇ ਵਿਕਾਸ ਕਰਵਾਏ ਜਾ ਰਹੇ ਹਨ  ਉਸੇ ਤਹਿਤ ਅਧੂਰੀਆਂ ਪਈਆਂ ਸੜਕਾਂ ਦੀ ਮੁਰੰਮਤ ਕੀਤੀ ਜਾ ਰਹੀ ਹੈ ਇਸੇ ਤਹਿਤ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਇੰਦਰਜੀਤ ਸਿੰਘ ਧਾਲੀਵਾਲ ਅਤੇ ਸਰਪੰਚ ਰੁਪਿੰਦਰ ਸਿੰਘ ਦੀ ਅਗਵਾਈ ਵਿੱਚ ਤਲਵੰਡੀ ਭੰਗੇਰੀਆਂ ਤੋਂ ਮੋਗਾ, ਤਲਵੰਡੀ ਭੰਗੇਰੀਆਂ ਤੋਂ   ਰੌਲੀ,ਅਤੇ ਤਲਵੰਡੀ ਭੰਗੇਰੀਆਂ ਤੋਂ ਬੁੱਗੀ ਪਰ ਬਾਈਪਾਸ ਸੜਕ ਦੀ ਮੁਰੰਮਤ ਕੀਤੀ ਗਈ।ਇਸ ਸਮੇਂ ਗੁਲਜ਼ਾਰ ਸਿੰਘ ਪ੍ਰਧਾਨ ਅਰਵਿੰਦਰ ਸਿੰਘ ਟੈਂਟ ਵਾਲੇ ਆਦਿ ਹਾਜ਼ਰ ਸਨ

ਆਪਣੀ ਜਿੰਗਦੀ ਦੇ 32 ਸਾਲ ਪੰਜਾਬੀ ਪੱਤਰਕਾਰੀ ਨੂੰ ਦੇਣ ਵਾਲਾ ਅਨਮੋਲ ਹੀਰਾ ਰਜਿੰਦਰਜੀਤ ਸਿੰਘ ਕਾਲਾਬੂਲਾ ਉਡੀਕਦਾ ਹੈ ਸੇਵਾ ਵਾਲੇ ਹੱਥ  
ਮਹਿਲ ਕਲਾਂ /ਬਰਨਾਲਾ - 11 ਜੁਲਾਈ- (ਗੁਰਸੇਵਕ ਸੋਹੀ)- ਰਜਿੰਦਰਜੀਤ ਸਿੰਘ ਕਾਲਾਬੂਲਾ ਦਾ ਜਨਮ 11 ਦਸੰਬਰ 1967 ਨੂੰ ਮਾਤਾ ਅਮਰਜੀਤ ਕੌਰ ਦੀ ਕੁੱਖੋਂ ਪਿਤਾ ਸ. ਸੁਰਜੀਤ ਸਿੰਘ ਦੇ ਘਰ ਪਿੰਡ ਕਾਲਾਬੂਲਾ ਜਿਲ੍ਹਾ ਸੰਗਰੂਰ ਵਿਖੇ ਹੋਇਆ, ਇੱਕ ਮਿਹਨਤਕਸ਼ ਪਰਿਵਾਰ ਵਿੱਚ ਜਨਮੇ ਰਜਿੰਦਰਜੀਤ ਸਿੰਘ ਨੇ ਮਜਦੂਰੀ ਕਰਦਿਆਂ -ਕਰਦਿਆਂ ਬਾਰਵੀਂ ਅਤੇ ਪੰਜਾਬੀ ਆਨਰਜ਼ ਤੱਕ ਅੱਖਰ ਗਿਆਨ ਹਾਸਿਲ ਕੀਤਾ, ਵਿਦਿਆਰਥੀ ਜੀਵਨ ਤੋਂ ਹੀ ਰਜਿੰਦਰਜੀਤ ਵਿੱਚ ਜਿੱਥੇ ਸ਼ਬਦ ਨਾਲ ਜੁੜਨ ਦੀ ਤਾਂਘ ਸੀ ਉੱਥੇ ਆਪਣੇ ਵਰਗੇ ਦੱਬੇ ਕੁਚਲੇ ਲੋਕਾਂ ਤੇ ਹੁੰਦੇ ਅੱਤਿਆਚਾਰ ਨੂੰ ਵੇਖ -ਸੁਣ ਕਿ ਉਸਦੇ ਦਿਲ ਵਿੱਚ ਉੱਠਦੇ ਵਲਵਲੇ ਉਸਨੂੰ ਆਪ ਮੁਹਾਰੇ ਹੀ ਲੋਕ ਘੋਲਾਂ ਦੇ ਪਿੜ ਤੱਕ ਲੈ ਤੁਰੇ ਜਿੱਥੇ ਉਸਨੇ ਡਟ ਕਿ ਸੱਚ ਤੇ ਪਹਿਰਾ ਦੇਣਾ ਸ਼ੁਰੂ ਕਰ ਦਿੱਤਾ,ਜੇਕਰ ਰਾਜਿੰਦਰਜੀਤ ਨੂੰ ਲੱਗੀ ਸਾਹਿਤਕ ਚੇਟਕ ਦੀ ਗੱਲ ਕਰੀਏ ਤਾਂ ਅੱਠਵੀਂ ਦੇ ਪੇਪਰਾਂ ਪਿੱਛੋਂ ਵੱਡੇ ਵੀਰ ਸਰਵਣ ਸਿੰਘ ਪਾਸੋਂ ਮਿਲਿਆ ਜਸਵੰਤ ਸਿੰਘ ਕੰਵਲ ਦਾ ਨਾਵਲ "ਜੰਗਲ ਦੇ ਸ਼ੇਰ" ਉਸ ਲਈ ਇਸ ਖੇਤਰ ਵਿੱਚ ਆਉਣ ਦਾ ਰਸਤਾ ਬਣਿਆ, ਉਸ ਪਿੱਛੋਂ ਕਾਲਾਬੂਲਾ ਕਾਮਰੇਡ ਤੇਜਾ ਸਿੰਘ ਪਾਸੋਂ ਲਗਾਤਾਰ ਕਿਤਾਬਾਂ ਲੈ ਕੇ ਪੜਨ ਲੱਗ ਪਿਆ । ਫੇਰ ਉਸਨੇ ਕੰਵਲ ਸਾਹਿਬ ਦੇ ਸਾਰੇ ਨਾਵਲ ਲੱਭ -ਲੱਭ ਕੇ ਪੜ੍ਹੇ ਅਤੇ ਕਈ ਵਾਰ ਦਿਹਾੜੀਆਂ ਕਰਕੇ ਕਮਾਏ ਪੈਸਿਆਂ ਨਾਲ ਖ਼ਰੀਦ ਕੇ ਪੜ੍ਹੇ। ਨੌਵੀਂ ਅਤੇ ਦਸਵੀਂ ਜਮਾਤ ਵਿੱਚ ਸਕੂਲ ਦੀ ਲਾਇਬਰੇਰੀ ਵਿੱਚੋਂ ਵੀ ਕਈ ਚੰਗੀਆਂ ਕਿਤਾਬਾਂ ਲੈ ਕੇ ਪੜ੍ਹੀਆਂ। ਦਸਵੀਂ ਜਮਾਤ ਪਾਸ ਕਰਨ ਤੱਕ ਹੁਣ ਕਿਤਾਬਾਂ ਰਾਜਿੰਦਰਜੀਤ ਦੀਆਂ ਸਾਥੀ ਬਣ ਚੁੱਕੀਆਂ ਸਨ। ਰਾਜਿੰਦਰਜੀਤ ਨੂੰ ਵੇਖਣ ਵਾਲੇ ਭਲੀਭਾਂਤ ਜਾਣਦੇ ਹਨ ਕਿ ਉਹ ਜਿੱਧਰ ਵੀ ਜਾਂਦਾ ਉਸ ਕੋਲ ਸਾਹਿਤਕ ਕਿਤਾਬਾਂ /ਮੈਗਜ਼ੀਨ ਜ਼ਰੂਰ ਹੁੰਦੇ। 1986 ਵਿੱਚ ਉਹ ਸਾਹਿਤ ਸਭਾ ਸ਼ੇਰਪੁਰ ਨਾਲ ਜੁੜ ਗਿਆ। ਇਸ ਦੌਰਾਨ ਸਾਹਿਤ ਸਭਾ ਦੇ ਮੈਂਬਰਾਂ ਦੇ ਸਾਂਝੇ ਕਾਵਿ ਸੰਗ੍ਰਹਿ 'ਉਡਾਰੀਆਂ' ਵਿੱਚ ਛਪੀਆਂ ਉਸਦੀਆਂ ਦੋ ਕਵਿਤਾਵਾਂ ਨਾਲ ਉਸਦਾ ਬਤੌਰ ਲੇਖਕ ਸਫ਼ਰ ਸ਼ੁਰੂ ਹੋਇਆ। ਸਮਾਜ ਸੇਵਾ ਵਿੱਚ ਵੱਡਾ ਨਾਮ ਅਤੇ ਅਖੌਤੀਆਂ ਵਿਰੁੱਧ ਚੱਟਾਨ ਵਾਂਗ ਡਟਣ ਵਾਲੇ ਇਸ ਬੇਬਾਕ ਇਸ ਸਖ਼ਸ਼ ਨੇ ਸ਼ੇਰਪੁਰ ਵਿੱਚ ਤਰਕਸ਼ੀਲ ਸੁਸਾਇਟੀ ਦੀ ਸਥਾਪਨਾ ਮੌਕੇ ਮੋਢੀ ਮੈਂਬਰਾਂ ਵਿਚ ਕੰਮ ਵੀ ਕੀਤਾ ਅਤੇ ਸਮਾਜ ਨੂੰ ਸਹੀ ਸੇਧ ਦੇਣ ਲਈ ਕਿੰਨੇ ਹੀ ਲੋਕਾਂ ਨਾਲ ਮੱਥਾ ਲਾਇਆ। ਰਾਜਿੰਦਰਜੀਤ ਅਸਲ ਵਿੱਚ ਸਿਰੜੀ ਵਿਅਕਤੀ ਹੈ ਉਸਨੇ 1988 ਦੌਰਾਨ ਪਿੰਡ ਕਾਲਾਬੂਲਾ ਵਿੱਚ ਦਸਮੇਸ਼ ਨੌਜਵਾਨ ਕਲੱਬ ਦੀ ਸਥਾਪਨਾ ਕੀਤੀ ਸਵਰਗੀ ਸਾਹਿਤਕਾਰ ਗੁਰਨਾਮ ਸਿੰਘ ਭੱਠਲ ਦੀ ਯਾਦ ਵਿੱਚ ਲਾਇਬਰੇਰੀ ਚਾਲੂ ਕਰਕੇ ਲਾਇਬਰੇਰੀ ਦੇ ਸੰਚਾਲਕ ਦੀ ਜ਼ਿੰਮੇਵਾਰੀ ਨਿਭਾਈ। ਉਹ ਇੱਕ ਪਾਠਕ ਵੀ ਹੈ, ਇਲਾਕੇ ਵਿੱਚ ਜਾ ਬਾਹਰ ਕੋਈ ਸਾਹਿਤਕ ਸਮਾਗਮ ਅਜਿਹਾ ਨਹੀਂ ਹੋਣਾ ਜਿੱਥੇ ਰਾਜਿੰਦਰਜੀਤ ਕਾਲਾਬੂਲਾ ਦਿਖਾਈ ਨਾ ਦੇਵੇ, ਲਿਖਾਰੀ ਸਭਾ ਬਰਨਾਲਾ ਵੱਲੋਂ 'ਇਕ ਦਹਾਕਾ ਹੋਰ'ਸਾਹਿਤ ਸਮਾਗਮ ਸਮੇਂ ਕਰਵਾਏ ਗਏ ਪੰਜਾਬ ਪੱਧਰੀ 'ਪਾਠਕ ਮੁਕਾਬਲੇ' ਵਿਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ, ਤੀਜਾ ਅਤੇ ਪੰਜਵਾਂ ਸਥਾਨ ਵੀ ਪਿੰਡ  ਕਾਲਾਬੂਲਾ ਦੇ ਹਿੱਸੇ ਆਇਆ। ਪ੍ਰਬੰਧਕਾਂ ਨੇ ਪੁਸਤਕਾਂ,ਸਰਟੀਫਿਕੇਟ ਅਤੇ ਸਨਮਾਨ ਚਿੰਨ੍ਹ ਦੇ ਕੇ ਨਿਵਾਜਿਆ।  