ਲੁਧਿਆਣਾ

ਲੁਧਿਆਣਾ,  ਮਾਰਚ ਗਿਆਸਪੁਰਾ ਦੀ ਸਮਰਾਟ ਕਲੋਨੀ ਦੀ ਇੱਕ ਦੁਕਾਨ ’ਤੇ ਮੋਬਾਈਲ ਰਿਚਾਰਜ ਕਰਵਾਉਣ ਗਈ ਨਾਬਾਲਗ ਨਾਲ ਦੁਕਾਨਦਾਰ ਨੇ ਦੁਕਾਨ ’ਚ ਹੀ ਜਬਰ ਜਨਾਹ ਕਰ ਦਿੱਤਾ। ਮੁਲਜ਼ਮ ਨੇ ਨਾਬਾਲਿਗ ਨੂੰ ਦੁਕਾਨ ’ਚ ਹੀ ਵਾੜ ਲਿਆ। ਜਦੋਂ ਨਾਬਾਲਗ ਦੀ ਮਾਂ ਉਸ ਨੂੰ ਲੱਭਦੀ ਹੋਈ ਦੁਕਾਨ ’ਤੇ ਪੁੱਜੀ ਤਾਂ ਲੋਕਾਂ ਨੇ ਦੱਸਿਆ ਕਿ ਦੁਕਾਨਦਾਰ ਉਸ ਨੂੰ ਅੰਦਰ ਲੈ ਕੇ ਗਿਆ ਹੈ। ਜਦੋਂ ਉਹ ਦੁਕਾਨ ਅੰਦਰ ਗਈ ਤਾਂ ਲੜਕੀ ਨੇ ਸਾਰੀ ਗ਼ੱਲ ਉਸ ਨੂੰ ਦੱਸੀ ਜਿਸ ਤੋਂ ਬਾਅਦ ਇਸ ਦੀ ਜਾਣਕਾਰੀ ਪੁਲੀਸ ਨੂੰ ਦਿੱਤੀ ਗਈ। ਸੂਚਨਾ ਮਿਲਣ ਤੋਂ ਬਾਅਦ ਥਾਣਾ ਸਾਹਨੇਵਾਲ ਦੀ ਪੁਲੀਸ ਮੌਕੇ ’ਤੇ ਪੁੱਜ ਗਈ। ਪੁਲੀਸ ਨੇ ਪੀੜਤ ਦੀ ਮਾਂ ਦੀ ਸ਼ਿਕਾਇਤ ’ਤੇ ਸਮਰਾਟ ਕਲੋਨੀ ਦੇ ਚੰਦਰ ਕੁਮਾਰ ਖਿਲਾਫ਼ ਜਬਰ ਜਨਾਹ ਦਾ ਕੇਸ ਦਰਜ ਕਰ ਲਿਆ ਹੈ। ਪੁਲੀਸ ਮੁਲਜ਼ਮ ਦੀ ਭਾਲ ’ਚ ਲੱਗੀ ਹੋਈ ਹੈ। ਲੜਕੀ ਦੀ ਮਾਂ ਵੱਲੋਂ ਦਿੱਤੀ ਸ਼ਿਕਾਇਤ ਅਨੁਸਾਰ ਉਸ ਦੀ ਲੜਕੀ ਇਲਾਕੇ ਦੇ ਹੀ ਇੱਕ ਸਕੂਲ ’ਚ ਪੜ੍ਹਾਈ ਕਰਦੀ ਹੈ। ਸੋਮਵਾਰ ਨੂੰ ਉਸ ਨੇ ਆਪਣੀ ਲੜਕੀ ਨੂੰ ਸ਼ਿਵ ਸ਼ਕਤੀ ਟੈਲੀਕਾਮ ’ਤੇ ਮੋਬਾਈਲ ਰਿਚਾਰਜ ਕਰਵਾਉਣ ਲਈ ਭੇਜਿਆ ਸੀ। ਦੁਕਾਨ ਮਾਲਕ ਨੇ ਉਸ ਦੀ ਲੜਕੀ ਨੂੰ ਦੁਕਾਨ ਦੇ ਅੰਦਰ ਹੀ ਬੁਲਾ ਲਿਆ ਤੇ ਜਬਰ ਜਨਾਹ ਕਰ ਦਿੱਤਾ। ਜਾਂਚ ਅਧਿਕਾਰੀ ਏਐਸਆਈ ਹਰਪਾਲ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮ ਹਾਲੇ ਫ਼ਰਾਰ ਹੈ। ਉਸ ਦੀ ਭਾਲ ਕੀਤੀ ਜਾ ਰਹੀ ਹੈ। ਪੀੜਤਾ ਦੀ ਮੈਡੀਕਲ ਜਾਂਚ ਕਰਵਾ ਦਿੱਤੀ ਗਈ ਹੈ ਤੇ ਸੈਂਪਲ ਜਾਂਚ ਲਈ ਭੇਜ ਦਿੱਤੇ ਗਏ ਹਨ।

ਸਿੱਧਵਾਂ ਬੇਟ(ਜਸਮੇਲ ਗਾਲਿਬ)ਸਮਾਜਿਕ ਸੁਰੱਖਿਆ ਇਸਤਰੀ ਤੇ ਬਾਲ ਵਿਕਾਸ ਵਿਭਾਗ ਵਲੋ ਬਲਾਕ ਸਿੱਧਵਾਂ ਬੇਟ ਡੀ.ਪੀ.ੳ ਕੁਲਵਿੰਦਰ ਕੌਰ ਤੇ ਸ਼ੁਪਰਵਾਈਜ਼ਰ ਪਰਮਜੀਤ ਕੌਰ ਦੀ ਅਗਵਾਈ ਵਿੱਚ ਪੋਸ਼ਣ ਦਿਵਸ ਅਭਿਆਨ ਪੰਦਰਵਾੜਾ ਪਰੋਗ੍ਰਾਮ 8 ਮਾਰਚ ਤੋ 22 ਮਾਰਚ ਤੱਕ ਮਨਾਇਆ ਜਾ ਰਿਹਾ ਹੈ।ਇਸ ਪੰਦਰਵਾੜਾ ਤਹਿਤ ਅੱਜ ਪਿੰਡ ਗਾਲਿਬ ਰਣ ਸਿੰਘ ਵਿੱਚ ਪੋਸ਼ਣ ਦਿਵਸ ਮਨਾਇਆ ਗਿਆ।ਇਸ ਮੌਕੇ ਸ਼ੁਪਰਵਾਈਜਰ ਪਰਮਜੀਤ ਕੌਰ ਨੇ ਗਰਭਵਤੀ ਔਰਤਾਂ ਨੂੰ ਆਪਣੀ ਸਿਹਤ ਦੀ ਸਾਂਭ-ਸੰਭਾਲ ਤੇ ਸੰਤੁਲਿਤ ਖੁਰਾਕ ਦੀ ਮਹੱਤਤਾ ਬਾਰੇ ਦੱਸਿਆ। ਉਨ੍ਹਾਂ ਕਿਹਾ ਕਿ ਗਰਭਵਤੀ ਔਰਤਾਂ ਲਈ ਸੰਤੁਲਿਤ ਖੁਰਾਕ ਖਾਣਾ ਬਹੁਤ ਜਰੂਰੀ ਹੈ ਜਿਸ ਮਾਂ ਅਤੇ ਬੱਚੇ ਦੋਵਾਂ ਦੀ ਸਿਹਤ ਠੀਕ ਰਹਿੰਦੀ ਹੈ।ਗਰਭਪਤੀ ਔਰਤਾਂ ਨੂੰ ਪੀ.ਐਮ.ਵਾਈ ਸਕੀਮ ਬਾਰੇ ਵੀ ਦਸਿਆ ਗਿਆ।ਇਸ ਸਮੇ ਸਰਪੰਚ ਪਰਮਜੀਤ,ਰਾਜਵੀਰ ਕੌਰ ਪੰਚ,ਸੁਰਿੰਦਰ ਕੌਰ ਪੰਚ,ਬਲਜੀਤ ਕੌਰ ਪੰਚ,ਨਿਰਮਲ ਸਿੰਘ ਪੰਚ,ਜਸਮੇਲ ਸਿੰਘ ਪੰਚ,ਹਰਮਿੰਦਰ ਸਿੰਘ ਪੰਚ,ਆਂਗਣਵਾੜੀ ਵਰਕਰ ਸਤਿਜੀਤ ਕੌਰ,ਆਸ਼ਾ ਵਰਕਰ ਕਾਂਤਾ ਰਾਣੀ ਆਦਿ ਹਾਜ਼ਰ ਸਨ

ਚੌਕੀਮਾਨ  ਮਾਰਚ (ਨਸੀਬ ਸਿੰਘ ਵਿਰਕ) ਧੰਨ-ਧੰਨ ਬਾਬਾ ਈਸ਼ਰ ਸਿੰਘ ਜੀ ਮਹਾਰਾਜ ਜੀ ਦੇ 106 ਸਾਲਾਂ ਸਮਰਪਿਤ 25ਵਾਂ ਸਲਾਨਾ ਸਮਾਗਮ ਅਤੇ ਮਹਾਨ ਨਗਰ ਕੀਰਤਨ ਠਾਠ ਨਾਨਕਸਰ ਵਿਰਕ ਵਿਖੇ 19 ਮਾਰਚ 2019 ਦਿਨ ਮੰਗਲਵਾਰ ਨੂੰ ਸਜਾਏ ਜਾਣਗੇ । ਇਸ ਸਮਾਗਮ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਸ੍ਰੀਮਾਨ ਸੰਤ ਬਾਬਾ ਬਲਵੀਰ ਸਿੰਘ ਜੀ ਵਿਰਕਾਂ ਵਾਲਿਆ ਨੇ ਦੱਸਿਆਂ ਕਿ ਹਰ ਸਾਲ ਦੀ ਤਰ੍ਹਾ ਇਸ ਸਾਲ ਵੀ ਬਾਬਾ ਜੀ ਦੀ ਦਰਸਾਈ ਮਰਿਯਾਦਾ ਅਨੁਸਾਰ ਸ੍ਰੀ ਗੁਰੂ ਗ੍ਰੰਥ ਜੀ ਦੀ ਛਤਰ ਛਾਇਆਂ ਹੇਠ ਤੁਕ-ਤੁਕ ਵਾਲੇ ਮਹਾਂ ਸਪੰਟ ਅਖੰਡ ਪਾਠ ਸਰਬੱਤ ਸੰਗਤਾ ਦੇ ਭਲੇ ਅਤੇ ਧੰਨ ਧੰਨ ਬਾਬਾ ਈਸ਼ਰ ਸਿੰਘ ਜੀ ਦੇ ਜਨਮ ਦਿਹਾੜੇ ਨੂੰ ਮੁੱਖ ਰੱਖਦੇ ਹੋਏ 23 ਫਰਵਰੀ 2019 ਦਿਨ ਸ਼ਨੀਵਾਰ ਨੂੰ ਪ੍ਰਾਆਰੰਭ ਕੀਤੇ ਗਏ ਸਨ । ਇੰਨਾ ਸਪੰਟ ਪਾਠਾਂ ਦੇ ਭੋਗ 19 ਮਾਰਚ ਦਿਨ ਮੰਗਲਵਾਰ ਨੂੰ ਪਾਉਣ ਉਪਰੰਤ ਰੈਣ ਸਬਾਈ ਕੀਰਤਨ ਵੀ ਸਜਾਏ ਜਾਣਗੇ ਪਰ ਇੰਨਾ ਦੇ ਭੋਗ ਤੋਂ ਪਹਿਲਾ ਵਿਸ਼ਾਲ ਨਗਰ ਕੀਰਤਨ ਸਜਾਇਆਂ ਜਾਵੇਗਾ ਜਿਸ ਦੀ ਆਰੰਭਤਾ ਸਵੇਰੇ 8 ਵਜੇ ਠਾਠ ਨਾਨਕਸਰ ਵਿਰਕ ਤੋਂ ਕੀਤੀ ਜਾਵੇਗੀ । ਇਹ ਵਿਸ਼ਾਲ ਨਗਰ ਕੀਤਰਨ ਵਿਰਕ,ਬਰਸਾਲ ,ਸੰਗਤਪੁਰਾ, ਗੋਰਸੀਆ , ਧੋਥੜ, ਸਵੱਦੀ ਕਲਾਂ , ਤਲਵੰਡੀ ਕਲਾਂ ਤਲਵੰਡੀ ਧਾਮ ਤੋਂ ਪਰੀਕਰਮਾ ਕਰਦਾ ਹੋਇਆ ਸ਼ਾਮ 7 ਵਜੇ ਠਾਠ ਨਾਨਕਸਰ ਵਿਰਕ ਪਰਤੇਗਾ । ਇਸ ਨਗਰ ਕੀਰਤਨ ਵਿੱਚ ਜਹਾਜ ਰਾਂਹੀ ਫੁੱਲ ਵਰਸਾਏ ਜਾਣਗੇ , ਗੱਤਕਾ ਪਾਰਟੀਆਂ , ਕਵੀਸਰੇ , ਢਾਡੀ ਜੱਥੇ , ਬਾਬਾ ਜੀ ਦੇ ਜੀਵਨ ਬਾਰੇ ਸੰਗਤਾ ਨੂੰ ਦੱਸਕੇ ਨਿਹਾਲ ਕਰਨਗੇ । ਸੰਤ ਬਾਬਾ ਬਲਵੀਰ ਸਿੰਘ ਜੀ ਨੇ ਇਲਾਕੇ ਭਰ ਦੀ ਸਮੂਹ ਸਾਧ ਸੰਗਤ ਨੂੰ ਵਿਸ਼ਾਲ ਨਗਰ ਕੀਰਤਨ ਅਤੇ ਸੰਤ ਸਮਗਾਮ ਚ ਹਾਜਰੀ ਭਰਦੇ ਹੋਏ ਆਪਣਾ ਜੀਵਨ ਸਫਲਾ ਕਰਨ ਦੀ ਅਪੀਲ ਕੀਤੀ । ਇਸ ਸਮੇਂ ਮੁੱਖ ਸੇਵਾਦਾਰ ਕਰਮਜੀਤ ਸਿੰਘ ਨੇ ਜਾਣਕਾਰੀ ਦਿੰਦੇ ਦੱਸਿਆ ਕਿ ਠਾਠ ਨਾਨਕਸਰ ਵਿਰਕ ਵਿਖੇ ਪੂਰਨਮਾਸ਼ੀ ਦਾ ਦਿਹਾੜਾ ਧੂਮ ਧਾਮ ਨਾਲ ਮਨਾਇਆ ਜਾਦਾ ਹੈ ਜਿਸ ਵਿੱਚ ਸੰਗਤ ਸਰਧਾ ਭਾਵਨਾ ਨਾਲ ਹਾਜਰੀ ਭਰਦੀ ਗੁਰੂ ਗ੍ਰੰਥ ਸਾਹਿਬ ਜੀ ਅੱਗੇ ਨਤਮਸਤਕ ਹੁੰਦੀ ਹੈ ।

ਸਿੱਧਵਾਂ ਬੇਟ(ਜਸਮੇਲ ਗਾਲਿਬ)ਪਿੰਡ ਜਨੇਤਪੁਰਾ ਵਿਖੇ ਸ਼ਹੀਦ ਹਰਪਾਲ ਸਿੰਘ ਜੌਹਲ ਦੀ ਯਾਦਗਾਰ ਕੋਲ ਬਣੇ ਸ਼ਰਾਬ ਦੇ ਠੇਕੇ ਨੂੰ ਲੈ ਕੇ ਪਿੰਡ ਵਾਸੀਆਂ ਵਲੋਂ ਵਿਰੋਧ ਸ਼ੁਰੂ ਹੋ ਗਿਆ ਹੈ ਅਤੇ ਇਸ ਨੂੰ ਚੁਕਵਾਉਣ ਲਈ ਗ੍ਰਾਮ ਪੰਚਾਇਤ ਤੇ ਸਫਾਈ ਗਰੁੱਪ ਦੀ ਅਗਵਾਈ ਵਿਚ ਪਿੰਡ ਵਾਸੀਆਂ ਇੱਕਠੇ ਹੋ ਕੇ ਰੋਸ ਪ੍ਰਦਰਸ਼ਨ ਕੀਤਾ।