ਜਗਰਾਉਂ , 21 ਅਪ੍ਰੈਲ (ਮਨਜਿੰਦਰ ਗਿੱਲ )ਅੱਜ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਡਕੌਂਦਾ ਦੇ ਜਿਲਾ ਪ੍ਰਧਾਨ ਮਰਹੂਮ ਹਰਦੀਪ ਸਿੰਘ ਗਾਲਬ ਦੇ ਬੇਵਕਤ ਚਲਾਣੇ ਤੇ ਪਰਿਵਾਰ ਅਤੇ ਜਿਲਾ ਕਮੇਟੀ ਨਾਲ ਦੁੱਖ ਸਾਂਝਾ ਕਰਨ ਪੰਹੁਚੇ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਡਕੌਂਦਾ ਦੇ ਸੂਬਾ ਪ੍ਰਧਾਨ ਬੂਟਾ ਸਿੰਘ ਬੁਰਜਗਿੱਲ ਵਿਸ਼ੇਸ਼ ਤੋਰ ਤੇ ਪਿੰਡ ਗਾਲਬ ਕਲਾਂ ਪੁੱਜੇ। ਇਸ ਸਮੇਂ ਜਿਲਾ ਲੁਧਿਆਣਾ ਅਧੀਨ ਸਾਰੀਆਂ ਬਲਾਕ ਕਮੇਟੀਆਂ ਚ ਸ਼ਾਮਲ ਸਰਗਰਮ ਆਗੂ ਹਾਜ਼ਰ ਸਨ। ਸੂਬਾ ਪ੍ਰਧਾਨ ਨੇ ਸ਼ਹੀਦ ਦੇ ਘਰ ਜਾ ਕੇ ਪਰਿਵਾਰ ਨਾਲ ਸਾਥੀ ਹਰਦੀਪ ਦੇ ਬੇਵਕਤ ਵਿਛੋੜੇ ਤੇ ਡੂੰਘੇ ਦੂਖ ਦਾ ਪ੍ਰਗਟਾਵਾ ਕਰਦਿਆਂ ਜਥੇਬੰਦੀ ਵਲੋਂ ਹਰ ਤਰਾਂ ਦੀ ਮਦਦ ਦਾ ਭਰੋਸਾ ਦਿੱਤਾ। ਉਨਾਂ ਕਿਹਾ ਕਿ ਕਿਉਂਕਿ ਹਰਦੀਪ ਸਿੰਘ ਕਿਸਾਨ ਅੰਦੋਲਨ ਦੋਰਾਨ ਦਿੱਲੀ ਵਿਖੇ ਗਲੇ ਦੇ ਕੈਂਸਰ ਦਾ ਸ਼ਿਕਾਰ ਹੋਇਆ ਸੀ ਜਿਸਨੂੰ ਬਚਾਉਣ ਲਈ ਜਥੇਬੰਦੀ , ਸਮਾਜਸੇਵੀ ਸੰਸਥਾਵਾਂ ਤੇ ਪਰਿਵਾਰ ਨੇ ਅੱਡੀ ਚੋਟੀ ਦਾ ਜ਼ੋਰ ਲਗਾਇਆ ਪਰ ਸਿਰਫ ਪੰਜਾਹ ਸਾਲ ਦੀ ਉਮਰ ਚ ਹਰਦੀਪ ਦਾ ਵਿਛੋੜਾ ਪਰਿਵਾਰ ਤੇ ਜਥੇਬੰਦੀ ਲਈ ਇਕ ਵੱਡਾ ਨਾ ਪੂਰਿਆ ਜਾ ਸਕਣ੍ਵ ਵਾਲਾ ਵੱਡਾ ਘਾਟਾ ਪਿਆ ਹੈ।ਊਨਾਂ ਦੋ ਦਹਾਕਿਆਂ ਤੋਂ ਕਿਸਾਨ ਲਹਿਰ ਲਈ ਕੁਲਵਕਤੀ ਵਜੋਂ ਕੰਮ ਕਰਦੇ ਹਰਦੀਪ ਨੂੰ ਕਿਸਾਨ ਲਹਿਰ ਦਾ ਸ਼ਹੀਦ ਕਰਾਰ ਦਿੱਤਾ।