2018 ਵਿੱਚ ਸ਼ਹੀਦ ਕਰਤਾਰ ਸਿੰਘ ਸਰਾਭਾ ਲਾਇਬਰੇਰੀ ਫਤਹਿਗੜ੍ਹ ਪੰਜਗਰਾਈਆਂ ਦੇ ਪ੍ਰਬੰਧਕਾਂ ਨੇ ਵੱਡੇ ਸਮਾਗਮ ਦੌਰਾਨ ਵਧੀਆ ਪਾਠਕ ਅਤੇ ਸਮਾਜ ਸੇਵੀ ਵਜੋਂ ਸਨਮਾਨਤ ਕੀਤਾ।  ਜੇ ਰਾਜਿੰਦਰਜੀਤ ਨੂੰ ਮਿਹਨਤ ਦਾ ਦੂਜਾ ਨਾਮ ਵੀ ਕਹਿ ਦਿਆਂ ਤਾਂ ਕੋਈ ਅਤਕਥਨੀ ਨਹੀਂ ਹੋਵੇਗੀ, ਸਾਈਕਲ ਤੇ ਮੋਟਰਸਾਈਕਲ ਤੇ ਸੈਂਕੜੇ ਕਿਲੋਮੀਟਰ ਦਾ ਰੋਜ਼ਾਨਾਂ ਦਾ ਸਫ਼ਰ ਉਸ ਲਈ ਆਮ ਜਹੀ ਗੱਲ ਸੀ, ਪਹਿਲਾਂ ਕੁਝ ਸਮਾਂ ਉਸਨੇ ਪਿੰਡਾਂ ਵਿਚ ਅਖ਼ਬਾਰਾਂ ਵੰਡਕੇ ਕਿਰਤ ਕੀਤੀ ਫਿਰ 1989 -90 ਦੌਰਾਨ ਰੋਜ਼ਾਨਾ 'ਚੜ੍ਹਦੀ ਕਲਾ' ਪਟਿਆਲਾ ਦਾ ਪੱਤਰਕਾਰ ਨਿਯੁਕਤ ਹੋਇਆ। 1993 ਵਿੱਚ 'ਅੱਜ ਦੀ ਆਵਾਜ਼' ਜਲੰਧਰ, 1996 'ਚ ਰੋਜ਼ਾਨਾ 'ਅਜੀਤ'ਜਲੰਧਰ, 2003 ਵਿੱਚ ਹਿੰਦ ਸਮਾਚਾਰ ਗਰੁੱਪ 'ਜਗ ਬਾਣੀ' ਜਲੰਧਰ, 2005 'ਚ 'ਦੇਸ਼ ਸੇਵਕ, 'ਹਮਦਰਦ' ਅਤੇ ਜਨ- ਜਾਗ੍ਰਿਤੀ'  2014 ਰੋਜ਼ਾਨਾ 'ਪੰਜਾਬੀ ਜਾਗਰਣ ' 2015 ਰੋਜ਼ਾਨਾ 'ਸਾਂਝੀ ਖ਼ਬਰ' ਲਈ ਕੰਮ ਕੀਤਾ ਅਤੇ ਅੱਜ ਤੱਕ ਪਿੱਛਲੇ ਸਾਲ 2020 ਤੋਂ ਰੋਜ਼ਾਨਾ 'ਚੜ੍ਹਦੀ ਕਲਾ' ਪਟਿਆਲਾ ਲਈ ਸ਼ੇਰਪੁਰ ਤੋਂ ਪੱਤਰਕਾਰ ਵਜੋਂ ਸੇਵਾਵਾਂ ਨਿਭਾ ਰਿਹਾ ਹੈ। ਰਾਜਿੰਦਰਜੀਤ ਦੀ ਜਿੰਦਗੀ ਵਿੱਚ ਬਹੁਤ ਹਨੇਰੀਆਂ ਆਈਆਂ, ਬੜੇ ਤੁਫ਼ਾਨਾਂ ਨਾਲ ਉਸਨੇ ਟੱਕਰ ਲਈ ਪਰ ਕਦੇ ਹਾਲਾਤਾਂ ਨਾਲ ਸਮਝੌਤਾ ਨਾ ਕਰਨ ਵਾਲੇ ਇਸ ਕਦੇ ਆਪਣੇ ਅਸੂਲ ਨਹੀਂ ਤੋੜੇ, ਸਾਲ 1995 ਤੋਂ 1999 ਤੱਕ ਉਹ ਬਲਾਕ ਸਾਖਰਤਾ ਸੰਮਤੀ ਸ਼ੇਰਪੁਰ ਦਾ ਕੋਆਰਡੀਨੇਟਰ, ਪਿੰਡ ਦੀ ਪੰਚਾਇਤ ਦਾ ਮੈਂਬਰ ਅਤੇ ਫਿਰ ਪੰਚਾਇਤ ਸੰਮਤੀ ਸ਼ੇਰਪੁਰ ਦਾ ਮੈਂਬਰ ਵੀ ਰਿਹਾ। ਸਾਲ 2005 ਵਿੱਚ ਸਮਾਜ ਸੇਵੀ ਸੰਸਥਾ ਸਮਾਜ ਭਲਾਈ ਮੰਚ ਸ਼ੇਰਪੁਰ  ਦੀ ਸਥਾਪਨਾ ਕੀਤੀ ਤੇ ਇਸ ਸੰਸਥਾ ਰਾਹੀਂ ਹਜ਼ਾਰਾਂ ਪੇਂਡੂ ਲੜਕੀਆਂ ਅਤੇ ਔਰਤਾਂ ਨੂੰ ਕਿੱਤਾ ਸਿਖਲਾਈ ਅਤੇ ਅੱਖਰ -ਗਿਆਨ ਦੇਕੇ ਆਤਮ- ਨਿਰਭਰ ਕੀਤਾ। ਉਹ ਨਸ਼ਿਆਂ ਖਿਲਾਫ਼ ਨੰਗੇ ਪੈਰੀ ਪਿੰਡ -ਪਿੰਡ ਤੁਰਿਆ, ਪਿੰਡ -ਪਿੰਡ ਜਾ ਕੇ ਉਸਨੇ ਨਸ਼ਿਆਂ ਅਤੇ ਆਤਮ ਹੱਤਿਆਵਾਂ ਵਿਰੁਧ ਹੋਕਾ ਦਿੱਤਾ। ਰਾਜਿੰਦਰਜੀਤ ਦੀਆਂ ਇਹਨਾਂ ਮਾਣਮੱਤੀਆਂ ਸੇਵਾਵਾਂ ਬਦਲੇ 31 ਮਈ 2015 ਨੂੰ ਅੰਤਰਰਾਸ਼ਟਰੀ ਤੰਬਾਕੂ ਵਿਰੋਧੀ ਦਿਵਸ ਸਮੇਂ ਜਿਲ੍ਹਾ ਰੈੱਡ ਕਰਾਸ ਨਸ਼ਾ ਛੁਡਾਊ ਕੇਂਦਰ ਸੰਗਰੂਰ ਵਿਖੇ ਉਸ ਸਮੇਂ ਦੇ ਵਧੀਕ ਡਿਪਟੀ ਕਮਿਸ਼ਨਰ ਸ੍ਰ. ਉਪਕਾਰ ਸਿੰਘ ਨੇ ਸਨਮਾਨਿਤ ਕੀਤਾ। ਅੱਜ ਵੀ ਸੰਸਥਾ ਸਮਾਜ ਭਲਾਈ ਮੰਚ ਸਿਹਤ ਸਿੱਖਿਆ ਅਤੇ ਵਾਤਾਵਰਨ ਦੇ ਖੇਤਰ ਵਿਚ ਵਿਲੱਖਣ ਪ੍ਰਾਪਤੀਆਂ ਕਰ ਰਹੀ ਹੈ।ਕੁਦਰਤ -ਮਾਨਵ ਕੇਂਦਰਿਤ ਲੋਕ ਲਹਿਰ ਅਤੇ 'ਪੰਛੀ ਪਿਆਰੇ' ਮੁਹਿੰਮ ਵਿੱਚ ਵੀ ਸਰਗਰਮੀ ਨਾਲ ਕੰਮ ਕਰਨ ਵਾਲੇ ਇਸ ਮਹਾਨ ਸਖ਼ਸ਼ ਨੂੰ ਹੁਣ ਗੁਰਦਿਆਂ ਦੀ ਨਾ ਮੁਰਾਦ ਬਿਮਾਰੀ ਨੇ ਇਸ ਕਦਰ ਜਕੜ ਲਿਆ ਹੈ ਕਿ ਉਹ ਨਾ ਚਾਹੁੰਦੇ ਹੋਏ ਵੀ ਮੰਜੇ ਦਾ ਹੋ ਕਿ ਰਹਿ ਗਿਆ ਹੈ, ਮਹੀਨੇ ਵਿੱਚ ਕਈ ਕਈ ਦਿਨ ਹਸਪਤਾਲਾਂ ਵਿੱਚ ਲੰਘਣ ਲੱਗ ਪਏ ਹਨ ਆਪਣੇ ਜੀਵਨ ਦੇ ਕਰੀਬ 32 ਸਾਲ ਪੰਜਾਬੀ ਪੱਤਰਕਾਰੀ ਅਤੇ ਲੋਕ ਹਿੱਤਾਂ ਲਈ ਲਗਾਉਣ ਵਾਲੇ ਇਸ ਸਖ਼ਸ਼ ਨੂੰ ਸਾਂਭਣ ਦੀ ਲੋੜ ਹੈ ਕਿਉਂਕਿ ਸਮਾਜ ਦੇ ਉਹ ਲੋਕ ਜਿਹਨਾਂ ਦੀ ਕੋਈ ਆਵਾਜ਼ ਨਹੀਂ ਬਣਦਾ ਉਹਨਾਂ ਦੀ ਇੱਕੋ ਇੱਕ ਆਸ ਰਾਜਿੰਦਰਜੀਤ ਕਾਲਾਬੂਲਾ ਹੀ ਹੈ, ਪਰ ਇੱਕ ਮਿਹਨਤਕਸ਼ ਕਿਰਤੀ ਪਰਿਵਾਰ ਦੇ ਇਸ ਅਣਥੱਕ ਪੁੱਤਰ ਨੂੰ ਆਏ ਦਿਨ ਹਸਪਤਾਲਾਂ ਦੇ ਵੱਡੇ ਖਰਚਾਂ ਨੇ ਜਿਵੇੰ ਥਕਾ ਦਿੱਤਾ ਹੋਵੇ, ਅਤੇ ਉਹ ਆਪਣੇ ਹਮਦਰਦੀਆਂ ਦੀ ਰਾਹ ਦੇਖ ਰਿਹਾ ਹੋਵੇ, ਸਾਰੀ ਉਮਰ ਅਸੂਲਾਂ ਤੇ ਅੜਨ ਤੇ ਖੜਨ ਵਾਲੇ ਲੋਕ ਜਿੰਦਗੀ ਦੇ ਪਿਛਲੇ ਹਿੱਸੇ ਵੀ ਕਦੇ ਹਾਲਤਾਂ ਅੱਗੇ ਖੁਦ ਝੁਕਦੇ ਨਹੀਂ ਹੁੰਦੇ ਪਰ ਅਸੀਂ ਮਹਿਸੂਸ ਕਰਦੇ ਹਾਂ ਕਿ ਉਸਨੂੰ ਅੱਜ ਮਿੱਤਰਾਂ ਤੇ ਸਨੇਹੀਆਂ ਦੀ ਮਦਦ ਦੀ ਲੋੜ ਹੈ, ਚਲੋ ਇੱਕ ਲੋਕ ਯੋਧੇ ਦੀ ਮਦਦ ਲਈ ਇੱਕ ਕਦਮ ਪੁੱਟੀਏ ਤਾਂ ਜੋ ਉਹ ਤੰਦਰੁਸਤ ਹੋ ਕਿ ਫਿਰ ਤੋਂ ਲੋਕਾਂ ਦੀ ਉਮੀਦ ਤੇ ਖਰਾ ਉੱਤਰ ਸਕੇ

ਲੰਡਨ/ ਲੁਧਿਆਣਾ , 10 ਜੁਲਾਈ ( ਗਿਆਨੀ ਰਵਿੰਦਰਪਾਲ ਸਿੰਘ /  ਅਮਿਤ ਖੰਨਾ  )-