ਸ਼ਹੀਦ ਦੀ ਯਾਦਗਾਰ 'ਤੇ ਇੱਕਠੇ ਹੋਏ ਲੋਕਾਂ ਨੇ ਪ੍ਰਸ਼ਾਸ਼ਨ ਨੂੰ ਚਿਤਾਵਨੀ ਦਿੰਦਿਆਂ ਕਿਹਾ ਕਿ ਜੇਕਰ ਸ਼ਰਾਬ ਦਾ ਠੇਕਾ ਇੱਥੋਂ ਨਾ ਚੁੱਕਿਆ ਗਿਆ ਤਾਂ ਉਹ ਧਰਨਾ ਦੇਣ ਦੇ ਇਲਾਵਾ ਤਿੱਖ ਸੰਘਰਸ਼ ਵਿੱਢਣ ਲਈ ਮਜ਼ਬੂਰ ਹੋਣਗੇ।ਪਿੰਡ ਵਾਸੀਆਂ ਦਾ ਤਰਕ ਸੀ ਕਿ ਉਹ ਹਰ ਸਾਲ ਸ਼ਹੀਦ ਹਰਪਾਲ ਸਿੰਘ ਜੌਹਲ ਦੀ ਯਾਦਗਰ ਤੇ ਆਜ਼ਾਦੀ ਦਿਵਸ ਅਤੇ ਗਣਤੰਤਰ ਦਿਵਸ ਮੌਕੇ ਇੱਕਠੇ ਹੋ ਕੇ ਤਿਰੰਗਾਂ ਝੰਡਾ ਲਹਿਰਾਉਂਦੇ ਹਨ ਅਤੇ ਹੋਰ ਅਨੇਕਾਂ ਮੌਕਿਆਂ ਤੇ ਸ਼ਹੀਦ ਦੇ ਸਨਮਾਨ ਲਈ ਸਮਾਗਮ ਕਰਦੇ ਰਹਿੰਦੇ ਹਨ।ਸਫਾਈ ਗਰੁੱਪ ਦੇ ਅਹੁਦੇਦਾਰਾਂ ਨੇ ਇਸ ਸਮੇਂ ਕਿਹਾ ਕਿ ਆਮ ਤੋਰ 'ਤੇ ਲੋਕ ਠੇਕੇ ਤੋਂ ਸ਼ਰਾਬ ਲੈ ਕੇ ਸ਼ਹੀਦ ਦੀ ਯਾਦਗਰ ਕੋਲ ਬੈਠ ਕੇ ਪੀਣ ਲੱਗ ਜਾਂਦੇ ਹਨ ਤੇ ਗੰਦ ਪਾਉਂਦੇ ਹਨ,ਜਿਸ ਨਾਲ ਸ਼ਹੀਦ ਦਾ ਅਪਮਾਨ ਹੁੰਦਾ ਹੈ।ਇਸ ਸਮੇਂ ਇੱਕਠੇ ਹੋਏ ਲੋਕਾਂ ਨੇ ਪਲਿਸ ਚੌਕੀ ਗਾਲਿਬ ਕਲਾਂ ਵਿਖੇ ਠੇਕਾ ਚੁਕਵਾਉਣ ਦੀ ਦਰਖਾਸਤ ਦਿੱਤੀ,ਜਿਸ 'ਤੇ ਠੇਕੇਦਾਰਾਂ ਨੇ ਭਰੋਸਾ ਵਿਾਇਆ ਕਿ 31 ਮਾਰਚ ਤੱਕ ਉਕਤ ਜਗ੍ਹਾ ਤੋਂ ਠੇਕਾ ਚੁੱਕ ਲਿਆ ਜਾਵੇਗਾ ਤੇ ਦੁਬਾਰਾ ਇਸ ਥਾਂ 'ਤੇ ਠੇਕਾ ਨਹੀਂ ਖੋਲਿਆ ਜਾਵੇਗਾ।