ਉਸ ਅਤਿਅੰਤ ਸਨਿਮਰ, ਸਿਰੜੀ ਸਾਥੀ ਦੀ ਅਗਵਾਈ ਵਿੱਚ ਜਥੇਬੰਦੀ ਦੇ ਵਿਕਾਸ ਚ ਪਾਏ ਯੋਗਦਾਨ ਨੂੰ ਆਉਣ ਵਾਲੇ ਲੰਮੇ ਸਮੇਂ ਲਈ ਯਾਦ ਰਖਿਆ ਜਾਵੇਗਾ। ਉਨਾਂ ਕਿਹਾ ਕਿ ਜਥੇਬੰਦੀ ਵਲੋਂ ਪਰਿਵਾਰ ਦੀ ਆਰਥਕ ਪੰਜ ਲੱਖ ਰੁਪਏ ਦੀ ਸਰਕਾਰੀ ਸਹਾਇਤਾ, ਪਰਿਵਾਰ ਦੇ ਯੋਗ ਜੀਅ ਲਈ ਸਰਕਾਰੀ ਨੋਕਰੀ, ਪਰਿਵਾਰ ਦੀ ਕਰਜ਼ਾ ਮੁਆਫ਼ੀ ਪੰਜਾਬ ਸਰਕਾਰ ਤੋਂ ਹਾਸਲ ਕਰਨ ਲਈ ਪਹਿਲ ਦੇ ਆਧਾਰ ਤੇ ਯਤਨ ਕੀਤੇ ਜਾਣਗੇ। ਜਥੇਬੰਦੀ ਪਰਿਵਾਰ ਦੇ ਹਰ ਦੁੱਖ ਸੁੱਖ ਚ ਪਹਿਲਾਂ ਵਾਂਗ ਨਾਲ ਖੜੀ ਰਹੇਗੀ। ਇਸ ਸਮੇਂ ਵਖ ਵਖ ਪਿੰਡਾਂ ਤੋਂ ਪੰਹੁਚੇ ਵੱਡੀ ਗਿਣਤੀ ਵਰਕਰਾਂ ਨਾਲ ਮੀਟਿੰਗ ਕਰਦਿਆਂ ਜਿਥੇ ਅਫਸੋਸ ਸਾਂਝਾ ਕੀਤਾ ਗਿਆ ਉਥੇ ਇਸ ਵਡੇ ਘਾਟੇ ਨੂੰ ਪੂਰਾ ਕਰਨ ਲਈ ਕਿਸਾਨ ਜਥੇਬੰਦੀ ਦੀ ਮਜ਼ਬੂਤੀ ਲਈ ਦਿਨ ਰਾਤ ਇਕ ਕਰਨ ਦਾ ਵਰਕਰਾਂ ਨੂੰ ਸੱਦਾ ਦਿੱਤਾ ਗਿਆ। ਇਸ ਸਮੇਂ ਭਰਵੀਂਂਮੀਟਿੰਗ ਨੂੰ ਸੰਬੋਧਨ ਕਰਦਿਆਂ ਉਨਾਂ ਕਿਸਾਨ ਵਰਕਰਾਂ ਨੂੰ ਐਮਐਸ ਪੀ ਦੀ ਪ੍ਰਾਪਤੀ, ਲਖੀਮਪੁਰੀ ਖੀਰੀ ਦੇ ਦੋਸ਼ੀਆਂ ਨੂੰ ਸਜ਼ਾਵਾਂ ਦਿਵਾਉਣ, ਫਸਲਾਂ ਦੇ ਖ਼ਰਾਬੇ ਦਾ ਮੁਆਵਜ਼ਾ ਹਾਸਲ ਕਰਨ , ਪੰਜਾਬ ਦੀ ਮਾਨ ਸਰਕਾਰ ਵਲੋਂ ਸੁਸਾਇਟੀਆਂ ਦੇ ਡਿਫਾਲਟਰ ਕਿਸਾਨਾਂ ਦੇ ਗਰਿਫਤਾਰੀ ਵਾਰੰਟ ਜਾਰੀ ਕਰਨ ਖਿਲਾਫ, ਰਹਿੰਦੇ ਸ਼ਹੀਦ ਕਿਸਾਨ ਪਰਿਵਾਰ ਲਈ ਮੁਆਵਜ਼ਾ ਤੇ ਨੋਕਰੀ ਹਾਸਲ ਕਰਨ, ਬਿਜਲੀ ਦੇ ਕੱਟ ਆਉਂਦੇ ਪੈਡੀ ਸੀਜ਼ਨ ਚ ਖਤਮ ਕਰਾਉਣ,ਕਣਕ ਦਾ ਝਾੜ ਘਟਣ ਕਾਰਨ ਤਿੰਨ ਸੋ ਰਪਏ ਪ੍ਰਤੀ ਕੁਇੰਟਲ ਬੋਨਸ, ਬਿਜਲੀ ਐਕਟ 2020 ਅਤੇ ਪਰਾਲੀ ਵਾਲਾ ਕਾਨੂੰਨ ਪੱਕੇ ਤੋਰ ਤੇ ਰੱਦ ਕਰਾਉਣ ਲਈ ਸੰਯੁਕਤ ਕਿਸਾਨ ਮੋਰਚੇ ਦੇ ਸੱਦੇ ਤੇ ਦੇਸ਼ ਭਰ ਚ ਕਿਸਾਨਾਂ ਨੇ ਪ੍ਰਧਾਨ ਮੰਤਰੀ ਦੇ ਨਾਂ ਮੰਗ ਪੱਤਰ ਭੇਜੇ ਹਨ। 24 ਅਪਰੈਲ ਨੂੰ ਕਿਸਾਨ ਜਥੇਬੰਦੀਆਂ ਦਾ ਵੱਡਾ ਵਫ਼ਦ ਲਖੀਮਪੁਰਖੀਰੀ ਦੇ ਪੀੜਤ ਪਰਿਵਾਰਾਂ ਨਾਲ ਅਤੇ ਹਮਲੇ ਦਾ ਸ਼ਿਕਾਰ ਗਵਾਹਾਂ ਨੂੰ ਨੈਤਿਕ ਬਲ ਦੇਣ ਅਤੇ ਦੋਸੀਆਂ ਨੁੰ ਸਜਾਵਾਂ ਦਿਵਾਉਣ ,ਕਿਸਾਨਾਂ ਤੇ ਦਰਜ ਝੂਠੇ ਪਰਚੇ ਰੱਦ ਕਰਾਉਣ ਲਈ ਯੋਗੀ ਹਕੂਮਤ ਤੇ ਦਬਾਅ ਬਨਾਉਣ ਜਾਂ ਰਿਹਾ ਹੈ। ਉਨਾਂ ਜੇਤੂ ਇਤਿਹਾਸਕ ਕਿਸਾਨ ਸੰਘਰਸ਼ ਦੇ ਹਾਂਦਰੂ ਪੱਖਾਂ ਦਾ ਜ਼ਿਕਰ ਕਰਦਿਆਂ ਅਤੇ ਘਾਟਾਂ ਕਮਜੋਰੀਆਂ ਦੀ ਨਿਗਾਹ ਸਾਨੀ ਕਰਦਿਆਂ ਜਥੇਬੰਦੀ ਨੂੰ ਮਜ਼ਬੂਤ ਕਰਨ ਦੀ ਲੋੜ ਤੇ ਜੋਰ ਦਿੱਤਾ। ਉਨਾਂ ਹਾੜੀ ਦੇ ਸੀਜਨ ਨਿਬੜਣ ਦੇ ਨਾਲ ਹੀ ਪਿੰਡਾਂ ਚ ਵੱਡੀ ਪੱਧਰ ਤੇ ਫੰਡ ਇਕੱਠਾ ਕਰਨ , ਸਾਰੀਆਂ ਇਕਾਈਆਂ ਚ ਮੈਂਬਰਸ਼ਿਪ ਮੁਹਿੰਮ ਜ਼ੋਰ ਸੋਰ ਨਾਲ ਚਲਾਉਣ ਦਾ ਸੱਦਾ ਦਿੱਤਾ। ਉਨਾਂ ਦਸਿਆ ਕਿ ਸੰਯੁਕਤ ਕਿਸਾਨ ਮੋਰਚੇ ਦੀ ਏਕਤਾ ਨੂੰ ਹਰ ਹਾਲ ਕਾਇਮ ਰਖਿਆ ਜਾਵੇਗਾ।24 ਅਪ੍ਰੈਲ ਦਿਨ ਐਤਵਾਰ ਨੂੰ ਸ਼ਹੀਦ ਹਰਦੀਪ ਸਿੰਘ ਗਾਲਬ ਦੇ ਪਿੰਡ ਗਾਲਬ ਕਲਾਂ ਚ ਕੀਤੇ ਜਾ ਰਹੇ ਸ਼ਰਧਾਂਜਲੀ ਸਮਾਗਮ ਦੀ ਵਿਉਂਤਬੰਦੀ ਕਰਦਿਆਂ ਵਰਕਰਾਂ ਦੀਆਂ ਡਿਉਟੀਆਂ ਨਿਸਚਤ ਕੀਤੀਆਂ ਗਈਆਂ। ਇਸ ਸਮੇਂ ਜਿਲਾ ਪ੍ਰਧਾਨ ਮਹਿੰਦਰ ਸਿੰਘ ਕਮਾਲਪੁਰਾ, ਜ਼ਿਲਾ ਸਕੱਤਰ ਇੰਦਰਜੀਤ ਸਿੰਘ ਧਾਲੀਵਾਲ, ਬਲਾਕ ਪ੍ਰਧਾਨ ਜਗਤਾਰ ਸਿੰਘ ਦੇਹੜਕਾ, ਬਲਾਕ ਪ੍ਰਧਾਨ ਸੁਖਵਿੰਦਰ ਸਿੰਘ ਹੰਬੜਾਂ, ਧਰਮ ਸਿੰਘ ਸੂਜਾਪੁਰ, ਜਗਜੀਤ ਸਿੰਘ ਕਲੇਰ, ਤਰਨਜੀਤ ਸਿੰਘ ਕੂਹਲੀ, ਹੈਪੀ ਸਹੋਲੀ , , ਰਾਜਬੀਰ ਘੁਡਾਣੀ, ਸੁਖਦੇਵ ਲਹਿਲ, ਸਰਬਜੀਤ ਧੂੜਕੋਟ, ਸਤਬੀਰ ਸਿੰਘ ਬੋਪਾਰਾਏ, ਬਲਕਾਰ ਸਿੰਘ , ਪਿੱਕਾ ਗਾਲਬ, ਜਗਨਨਾਥ ਸੰਘਰਾਓ ਆਦਿ ਆਗੂ ਹਾਜਰ ਸਨ।