ਬਹੁਤ ਹੀ ਦੁਖਦਾਈ ਖ਼ਬਰ ਜਗਰਾਉਂ ਹਲਕੇ ਦੇ ਸਾਬਕਾ ਵਿਧਾਇਕ ਸ਼੍ਰੋਮਣੀ ਅਕਾਲੀ ਦਲ ਦੇ ਹਰਮਨ ਪਿਆਰੇ ਆਗੂ ਸਰਦਾਰ ਭਾਗ ਸਿੰਘ ਮੱਲ੍ਹਾ ਦੇ ਭਤੀਜੇ ਅਵਤਾਰ ਸਿੰਘ ਸਿੱਧੂ ਉਮਰ 68 ਪੁੱਤਰ ਜਗਸੀਰ ਸਿੰਘ ਦਾ ਅਚਾਨਕ ਦੇਹਾਂਤ ਹੋ ਗਿਆ । ਉਨ੍ਹਾਂ ਦੇ ਛੋਟੇ ਭਰਾ ਸਰਦਾਰ ਹਰਪਾਲ ਸਿੰਘ ਸਿੱਧੂ ਵਾਸੀ ਵਾਟਫੋਰਡ ਇੰਗਲੈਂਡ ਵੱਲੋਂ  ਮਿਲੀ ਜਾਣਕਾਰੀ ਅਨੁਸਾਰ  ਸਰਦਾਰ ਅਵਤਾਰ ਸਿੰਘ ਸਿੱਧੂ  ਦਾ ਅੰਤਮ ਸੰਸਕਾਰ 11 ਤਰੀਕ ਦਿਨ ਐਤਵਾਰ ਸਵੇਰੇ 9.30 ਵਜੇ ਪਿੰਡ ਮੱਲ੍ਹਾ ਜ਼ਿਲ੍ਹਾ ਲੁਧਿਆਣਾ ਵਿਖੇ ਹੋਵੇਗਾ । ਸਰਦਾਰ ਅਵਤਾਰ ਸਿੰਘ ਦੇ ਨੇੜਲੇ ਸਾਥੀਆਂ ਤੋਂ  ਮਿਲੀ ਜਾਣਕਾਰੀ ਅਨੁਸਾਰ ਬਚਪਨ ਤੋਂ ਲੱਗ ਕੇ ਅੱਜ ਤਕ ਸਰਦਾਰ ਅਵਤਾਰ ਸਿੰਘ ਬਹੁਤ ਹੀ ਮਿਲਾਪੜੇ ਸੁਭਾਅ ਦੇ ਅਤੇ ਛੋਟੀ ਉਮਰ ਵਿੱਚ ਕਬੱਡੀ ਫੁੱਟਬਾਲ ਅਤੇ ਹੋਰ ਗੇਮਾਂ ਨੂੰ ਬੜਾ ਪਿਆਰ ਕਰਨ ਵਾਲੇ ਇਕ ਬਹੁਤ ਹੀ ਸਮਝਦਾਰ ਪਰਿਵਾਰ ਦੀਆਂ ਕਦਰਾਂ ਕੀਮਤਾਂ ਨੂੰ ਜਾਣਨ ਵਾਲੇ ਇਨਸਾਨ ਸਨ  । ਇਸ ਦੁੱਖ ਦੀ ਘੜੀ ਵਿੱਚ ਪ੍ਰੈੱਸ ਰਾਹੀਂ ਪਰਿਵਾਰ ਨਾਲ ਦੁੱਖ ਸਾਂਝਾ ਕਰਨ ਵਾਲੇ ਵਿੱਚ ਸਾਬਕਾ ਮੰਤਰੀ ਜਥੇਦਾਰ ਤੋਤਾ ਸਿੰਘ ,  ਮੈਂਬਰ ਪਾਰਲੀਮੈਂਟ ਬਰਤਾਨੀਆ  ਤਨਮਨਜੀਤ ਸਿੰਘ ਢੇਸੀ ਸਲੋਹ UK, ਵਰਲਡ ਕੈਂਸਰ ਕੇਅਰ ਦੇ ਬਾਨੀ  ਡਾ ਕੁਲਵੰਤ ਸਿੰਘ ਧਾਲੀਵਾਲ UK , ਜਨਸ਼ਕਤੀ ਪੰਜਾਬ ਦੇ ਅਡੀਟਰ ਸੰਪਾਦਕ ਸ ਅਮਨਜੀਤ ਸਿੰਘ ਖਹਿਰਾ UK , ਗੁਰਦੁਆਰਾ ਸਿੰਘ ਸਭਾ ਸਾਊਥਾਲ ਦੇ ਮੁੱਖ ਸੇਵਾਦਾਰ ਸਰਦਾਰ ਗੁਰਮੇਲ ਸਿੰਘ ਮੱਲ੍ਹੀ UK ,  ਜਗਰਾਉਂ ਆੜ੍ਹਤੀਆ ਐਸੋਸੀਏਸ਼ਨ ਦੇ ਪ੍ਰਧਾਨ ਸੁਰਜੀਤ ਸਿੰਘ ਕਲੇਰ , ਸੈਕਟਰੀ ਜਗਜੀਤ ਸਿੰਘ ਸਿੱਧੂ  , ਸਾਬਕਾ ਚੇਅਰਮੈਨ ਸਰਦਾਰ ਸਵਰਨ ਸਿੰਘ ਤਿਹਾਡ਼ਾ , ਸਵਰਗੀ ਸਾਬਕਾ ਚੇਅਰਮੈਨ ਸਰਦਾਰ ਰਛਪਾਲ ਸਿੰਘ ਤਲਵਾੜਾ  , ਗਿਆਨੀ ਅਮਰੀਕ ਸਿੰਘ ਰਾਠੌਰ ਮਨਚੈਸਟਰ ਵਾਲੇ UK  , ਸਰਦਾਰ ਗੁਰਚਰਨ ਸਿੰਘ ਜੌਹਲ ਮਡਿਆਣੀ ਵਾਲੇ UK , ਸਰਦਾਰ ਅਮਰਜੀਤ ਸਿੰਘ ਕਮਾਲਪੁਰਾ UK  , ਸ ਬਲਦੇਵ ਸਿੰਘ ਖਹਿਰਾ ਲੋਧੀਵਾਲਾ UK , ਸ ਸੰਤੋਖ ਸਿੰਘ ਸਿੱੱਧੂ ਮੱਲ੍ਹੇਵਾਲੇ UK, ਬੇਟ ਇਲਾਕੇ ਦੇ ਅਨੇਕਾਂ  ਸਾਬਕਾ ਅਤੇ ਮੌਜੂਦਾ ਪੰਚਾਂ ਸਰਪੰਚਾਂ ਨੰਬਰਦਾਰਾਂ ਅਤੇ ਮੋਹਤਬਰ ਵਿਅਕਤੀ ਆਦਿ ਨੇ ਗੁਰੂ ਸਾਹਿਬ ਅੱਗੇ ਵਿਛੜੀ ਰੂਹ ਨੂੰ ਆਪਣੇ ਚਰਨਾਂ ਵਿਚ ਨਿਵਾਸ ਬਖਸ਼ਣ ਦੀ ਅਰਦਾਸ ਬੇਨਤੀ ਕੀਤੀ ।       

ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ 
-------------------------
ਜੇ ਤੂੰ ਸਭ ਜਾਣਦਾ ਏਂ, ਮੈਨੂੰ ਚੁੱਪ ਬਹਿਣ ਦੇ 
      ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ ।।
ਜੁਲਮਾਂ ਦੀ ਹੱਦ ਕਰ,ਭਾਂਵੇਂ ਰੱਜ-ਰੱਜ ਕੇ 
     ਖੋਤੀ ਆਉਣੀ ਬੌਹੜ ਥੱਲੇ,ਜਾਉ ਕਿੱਥੇ ਭੱਜ ਕੇ ।
ਆਉਂਦੇ ਨੇ ਤਰੀਕੇ ਬੜੇ ਸਾਨੂੰ ਹੱਕ ਲੈਣ ਦੇ
     ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ ।।
ਆਪਣੇ ਹੀ ਨੰਹੂ ਅੱਜ,ਤਨ ਜਾਣ ਛਿੱਲਦੇ 
     ਬਿਨਾਂ ਕੁਰਬਾਨੀਆਂ ਤੋਂ,ਹੱਕ ਕਿਉਂ ਨਾ ਮਿਲਦੇ ।
ਸਾਡੇ ਵਿੱਚ ਜਜ਼ਬੇ ਨੇ ਵਾਰ ਤੇਰਾ ਸਹਿਣ ਦੇ 
     ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ ।।
ਬਹਿ ਗਿਆ ਏਂ ਕਾਹਨੂੰ ਬੂਹੇ,ਅਕਲਾਂ ਦੇ ਭੇੜ ਕੇ 
     ਆਇਆ ਜੇ ਸੈਲਾਬ ਲੈਜੂ,ਸਭ ਕੁਝ ਰੇੜ ਕੇ ।
ਠੰਢੀਆਂ ਹਵਾਵਾਂ 'ਚੋਂ' ਤੂਫਾਨ ਉੱਠ ਲੈਣ ਦੇ
      ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ ।।
ਫੇਰ ਕੋਈ ਬਣ ਕੇ,ਭਗਤ ਸਿੰਘ ਉੱਠ ਜੇ
     ਜਾਕੇ ਅਸੈਂਬਲੀ 'ਚ' ਬੰਬ ਹੀ ਨਾ ਸੁੱਟ ਦੇ ।
ਧਿਆਨ ਲਾਕੇ ਬੈਠੇ ਹਾਂ ਧਿਆਨ ਵਿੱਚ ਰਹਿਣ ਦੇ 
     ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ ।।
ਚੜ੍ਹਦੀ ਕਲਾ ਦੇ ਵਿੱਚ,ਰਹਿਣ ਸਦਾ ਹੱਸਦੇ 
     ਗੁਰੂਆਂ ਦੇ ਬੇਟੇ ਨਾ,ਮੈਦਾਨ ਵਿੱਚੋਂ ਭੱਜਦੇ ।
ਆਖਦਾ ਏ ਬਾਗੀ ਜਿਹੜਾ ਬਾਗੀ ਉਹਨੂੰ ਕਹਿਣ ਦੇ
     ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ ।।
ਅਸੀਂ ਸਾਰੇ ਇੱਕ ਜਰਾ,ਗੌਰ ਨਾਲ ਤੱਕ ਓਏ 
     'ਰਮੇਸ਼' ਅਤੇ 'ਜਾਨੂੰ' ਕਦੇ,ਹੋਣੇ ਨਇਓਂ ਵੱਖ ਓਏ ।
ਉੱਚੀਆਂ ਨਾ ਕਰ ਕੰਧਾਂ ਵੈਰਾਂ ਦੀਆਂ ਢਹਿਣ ਦੇ 
     ਮੇਰੀ ਤਲਵਾਰ ਨੂੰ ਮਿਆਨ ਵਿੱਚ ਰਹਿਣ ਦੇ ।।
                             ਲੇਖਕ-ਰਮੇਸ਼ ਕੁਮਾਰ ਜਾਨੂੰ 
                           ਫੋਨ ਨੰ:-98153-20080

ਡੂੰਘੇ ਜਜ਼ਬਾਤ
 
ਦਿਲ ਦੇ ਡੂੰਘੇ ਜਜ਼ਬਾਤ ਜੋ ਮੈਂ
ਇਨ੍ਹਾਂ ਕਾਗਜ਼ਾਂ ਉੱਤੇ ਉਕੇਰੇ ਨੇ
ਜੋ ਸ਼ਬਦ ਬਣ ਬਣ ਉੱਭਰੇ ਨੇ
ਕੁਝ ਤੇਰੇ ਨੇ ਤੇ ਕੁਝ ਮੇਰੇ ਨੇ

ਤੂੰ ਤਾਂ ਸ਼ਾਇਦ ਭੁੱਲ ਗਿਆ ਏਂ
ਪਰ ਦਿਲ 'ਚ ਤੇਰੇ ਹੀ ਡੇਰੇ ਨੇ
ਤੈਨੂੰ ਰਤਾ ਹੁਣ ਫ਼ਰਕ ਨਾ ਪੈਣਾ
ਮੈਨੂੰ ਤੇਰੇ ਹੀ ਖ਼ਿਆਲ ਚੁਫ਼ੇਰੇ ਨੇ

ਕਦੇ ਪੁੱਛ ਦੇਖੀਂ ਤਨਹਾਈਆਂ ਨੂੰ
ਤੰਗ ਕਰਦੇ ਜੋ ਫ਼ਿਕਰ ਬਥੇਰੇ ਨੇ
ਤੇਰੀ ਖੁਸ਼ੀ ਖ਼ਾਤਿਰ ਬਰਬਾਦ ਹੋਏ
ਦੇਖ ਸਾਡੇ ਵੀ ਤਾਂ ਕਿੱਡੇ ਜ਼ੇਰੇ ਨੇ

ਦਿਲ ਤੈਨੂੰ ਕਰਦਾ ਰਹਿਣਾ ਯਾਦ
ਸੁਪਨਿਆਂ 'ਚ ਵੀ ਤੇਰੇ ਚਿਹਰੇ ਨੇ
ਇਹ ਨਾ ਸੋਚੀਂ ਕਦੇ ਫ਼ੇਰ ਮਿਲਾਂਗੇ
'ਇੰਦਰ' ਜ਼ਿੰਦਗੀ ਦੇ ਪੰਧ ਲਮੇਰੇ ਨੇ

ਮੀਟਿੰਗ ਤੋਂ ਬਾਅਦ ਮਾਰਚ ਕਰਕੇ ਡਾ.ਅਮਰ ਸਿੰਘ ਮੈਂਬਰ ਲੋਕ ਸਭਾ ਦਾ ਘਿਰਾਓ ਕਰਕੇ ਦਿੱਤਾ ਜਾਵੇਗਾ ਮੰਗ ਪੱਤਰ......

ਉਘੇ ਪੱਤਰਕਾਰ ਡਾਕਟਰ ਮਿੱਠੂ ਮੁਹੰਮਦ ਜੀ ਮਹਿਲ ਕਲਾਂ ਸੀਨੀਅਰ ਮੀਤ ਪ੍ਰਧਾਨ ਪੰਜਾਬ ਕਰਨਗੇ ਉਦਘਾਟਨ......

ਮਹਿਲ ਕਲਾਂ/ਬਰਨਾਲਾ - 9 ਜੁਲਾਈ -(ਗੁਰਸੇਵਕ ਸਿੰਘ ਸੋਹੀ)- ਮੈਡੀਕਲ ਪ੍ਰੈਕਟੀਸ਼ਨਰ ਐਸੋਸੀਏਸ਼ਨ ( ਰਜਿ :295) ਪੰਜਾਬ ਦੇ ਬਲਾਕ ਪੱਖੋਵਾਲ ਜਿਲ੍ਹਾ ਲੁਧਿਆਣਾ ਵਲੋਂ ਦਿਲ, ਸੂਗਰ ਦੀਆਂ ਬਿਮਾਰੀਆਂ,ਅੱਖਾਂ ਦੀਆਂ ਬਿਮਾਰੀਆਂ ਦਾ ਮੁਫਤ ਮੁਫਤ ਮੈਡੀਕਲ ਕੈਂਪ ਗੁਰਦੁਆਰਾ ਟਾਹਲੀਆਣਾ ਸਾਹਿਬ ਰਾਏਕੋਟ ਵਿਖੇ 10 ਜੁਲਾਈ ਦਿਨ ਸਨਿਚਰਵਾਰ ਸਵੇਰੇ 10 ਵਜੇ  ਤੋਂ 1 ਵਜੇ ਤੱਕ ਲਗਾਇਆ ਜਾ ਰਿਹਾ।  ਜਿਸ ਵਿੱਚ ਮਰੀਜ਼ਾਂ ਦੀ ਮੁਫਤ ਈ ਸੀ ਜੀ ਸੂਗਰ ਤੇ ਅੱਖਾਂ ਦਾ ਚੈੱਕ ਅਪ ਕਰਕੇ ਮੁਫਤ ਦਵਾਈਆਂ ਵੀ ਦਿੱਤੀਆਂ ਜਾਣਗੀਆਂ। ਇਹ ਸੇਵਾਵਾਂ ਕੁਲਵੰਤ ਹਾਰਟ ਸੈਂਟਰ ਲੁਧਿਆਣਾ ਅਤੇ ਸਰਾਂ ਆਈ ਹਸਪਤਾਲ ਗੁੱਜਰਵਾਲ ਵਲੋਂ ਦਿੱਤੀਆਂ ਜਾਣਗੀਆਂ। ਇਸ ਮੈਗਾ ਮੈਡੀਕਲ ਕੈਂਪ ਦਾ ਉਦਘਾਟਨ ਉਘੇ ਪੱਤਰਕਾਰ ਡਾਕਟਰ ਮਿੱਠੂ ਮੁਹੰਮਦ ਜੀ ਮਹਿਲ ਕਲਾਂ ਸੀਨੀਅਰ ਮੀਤ ਪ੍ਰਧਾਨ ਪੰਜਾਬ ਆਪਣੇ ਕਰ ਕਮਲਾਂ ਨਾਲ ਕਰਨਗੇ ।
  ਇਹ ਜਾਣਕਾਰੀ ਦਿੰਦਿਆਂ ਡਾਕਟਰ ਜਸਵਿੰਦਰ ਕਾਲਖ ਜਰਨਲ ਸਕੱਤਰ ਮੈਡੀਕਲ ਪ੍ਰੈਕਟੀਸ਼ਨਰ ਪੰਜਾਬ ਅਤੇ ਡਾਕਟਰ ਭਗਵੰਤ ਸਿੰਘ ਜੀ ਬੜੂੰਦੀ ਜਿਲ੍ਹਾ ਵਾਈਸ ਚੇਅਰਮੈਨ, ਡਾਕਟਰ ਕੇਸਰ ਸਿੰਘ ਜੀ ਧਾਂਦਰਾ, ਡਾਕਟਰ ਬਿਕਰਮ ਦੇਵ ਘੁੰਗਰਾਣਾ ਜੀ ਨੇ ਕਿਹਾ ਕਿ ਇਸ ਮੌਕੇ ਸਮੂਹ ਮੈਡੀਕਲ ਪ੍ਰੈਕਟੀਸ਼ਨਰਾਂ ਦੇ ਭਲੇ ਲਈ ਅਰਦਾਸ ਵੀ ਕਰਵਾਈ ਜਾਵੇਗੀ ਅਤੇ ਮੁਫਤ  ਦਵਾਈਆਂ ਦਾ ਲੰਗਰ ਵੀ ਲਾਇਆ ਜਾਵੇਗਾ। ਉਹਨਾਂ ਅਪੀਲ ਕੀਤੀ ਕਿ ਇਸ ਮੁਫਤ ਮੈਡੀਕਲ ਕੈਂਪ ਦਾ ਵਧ ਤੋਂ  ਵਧ ਲਾਹਾ ਪ੍ਰਾਪਤ ਕਰੋ ।
    ਉਹਨਾਂ ਨਾਲ ਹੀ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਮੈਡੀਕਲ ਪ੍ਰੈਕਟੀਸ਼ਨਰ ਪੰਜਾਬ ਵਲੋਂ ਪੂਰੇ ਪੰਜਾਬ ਦੇ ਕਾਂਗਰਸੀ ਲੀਡਰਾਂ ਦੇ ਘਿਰਾਓ ਕਰਕੇ ਮੰਗ ਪੱਤਰ ਦਿੱਤੇ ਜਾ ਰਹੇ ਹਨ, ਉਸ ਲੜੀ ਤਹਿਤ ਹੀ ਮੈਡੀਕਲ ਕੈਂਪ ਤੇ ਮੀਟਿੰਗ ਤੋੰ ਬਾਅਦ ਮੋਟਰਸਾਈਕਲ ਮਾਰਚ ਕਰਕੇ ਲੋਕ ਸਭਾ ਮੈਂਬਰ ਡਾਕਟਰ ਅਮਰ ਸਿੰਘ ਜੀ ਨੂੰ ਆਪਣੀਆਂ ਮੰਗਾਂ ਪ੍ਰਤੀ ਮੰਗ ਪੱਤਰ ਦਿੱਤਾ ਜਾਵੇਗਾ ਅਤੇ ਆਪ ਦੇ ਐਮ ਐਲ ਏ ਸਰਦਾਰ ਜੱਗਾ ਸਿੰਘ ਜੀ ਨੂੰ ਵੀ ਮੰਗ ਪੱਤਰ ਦਿੱਤਾ ਜਾਵੇਗਾ।
 ਇਸ ਮੌਕੇ ਹੋਰਨਾਂ ਤੋ ਇਲਾਵਾ ਮੈਡਮ ਡਾਕਟਰ ਮਨਪ੍ਰੀਤ ਕੌਰ ਜੀ ਢੈਪਈ ਜਿਲ੍ਹਾ ਜਰਨਲ ਸਕੱਤਰ ਇਸਤਰੀ ਵਿੰਗ ਜਿਲ੍ਹਾ ਲੁਧਿਆਣਾ,ਮੈਡਮ ਡਾਕਟਰ ਰਮਨਦੀਪ ਕੌਰ ਜੀ ਬੱਲੋਵਾਲ ,ਬਲਾਕ ਕੈਸ਼ੀਅਰ ਮੈਡਮ ਡਾਕਟਰ ਜਸਵਿੰਦਰ ਕੌਰ ਬਾੜੇਵਾਲ, ਡਾਕਟਰ ਨਵਦੀਪ ਕੌਰ ਜੀ ਲਲਤੋਂ ਕਲਾਂ ,ਡਾਕਟਰ ਜਸਮੇਲ ਸਿੰਘ ਲਲਤੋਂ ਕਲਾਂ ਸੀਨੀਅਰ ਮੀਤ ਪ੍ਰਧਾਨ ਬਲਾਕ ਕਮੇਟੀ, ਡਾਕਟਰ ਹਰਜੀਤ ਸਿੰਘ ਭੈਣੀ ਅਰੋੜਾ, ਡਾਕਟਰ ਰਾਜੂ ਖਾਨ ਘੁਮਾਣ, ਡਾ ਮੇਵਾ ਸਿੰਘ ਜੀ ਤੁਗਾਹੇੜੀ, ਡਾ ਹਰਜਿੰਦਰ ਸਿੰਘ ,ਡਾ ਸਤਿੰਦਰ ਸਿੰਘ ਜੀ ਪੱਖੋਵਾਲ ,ਡਾ ਜਤਿੰਦਰ ਸਿੰਘ ਤਾਜਪੁਰ, ਡਾ ਸਰੂਪ ਸਿੰਘ ਪੱਖੋਵਾਲ ਆਦਿ ਹਾਜ਼ਰ ਸਨ।